EUPHORIA 13

13

“I pa hi cancer stage sang ber a ni tawh, nangmah hi a ngaihtuah ber che I nia, a damlai ngeia pasal neia thlir liam che a duh a ni” tih ri chu ka bengah a ri tluk tluk a, ka ral riai riai ni ber hian ka hria.

Ka zin ka haw tawh zawng zawngah rit phur luk chunga ka haw awmchhun a la ni hial awm e, ka room ah ka tawm ngawt ngawt a, he khawvelah hian ka pa tia koh tur nei lo mai tur anga ka inngaihtuah ringawt pawhin ka thinlung hi a na vawng vawng.

“A damloh pawh kan hriat hlauin a lo inthup tang tang a, kan huan enkawltute nupa hian an lo buaipui nasa tawh lutuk a lo nia” ka nu in a thiante hnena a tih ri chu ka hria a, a chhungten a natna kan hriatpui lo leh amahin a mal tuar tih ka hriat phei chuan ka inthiam lo ngawih ngawih. Kan nawm loh hlauin a theih tawk piah lam thlengin a bei thin. Kan naupanlai atang tawhin mi ta awtin kan awm ang tih a hlau a, a taksain a tuar thak thleng pawhin kan mangan hlau leh kan hrehawm hlauin a la awm tak tawk tawk a, chung ka ngaihtuahnate chuan min titliak hnawp a ni ber e.

“I pa vawiin tlaiah a rawn haw tawh dawn a, tuman mittui lo hmuh loh tur, chhel taka a awm theih nan paukhauh takin tupawh in lo awm tur a ni” chaw kan ei laiin ka nu in a ti a, U Mama te chhungin an rawn ei ve bawk.

Ka chawei pawh ka lem thei lo, ka tho chhuak a, ka thleng ka seng ta ringawt a, mittui tih tlak loh maw? Ka thei ve lul lo ang. Ka room ah bawk ka tlan lut leh a, ka pa nena kan thlalak chu ka thlir vang vang a.

“Bawihi, nangmah ber hi i pawimawh aw, ka pa in I hrehawm hmel a hmuh chuan chakna a nei thei lo ang” U Mama chuan a ti a, engtiklaiin nge a lo luh ka hre lo.

Ka naupanlai ata tawh ‘a pa fanu’ an tih khawpa ka pa nena inzui, min atchilh em emtu a ni a, ka nu aiin min buaipui nasa zawk tih tur khawp a ni a, ka collge kal thlengin engkima ka rawn ber leh min ngiahtuahtu chu ka pa hi a ni. Lehkhathiam lo zawk a ni chung pawhin ka nu aiin ka lehkhazir min vil nasa zawk a, ka pa sawi a nih chuan keipawhin thuawih takin ka zawm thin. Chung thil zawng zawng chu ka rillruah a rawn lang a, ka pa telloa hun hmang tura ka inngaihtuah ringawt pawhin ka a mai dawnin ka hria.

Nilengin ipik tunin ka awm a, ka nu leh u Mama chu ka pa hruai turin an chhuak tawh a, nizan lamah a lo luak chiam avangin an huan enkawltuten damdawiinah an lo dah a, ka nuin a riah pui a, tihfel ngai a awm avangin ka nu chu a rawn haw leh a, doctor te remtihnain vawiin tlaiah an rawn inhruai haw dawn a ni. 

Kawngpui lam chu ka thlir leh zauh thin a, huan atanga a rawn haw dawn tlaia ka hlim theihzia chu ka rilruah a rawn lang a, ka mittui bawk chu a rawn tla leh. Motor thawm ka hriat chuan ka tlan chhuak vat a, ka pa ka hmuh chuan ka tlan a, ka va kuah ta thlawp a, ka mittui tla tur chu dan tum hle mah ila ka thei lo, a luang zawih zawih a. Ka nu in min lo namsawn a tum a, nghet lehzualin ka pa chu ka kuah a.

“Ka dam leh dawn alawm naute” tiin ka beng bulah a phun sap a.

