EUPHORIA 19

 

19

 

Phone number ka hriat ngai loh atangin call ka dawng a, ka han pickup chuan Sawmzuala nitei a lo ni.

 

“Inhmuh lawk ang” a rawn tih chuan keipawhin hmuh ka lo rilruk lai tak a ni a, inhmuhna tur hmun min hrilh lam pan chuan ka kal ta vat a. Ka va thlen chuan a lo awm reng tawh. A hmel chu a bui deuh chuk a, a hmaa ka lo hmuh tawh amaha phurna ang kha engmah a awm lo.

 

“Ka vahpa nena in inneih rem ka tih loh vang hian min ngaidam turin ka duh hmasa che a, kan thisen leh in thisen inzawm hi ka thei lo tih ka hrilh tlang tawp duh che a ni” a ti a.

 

“Ka pa khan tual a that lo a sin” ka tih chuan min rawn melh a, a nui hak a.

 

“Tupawhin chu thu chu an fate hnenah an sawi thei ang chu. Tualthattu nih hi chu a rapthlak tlat alawm” a ti a, “Nangmah ka duh loh vang che a ni lo tih chu I hriat kha aw, I pa thlalak ka hmuh rual khan mang lamah pawh ka hmuh duh tawh loh ka pasal thi tur hmel kha ka hmu zan tin a, ka thinlung hi a na nawn vawng vawng a sin” a ti a.

 

“Enge ti tura min duh?” ka ti a.

 

“Sawmzuala hi then rawh”

 

“A awlsam lo asin”

 

“Ka pasal thattu fanu I ni tih I inhre chung pawhin maw?”

 

“Sawmzuala’n a thei lo ang”

 

“Ani chu ka hneh thei mai ang. Khawngaihin inthen hram ang che u. Ka pasal thattu hi I pa a nih thu sawi chhuah hi harsa ka ti ve tho tih hria la, sawi chhuah kher ngai lo tur hian i chingfel hram dawn nia” a ti a, a bag a la a, a chhuak ta a.

 

Ka mittui chu a rawn luang ngiai a, ka hlim ve dawn chauh a, harsatna bawkin min lo hmuak leh si. Ka tihtheih awmchhun chu ka hmangaih ber then a nih si chuan harsa ti tak chung pawhin ka tih mai a ngai alawm. Keichuan ka pa thusawi kha ring thlap mah ila dan hnuaiah thiam a chang miau si lo a, tih theih ka nei ta lo a ni.

 

Sawmzuala call rawn kal zozai chu chhan ka tum lo a, mittui nen ka en liam tawp. Engtinnge a bulah chuan ka sawi tak ang? A nitei sawi ang ngei khan kei hi min chenpui duh ngai dawn loa, keipawhin ka theih ka ring bawk hek lo.

 

“Sawmzuala a rawn kal a” ka nu chu ka roomah a rawn lut a, ka lo mu reng a hmuh chuan a rawn lut a.

 

“Ka nuamsam lo a, nakinah ka be mai ang” ka ti a.

 

“I tap elo? Enge thil nge thleng?” tiin ka hnungah chuan a rawn chul a.

 

“Nu, tunah chuan engmah ka sawi thei lo. Nakinah ka hrilh ang che, Sawmzuala kha lo haw tir phawt rawh” ka tih chuan engmah min zawh chhunzawm a tum bik lo.  

 

Ka rilru a kal thui kher mai, tihsual engmah ka nei ve lo chung pawha ka hmangaih ber ka thlah a ngai hi ka hrethiam lo lek lek a, ka pa in a hriat chuan hrehawm a tizual hle dawn tih pawh ka hria. Sawmzuala rilru nghehzia ka hria a, chuti maia min thlah hi ka ring lo. Mahse, hun a kal anga, tunah hrehawm ti mah se a tawrh chhuah hunah chuan kan thutlukna siam hi a dik tih a la pawm maiin ka ring bawk.

 

“Rin, in kawtah ka awm” ka call rual rualin alo pickup a. Tukverh atang chuan ka han dak chhuak a, a lo awm tak tak. Nichina haw tura ka tih khan a lo haw miah lo tih ka hria. Ka chapal ka bun a, ka chhuak thla ta a.

 

Min hmuh veleh min lo kuah chawt a.

 

“Engati nge min lo hmuh duh loh a?” a ti nghal zat a.

 

“Sawmzual, inthen ang”

 

Min kuahna a thlah a, mak ti zet hian min melh a.

 

“I fiamthu tiraw?” tiin a nui a, ka lu ka lo thin chuan a mangan hmel tak zet.

