EUPHORIA 15

15

Sawmzuala nen kan sawi dun fe hnuah ka hna atanga ban chu ka titlu ta, ka pa khan ka thawh dawn pawh khan min thlawp vak lo hrim hrim a, keima duhthlanna a dah pawimawh em vang chauhin min hnial ta lo kha ania, chutia a awm loh hnuah chauh ka bansan tur chu engemawti tak chuan ka awm a tinuam lo.

“Naktukah huan an rawn teh dawn a, I awm ve a ngai dawn ania” ka nu chuan kan chaw ei lai chuan a ti a.

“Ka hralh phal ve lo ania”tih pahin ka thleng ka la a, ka tho hmak.

“Ka thuhnial hnial tur hi I ni lo tih hi inhre ve deuh rawh. Hei leh chen hi ka enkawl tawh che a, enkawl che ka bat a ni lo chung pawhin phaiah I duhtawka nuamin ka awm tir che. Min rulh let dan tur ngaihtuah hi I bat a ni” a ti hram.

“Ka pa khan vawikhatmah min hmangaihna hi rulhlettir min tum ngai lo. A awm loh veleh hetia min ti thei hi chu hria se a rilru a na ve ngawtin ka ring. Ka u te ka lamah an tang a, ka duhtawk viau” ka nui lui hak a.

“Enge I tih theih chu min han entir ta che” a tih chuan ka room ah ka tlan chho a, ka mittui a rawn luang nghal. Heti tehhrep a buai a ngai ta hi a mak tih bak sawi tur ka hre lo.

Sawmzuala hnathawk chu ka thlir reng a, a kiangah hi chuan ka hahdam ve sawng sawng thin. Chhuna an ei tur ka siamsak a, ka siam zawh chuan an hnathawk chu ka thlir kual mai mai a, ka nu nena inhnial renga awm ai chuan helai hmuna boruak thianghlim dawn hi ka chak fe zawk.

“Enge I lo ngaihtuah a?” tih riah chuan ka han hawi chhuak a, Sawmzuala chu ka bulah a lo ding reng. Engtik laiin nge a lo luh ka hre miah lo.

“Thil engemaw mai mai ka lo ngaihtuah a” ka tih chuan ka bulah a rawn thu a.

“Engmah ngaihtuah hah duh suh aw, tunah ka bulah awm thei lo mah la kan awm tlan theih nan ka ngaihtuahna ka seng reng tih I hre dawn nia” a ti a.

“Sawmzual, fahrah mai ka ni tih I hriat hian I rilru a danglam miah lo em ni? Tu fa nge ka nih tih kan hre si lo a, ka nu leh pa hi misual tak pawh an lo ni maithei asin” ka ti a, ka tah a chhuak ut ut.

“Shhh.. chutiang an sawi ngai lo. Tu fa nge I nih tih ah ka buai lo, ka hmangaih che a, chu chu a tawk” tih pahin min kuah a, a darah ka lu ka nghat a. Ka pa fa lak mai mai ka ni tih ka hriat zan khan tunge ka pianna nu leh pa ni ang tih ngaihtuah khan ka tlai var thak a nih kha. Ka pa damlai khan lo hre hman ni ila chuan zawh duh tam tak ka nei asin, min hmangaih bertu ka pa ka chan tawh a, zawhna tawp thei lo tur paiin min kalsan a ni si a, ka ngaihtuah sual chang chuan vanduai ka inti a, damchhan awm lo riauin ka hre bawk thin.

“Ka tana Pathian ruat I nih hi ka ringhlel lo” ka ti sap a, ka chalah a rawn fawp a.

“Pathian hian engkim hi chhan nei vekin a thlen tir thin tih hria la, vanduai bikah te I lo ngai ange, I vanduai lo, hmangaihtu chhungte a pe che a, hei leh chen hi I kal tawh tih hi theihnghilh ngai suh ang che aw” a ti dam dup a.

“A tirah kha chuan Pathian hnenah pawh ka vui ve asin, engati nge hetiang tura min piantir bik tiin ka chhuahchhal hial a, vawiin ni thleng hian chhanna ka la hmu lo. Mahse, ka kianga awm reng tura min pek che avang hian Pathian hi a awm ngei a ni tih erawh ka chiang” ka ti a, ka kut chu a chul heuh heuh a.

