EUPHORIA 17

 

17

 

“I lo chhuak ve dawn em?” Ruatdika’n a tih chuan ka harh chhuak zawk a, kan hma lawka ding chuan min rawn en ve reng a, motor atang chuan ka chhuak a, ka chezia chu a lo en uluk kher mai.

 

Ka hmalam chu ka pan a, “ka pa “ tiin ka hriat tawk lek chuan ka phun sap a.

 

Reilote chhungin a mitmengah chuan min hmangaihna ka va hmu theiin ka hria, chutah hmanhmawh takin ka tlan a.

 

“Ka pa “ tiin ka va kuah ta thlawp a, min chhang lo, a taksa erawh a khur vek, a tap tih ka hria.

 

Inchhungah min hruai lut a, kan chhungkaw thlalak banga intar chu ka hmu hmasa ber, ka nu hmel pawh ka hmu ve ta alawm. Uluk tak hian bang chu ka thlir a, thlalak chu ka bih vang vang a, chhungkaw hlim tak kan nih hmel tehlul nen engvang chiaha hetia darh ta nge kan nih tih chu ka pa hnen atanga ka hriat theih ka beisei.

 

“I nu chuan hmu ve che sela a chhuang ngawt ang che” tiin min rawn melh a, ka lo insut hlap hlap a.

 

“Duhtawkin inkawm rawh u, ka rawn let leh vat ang” Ruatdika chuan a ti a, a chhuak ta a.

 

Ka pa nen chuan thutthlengah kan thu a, inchhung chu ka han bih kual vel a, engkim chu a felfai em em vek, ka pa hian nupui a nei leh ta nge ka hre lo a, inchhung hi enkawl uluk tih a hriat hliah hliah.

 

“I duh duh min zawt rawh, engkim hrilh tur che hian ka inpeih tawh e” a ti a.

 

“Ka nu chanchin ka hre duh a” ka ti a, ka zawhna hian tina nawn lo se ka duh em em a, mahse, hriat duh ka ngah ve si a.

 

“Thla nga I nih hian I nu chuan min boralsan a, hrisel lo em em a nih avangin kan inneih pawh hian nau pai ngam lo tura doctor ten an hrilh a nia, mahse, fa min hrinsak hi a tum em vangin nang hi a lo pai che a, hrisel lo leh chak lo tak chungin a hring che a, amah pawh a insawisel lem loh avangin ka lawm ru hle nghe nghe. Mahse, thla thum I tlin atang hian a taksaah harsatna hrang hrang a tawk chho a, thla nga I nih hian kan pahnih chauha khawvel hmachhawn turin min kalsan ta a ni” a ti a, ka lo thaw hak a.

 

“Nupui dang I nei tawh miah lo em ni?” ka tih chuan min rawn nuih sak a.

 

“I nu kha ka hmangaih a, midang neih san hi ka la thei lo a ni” a ti a, tukverh thlang lam chu a hawi vang vang a, ka lainat ngei mai.

 

“Pa, kan in bulah I rawn kal fo tiraw?” tia ka zawh chuan min melh vang vang a, a lu chu a bu nghat a. Hmanzana kan in kawta ding kha a nih ngei ka ring a, a hma pawhin a rawn kal foin ka ring ta kha a nia, al o ni chiah bawk.

 

“Engang takin nge ka fanu hi a thanlen tih ka hre chak a, ka rawn kal fo thin. Mahse, I pa hnenah khan intiamna ka lo neih tawh avangin hnaih che ka tum lo a, ka ngam lo bawk. I pa a thi tih ka hriatna a la rei lo, ka hriat veleh ka rawn ngaihven che a, mahse, I unauten an hmangaihzia che ka hria a, ka ngaihtuah lo che” a tita a.

 

“Pa..” a bulah chuan ka thu a, a kut chu ka vuan a, ka hmer ta ngawt ngawt a.

 

“Min ngaidam rawh aw” a ti a, a mittui chu a rawn luang ngiai a, ka lu ka thing a.