 

“Ka nitei khan enge a hrilh che? Amah vang mai maia inthen ka duh lo, a duh loh che pawhin kan indang mai ang.” a ti a.

 

“I chhungte thu I awih kha atha zawk alawm. Min duhlo tute inchhunga luh hi tuman kan duh bik lo a” ka ti a.

 

“Chuvang chuan awlsam takin min then thei amaw? Engkim ka huam asin, nang ka neihna tur che a nih phawt chuan kan in leh lo pawh ka kalsan thei” a ti a.

 

“Sawmzual, tunah chuan a na pawh I ti ang, mahse, hunin heng hi chu ala liampui ve mai ang. Chu zawng chu ka sawi duh chu a ni mai, ka kal tawh ange” tiin ka inher a.

 

“Rin, min hmangaih ve tak takah ka lo ngai a, ka tan hian I inhuam thui ka lo ring ve viau asin. Heti maia min phatsan thei hi a mak ka ti. Mahse, I hlimna tur a nih chuan I kal thei lawm” a ti a, a kal ta a. Ka thu hnawk a, ka mittui chu a rawn luang zung zung a, thudik hre ta se a tan a awlsam a ngem? Chu thu dik hrilh tur erawh chuan huaisenna ka nei tlem si a, aw, a va han hrehawm tak em!

 

Ka nu hnenah chuan engkim ka hrilh vek a, ka pa thusawite pawh chu ka sawi ta vek.

 

“I pa chuan dawt a sawiin ka ring lo, engpawh nise hmuh ve ka duh hle mai. Kum hei leh chen a liam hnuah a hmel pawh ka la hmu ve lo a, I pa nena an intawn dante pawh zawh ka duh reng reng a ni” ati a, zanah ka pa chu ka be nghal a, a tuka kan ina kal turin ka ti a, ani pawhin min hnial lem lo.

 

Zan khuain Sawmzuala a reh a, keimah zawk hian tawrh hrehawm ka va ti ngat ngat tak. A number chu vawi engemaw zat ka hmetchhuak a, keimah leh keimah inhneh tumin ka bei tlaivar thak. Zing khua a var rualin ka tho a, ka rilru ipik lutuk tihreh tumin pawnah chuan ka tlan ta chiam a, ka hah hnep thlengin ka tlan a. A tawpah chuan ka chau lutuk chu ka thu ta hnawk a, au vak vak ka chak ber.

 

Ka pa rawn thlen chuan ka lo inbual zo chiah a, ka nu nen sitting room ah an lo thu a, u Mama office kal tur chu ka nuin rawn lut kawi tura a rawn tih vangin a rawn lut thla bawk a.

 

“Nautei pa maw I nih a, a u Mama ka nia” tiin a lo chibai mek a, u Mama hi chu ka chhuang ve veng veng thin.

 

Eng engemaw an sawi hnu chuan ka nu chuan ka pa nen an intawn dan a han zawt a, ka pa hmel chu a ngui deuh nghal rawihin ka hria.

 

“Nov ni 10, 1993 kha ka tan chuan ka khawvel inher danglam bawih ni a ni a, theihnghilh vang vang hi ka chak thin, chutihrualin khawvelah hian mihring fel famkim hi an lo awm a ni tih ka hriatna ni a ni bawk. Taxi khalha eizawng ka nih avangin hmun kilkhawr ber ber thleng pawhin ka tlan thin a, chutianga mi ka phurh pakhat vanga ka fanu nen inthenhran ngai ta pawh ka ni.

 