“Keipawh ka nuin min thihsan hlim kha chuan ka kehsawm vek a, nun hi a ho riauin ka hre thin. Hun engemaw chen chu mumal lo takin ka khawsa a, mahse, ka tawpna chu Pathian tho a ni. Ama hnenah lo chuan kalna tur reng reng hi a lo awm chuang lo a” a ti a, ka han melh chuan min lo nuih sak a, a lungngai hmel aia hlim hmel min hmuh fo theihna hian sawi sawi lo mah se Pathian a hmu chiang a ni tih min rin tir thin.

Nilenga nisa hnuaia ka khawsak ve vang a ni maithei, tlai chaw ka eikham chu ka muhil nghal bawrh bawrh a. Engemaw thawm ri deuh rak rakah ka harh deuh a, ka mit ka han tichet chuan ka wardrobe chu a lo let deuh phung. Ka han thu chhuak a, ka room kawngkhar pawh a lo inhawng deuh a, ka mut dawn khan ka khar phui tih ka hrechiang si a, ka ngaih a tha lo vat. Ka wardrobe chu ka han khar tha dawn a, lehkha a rawn tla hlawm thla tawp. Ka han keu nghal a, ka nausen lai thlalak ni awm tak leh pa pakhatin min pawmlai a lo ni. Ka khumah thu pheiin chu lehkha chu ka han keu kual a, min hringtu pa ngei a ni tih a chiang ta, ka pa nena an inremna lehkha a lo ni.

Chu lehkhaah chuan kei hi ka puitlin hunah pawh chuh buai lo tura intiamna vel a lo ni a, ka pa hming sign leh min hringtupa hming sign a chuang a, ka pa tak hming chu Remmawia a ni tih ka hr eta, ka thaw hak a, thlalak chu ka bih ta ngut ngut a. Chu lehkha ringawt chu ka va han duhkhawp lo tak em! Ka phone ka la a, tunge ka biak ang tih ka ngaihtuah fe hnuah pawh ka hre chuang lo. A tawpah chuan hriatchhuah ka nei, ka pa khan a damlai khan vawikhat chu veng pakhatah min hruai a, tuna thlalaka ka pa hi a ni em tih ka chiang ngam tawh lo na a, a nih ngei ka ring ta. Police in min lo dang ta te khan ka hria, ka la naupang lutuk a, engmah hriatchian erawh ka nei tawh lo.

Ka kawrlum ka la chhuak a, pawn lamah chuan ka tlan chhuak nghal a. Ka pa thlalak ka neihchhun hmang hian amah zawn chhuah chu ka tum ta a ni. Kan in lam chu ka han melh phei a, in ropui tak ni bik lo mah se engmah awh ka neih bik ngai lohna hmun a ni a, ka ta tia ka lo sawi thin leh ka lo kawh ve thin a ni. Zan khat thil thuah ka ta a ni lo a, midang daih fa ka ni tih hriatna hi kehsawm nan chuan a tawk viau. Mahse, chuti maia tlawm thei ka ni si lo, pianpui unau ka nei ve angem tih mai mai pawh ka ngaihtuahna luahtu a ni ta.

“Aw Rin, harsatna I nei em ni?”

Sawmzuala pawh tibuai ngam loin Ruatdika ka call ta ringawt a, chhun lamah a hnathawk a hah tih ka hre si a, ka tibuai ngam lo a ni.

“Chhuah lawk ka duh a, min hruai thei angem?” ka tih chuan zawhna min zawh belh loin amah nghak turin min ti a. Rei ka nghah hmain a rawn thleng a, engmah sawi loin ka chuang lut a, kan veng kan chhuahsan lai chuan a motor a tiding a, min rawn en a.

“Mi zawn duh ka nei a” tih pahin ka ipte atang chuan thlalak ka phawrh chhuak a, ka pe a.

“Khawiah nge kan zawn tan ang?” tih pahin thlalak chu min pe let a, ka naupanlaia ka pa min hruaina nia ka hriat chu ka sawi a, chu lam pan chuan kan tlan ta a. Tun ang huna zawn chu a chi ber lo maithei, mahse, inah ka awm hle hle thei si lo a.

Khawpui a lo thang ve nasa si a, ka pa nena kan kalna niawm a ka hriatah chuan in a lo tlar phei put tawh a, khawi ber nge nita ang?

“Khawi maw thlalak kha?” Ruatdika chuan a ti a, ka lo pe vat a. Motor atang chuan a chhuak a, dawr lo inhawngah chuan a lut a, thlalakte chu a han hmuh a, rei fe an indinchilh hnuah beidawngin a rawn let a. Chu lai hmuna mi engemaw zat kan zawh hnuah kan beidawng titih der, helai hmun vel hi ni ngeiin ka hre si a, an hriat loh chuan engtin nge ka zawn chhuah tak ang?

