EUPHORIA 14

14

U Tetea te nupa an rawn thleng a, Mimii ka hmu chu ka mittui a baw zawih. Engkim min hriatpuitu leh ka mangan lai bera ka rilrua awm hmasa ber a ni ziah a, ka paukhauhna kha thiahin a awm a, a bulah chuan ka insum thei thlawt lo.

“U Rin, lungngai miah suh aw, ka pa  pawh a tha leh em em ang” a ti a, an inneihte khan ka pa kha a phur berah a tang a, la inhrawn rei lo mah se Mimii pawhin a ngaina takzet tih ka hria.

Chaw ei turin ka pa chu ka chhuahsan a, a nihna takah chuan kalsan ka hreh ngawih ngawih. Mahse, ka chhungten min nawr luih nasat avangin chaw chu ka va bar ve a, ka ei hlei thei lo. Ka eikham veleh ka pa bulah bawk ka phei leh a, chhungkua kan inrawn nasa ve viau, damdawiin a kalpui duh viau mah ila amah berin a duh loh avangin kan tilui ta lo kha a nia, hriatthiam a har duh khawp mai. Ka phone chu ka han phawrh chhuak a, Sawmzuala miscall a lo awm nual. Min ngaihtuah ve ang tih chu ka hre reng, mahse, sawi dun awm miah loa min let tir vang hian ka lawm lo ngawih ngawih a, biak chakna pawh ka nei rih lo.

“Doctor nen kan inbe zo chiah a, damdawiin lama kalpui mai turin min rawn tia, inphur phei phawt mai ang u” ka patea chuan a ti a, tha kan ti tlang vek.

Damdawiin lamah zan khat kan riak tawh a, ka pa hmel cher kuam leh harh tha thei lo chu ka melh tlawk tlawk reng a, ka inrin loh laiin ka mittui a lo tla leh thin. Ka dara rawn vuantu chu ka han melh a, Ruatdika a lo ni. Ka pa damdawiin kan dah dawn tih a hriat atangin a buai berah a tang a, a motor in min dah phei a, nizan lamah pawh a buai tih ka hria, biak that harsa ka ti viau a, ka pa vang liau liau in ka hmu mawh duh lo lui.

“I nu in inbual turin rawn haw se, a duh leh zanah a riak leh anga ati che a” a tih chuan pawi ka ti vak lo. Inbual harh te ka duh, ipik churha hetia awm chu ka chau chhe mai dawnin ka hria.

U Mama te nupa in min thlak a, ka patea a haw tawh a, haw turin keipawh ka insiam a, Ruatdika chuan min nghak a, a rual a haw a ngai tih ka hriat chuan tlemin ka hreh ve deuh. Pawn kan thlen chuan Ruatdika chu a motor la chhuak turin a kal a, kawtah ka lo nghak a, pawn boruak chuan min tiharh deuh sawng sawngin ka hria. Van lam chu ka han hawi a, chhum dum pawl raih chuan beiseinate pawh min pe tharin ka hria. Ka dinna bulah motor a rawn ding a, ngawi rengin kawngkhar ka hawng a, luh tum pah chuan ka han hawi chhuak a, kan piah sirah Sawmzuala chu ka va hmu hlawl. Min lo en renga, ka va hmu tih a hriat chuan min rawn nuih ta sak a, chet lak ngaihna pawh hreloin ka ding ta reng a, kan hnunga motor rawn tlan chhuak tur chuan horn an rawn ti ri tuar a, chumi rual chuan Sawmzuala pawh a motorah a lut a, beidawng zet hian ka chuang lut ve ta.

Side glass atang chuan ka va en zui hram a, a motor chhungah thu in a hma lam chu a melh ngar a, chutih lai chuan motor hman tum niawm takin an bia a, kan tlan liam ta. Motor chu tihdintirin kava tlan let leh dawn em ni ang tih ka ngaihtuah vang vang a, mahse, min haw tir dan kha ka lung a awi thei lo. A hrehawm lai ber tur thlenga ka ngaihtuah tawh hnua ka zui ngam laia ka chhungte min rawn hruai tir kha ka rilru a dam thei lo. Ka hmangaih ang hian min hmangaih ve lo niah ka ngai a, ka tlawm vawng vawng hian ka hria.