Zing atangin ka service a, dar 10 chho velah ka ril atam avangin in lam panin ka haw a, kan in ka thlen hma hian pa pakhat hian ka taxi chu tidingin hna hmanhmawhthlak tak a nieh thu sawiin ka motor hman chu min dil a. Ka rate te min zawh hnuah ka rate pangngai leta tlan tura min dil chuan ka hnar phal ta lo a, tichuan a hmun sawi lam pan chuan kan tlan ta a. Hetah hian enge kan tih tur pawh ka hre chuang lo, ka rindan chuan amah kha ka thlah anga, ka let leh mai turah ka inngai a ni. In pakhat kan va thleng a, nghah lawk a ngaih tur thu a sawi a, a rei vak lo ang chu tiin leh pawisa pawh min la pek loh vangin ka lo nghak ta a. Minute 10 vel ka nghak ang tihah chuan nula pakhat hi a rawn kai chhuak ta dawr dawr a, a rawn kek phei deuh nawk nawk bawkin ka hria. Chutia thawm an rawn neih deuh takah chuan an thenawm nupa niawm tak hi an rawn tlan chhuak ve ta nghal a. An buai ta nghal laih laih a, ka dinna atangin a hlat deuh vangin ka va hmu chiang thei vak lo a, an boruak thelh daih chu a ngai tih ka hria. Mahse, nupa an nih takin tih thuah anmahni chu ka han ngaichang leh a, chutihlai tak chuan ka motor hmangtupa chuan a bag atangin chemte a rawn phawrh chhuak ta mai a. Chu veleh keipawh ka motor atangin ka tlan chhuak a, va thelh chu ka tum a, an bul ka va thlen chuan nupa ka tih te khan a kutah an lo chelh bet a, an nu zawk pum zawnah chemte chu a dah tih ka hmuh rualin chet ka la vat a, chemte pawh chu a per nghal dawr a. Engtin chiah nge khatah khan kan awm tih hi ka ngaihtuah chhuak zo tawh lo, ka hriat leh chuan ka phurhpa chu leiah a mu a, a awmah chemte chu a invit bur va tih kan hmuh leh chu a ni mai. Chemte kha vawikhatmah ka va dek lo hrim hrim a, mahse, ka dek lo tih min hriatpuitu an awm tlat lo. Nupa ka va tanpui berte lah chu hlau hlawpin an inkuah ngawih ngawih bawk si a, thu dik hretu tur ber nula kha engtika laiin nge a lo tlan bo ka hre lo, a lo awm tawh hauh si lo a. Chutiang chuan tualthattua puh chu ka nita ringawt mai a ni.

 

I pasal kha vawi tam tak ka taxi a ka phurh thin a ni a, kan inhmelhriat ve viau. Khatia thiam loh ka chan takah khan chhungkhat min buaipuitu tur ka nei si lo a, ka neih hnai ber ka pate ate chhung lah chu Tahan lama an pemna a rei tawh si a. Ka mi rin ber I pasal chu rawn be pawpin tikhan intiamna nen ka fanu min enkawlsak ta a ni” a mittui chu a han tuai tawk a, ka nu ho chuan kan lo insut faih faih bawk a.

 

“I dikna hailan nan theihtawp kan chhuah dawn nia. Engpawhnise, thil awlai a ni hauh dawn lo a, mahse, Pathian hian thudik chu a rawn lantir ang tih ah innghat ila, kan dil bawk anga, hnehna chu kan chang em em ang” u Mama chuan a ti a.

 

Ka pa chanchin ka hriat chian takah chuan ka lainat kher mai, kum 27 chhung zet rilru leh taksa hrehawmin a lo awm tawh chu a ni a, thudik a lanchhuah hi a tul ka ti ve tak zet. Sawmzuala nena min pawt hrangtu thudik lo a nih piah lamah ka pa hian a dikna a hmuh let hi a ngai a ni.

 

Kan theih ang angin ukilte kan be kual ve a, chutimaia thil chinfel awlsam tur chu a ni hauh lo, khatih laia nula kha ka pa hian hmu se  chuan engkim hi a fel thluam in ka ring. Mihring lamah chuan bei a dawng duh khawp mai, mahse, kan tawngtai nasa bawk a, engtin emaw tak chhanna kan dawn hi ka ring tlat a ni.

 

Inchhung mamawh lei ngai a awm avangin bazaar lamah ka chhuak a, ka pa chungchangah ka buai ve tawk bawk a, thinlungah thi bik lo mah se Sawmzuala vanga hrehawm pawhin ka awm hman meuh lo. Ka na ta lo e tihna ni loin ka pa hi ka tan a pawimawh zawk miau a, ani chu tawrh theih a awm ve zawk zel. Zawmi dawr atangin ka chhuak a, ani hi veng danga pasal a neih tawh avangin kan inkawm thei tawh lo a, a dawrah erawh ka lang ve zeuh zeuh tho. Chutia dawr atanga ka pen chhuak chiah chu Sawmzuala ka hmu hlawl, polythene ah engemaw a khai bawr teuh a, ka hmuh rualin ka ke pen a tawp deuh chat a, ani pawhin min rawn hmu ve vat. A ka chu a han ang deuh zuau a, chutah a mitmeng chu danglam zawkin a kal ta nal nal a, a kal liam tur chu ka thlir zui tawk tawk. Min rawn hmuh tirha min ngaihtuah zeta min melhna kha ka hmu hman a, reiloteah min hre ngai lo melhin min melh leh anih kha, a tan engmah ka huam ve lo a, ka kalsan taa min ngai chu tawrh hrehawm ti ve tho mah ila min kalsan ve theihna tur a nih chuan ka paltlang luih a ngai si, ka inring hman lo, ka mittui chu a rawn baw ta zawih a.

Note: Hmm.. Episode 20 ah chiah chiah kan titawp ang