“Kan la zawng zel dawn alawm, beidawng nghal suh aw. Mi pawhin hetiangah chuan hun an hmang rei thin ania” tiin Ruatdika chuan min hnem a, ka lo bu nghat.

Chutiang chuan a rukin ka pa zawng chuan ka chhuak ta fo a, Sawmzuala bulah engmah ka la sawi lo. Engkim hrilh ka duh thin, mahse, min khawngaih lutuk tur hi ka duh lo a, ka hrilh tum pawh ka thulh leh thin. Ka chanah han indah la, nangpawh I nih ve tho ka ring. Mihringte hian chapona hi kan lo pianpui ve tlat a, tlawm lutuka awm hi tupawhin kan hreh theuhin ka ring, hei vang hian sawi chhuah harsa ka ti thin. Ka zawn hmuh hunah erawh hrilh ka tum em em thung.

“Naute, zir zawm leh I duh em?” u Mama te inah chaw ka ei a, kan chawei laiin u Mama chuan chu zawhna chu min zawt a.

“A.. ka peih tawh lo” hlim luih hram tumin ka nui a.

“Hmundangah hian awm la, I rilru te pawh I tih thar ve a ngai a” a ti a, min ngaihtuah em em tu leh min hmangaih tak taktu ka u te vang chauh hian ka beidawng lo leh thin.

“Ni e, hetia awm ngut ngut hi chu a tha lo” U Feli chuan a lo ti a. Kan monute hian min hmangaih em em bawk, an pasalten min hmangaih em a, min hmangaih lo thei bik lo.

“Ni e, ka lo inngaihtuah dawn nia” ka ti a, ka tum tak tak. Mahse, hmun hla takah ni lo, ka pa ka zawn chhuah hunah he in hi ka chhuahsan ang.

Inchhung tifaiin ka buai hle a, ka nu pawh a chan ai a hralh fel tawh a, a inhmun veng dang a mi sa in ni tin a chhuak a, pasal sun hlim tih hriat loh khawpin a inchei nasa, engmah sawi ka tum lo a, ka en liam ve tawp. Ani pawhin a hnena cheng, a awmpui enin min en tawh tih ka hre ve tho a, mi nung pakhat angin kan inen a ni ber. Mimii’n min ngaihtuah thei em em a, kan inbe awl lo. Nau a pai ve tan avangin a rawn zin mai mai thei rih si lo a, min ngaihtuah ve tak zet tih ka hria.

“Rin, lo insiam rawh. I pa chanchin hretu ka hmu tawh” Ruatdika’n a rawn tih chuan ka au chhuak lo chauh. Ka insiam sawk sawk a, pawnah a rawn kal hun nghakin ka lo ding a. Ka tha te chu a khur deuhin ka hria, khatia kan zawn hmasak ber zan khan ka pa thlalak kha a copy a siam a, a kawl ve ta kha ania, engtin nge hma a lo lak zel ka hre hauh lo. Ka bulah motor a rawn ding a, ka chuang lut ve nghal.

Hmanzana kan kalna thoah khan kan kal leh a, Ruatdika chu ka va melh a, hma lam a lo bih ngar. Kawr kan tlan pel a, tuikhur a lo awm a, ka mitthlaah chu tuikhur chu chiang zet hian ka hmu, helaiah hian ka pa khan min hruai. In lo awm hmasa ber bulah chuan kan ding a, Ruatdika a chhuk a, ka chhuak ve nghal. Kawngkhar chu a kik kauh kauh a, lut tura min tih chuan kan lut a, pa upa lam leh an nu niawm tak hi an lo awm a.

“Ka pu, ka sawi tak fanu nen kan lokal a” Ruatdika’n a tih chuan an nupa chuan min rawn pan a, ka banah an vuan a, an tap ta a, a ngaihna hre lo zetin Ruatdika chu ka en a.

“I pa kha awm lo se chuan ka nupui hi ka chan tawh ang, ani erawh chuan keimahni vangin tual a that a, jail bang a zut phah ta si a” an pa zawkin a tih chuan ka lu a vir muai muai a, ka pa chu jail ah a tang a maw? Tualthattu fanu maw ka nih? Ka khawhmuh a fiah lo a, ka awn ta riai riai a.