 

“Chutiang sawi suh, tun thleng I lo la dam vang hian ka lawm lutuk” ka ti a.

 

“Ka la dam tih I hria a, a tawk aw, I pa chu a thi tawh, chu chu I hun kal zel tur atan a tha ber” a ti a.

 

“Engang mi pawh lo ni la ka pa I nihna a bo dawn chuang lo, eng thil pawh lo ti tawh mah la pawi ka ti lo. Ka thisen zawmpui neihchhun I ni a, ka tan I hlu lutuk” ka ti a.

 

“Ka nunhlui vang hian harsatna I tawh hlauin kum 27 dawn I hlatah ka awm tawh a, tih thlawntir suh” a ti a.

 

“Kum 27 chhung kan inthen hrang tawh a, thlen tir zel ka duh tawh lo. Chuvanga zawn chhuah pawh duh che ka ni a, khawngaih takin nangmah hlata awm leh tur chuan min ti tawh suh” ka ti a.

 

“Hringnun hi a awlsam lo asin, tu fanu nge I nih tih miin an hriat rualin an en dan che a dang vek dawn, chuvangin ka fanu anga awm hi a thlanawm lul lo” a ti a.

 

Ka rilru ka siam fel tawh a, sawhsawn ka tum lo. Rei fe kan sawi dun a, a changin kan inhnial a, a changin kan tap a, ka kalsan dawn meuh chuan rei tak lo cheng dun tawh kan ang ka ti.

 

“Pa, ka lo kal leh vat ang, khawiah mah tlanbo tum suh ang che. Ka hmuh hma che chuan ka zawng leh zel dawn che a nia” ka ti a, ani pawhin hreh tak chungin ka thusawi chu a pawm ve thei ta hram.

 

Chutiang boruak chu ka tawng ang tih ka mumang lamah pawh ka la hmu ngai lo a, engkim mai ziah chawp leh phuahchawp ang maia lo thleng chu a mak tih bak sawi tur ka hre lo. Chau zetin khumah chuan ka bawk thlawp a, Sawmzuala bula engkim sawi a hun tawh tih ka hria. Engtin nge bul ka tan ang tih erawh ka hre mai lo a, min kalsan ta anih pawhin ka dem ngai lo ang. Ka bag a ka phone chu ka han phawrh chhuak a, message lo awm chu ka han en thuak thuak hlawm a, Sawmzuala message pawh a lo awm.

 

*Ruatdika nena hmuh dun cheu kha thil nuam zawk zawk chu a ni lo tawp mai, keimah nena chinfel theih loh thil a awm chu a ni em lo ang chu maw?*

 

Ka call nghal a, a pickup thei lo lehnghal. Khawiah nge min lo hmuh ang tih chu ka han ngaihtuah vang vang a, ka hre thei bawk si lo. Engpawhnise, ka biak a, engkim ka hrilh vek a ngai tawh. Message chu ka hnutchhiat ta tho a.

 

*Inbia ang, ka pa chungchangah sawi dun tur kan nei* tiin.

 

Ka inbual zawh chuan Sangbawihi’n inleng ka nei tih min rawn hrilh a, ka thawmhnaw ka hak fel hnuah inhnuai lamah ka chhuk a. Ka nu leh Sawmzuala an lo inthutchilh a, ka thawm pawh an hre lo ni awm tak a ni. Ka nu chuan Sangbawihi chu Sawmzuala bulah a kuai thu lai pawh chu ka hmu reng, ka va hnaih takah chuan ka thawm hriain an rawn hawi thap a, Sangbawihi chu rang fe hian a insawn nghal.

 

“Tunlaichu insakna lamah ka kaltir ngun deuha, a chau ve deuh ang” ka nu chuan a ti a, ka lo ner sak. A mark score tum dan vel hi a thing thei.

 

“I chau viau em ni?” Sawmzuala chuan min ngaihtuah hmel tak hian a ti a.