In ka thlen chuan ka inbual nghal a, reilote tal hahdam ka duh vangin ka mu a, ka rin loh deuhin ka muhil zui bawrh bawrh. Ka harh leh chuan tlai dar 3 a lo ri tawh a, Mimii chuan zana min riahpui tumin ei rawng a lo bawl hma a, ka nu pawh zan lam a mu tlem nen a thisen sang a chhuak a, a mu reng. Ka rilru tina viau mah se ka nu a ni miau a, ngaihsak loh a theih si loh a, hetianga kan awm a ngai hi pawi ka ti.

Mimii nen chaw kan ei a, u Tetea chuan ka nu clinic ah a hruai a, kan chhung buai ve tak zet. Kan insiam fel hnu pawha u Tetea a rawn la haw hman loh vangin taxi lak mai chu kan tum a, kan kawmthlanga mi call kan tum mek laiin Ruatdika a rawn thleng.

“Tetea’n min rawn call a, damdawiina hruai tur che u in” a tih chuan Mimii nen kan inmelh tawp.

Ngawi rengin kan tlan mawp mawp a, Mimii takngial pawhin sawi tur a hre lo aniang a ngawi ve kar mai.

“Kan lawm lutuk e min ngaihsak thin a, mahse, ka chhungten an lo call leh che pawhin I buai thu min lo hrilhsak zel dawn nia, ka tan a nuam lo emai” damdawiin kawt kan thlen chuan ka ti a.

“Rini..”

Mimii chu rang zet hian a lo inthiarfihlim a.

“Ka pa damthat lai khan ka hmangaih ber neih min phalsak a, tuna hetia a awm vang hian ka neih a ngaih kher chhan che hi ka hre lo a. Ka tawngkam a mawi lo I ti maithei a, mahse, nangmahah hian feelings ka nei tawh lo, ka tawp tawh a ni” ka ti ta tawl a. A thaw hak a, min melh vang vang a.

“Rin, ka hmangaihzia che ka hre tlai hi a pawi ka ti, ka hnena rawn let leh tur hian ka theihtawp ka chhuah kim chuan ka hria. Mahse, I sawi ang chuan keimahah I tawp tawh tih ka hrechiang tawh e, ka tibuai tawh lo ang che. Hlim takin I hun I hmang tawh dawn nia” a ti ta a.

“Ka lawm e, nangpawh midang tha deuh tawng turin ka duhsak che” tiin kan inthlahliam ta a.

U Mama te nupa an haw tawh a, ka pa pawh tlemin a rawn harh ve deuh tawh. Amah a chau em a, han tawng peih vak chi a ni lo tih a ni mai a, nimin lam ai chuan hma sawn tak chu kan ni.

“U Rin, U Ruatdika kha ka khawngaih ve reuh lutuk, Sawmzuala chu lo awm hman lo se chu let leh turin ka ti ngei ngei ang che” Mimii chuan a ti a.

“Sawmzuala hian min thlak danglam ve chiang em alawm” ka ti a, ka nui sak a.

“Tinge a hmel ka la hmuh ve miah loh a? Ka nu in khatiang khan ti mah se a vawn ngheh tlat che ka ring asin” a ti a, a lungawi loh hmel ve tawp.

“Ni e, keipawhin ka beisei alawm. Eng ang pawhin kan inkar hi harsain hnawk mah se kan invawn tawn talt ka lo ring thin a, mahse.. ka ring sual a nih hi” ka ti a.

“A dinhmun atanga thlir chuan ka hrethiam vet ho, mahse, mipa zawk a nia, hetiang mai mai tur hi a ni lo sin le” a ti nauh nauh a, kan rilru a inang chiah.

