EUPHORIA 18

 

18

 

Ka nu thusawi kha dik lo engmah a awm lo, mak tih erawh ka nei. Kei h a fahrin pawh lo ni lo tehreng ila, mn hmangaih em loh pawhin lainatna min nei lo em ni tih hi. Ka nu tak a ni lo tih ka hriat ni khan ka na ngawih ngawih a, min duat viau ngai lo mah se ani bak nu ka nei chuang lo tih ka chiang em a, dinhmun chhe berah pawh ding se ka thlauhthlak theih ka ring lo. Hetianga hmelma ang maia min chhaih kual hi a chhan ka hre lova, kei chuan ka khing let ngai lo ang tih erawh ka chiang.

 

“In ka thleng chiah a, ka ngai nghal ringawt che maw le” Sawmzuala chuan min rawn call nghal zat a, ka hmai ka lo phih zo chiah.

 

“Keipawh ka ngai ve tho che lawm” ka tih chuan a nu ri hak a.

 

“Ka pa bulah inneih vat ka duh tih ka sawi a, a lo phal mah mah a” a ti a, a hlim hmel tawp.

 

“Phal mah mah lai tak kha ka tan tawp” ka tih chuan, “Ka pa chuan min hnial ngai dawn lo tih ka hria a” phur deuh hian a lo ti a.

 

“I nitei’n enge a sawi ve?” tiin ka zawt a, a pa chuan a hnial kha ka ring lo sa hrim hrim a.

 

“Ani pawh a phur khawp mai. Mahse, nupui ka neih hunah chuan inhnuaia awm hi a tum tlat a, engtin nge a rilru kan hneh theih ang aw?” a ti vawng vawng a.

 

“Ka tan apwh thil nuam a ni miah lo, enkawltu ber che u a nia, ka rawn awm veleha awm sawn kha chu a ngai pawh ka ti lo. Chu bakah nu chan chang tur ber a nia, a tello chuan kan awm thei lo ang” ka ti a.

 

“Ka rilru chiah a ni. Ka pa hi chuan ka nitei thu thu ah a dah a, tumah nawr lui chi a ni lo a, engpawh nise han innei fel phawt ila” a ti ta a.

 

Ka ngaihtuah a, pasal nei mai tur anga ka han suangtuah  chuan ka huphurh ru zek. Ka pa damlai kha ni hman se chuan a hlim dawn tehlul nen, ka tak tak zawng hmu tawh ma hila min enkawl seiliantu ber a nih vangin ka thinlungah chuan tuman an tluk ngai lo ang.

 

Ka rin aia hmaah palai an rawn kal a, ka unaute an lawm lutuk lo. An thisen ka ni lo tih ka hriat hnu hian min en dan a dang miah lo a, keimah zawk hi ka danglam ang tih an hlau tih ka hria. Ka tan chuan ka u te an ni reng a, an ni reng dawn bawk. Ka nu chuan chhungkua an inrawn tur thuin palaite a lo thlah a, min dodal a tum loh thu min hrilh bawk.

 

“I pa I zawng hmu tawh chung pawha ka hnena palai I rawn kaltir hi ka lawm khawp mai. Ka enkawl seilen ni mah la I pa I zawn hmuh hnu chuan min kalsan mai ka lo ring a, I pain I puala a dah chungchangah pawh ka lawm lo hle nghe nghe. A chhan chu tunge tih pawh ka hriat ve loh hnena min kalsan tur leh  I pain hah taka a lo thawh chhuah a hnena I hlan mai tur anga ka ngaihtuah khan ka thinlung hi a na em a, mi famkim ka ni vik lo tih I hriat kha, chuvanga I chungah pawh khatiang khan ka awm a, min ngaidam dawn nia” ati a, ka mittui a lo tla.

 

Ni e, ka nu hian ka sei tet ata min enkawl a, a fa tak ni lo mah ila kum 27 chhunga min lo enkawl tawh avangin chuti mai mai a min hmangaihna a tawp hi ka lo ring lo reng a ni.