Chutianga rin loh taka thil a thlen atang chuan ka hlimna te hi a chuai zo vekin ka hria, Sawmzuala vang chauhin ka intihlim chawp hram hram. Engkimah min fuih thiamin min tawngtaisak nasa bawk a, ani awm lo se chuan ka na zual viauin ka ring Hetih lai mek hian Ruatdika pawh kan in lamah a rawn lang nasa a, ka be ngai lo a, biak chi ah min ngai lo nge min be bik hran lo. Ka nu hian eng enge a chah thin ka hriatpui lo a, a rawn khai lut hi chu ka hmu fo a, ka ngaihven peih lo.

Zan khat chu ka pa a zual deuh a, damdawiin lam panpui kan tum lah hian a duh ngai der  bawk si lo, a duh tawh loh ah chuan a nawr luih theih bawk si lo a, awmdan thiam a har thin khawp mai.

“Pa, damdawiinah chuan kal mai ila” ka ti a, chau zet hian min en a, nui hmel min hmuh chungin a lu a thing a.

“In bulah ka lo awm tam ngai lo lutuk kha ka inchhir, ka hun neih ang ang hi chu in zinga awm ka tum a ni” a ti a, tihngaihna kan hre tawh lo.

Sawmzuala pawh ka pa chanchin ka hrilh chuan a rawn lang ve vat a, ka room bathlar thlanglamah kan thu a, a darah ka lu ka nghat a, ka tap chu min nghak a ni ber.

“I pa hmuh lai chuan chhel takin I awm tlat dawn nia aw” tiin min fuih ve sauh sauh a, a harsa hret thin. 

Chutia ngawi renga kan awm lai chuan tukverh a rawn inhawng pawp a, ka nu a rawn lang thut. Sawmzuala dara ka lu nghata ka lo awm chu ka samah min rawn tham thut a, inrin na hman a awm lo.

“Pa te thichhawnga an leh reng laiin mipa I lo tawmpui a maw? Tiin a au ta tuar tuar a, kan chhungte chuan thawm hriain an rawn lut tuk tuk a.

“En teh u, mi zahna pawh nei miah loin tihian a room ah mipa a lo khawi a nih hi, chu pawh a pa thichhawnga a leh reng laiin”tiin min kawk a, U Feli chu rawn tlanin a nu chu hruai chhuah a tum a.

“Nu, lo kal phawt la, inbengdai phawt rawh” a ti a.

“Nang pawh kha, chiang takin ka hrilh tawh che kha, kan chhungkua hi min rawn hnaih tum tawh suh” tiin Sawmzuala chu a rawn kawk leh a, ka insum zo thlawt lo.

“Engtikahmah min pawtthen chuang lo ang, I duh ang angin ka awm dawn hek lo” ka ti a, ka thinrim lutuk chu ka sawi tum ang pawh ka sawi chhuak thei lo.

Kan boruak chu hrethiamin midang an chhuak tawh a, u Feli chuan ka nu chu a la vuan bet a, Sawmzuala chu ka bulah ngawi rengin a ding a, hnuai lam chu a melh tlat a, a ngaihtuahnaa awm tur ang chu ka hrethiam.

“I chhungte aiin khapa kha I thlang ang maw? Kal ta che, va zui ta che, I chhungte hi engahmah min ngai lo anih chuan engahmah kan ngai bik lo ang che” ati a.

“Aw le, ka hmangaih ber ka neih loh ai chuan he in hi chhuahsan ka duh daih zawk. Sawmzual, kal ang” tiin a banah ka kai a, step ah te chuan ka tlan thlak pui zawt zawt a. Kan chhungte ho chuan min melh thup tih ka hre reng, ka thinrim lutuk hian khua ka hmu thei bik lo. 

Kan kawta a taxi lo dingah chuan ka chuang lut a, ani pawh a rawn lut ve nghal a.

“Rin, inbengdai hram teh” tih pahin ka kut a rawn vuan a.

“Kal ang” tiin chiang zet hian ka melh a, ka mitmengah nawr luih chi ka ni lo tih a hre ve aniang, motor a tinung a, kan tlanchhuak ta a.

Khawi lamah nge kan kal pawh ka hre lo, kan mittui a hul phak a, ka nu huatnain ka khat. Ka pa erawh ka rilruah a awm reng, ka kalbo hlan hian lo awm ta lo se tihte ka ngaihtuah thleng vek, mahse, tuna ka nu laka chet ka lak loh chuan a rilru ka hneh thei ngaiin ka ring tawh si lo, hringnun hi a va han harsa tak em! 