Vawihnih vel zanlaiah kan tho tih loh chu ka pa pawh buaipui ngaiin a awm lo. Doctorin ward a rawn fan chuan min discharge theih tur thu a sawi a, beiseina a sang tawh lo ve chung hian mahni pa te an nihnaah beiseina chu a awm lo thei bik lo. Kan chhungte hnenah chanchin hrilhin min rawn hruai tur an rawn kal nghal a, chutiang chuan damdawiin kan chhuahsan leh ta phawt a, enge kan an zel dawn tih chu Pathian thu thu a ni tawh.

Ka hna ka chawl rei tawh bawk a, ka kal ve tan tawh a, u Tetea pawh chawlh reng theih a ni si loa, amahin a haw chho a, Mimii erawh kan buai em vangin a haw ve lo. Chu chuan ka rilru a tinuam ve a, ngaihngam takin kia hnaah ka kal theih phah a, ka lawm khawp mai.

Thla thar a ni bawk a, dawrtu neuh neuh kan ngah leh viau mai. Keipawh chhunah mi hmuh tur pawimawh ka neih vangin chhuah ka tum a, office ka chhuak chiah chu ka rin loh deuhin Sawmzuala nen kan intawk hlawl. Min hmuh chu a inbeisei vak bik loin ka hria, a han ding deuh a, kal tlang mai ka tum chu min ko a.

“I pa enge a an?”

“A pangngai a ni mai, a tha em em lo a, kan hniam lem lo bawk a” ka ti tha ve mai a.

“Kan inbe lawk thei angem?” inthlahrun hmel deuh hian a ti a.

“Pawi ka ti lutuk, chhuah ka lo tum chiah a” tiin ka sana chu ka melh a.

“Um.. a nih chuan nidangah a ni mai” a ti ve a, ka kalsan ta.

Ka ngaih em em kha a la ni reng, a telloa awm ka suangtuah ngai lo, mahse, tlawm ka inti ve laklawh a, ka inti paukhauh lui ve tang tang a ni.

Chaw kan ei laiin Ruatdika pa a rawn lut a, ka nu chaw eikham tawh nen sitting room lamah an inzui lut a. Thleng ka seng hnu pawh chuan an la titi tui hmel khawp mai, ka pa hmuh tumin an room ah ka lut a, u Feli’n a hmai a lo hruk sak mek. Chaw ei ve tura ka tih hnu chuan a chhuak a, keimahin ka pa chu ka awmpui a, an tukverh te chu ka hruk sak a, boruak nuam tawk tak chuan krismas a hnai tan tawh tih a tilang a, lung a leng ve veng veng thei.

“Naute..”

Fiah lo zeta ka pa min kohna chu ka hre reng kher mai, a bulah ka thu thla nghal a.

“Pa..” tiin a kut chu ka chelh nghal a.

“Nangmah ber hi kalsan ka hreh chhan che I nia” a tih chuan ka mittui a tla a, a hmuha tah loh hram ka duh thin nen ka insum zo lo.

“Pa, I dam tha leh dawn alawm. Tinge chutiang I sawi a?” tiin ka mittui chu ka han hru a.

“I hmangaih ber neih ka phalsak che kha aw” a ti leh sap a. A chau hle chung pawhin chu thu chu min rawn hrilh leh hram, ka pa hi chuan ka hlim loh hi a hlau thin reng a ni.

“Pa, ka pasal neih nia I hlim hmel hmuh ngei ka duh ania aw, I chhel em kha” ka ti a. A hmai cher deuh kuam tawh chu ka chul a, a telloa awm tur anga ka inngaihtuah hian ka na ngawih ngawih.

“Ka awm loh hnuah miin eng thu pawh lo sawi se ka fanu I ni, ka chhuang em em reng che tih lo hria la, ka hmangaih hle che tih I hre reng dawn nia” a tih chuan thildang a sawi thei tawh lo, a thaw hrawk hrawk a.

