EUPHORIA 20

 

20

 

Ka beisei ang leh ka duh dan angin thil chu a kal zung zung lem lo. Ka bei erawh a dawng mai bik lo, engtin emaw tak thudik hi a lang ang tih ka ring ve tawp a, ka nghak deuh vang vang a ni deuh ber. Ka nu min tirh angin office pakhat dawr turin min ti a, thawktute an hmanhmawh lo deuh nge nileng hun ka hmang a ni deuh der mai. Ka hun chu ka ui viau na a tihngaihna tak a awm si lo a. Ka scooty tlan loh ni a nih vangin taxi in ka kal a, tunah pawh taxi changin ka ding ran a, ka rin aiin a vang phian lehnghal. Minute 5 hnu velah chuan pakhat a rawn tlan a, ka lo phar vat a, ka bulah a rawn ding ve nghal zat a. A khalhtu ka han en chuan Sawmzuala a lo ni, ka han tim deuh na a a hnungah chuan ka chuang lut ta tho.

 

“Inah I haw tlang dawn em?”

 

Front glass atang chuan min rawn melh khiau a, ka lu chu ka lo bu nghat tawp. Ngawi rengin kan tlan mawp mawp a, ka phone chu khawih tur bik pawh hre lo in ka kheuh ka kheuh ringawt.

 

Kan veng kan thlen dawn chuan ka rin loh deuhin a tlan tlang a, ka hawi phei hu ringawt.

 

“Tinge?” ka ti ringawt a, min chhang lo. “Sawmzual, ka chhuk duh ania” ka ti a, a nui suk ringawt.

 

Kan tlan zel a, an veng lamah kan tlan tih ka hria, ka rilru chu a hah tawh lutuk, ka han thaw deuh hawk ringawt a. An gate ah kan tlan lut thla zel a, ka thin chu a phu dup dup, a nitei nen inhmachhawn ka duh tawh lo.

 

“Lokal rawh le” tiin kawngkhar a rawn hawng a.

 

“Kan inah min dah rawh” tiin ka thu tlat a.

 

“Pawm chhuah kher I duh pawhin ka pawm thei tho che a” tih pahin a rawn kun a, ka lo tawlh dawrh. Duhthlan tur a awm tawh lo, ka chhuak ta nge nge. Ka kutah a rawn vuan a, min kai a, an in chhung lam chu min panpui a.

 

“I lo haw tawh elo” tih ri kan hriat rualin a nitei a lo lang a, min hmuh chuan a nui hmel a tawp hmak a, mak tih awm tak hian min en bawk.

 

“Khawnge ka pa?” Sawmzuala chuan min la vawn reng pah chuan a ti a.

 

“A room ah” tih chiahin min chhang a, a kalsawn.

 

Inchungah min chho pui a, room lo awm hmasa berah chuan min luh pui a, Sawmzuala pa chuan lehkhabu a lo chhiar a.

 

“Ehe, Rini, I lo leng a ni maw?” tiin hlim hmel deuh hian min lo bia a.

 

Ka chhan hmain Sawmzuala’n a lo chhang a, “Pa, Rini hi ka haw tir tawh dawn lo” a lo ti.

 

‘Engmaw?” a pa nen chuan kan ti rual thawt a.

 

“Rini ka neih theihna tur a nih chuan hmundangah pawh kan awm mai ang. Ka nitei’n a rilru a thlak dawn lo a nih chuan keipawhin ka thlak dawn bik lo” a ti a, ka tah a lo chhuak tawp.

 

“Thu phawt teh u” tiin min han hui a.

 

A pa thutna epah chuan min thutpui a, ka talchhuah hlau awm tak hian ka kutah min vuan tlat a, awmdan tur ber pawh ka hre lo.

 

“I nitei chu han ko ve phawt la” a tih chuan Sawmzuala chuan min melh a, “Eng pawh sawi se ngaithla liam mai mai ang che” a ti sup a.

 

Inhnuaiah a chhuk a, rei pawh a awm lo, a rawn lut chho leh nghal a, ka bulah a rawn thu a, reiloteah a nitei pawh a rawn lut.

 

“Bawiha hian Rini neih a ngen tlut tlut a nih hi” tiin a pa chu nelawm zetin a nui a.

 

“A theih loh ka tih kha” a nitei chuan a ti a, min rawn melh deuh ram a, ka lo kun daih.

 

“A theih loh chhan te chu han sawi la, Rini pawhin insiamthatna tur a neih chuan a insiam tha hreh tawp lo ang. Hetia puitling lo deuha thil kal tir hi a tha ngai lo e” a pa chuan a lo ti charh charh a.