Sawmzuala thianpa Rempuia inluahah kan kal a, kan pahniha min hmu chu a lo phawk deuh hru a, hmundangah inhmu ve fo tawh mah ila a inluah tak hi ka kal vawikhatna a ni. Engmah min zawt lo a, a lo titi bawrh bawrh a, ka pangngai chho ve tan dawnin ka hria.

“Chawhmeh ka han lei lawk ange aw, ka rei lo ang” tiin a chhuak a.Sawmzuala chuan thingpui lumin kan pahnih chuan kan in a, a hmel hmuh ka huphurh lutuk vangin kan in kan chhuahsan hnu khan ka la melh miah lo, ngam leh ngam lo hian ka va melh a, min lo melh vein a rawn nui sak a. Nichina kan ina thil thleng kha hria ang pawhin a awm tawh lo, hei hi a ni mak ka tih thin em em chu, engkim hi tawrh dan a thiam vek mai hi.

Thutthlengah chuan inngheng rial hian kan thu a, kan tawng tlem dun khawp mai. Ka kut chu a khal niap niap a, vawihnih vel chu a rawn thaw chhuak halh a, engmah ka sawi ngam si lo. A phone rawn rik chuan pawnah a va chhang a, a be rei vak lo. Rempuia nen an rawn inzui lut a, a chawhmeh rawn khai luh chu ka lo dan fel sak a. Chutia mahnia awm ta chu mipa nih bawk si chuan a chawhmeh dahna pawh chu a felfai vak lo, ka theih ang angin ka han remthat sak vel a. Anni pahnih erawh khunkhan takin an titi a, an tawng ri ka hre pha vak lo.

Ei rawng kan bawl a, Sawmzuala chu ka va en leh thin a, hlim luih a tum viau na in harsa chu ati deuh niin a lang. Chawhmeh ka chawh mawlh mawlh lai chuan kwngkhar chu an rawn kik a, Rempuia’n a lo hawng vat a. Tutenge tih en paha ka hawi chuan ka patea leh u Mama an lo ni.

“Rini, kan mualpho thui hmain rawn haw phawt rawh le” ka patea chuan a ti a, Sawmzuala ka lo melh daih thung.

“Ni e, ka pa a ngaihtuahawm bawk si a, hetianga nang I lo awm lehzel chuan a chauh zual phah lutuk ang” u Mama chuan a ti a.

Sawmzuala lamah ka kal phei a.

“Ka chhungte nen in lo bia amaw? Chuan hei hi I duhthlanna maw? “ ka aw chu a khur deuh dar dar a, ka thinrim luat tuk vangin.

“Rin, duhthlan tur ka nei lo a ni” a ti a, ka banah rawn vawn a tum a, ka lo paih sawn sak.

“Min hrilh ve thei lo mi? mawh? “ a awmah chuan a chum chawrh chawrh a, “Ka chhungte kalsan huam vekin ka thlang che a, mahse.. engmah.. engmah I ngam ve lo” ka mittui chu a tla zung zung a, “Ka pa damlo kalsan meuhin asin nang thlah ai che chuan tia ka zui che” ka mittui chu ka hru tawk a.

“Kal ang u le” tiin ka patea te lam chu ka hawi a, vawikhatmah ka hawi let lo.

In ka thlen chuan ka pa in min lo lam ngun tawh viau a ni awm e, an room ah a tlan lut nghal a. 

“Nichin khan a lam char char che a, tunah chuan damdawiin a chhawk leh rih a, a muhil a” u Feli chuan a lo ti a. 

Ka pa kutah chuan ka vuan a, min thlahlel em em tu kalsanin ka mipa hmangaih zui ka tum a, mahse, a tawp min thlenpui ngam ve lo tih chu ka rilruah rawn lang hmasa ber.

“Amahin thlahthlam lo ula, a chhuah dawn pawhin zui zel ang che u” tiin ka nu chuan ka unaute ho chu ka chungchangah thu a pe a, ka lo nuih suk. Min thlahthlam pawh tum se khawiah mah ka pa hi ka kalsan tawh lo ang.