Ka nu te chu ka koh thawmah an rawn tlan lut nghal a, ka u te chawei lai pawh an rawn tlan lut a. Ka cousin Mapuia, doctor ni bawk kan inhnuaia awm chu kan au nghal a, ani pawh a rawn tlan nghal a, ka khur nasa lutuk chu pawnah ka ding reng ringawt. Mimii’n ka kut a rawn vawn chuan tlemin ka harh fim deuh, ka mittui a luang a, engmah ka sawi thei lo. Rei vak lo hnuah ka nu tap thawm ka hria a, ka pa a awm tawh lo tih hrilh lehchhawn ka ngai lo. Chhuatah ka thu hnawk a, ka thinlung hi a kehsawm vek. A thih hmaa a thu min hrilh kha ka thinlungah a fiah em em a, ka pa min hmangaihzia ka hriat theih nana hun reilo tal peka kan awm kha ka lawm kumkhua tawh ang.

Ka pa vuina hun kan hmante, thlana an phumte chu chiang lo ruaiin ka hria a, engkim hi a lem vek ni berin ka hria. Ka hriat leh hmasak ber chu Ruatdika’n min vil tawp a, min thlahthlam miah lo tih chu a ni. Ka rilru chhungril ber hi chuan Sawmzuala a ko mawlh mawlh a, ka bulah awm se ka thinlung na lutuk pawh hi a damin ka ring a, hmuh tur a awm si lo. Ka hua a, ka ngai em em bawk si.

Kar a liam a, thla tam pawh kan enkawlna dawng hman lo a min kalsan hi hriatthiam har ka ti ber. Ka pa khan eng engemaw kan tana dah a lo ngah a, ka u te ho mahnia ding thei veka a ruat vang pawh a ni anga, ka nu nen kan hminga thil tih a lo ngah khawp mai. Chung zawng zawng chu keini tana buaipui hrehawm leh nuam lo tak tak an ni a, ka pa sulhnu han chhui ringawt pawh a zuamawm loh, Ruatdika’n min tlan sak zung zung a, office dawr ngai pawh min tihfel sak zung zung a, hemi kawngah chuan a chungah pawh ka lawm khawp mai.

Ka pa thihni thlalak ka la en ngam lo a, kar hnih a tlinnaah chiah ka en ve. Mipui thlalak te chu ka thlir reng a, chutia ka keu kual lai chuan Sawmzuala ka hmu ve hlawl. Ka han enchiang lehzual a, amah ngei a ni. Album chu ka khup a, min lo la thlahthlam thak bik lo a nih hi ka ti rilru a, album chu pawmin ka mittui rawn luang zung zung pawh chu ngaihsak loin ka pa chu ka lam mawlh mawlh a.

Ka pa awm lo chiah chu ka rin loh hlirin min lo hmuak dawn a lo ni. Ka pa vanga kan mittui pawh a la hul hma in ka nuin ka pa huan thenkhat a hralh tih kan hriat zanah u Mama nen nasa lutukin an inhau.

“I pa khan ka hmingin loan a la nual a, chuvanga kan inhmun pakhat pawh saw sa thei lo reng  kan nia, a awm tawh loh hnua hralh min phalsak vek, engmah lo sawi ve suh u” a ti hmak.

“Ka nu, Nautei tana a dah zawng zawng pawh I hralh sak hi a dik lo?” a tih lai chuan inchung chhohna step ah ka thu chawrh a.

“Ka hriat miahloa thil a tih vang hian a tidik lo hulhual, nausen tufa nge tih pawh hriat loh kan inchhunga a rawn lakluh ni atang chiah khan asin ka hriat loha thiltih a chin tak, engmah lo sawi ve suh” a tih chuan ka ral riai riai hian ka hria. Ka naupanlai atanga u Tetea nen kan inhauh changa naupang zawk ni si min vaw thinte, ka u te a hauh loh pawha keimah min hau ziah thinte kha a fa ka ni lo aniang tih rilru lo pu thin mah ila a taktaka a lo thlen meuh chuan a na tih bak a sawi theih loh.