 

Inchungah puan ka pho a, nihnih hnua palai kal leh tura an intih avangin ka nu pawhin a unaute leh ka u te ho a kokhawm a, a rawn hlawm a, Mimii a rawn phur fal tawp. Thian ah hman ka duh viau na a, a nau pai a lan ve tawh avangin a rem dawn ta lo. Ka nu nen a rukin ka mamawh zual tur kan dap tan bawk a, palai an rawn kal leh hun atana an ruatah ka puteho an rawn phei bawk. Ka phone a rawn ri ral ral a, ka chhungtehoin min en thap.

 

“Rin, buaina kan nei a, zanin palai rawn kal tur kha chawpchilh deuhin kan thulh a ngai, chanchin ka lo hrilh chiang leh ang che. I chhungte hnenah thupha lo chawi mawlh mawlh la aw” a rawn ti a, a aw ah chuan chiai na ri ka hre thei.

 

Ka nu bulah chuan thil awmzia ka sawi a, tih theih vak awm hek lo, ka puteho pawh an haw leh ta rih.

 

“Sawmzuala mizia kha ka hrechiang, hetianga thil a awm chhan awm hi I ngaihtuah thiam em? Amah atang chuan a ni dawn lo ngei a” ka nu chuan a ti a.

 

“Ka hre bik miah lo, ka rawn hrilh chiang leh ang che a tia” ka ti a, a ruk tak chuan ka awm a nuam lo. Ka nu sawi ang hian amah Sawmzuala lam chu a ni dawn lo, a chhungte atangin tihna nge? Ka room ah chuan ka vei kual sek a, ka lungphu chu a su deuh dup dup a.

 

Dar 10 velah Sawmzuala call ka dawng ta, rang zet hian ka pickup a.

 

“Rin, ka tihrilhhai viau ang che tih chu ka hria a, pawi ka ti lutuk a nia. Ka nitei a khawng a, kan buai lutuk a” a rawn tih chuan ka thaw deuh huai. 

 

“Aw, a nih chu. Enge tunah a an tawh?” ka ti a.

 

“A rawn harh tawh a, mahse, a mak lutuk. A tira min phurpuitu ber a ni sia, palai chu kal tawh lo mai rawh se a rawn ti deuh tlat a, enge a awmzia ni ang le?” a ti a, ka bangbo lutuk.

 

“Kan inneih a phal lo maw?” ka ti halh a.

 

“Ka hrethiam lo, naktukah ka rawn hruai ang che, lo phei ve phawt la” a tih chuan duhthlan tur dang kan nei lo tih ka hria.

 

Ka muhil tlem kher mai, thiil chi hrang hrang ka ngaihtuah hian chuti teh thuta a nitei rilru inthlak chu mak ka ti telh telh. Thil pakhat hriat chhuah ka nei, a pasal kha thah a nih thu Sawmzuala khan a sawi a, anih chuan ka pa that a ni thei angem? Ka mu chu ka inperh tho zawt a, ni lul lo se ka va duh tak em! Ka thawmhnaw ka ha a, thawm dim thei ang berin pawnah chuan ka chhuak a. ka phone chu phawrhin ka pa chu biak ka tum a, a tlang thei lo. Ka chhuak ta ringawt a, hmuh ngei ngei ka mamawh. Ka pa hian Sawmzuala nitei chu a lo that tak tak a nih chuan engtikah mah kan inneih hi a rem ngai lo ang. Keipawhin an thinlunga ser siamsak reng tura chhungkuaa insiam chu ka thei lo ang. 

 

Taxi rawn tlan chu phar din ka tum a, chutihlai tak chuan car hi ka bulah a rawn ding chawt a.

 

“Khawnge I kal dawn?” Ruatdika chu a rawn dak chhuak nghal a.

 

Ka pa hmuh ka tum thu ka sawi chuan motora lut turin min ti a, hnial ka tum zet na a atir atanga min buaipui a nih vangin ka inthlahrung duh ta lo.

 

“Pasal I nei dawn tih ka lo hria a” kan tlan hnu chuan a ti a.

 

“A.. neih dawn em em pawh a la awm chiah lo. Ka tibuai thei che sia, ka inthlahrung hle mai” ka ti ta ringawt a.

 

“Inthlahrunna tur engmah a awm lo. Johana te inah ka leng a, ka tum lawk pawh ni lo in in in lam atanga haw kha ka tum thut a, a tihzia zawk khawp mai” a tih chuan ka thawveng deuh huai.

