EUPHORIA 16

 

16

 

Ka thleng chu ka lo bih ngur ngur a, ka rilruah thildang engmah a awm lo. Ka pa chuan tual a that tak tak angem? Ka lu chu ka han thing a, ka chunga thil thleng zawng zawng hi hriatthiam a va harsa tak em!

 

“Vawiin chu kan hnathawkte I lo vil dawn nia, bank dawr ka ngai a, chhuna an ei tur pawh I lo ngaihtuah a ngai dawn ania” tiin pawisa chu dawhkanah a dah a, ka nu anna pakhatmah a nei tawh lo.

 

Sawmzuala’n an ina min hruai a tum a, a chhungte nena min inhmelhriattir a tum a, ka rilru a la inpeih loh avangin ka la hnial. A nihna takah chuan ka pa nihna dik tak hi hre ta se an fapa tan hian min pawm theih ka ring lo a, amah Sawmzuala ngei pawh hian min hmuh dan a danglam maithei asin. Ka thaw halh a, ka nu insakna lam pan chuan ka inkhalh chhuak ta a. Nilengin hnathawhnaah ka awm a, ka rilru pawh ka kawm hman meuh lo. Tlai ka haw dawnah Sawmzuala’n min rawn bia a, ka awmna ka sawi chuan amah nghak turin min ti a, rei erawh ka nghak lo. A thianpain bike in a rawn thlah a, min hmuh chuan min rawn nuih nghal var var a, zing kan inbiak bak kha kan inbe miah lo a, a inchei danah chuan khawiah emaw a kal a ni ngei ang.

 

“I van nalh em em” ka tih chuan a nui ri hak a.

 

“Ka hnathawh dress nen ringawt min hmu thin a, min iai ka hlau ve alawm” a ti ve ngei.

 

“Enge I lo tih dawn a?”ka tih chuan ka zawhna chu a mawlmang ka ti leh angreng.

 

“Kan inah chaw I lo ei dawn” a ti deuh thawr a.

 

“Eng a?”

 

“In inah ka rawn nghak ang che, min hnial leh ka rin vangin ka rawn kalchilh che a nih hi” a ti leh ta zel a.

 

“I mak ve e” ka han ti ngawt a, han tihvak ngaihna pawh ka hre lo.

 

Kan inlamah chuan kan inphur phei ta a, Sangbawihi chiah a lo awm a, hmun dangah chaw ka ei tur thu ka hrilh a, inbual turin ka room lam ka pan nghal. Sangbawihi pawh hian tlemin min en dan a dang tawh, a hmaa ka lama tang tlat thin kha tunah chuan an thisen zawm ka ni lo tih a hriat atang hian min hnaih tha duh tawh lo. Ka inbual zawh chuan ka insiam leh malh malh a, tawng thawm ka hriat chuan ka nu a lo haw tawh tih ka hre mai. Ka chhuak thla chu ka nu in Sawmzuala chu a lo be nasa mai, mak ti zet hian ka va melh thin, fel ber awm ziazang hian a lo tawng suah suah a, Sawmzuala chuan min rawn en a, a dar chu a san ak a.

 

“Enge a hriat a?” kan tlanchhuah hnuah ka ti nghe nghe.

 

“Ka hre bik lo, a rawn haw khan min hau leh hrep dawn emaw ka tia, min rawn be tha tawp” a ti a, a nui deuh ruh ruh.

 

Kan tlan zel a, an in peng kan thlen chuan ding turin ka han ti a, a ngaihna hre lo zet hian a ding a, min rawn en a.

 

“Ka hlauthawng” ka tih chuan ka kut a rawn vuan a.

 

“Hahdam takin awm rawh, tuman an hau dawn lo che” a ti sup a, kan tlan leh ta a.

 

Sawmzuala ka lo hmuh thin leh ka lo hriat thin dan ang zawng zawng chu an in leh lo ka hmu chiah chu a danglam vek. Tlangval fel ve em em leh kuthnawh pawh hreh lo a nih khan ka lo ngaisang tawk viau tawh a, an in ka hmuh chiah chuan ka ngaihsanna a letin a pung. An compound chhung chu a zau nuam em em a, an insak danah pawh an sakna ala rei ka ring lo, a lian in a mawi em em a, te chem chem hian ka inhria.