Ka roomah ka tlan lut a, ka thawmhnaw ka thlak sawk sawk a, in ka chhuahsan lai pawhin ka nu te chu an la inhnial nasa, hetiang taka U Mama thinrim hi ka la hmu ngai lo. Ka scooty ka la chhuak a, kalna tur bik pawh hre loin ka tlan chhuak a, vawikhat tal ka pa hmuh leh tluka chak ka nei lo. Ka phone rawn ri tluk tluk reng chu ka han en a, Mimii a lo ni. Min ngaihtuah viauin ka ring, tunah hi chuan hetia engmah ngaihtuah nei loa tlan kual mai mai hi ka chak ber. Ka pa damlai kha chuan a thawi takngial pawhin fa atana an lak ka ni tih kha ka hre ngai lo a, a thih atanga reiloteah thil engkim a inthlak danglam ta vek a nih chu.

Khawpui chhung lar phe tuar chu ka thlir a, ka chhungte emaw ka tih thinte nen khan thisen inzawmna pakhatmah kan lo nei lo, chu tluka min tinatu hi a awm leh theih tawh ka ring lo.

“Hello.. Rin.. Hello..”

Sawmzuala chu engtiklaiin nge ka call ka hre lo, a aw ka hriat chuan ka mittui a tla zung zung a, min ngaihtuah zeta min biakna chuan ka thinlung a ti no vek.

“Khawnge I awm? Ka rawn kal ang?” a tih chuan ka awmna ka hrilh a, phone ka dah nghal.

Ka scooty nghengin ka thu a, khaw thim mup chu hlauhna pawh ka nei lo. Motor thawm a rawn awm a, reiloteah Sawmzuala a rawn tlan chhuak a, engmah sawi lo in min rawn kuah thlawp.

“Min kaltir tawh suh aw” ka ti a, a insut nghal hraih.

“Vawikhatmah ka hnen atangin kaltir tawh ngai lo ang che, ka tihpalh aw” a ti a.

Kan in kawtah chuan kan ding a, kan inchhung atanga eng rawn chhuakte chu a chuai raih hian ka hria.

“Mu hahdam phawt rawh aw. I nu in eng thu pawh lo sawi se hre lo der hmak la, ka rawn la chhuak vat ang che” a ti a, ka lo bu nghat.

Inchhung ka luh rual chiahin Mimii leh U Mama te nupa an thutna atangin an tho a, min ngaihtuah hmel zet hian min melh thap a, u Mama phei chu a mit a bui vek.

“Naute” tih pahin min rawn pan a, min kuah a, Mimii a lo inhru nghal mawlh mawlh.

“Ka nau I ni, ka nau I ni reng bawk ang, a chiang tiraw?”tih pahin amaha en thei turin min kuai dak a, ka lu chu ka bu nghat a.

Ka nu hmel ka hmu lo a, hmuh tur a lo awm lo chu ka lawm hle bawk. Ka ngaihtuahna hmasaah kha chuan he in hi tlan chhuahsan vang vang ka tum kha a nia, mahse, ka rilru ka thlak leh, ka pa in ka chan tur a tih chang loa chhuah hi ka tum lo bur. Ka it ngawr ngawr vang ni loin ka pa in hah taka a thawh chhuah a ni a, ka hminga dah a neih chu ka pa vang hrim hrima chan hi ka duh. ‘Miin eng pawh lo sawi se ka fanu I ni’ tia a thih dawna a thusawi kha ka hrereng tur a ni.

Note: ADS HI CLICK NAWN SUH AW KHAWNGAIHIN, VAWIIN ATANGIN A THA CHIAH A, CLICK NAWN AN AWM THIN VANGA CHHIA A NI THIN A, NET IN NEIH THAT LOH CHUAN CLICK LOH KHA A PAWI LO ZAWK AW. 

A hmawr bawk ka tum zet na a, ka ngaihtuahnaa a la buai leh rih😆