 

Ka pa in kawt kan thlen chuan a lo thim thap a, a muhil tawh a ni ngei ang.

 

“Ka riak nghal mai ang, min hruai a, ka lawm lutuk aw” ka ti a. 

 

“Rin”

 

Ka chhuak tur chu ka kutah a rawn vuan a, ka lo hawi deuh hu a.

 

“Ka vawn chakna a rei tawh lutuk a, min hrethiam rawh aw” a ti a, a hmer deuh vang vang a.

 

“Ka’n kal tawh ang’e” tiin ka kut chu ka la a, ka chhuak ta a.

 

Ruatdka tlan liam chu ka thlir zui vang vang a, kan inneih loh kha ka ring ngai miah lo a nih kha. Kan hun liam tawh hnu kha ka tum vang ni miah loin ka rilruah a rawn lang a, duh loin ka lu chu ka han thing a. Ka pa kawngkhar chu ka han kik deuh dat dat a, a thenawmte ka tiharh ang tih ka hlau angreng. Rei loteah kawngka kalhna a ri rak a, ka pa chu a rawn dak chhuak a.

 

“Enge…tun ang zanah” tiin min ngaihtuah zet hian inchhungah min kai lut a.

 

“Pa, ka rawn tibuai che a, pawi ka ti lutuk aw” ka tih chuan min nuih sak a.

 

“I duh hun hunah I lokal thei alawm” tiin sitting roomah chuan kan inzui lut a. “Eng thil nge ni ta zan zana I rawn kal tak?” a ti a.

 

“Pa, sawi chhuah hi ka huphurh lutuk tih min hriatsak hmasa rawh aw. Pawi I khawih pa kha ka hre duh a.” ka sawi tawp lam chu a zui ral a ni mai.

 

“Bawihi, tumah ka that hleinem” a ti dam dup a, mak ti zet hian ka va melh a.

 

“Pa..” a awmzia sawi fiah turin ka ngen a ni ber.

 

“Tumah ka that lo tih ah hian duhtawk ang, um..? Chu chu a tawk mai. Ka tuar rei tawk tawh a, hemi vanga tawrh belh zel hi ka duh tawh lo a ni” a ti a. A hmelah chuan sawi belh zel a duh lo tih ka hrethiam, mahse, ka va han duhkhawp lo tak em.

 

Ka phone chu a rawn ri a, ka han en chuan ka nu a lo ni.

 

“Khawnge I kal? I room ka rawn en a, I awm si lo a” ati a. Ka nu tak tak kha a ni leh tawh, min ngaihtuah em em rengtu kha.

 

“Nu, thil chinfel lawk tur ka nei a, tui deuhin lo mu rawh. Naktukah ka hrilh ang che” ka ti ta a.

 

“Kan thenawmpa hian taxi a nei a, ka va thlah tir dawn che em ni?” ka pa chuan a lo ti a.

 

“Zanin chu hetah ka riak dawn” ka tih chuan min hnial a tum tih ka hria, ka tho ta daih a.

 

“Enteh Bawihi,  I hmakhua ngai hian hrehawm ka lo taur zo vek tawh. Ka tawrhna kha engmah lo maiah I chantir thei asin. Ka case neih tawh thu an hriat rual rualin Sawmzuala hi I chan thei bawk, chutiang khawp chuan I pa nih hi thil thlanawm a ni lo” a ti a, a mittui chu a tling pam mai.

 

“Pa” ka va din hnaih a, a kawngah ka kut pahnih rawlh lutin ka kuah a, a mitmenga min hmangaihna zozai kha ka chhiar zo seng lo. “Ka pa I nih hi ka zahpui ngai lo ang che. Miin engang pawhin min sawi dawn mah se tun atang chuan ka pa nihna hi I nei tawh ang” ka ti ta a.

 

“Mimawlnu” tiin a inhrut hraih a, tawrh belhtir zel hi a thei tawh lo a ni.

Note: chawlh ka tum zet na a hunawl tlem ka nei leh sia ka rawn vawm bei leh si e. A tawp khar theih tep e, story dang ziahte pawh chakawm ve tan tawh😃