 

“In va nei ropui em em” ka ti a.

 

“Ropui bik lo e, I ta vek tur a la nih hi” tiin a nui sak a. A taxi chu an kawtah a lo ding a, a piahah motor chi hrang pali vel a ding bawk. Eng hna mah thawk lo mah se duhtawka heng motor hi khalh chhuak thei leh mi hausa fapa duh duh nei thei a nih laia kuthnathawh a thlang tlat chu mak ka ti telh telh, ka ngaisang zual hle bawk.

 

Inchhungah min hruai a, a pa leh nu pakhat hian min lo chhawn a, ka zam lutuk chu Sawmzuala’n hrethiamin min kai tlat a.

 

“Kan lo nghak reng tawh cheu a, lokal rawh u” a pa chuan dam dup hian a lo ti a, Sawmzuala nen an mizia zawng zawng pawh inang tih piah lam a ni.

 

Sitting room lamah min hruai a, an inchhung chu pui tak a ni. An sitting room ringawt pawh hmuhnawm tham a ni. Nutling lo awm ve chu Sawmzuala nitei a lo ni a, a pasal a thi tawh tihte chu a sawi a, heti hian Sawmzuala tan a nu ai a awh a, engkimah inchhungah roreltu ber a lo ni.

 

“Bawiha hian nupui a neih hun hunah inhnuaiah hian ka insuan thla ang, an tan hnawksak nih hi ka duh lo a” a ti a, ani pawh hi a rilru a that ka ring.

 

Chaw kan eilai chuan kan tawng tam vak lo, Sawmzuala’n a pa a treat dan chu hmuh nuam ka lo ti, an in ngaihsak dun ngawih ngawih. Ka pa kha ka mitthlaah a rawn lang vat a, enkawl ka la thlahlel em em a, hetia ka pa dik tak a ni lo tih ka hriat hnu pawh hian ka thinlungah chuan ka pa a ni tih ka pawm thlap.

 

“Bawiha room te kha han enkual ula, hetah thingpui kan lo dawm ang” chaw kan ei kham hnu chuan a pa in a ti a, inchung lamah Sawmzuala’n min hruai a, a room chhung chu zau nuam tak a ni.

 

“Kan inneih hunah I duhtawkin I chei tha dawn nia” a ti a, chei hranpa pawh a ngai tawh lo, engkim a nih tur ang vekin a awm.

 

“Engtinnge mi pangngai ang maia I awm reng theih zawk a?” ka tit awl.

 

“Mi pangngai ka ni lo mi?” a ti a, ka zawhna pawh a hriatthiam loh hmel zawk.

 

“Ka tih awmzia chu, heti khawpa nuamsa si kut hnathawh I thlang tlatte hi ka hrethiam ve lo a” ka ti a, khum bula sofaah chuan min thutpui a.

 

“Rin, hausakna hi sum leh pai leh in leh loah ka teh ve hleinem. Mahni kea ding tur khawpin a taima em, rilru hrisel a pu em tih ah hian ka teh zawk thin. Heng kan in leh lo hi ka pa in a theihtawp chhuaha a lo sual chhuah a ni a, heng bak hi chu engmah tihtheih a nei tawh lo. Kei hian heng enkawl zui leh a tih zawh hman loh tam tak tih zel tur ka la nei a, chutiang ka tih theih nan chuan keiman kawng ka zawn ve a ngai alawm. Lehkha ka zir sang lo a, chuvangin ka intodelh theihna tur kuthnathawh ka thlang mai a, hlawhtlin ngei pawh ka tum a ni” ati ta a.

 

“Ka chhuang lutuk che” ka ti sap a, ka kuah a, min lo kuah ve nghal zat a, ka ban chu a chul heuh heuh a.

 

“Ka pa neih hmang hian ka chapo ve ngawt thei lo tih ka hria a, ka pa min zirtir dan pawh a ni lo a, chuvangin tunah hi chuan engmah neih ka la nei lo, hma ka la tan ve chauh ania, chutichung chuan min ring ngamin I pasal atan min la nei duh tho angem?” a ti a.