 

Chutih lai tak chuan ka phone a lo ri a, ka nu a lo ni.

 

“Chhang rih lo mai rawh”Sawmzuala’n a lo ti a, ka phone min laksak.

 

“Ka u, ka pasal thiha mawhphurhtu kha I monu tur pa a ni tih hre ta la, I rilru a dang ve angem?” a nitei chuan a rawn tita a, ka lo ip chawih.

 

“Eng maw I sawi?” Sawmzuala pa awki zawi deuh, hlauhawm deuh si hian a lo ti.

 

“I fapa in ‘a telloin ka awm thei lo e’ a tih hringtu khan ka pasal nunna a la asin” a ti vin ta tuar a.

 

“Dawt” Sawmzuala chuan a lo ti sap a.

 

“Ka pa in tumah a that lo, lamtang a neih that loh vang chauhin a tuar a, tual a that lo” ka lo ti chuai raih a.

 

“Ngawi rawh, nang kha, kan sawi fel vek tawh a ni lawm ni?” a nitei chuan min rawn kawk a. Sawmzuala pa chuan a awm zawn a dawm vang vang.

 

“Engpawhnise, Bawiha, Rini chu va thlah phawt la, kan sawi tha leh dawn nia” a ti a.

 

“I rawn hruai lut dawn anih chuan kei hi ka chhuak ang” a nitei bawk chuan a lo ti leh a.

 

“Ka pa’n thiam a chan ni chuan ngaihdam min la dil ang” tiin a nitei chu ka melh ngar a, ka ding chhuak bawk a, ngeiawm zet hian a lo nui.

 

“Sawmzual, min va thlah rawh le” ka ti a, chesawn chuang miah lo hian ka kutah a rawn vuan a.

 

“Ka pa, I thu hi vawikhatmah ka la hnial ngai lo, a vawikhat nan hei hi ka dil ve duh che, Rini hi neih tir min phalsak rawh” a tita a. A pa chu a thaw chhuak ham ham a, a fapa a hmangaihzia ka va hmu thei.

 

“Bawiha, I duh miau si chuan ka dan theih I ni hleinem, mahse, I nitei hi keimah ang bawka I zah phu a ni a, kan pahnihin min enkawl a, engmah a sawisel ngai lo. Tuna a dodal chungchangah cheu pawh hian Rini a duh loh vang a ni lo a, puitling in nia, in hriat vek kha. Engpawhnise, Rini pa chu kawm ve phawt ka duh e” a tita.

 

“Ka u” a nitei chuan a lo ti leh tuar a.

 

“Chu chu ka thutawp a ni rih e, ka room atangin in chhuak thei ang” a ti a, kan chhuak ta a.

 

“Min then hi lo rilruk ngai tawh reng reng suh aw, ka then ve ngai dawn lo che” motora kan luh chuan a ti a.

 

“A chhan I hriat hunah chuan min kalsan tho tho ka lo ring asin” ka tih chuan a nui ri hak a.

 

“Nangmah hi tualthattu pawh lo ni la, ka hmangaih tho ang che, chu chu I hria tiraw?” tiin ka khabeah a rawn dawm a, ka lo bu nghat a.

 

“I mitmengah hian min hmangaihzia ka hmu thiam ve tho ania, thil dang vang mai mai chuan inti na tawn lo ang” a ti leh a, ka mittui a rawn tla a, ka nui hak bawk.

 

In ka thlen chuan ka roomah ka tlang a, thil tam tak ka ngaihtuah hnuah keipawhin Sawmzuala kalsan chu ka tum duh ta lo. Min hmangaihzia ka hria a, engvang maha kan inthen hi ka phal tawh lo. In a thlen rual rualin min rawn call leh nghal a.

 

“Ka bula I awm loh lai pawh khan min then kha chu lo ngaihtuah buai tawh suh ang che. Ka pa in a phal emaw phal lo emaw ka nei dawn tho tho che” a rawn ti leh a, ka lo nui tawp.

 

U Mama te inah ka chho a, u Feli a lo buai si a, ka han pui leh lawp lawp a, kan monute hi ka chhuang thin, hetia an pasalte farnu tak tak ka ni lo tih an hriat hnu pawh hian min endan a dang lo mai niloin min hmangaih zual sawt ni hian ka hria, mo fel leh fel lo kar hi a lo hla thei dawn mange ka tih fo phah.

 

“Naute, nichin khan Sawmzuala’n a lo thlah che mi a?” a ti a.

 

“Um.. an inah min hruai a, a pa leh a nitei bulah min neih tur thu leh an duh lo anih chuan a chhuah tur thute a sawi maw le” ka ti a.