 

“Chau lo e, an hnathawh ka vil a ni mai a, chauh viau na tur pawh a awm lo” ka ti a.

 

“I nu ka lo dil tawh a, chhuah pui lawk che ka duh a” a tih chuan ka nu ka va melh a, a hmel chu a hmuhnawm tawp. A phal lo ngam chiah si lo a, phal loh a chak tih ka hre reng.

 

In kan chhuah hnu chuan ka lo insehruh tih ka hre chiah, ka kut chu a kham urh a, ka han maimitchhing sawk a.

 

“Sawi duh I nei sia, I nu a awm reng kha chuan engmah I sawi thei dawn loin ka hria a, chhuanlam ka lo siam tawp a” tiin min nuih var var a, nichina a thinrim ve na te kha khawiah nge an awm tak?

 

“Ka lawm e” ka ti sap a. Kan tlan chhuak nghal a.

 

“I thin kha a rim hmel lutuk a, ka call pawh I pickup duh si lo a” ka tih chuan min rawn melh a, ka kut chu a rawn la a, a hum a.

 

“Awmze nei miah loin ka lo thinrim a, ka tihpalh aw. Engkim hian chhan a nei vek zel alawm, Ruatdika nen in chhuak a nih chuan chhan tha tak a awm ka ring a, I sawi hun nghah mai kha ka tihtur a ni” a ti dam dap a, pawn lam chu ka hawi ta ringawt.

 

Hetiang mihring perfect lutuk leh gentleman dik tak hi engtikah mah ka tawng tawh dawn lo tih ka hrechiang lutuk a, chan tur anga ka inngaihtuah hian ka thinlung a na nghal vawng vawng thin.

 

“Vawiinah khan ka pa kan han hmu a, Ruatdika inrawlh a ngai erawh pawi ka ti, mahse, ka pa min zawn hmuhpui bak kan inkarah engmah a thleng lo, chu chu amah pawhin a hria ang” ka ti a.

 

“Ka ring tawk che a lawm” tiin ka kut chu a han hmer a.

 

Ka rilru hah apianga min hruaina thinah bawk min kalpui leh a, khawpui lang duai chu kan epah a awm a, helai hmunah hian ka rilru natna tam tak ka lo leih baw tawh a, hlimna tam tak pawh ka lo chhar tawh bawk.

 

“Sawmzual, ka nihna dik tak I hriatchhuah huna min kalsan duhna rilru I pu a nih chuan ka dem ngai lo ang che. I duh vanga min kalsan I ni lo tih ka hre dawn tho a, chuvangin inthiam lohna nei lo turin ka duh che a” ka ti a.

 

“A tirah pawh ka sawi tawh kha, engang pawhin kan inkar hi hnawkin harsa mah se ka nihna ang anga min pawmtu hi ka kalsan lo ang che” a ti a.

 

“Tualthattu fanu ka ni tih I hriat hnuah pawh maw?” ka ti a, min chhan ngaihna a hre bik lo a niang, a tukhum chu a han zut a, van lam chu a hawi a. Min kalsan hun a thleng dawn ta tih chu ka inhrilh nghal a, tuar thiam ka tum lui ve tang tang. Chutah ka rin loh lutukin a rawn hawi a, a mittui a tla a nih chu! Min rawn kuah a.

 

“Tumah hian kan nuna thil thleng tur hi kan thlang thei hleinem, I pa chuan engvanga chu thil chu thlen tir nge I hre lo tiraw? Harsatna thuk tak a nei a ni ngei ang, ka hmangaihna che hi engmah hian a hliah khuh ngai lo ang” a ti a, ka insum zo lo, ka tap chhuak ta hawk hawk a.

 

Min hmangaihtu tak tak hi hetiang dinhmuna din chiah hian an lo hriat thin, Malsawmzuala ka tawng hi ka nuna thil thlengah chuan a tha ber ka ti lo thei lo.

 

“Ka hmangaih che” ka ti sap a.