 

Ka chhan mai loh vang chuan a mah en thei turin ka khabe ah a rawn dawm a, ka mittui lo tling pam chu a rawn hmuh chuan a kutin a rawn tuai zeuh a, ka hmui khur deuh dar dar chu a kuta rawn tuai hmasain a rawn fawp ta vawng vawng a.

 

“Ka pa bulah ka lo sawi nual tawh a, a rang thei ang bera inneih hi ka duh a ni. Kumhnih nghah leh chu ka thei tawh lo ang” a ti a, ka lo nui ve ta hak a.

 

Sitting room lamah kan inzui thla leh a, a pa leh a nitei chuan hlim hmel tak hian min lo thlir a, an kianga awm chu a hahdamthlak hlein ka hria.

 

“In inneih hunah pawh I nitei hi in thlauhthla tur a ni lo ang, tun dinhmun kan din theih chhan chu a mah vang hi a ni tih engtiklai mahin in theihnghilh tur a ni lo ang” a pa chuan a ti a.

 

“Ka nitei tel lo chuan ka awm thei teuh lo” Sawmzuala chuan a lo ti a, a nitei pawh a nui ve var var mai.

 

Ka haw meuh chuan dar 9 a lo ri tawh, a tlai deuh tawh avangin kan ina leng lut tawh loin a haw tlang a, in a thlen hnuah phone call in rei tawk tak kan inbe leh reng.

 

“I nitei pasal kha a thihna a rei tawh em?” tiin ka rilrua awm chu ka han zawt a.

 

“A rei ve tawh angreng, nichin pawh khan hrilh che kha ka tum a, mahse, sawi chhuah hi harsa ka ti leh thin a. Kan naupanlaiin a thi tawh a, miin an that a” a ti ta a, ka tha a khur chhuak leh vek.

 

Tualthah hi a rapthlak a, tualtthattu phei chu rapthlak tak an ni, keipawh hi chutiang tualthattu fanu ve mai chu ka ni a, tu chhungkua mah hian an ina cheng tur hian min duh ka ring lo. Darthlalangah chuan ka inen vang vang a, ka pa zawn chhuaha tualthattu fanu nih kumkhua nge ka thlan dawn a, ngawi renga ka pa hre lo anga awm hi?

 

Ka muhil lai chu ka harh hlawl a, ka room tukverh chu ka lo khar lo chu niin, thliin a rawn vaw ri thawmah ka harh a, khar tumin ka va tho a. Khar ta mai lo chuan ka han dak chhuak a, kan gate bula mihring awm ni awm tak chu ka va hmu a, hmuh chian tuma ka han thlek chuan a kalsawn ta daih a, ka hmuh sual mai mai nge ka hre lo, tukverh chu ka khar a, ka mu leh ta a. Muhil leh mai thei lo chuan ka let ka let a, ka hun hman mek hi a mak tih bawk ka rilruah a rawn lut leh a, ngaihtuah chhuah tur nei si lo hian ka ngaihtuahna chu ka han hmang leh a, chutah ka lukham hnuaia ka phone chu la chhuakin Ruatdika tan message ka hnutchhiah a.

 

*ka pa chu hmuh chhuah ngei ka duh e*

 

A hmaa ka hmu duh angem tih min zawhna chu kar a liam hnuah ka hmuh duh ngei thu ka hrilh ta. Ka pa a nihna hi engmahin a hliah bo thei chuang lo a, he khawvela ka thisen zawm neih chhun hi ka hriatchhuaha ka hmuh chhuah ngei a ngai, engang mi pawh lo nise ka pa a ni tih chu ka thutlukna a ni ta. A thiltih khan chhan a neih ngei ka ring a, engvanga tualthat nge a ni tih ama hnen atang ngeia hriat theih ka inbeisei bawk. A fanu hi min lo hmu chak ve ngawih ngawih maithei a, engang takin nge a nun a hman chhoh zel tih pawh ka hriat a ngai alawm. A nihna vanga huat ka hlawh emaw, kalsan ka nih pawhin hrethiam thei turin ka rilru chu ka ti paukhauh ta sauh sauh a.

Note: He story hi a tira ka ruahman dan pel rakin ka ziak chho tawh, ka thluak sawizawi nan ka duh avangin keipawhin ka tum loh danin ka her kualtir ta vel a nih hi 😃