 

“A hmangaih ve tak tak che a lawm, I vannei lutuk, a fel bawk sia e” a ti a, ka lo nui deuh sung.

 

“Min hmangaihtu hi an hlu a” a tih leh chuan, “Keipawhin ka hmangaih tho alawm” ka lo ti a.

 

“Nang chuan I then thawt thawt kha aw” a ti a, kan nui dun ta a.

 

“Tak takin maw u Fel, ka pa hian a nitei pasal kha lo that tak tak ta se chuan hmangaih viau mah ila ka nei lui miah lo ang. Mahse, ka pa hi ka ring tawk a, chuvangin Sawmzuala pawh hnar ta lo ka nia. Tu in nge mahni pasal thattu nena chen dun duh ang? a nitei pawh hi ka haw chuang lo, thudik a hriat hunah a la dam ve mai ang” ka ti a.

 

“Zan tin hian  I u Mama hian chhung inkhawmah hian I pa in dikna a hmuh ngei theih nan hian a thawh ziah a, kan tawngtai ziah alawm” a ti a, ka kutah a rawn vuan a, “Nang pawh beidawng lo la, thudik hi chuan lanchhuah hun a nei zel a nia” a ti a, mittui karah ka nui ta sak a.

 

Chutiang chuan hun a kal ve zel a, Sawmzuala pawh kan inah a rawn lang leh ta zut a, a pa duh ang erawh kha chu chuti maiin ka pa in rem a lo ti ve lo. Kum 27 chhung zet hrehawm a tawrh phahna in chu hmuh a chak loh thu leh nakinah a dikna hailan hun a awm a nih chuan a la kal chauh tur thu a sawi a, tuman nawr luih kan tum lo.

 

Ka phone a rawn ri ral ral a, chhuat ka nawh laklawh avangin ka va la thei lo a, a rawn rik nawn sek takah chuan ka thil tih lai dahin ka room ah chuan ka lut phei a. A lo tawp leh chiah. Ka han en chuan  u Mama a lo ni a, call back tuma a number ka hmeh dawn chuan a lo call leh a, ka lo pickup ve vat.

 

“Naute, thil mak lutuk a thleng a nia” tiin phur em em hian a rawn tawng a, a hah hmel viau lehnghal.

 

“Enge a?” a ngaihna hre lo zet hian ka lo ti a.

 

“Sawmzuala nitei pasal thattu a inpuang a, case kan reopen leh dawn” a rawn ti a.

 

Ka lo au chul ringawt.

 

“Ka rawn haw ah ka sawi chiang dawn nia, I pa kha call la, kan inah lo phei ve rawh se” a ti a, ka lawm lutuk chu ka mittui te a tla zawih zawih.

 

Ka pa chu ka han call a, ka call sual deuh nawk nawk. Kan ina rawn kal vat turin ka ti a, thil dang ka la sawi duh lo. Inhnuaiah ka chhuk thla a, ka nu bulah chuan ka sawi deuh thuak a, a lo man ve mai.

 

“I pa Ruata ka’n bia ange” tiin kan ukil biak ve fo kha a be zui nghal a. Ka hlim lutuk chu tih tur ber pawh ka hre lo. Sawmzuala ka call a.

 

“Lo phei ve la” tiin u Mama thusawi chu ka han hrilh chhawng a.

 

“Aw le, huan atangin ka rawn chhuak dawn chiah a, ka rawn tlang ang” a ti a.

 

Veranda ah te chuan ka han dak voh voh a. Kan tawngtaina chhana awm ta hi mumangte pawh a ang rum rum zawk alawm le. Inhnuai lam chu ka han hawi thla a, kan kawta motor ding chu u Mama tih ka hria, ani pawh a che reng reng a hmanhmawh tih ka hria.

 

U Feli nen inchhungah an rawn lut rual a, ka lo za deuh sek.

 

“Khawnge ka nu?” u Mama chuan a ti a, ka nu ko turin an room ka pan nghal.

 

Ka nu nen chuan sitting room lam pan chuan kan inzui a, u Mama hmela phurna chu tupawhin kan hmu vek ang.

 

“Vawiin chu thil mak em em mai a thleng a, a mak lehzualna chu kan station khera thlenga nih vang a ni bawk a. Nautei pa thusawi kha ka bawhzui nasa khawp a, khatih laia thil thleng kha ka theih ang ang chu ka dap kim in ka hria. Kan pute ho pawh ka be rawn pah ve reng a, nangni pawhin in hria anga, chumi maiin kum 27 liam tawh thil thleng hi a fel duak lo ang tih chu. Mahse, kan tawngtai nasa bawk a, chhanin a awm ta tih hian a sawi fel ber awm e.