 

“Keipawh hian ka hmangaih em em che. I hrehawm rei ka phal tawh lo, kan innei vat ang. I pa hnenah min hruai vat la, a fanu hi neih atan ka dil dawn che a ni” a ti a, mittui karah ka nui ta sak a.

 

Sawmzuala leh ka pa inhmu tur chuan an duhzawng min zawt tawn reng a, an nervous ve ve tih ka hria, keipawh ka bang bik lo. Ka pa tih ka hriat atanga chaw kan ei dun hmasa ber tur a ni a, ka zam tak zet. Kal pahin chawhmeh kan lei a, ka pa duhzawng tur ka hre bik lo a, Sawmzuala lahin min zawt deuh sek, ka nuih a za tawh zawk. Kan tlan chhungin ka pa in vawithum min rawn call hman bawk, chutiang chuan an inhmu tur chu an zam ve a, a awm lo lem lo e.

 

Ka pa inkawt kan thlen chuan min lo hmuak a, kan chawhmeh leite chu a khai lut a, a thenawmte lahin enge thleng tih hriat tumin an rawn in lawr chhawk a, ka pa kan tlawh thu han sawi ka tum chuan ka pain min lo khap a.

 

“Ka tuten min rawn tlawh anih hi” a tih chuan ngaihtha takin an chhuak ve zel a.

 

“I fanu ka ni tih I sawi mai lo a” tiin ka vui a.

 

“Mihring hi rilru tha lo fe fe kan tam a “ tih chiahin min chhang.

 

Eirawng kan bawl ho a, kan hlim ve khawp mai, ka rin aiin a taka an inhmuh in an pangngai a, an zam em em lo in ka hria.

 

“Ka hmuh tum ai chein I lo la thalai a” Sawmzuala chuan a ti ve ngei a, ka pa pawh a nui ve suk mai.

 

Chaw kan eikham chuan bathlar thlanglamah kan thu a, eng engemaw sawiin kan titi tui ve hle a, a tawpah chuan Sawmzuala chuan inneih a dil ta, ka lo ip deuh chawi a, ka rin aiin ka zak, ani lah chuan puitling zet hian a dil vei thlap bawk si.

 

“Mi fel tak I ni tih ka hre nghal alawm, keichuan in inneih ka remti lutuk, mahse, Rini nu thu thu aniang chu” tiin a chhang a.

 

“I phalna lak kha ka duh hmasa ber a, nangberin min phalsak a, ka hahdam huai e” a ti a, ka kutah chuan rawn vuanin a hahdam hmel tak takin ka hria.

 

“I pa hmel ka hmuh khan misual a nih hi ka ring miah lo, engemawti takin a talawk palh a nih ka ring” kan haw kawngah Sawmzuala chuan a ti a. Keipawhin chu chu ka ring, ka pa anih vangin ka lo tan lutuk a ni ang tih hlauin ka sawi chhuak ngam lo mai mai zawk a ni.

 

Kan kawtah chuan dingin kan in chu ka han thlir a, ‘kan’ tia ka koh theih loh hun hi a thleng tep tawhin ka ring.

 

“Ka rawn lut tawh lo mai ang aw, ka pa muthilh hmain thlen ka duh si a” a tih avangin keimahin ka lut chho ta a.

 

Inchhung ka luh chuan a lo reh thap a, ka room lam pan tumin step ka rap chiah tihah ka nu chu a room atangin a rawn chhuak a.

 

“I pa tak chu I zawng chhuak ta maw? Sawmzuala chhungten I nihna dik tak an hre tawh em?” tiin min rawn nuih a, a hmelah chuan hnehtu chang hmel a pu bawk.

Note:  Ka story chhiar thang chuan hetiang tehduah hian ka ziak ngai lo tih in hre vek. Ka sawi tawh ang khan keimah leh keimah ka inchhin vel e ka tia, chuvanga keimah lo riau anna pawh a nei maithei, ka story ziah lehzel tura ka tana tangkai tur a nih vangin ka ti tlang ve dawn hrim hrim 😂Weekend hman nuam vek u le.