 

Vawiin report kan dawn bawhzuiin chawhma lam ka chhuak a, ka inching fel zo ka let leh kha Pu Johana thattu nia insawi a rawn in report e an tia, chu veleh ka tlan lut ve nghal a, I pa in nula awm ve, pu Johana(Sawmzuala nitei pasal kha) nena inpawt buai a tih nu kha a lo ni a. Khatah khan I pa in nupa lo awm ve te a buaipui lai tak khan a lo vit ta a ni awm e. Chutiang vel chu thil thlen dan chu a nia, kum 27 chhung rilru nuam lo leh mahni inthiam lo reng rengin hun a lo hman tawh thu te, I pa tan tirha inpek tuma police station pawh a kal thin thute, a ngam leh loh thute a sawi ta vek a”

 

 

Chutiang thu a sawi chhung zawng chuan ka mittui ka lo hru a, kum tam tak liam hnuah ka pa in thiam a chang ve dawn ta, tualthat case a lo awrh tawh chu nawr reh a ni dawn, chu thu tluka hriat nuam chu a awm leh tawh ngai lo ang. Sawmzuala’n ka banah a lo hmer vawng vawng a, ani pawh a mittui a parawl ve kuangin ka hria.

 

Ka pa a rawn thlen chuan thingpui lum turin ka tho chhuak a, Sawmzuala’n min rawn zui ve a.

 

“Ka lawmpui lutuk che” tiin ka chalah a rawn fawp a.

 

“Ka mumang chu a ni lo tiraw?” ka han ti a.

 

“Mumang mai mai chu ni lo e” tiin duat zet hian min kuah a.

 

“Ka nihna ang anga min pawm vangin ka lawm e aw” ka ti a.

 

“Ka nihna ang anga min pawm hmasatu I ni alawm, ka hmangaih lutuk che” a ti a.

 

Thil chu a thleng duak duak a ni ber, court in ka pa thiam a chan tir a, kum rei tak thudik lo vanga a lo tuar tawh vangin zangnadawmna sorkarin a pe bawk a, chung zawng zawng ai chuan a hmingchhiat tawhna nawhreha a awm ta chu kan lawm ber zawk.

 

“Zaninah palai an rawn kal dawn kha aw” Sawmzuala nen kan inbiak chuan a rawn ti a, tunah  chuan ngaihngam takin pasal ka nei thei ve tawh ngei ang.

 

December ni 20 a pasal nei tur ka ni ve ta reng mai, ka hun kal tawhte ka thlir kir a, ka lo paltlang ve nasa malh malh hlein ka hria. A chang chuan paltlang zo loin ka tlu mai dawnte khan ka hre thin a, min pawttho leh thintu hi tudang an ni lo, tling lo tak chunga  a rawng ka bawl ve thin Pathian hi a ni tih ka hre chiang a, chuti ni lo se chauin ka tlu tawh ngei ang.

 

Ka lo suangtuah ngai reng reng loh min hringtu pa ngeiin ka pasal neih niin min din pui ang tih chu a takin alo thleng a, ka pa thi ta erawh ka ngaih a zual kher mai. Ka chhungten min tuam mawiin min thlah ropui a, mi hausa fanu ang maiin min sawng bawl a, lawmna tur hlir a ni.

 

“I rilru ka lo tihnat tawhna leh ka chet dan zawng zawngah khan min ngaidam dawn nia” tia Sawmzuala nitei ngaihdam min dilna pawh chu ka pawm thlap a, keini pawh ni ila kan tih ve tur tho a ni a, ka dem reng reng lo.

 

A kiangah chuan ka him a, ka hlim a, ka pasal a ni ta mai hi ka lawm em em bawk. Kan inkar hi a fel thluam bik hauh lo a, chutichung chuan min beidawnsan ngai lo. Ka hlimna leh lawmna min thlen sak zawng zawng hi ka rul sengin ka ring lo a. Ruihhlo ngaiin an ruihhlo an ruih nawmna an tem a an hlim veng veng ang mai hian ka pasal Malsawmzuala bulah hi chuan ka hlim veng veng fo a, rei tak min dam pui se, kan hlimna hian chuai ni nei lo se tih hi ka duhthusam a ni.

 

*Tawp tawh mai rawh se aw, a phuai luai nuaiin ka ring, mahse, tihtawp ka duh tawh si, tawt chung chungin kan hnawh lui te pawh ti ila adik awm e.

 

Min chhiar sak a, comment min pe rengtute, nangmahni vang hian thuziahte hi a nuam a, phurna min petu in nih vangin in chungah ka lawm em em a ni.

 

Pathianin rem a tih chuan naktuk zan atanhin Thawnthu thar nen kan inhmu leh dawn nia*