EUPHORIA 6

6

U Mama nen ka pa buhfai leh chawhmeh vel pe turin huan lam kan pan a, kar tir atanga a riak kha rawn haw hman a la inti lo a, han khap chiam tum pawh hian a tih hi chu ti lui ve tlat chi a lo ni bawk si a, kan khap hlei thei lo. Tun tum phei chu hlawhfa pawh la loin huan enkawltute chhungkua nen an bei tawp a, an chau viauin ka ring. Nidangah chuan huan pawh hi ka tlawh ve ngai mang lo, ka kal turah an dah lo tawp thin. Chutiang khawp chuan ka tui pui ve ngai lo a, tunhnaiah erawh ka tui thar ve deuh tlat. Ka pa vanga nuam taka awm kan nih hre reng mah ila ka phur pui hluai ngai lo hrim hrim a, ngaiah min nei ve tawh a ni ber.

“I U Tetea pawh a rawn haw dawn a” U Mama’n a ti a, a rawn haw thlak na kha a la rei lo viau sia, chutia a rawn kal leh vat tur chu a mak zawk. Mahni hnathawhnaah nghet taka awm a, a tul ah lo chuan haw lo tura ka pa min zir tir thin kha anni pawhin an ngai pawimawh ve thin. Chuvangin training tur emaw, office thil ni loa an rawn haw hi chu krismas a ni mai. U Thantea phei chu krismas ah a rawn haw deuh tawk tawk thin, chutiang khawp chuan an awmna lamah an rilru a nghet a, rawn haw fo tur pawhin kan beisei lo.

“Hmanni lawkah a rawn haw sia” ka ti satliah a.

“Nia, ka mit checkup a hun a tia lawm” a tih chuan ka lo nui ru ver ver.

Mimii nen hian inzawmtir  leh hi ka tum nghet bur, inhmangaih tak chunga hetia an awm hi hmuh hrehawm ka ti, thu kal dik lo a awm hi ka ring deuh tlat. U Tetea hian ngaihdam harsa a tih chhan hi hriatchhuah ka duh, a lo tisual tak tak anih pawhin hmangaihna vang chuan a ngaidam thei turah ka ngai.

Tomato ka lawh mawlh mawlh lai chuan Sawmzuala ka hrechhuak thut a, huan lama a kal ve tho ka ring. Ka phone chu la chhuak in ka videocall ta a, ka rin ang ngeiin a huanah a awm.

“I feh ve elaw?” a tia, min rawn nuih var var.

‘Ka tomato pawh a rah tha tawp a, thawhtan lama lawh an tia, kan ei tur ka lo mai mai a” ka ti a.

“I tomato nge I pa?”tiin min han fiam a, a nghal ve thei a nia.

“I tawng thei lutuk aw” ka tih chuan a rawn nui chhuak hawk hawk.

“Vawiin chu ka zawi lutuk a, ka thawk tha peih vak lo a, hei thlamah ka mu mai mai rih” tih pahin thlam chhung vel chu a rawn ti lang a.

“Haw hma la, nuam lo chung chuan tilui lo la” ka ti a, ka ngaihtuah ru ve reng. A mak ngawt mai, engtiklai atang khan nge ka lo ngaihven viau tih pawh ka hre thiam lo.

In kan thlen chuan khua a thim tawh, U Mama’n a thawh pui ve vangin kan haw hma thei ta lo a, kan inbual sawk sawk a, chaw kan ei nghal. Chaw eikham chuan room ah ka awm a, khumah ka mu zal vel mai mai. Ka kawng a kham ve riau a, inkhawm pawh ka inkhawm peih ta lo mai. Ka lo chhing sek a niang ka phone riah ka harh a, Ruatdika a lo ni.

“Tinge I inkhawm loh a?” a rawn ti.

“Nia, ka feh chau ve deuh a” ka lo ti mai a.

“Hei thingpui kan lo in dawn sin, in kawt kan lo thleng tawh” a ti a, ka ner sak.

“Awi, naktuk lamah lo in mai ru, ka mu tawh sin” ka ti a.

“Over miah suh hei chen kan lo kal ve a” Victor-a, Ruatdika thianpa chuan a rawn ti a, ka ngawi roh roh.

“Kan lo lut” tih pahin phone a dah daih, ka va ngei mai mai tak.

A nihna takah chuan kan inthen tawh a, inhmuh a inbiak fo hi ka duh lo. Kan inthen anih chuan inbiak zui hi tul ka ti lo a, inhmuh nikhuaa inbiak lumlam hi tawk ka ti viau. Chutia an rawn kal luih tlat chuan thawh loh theih ni hek lo, ka han tho ta nge nge a. Room atanga ka chhuah chuan sitting room ah an lo thu a, Victor-an min lo nuih vur vur.

“In mak ve e, ka chau ka ti mawlh mawlh kha” ka han ti hlak hlak a.

“Aw, kan hmu ve chak che alawm a” Victor-a chuan thawveng zet hian a ti a.

“Hmuh chak chhan tur ka awm lo emai” ka lo ti ve kher.

“Khawnge I chhungte?” Ruatdika chuan a ti a.

“Ka pa huanah a riak a, ka nu hi U Mama te inah a chho niang. Sangbawihi(ka nu nau fanu kan ina lehkha zira awm) lehkha a zir aniang” ka ti a. “Thingpui chu ka’n lum ange” tiin ka tho nghal a.

Thingpui chawi phei chungin ka phei leh a, phone an lo bih dun ngar ngar. Ruatdika chu ka melh zawk a, zep miah lo chuan ka ui ve thlawt. Mipa mahni lu zo veh vawh, tum ruh ve em em, lehkha lamah pawh ti thei ve tawk tak anihna te, a hmel zahpuiawm lo zet leh invawng tak a nihna te hi ka lo chhuan ruk ve em em thin kha ania, ka tan a ni ve ta lo hi chu ka na ve fo.

“Tunlai in buai em?” tia min zawh chuan ka va melh a, min lo melh deuh run.

“Buai a ni mai ang chu, buai loh tak tak hi kan nei vak lo” ka ti a.

“Tunge I thawhpuinu, I kawm ve deuh ber, status a I rawn hman thin kha” Victora’n a tih chuan Mimii tih ka hre nghal. Mimii a nih thu ka hrilh a, “A chhe lo reuh phian” a ti zui ham ham a. Victor-a hi chu a thawveng ve a, engah vak mah a thusawi hi chu kan ngai duh ngai lo.

Rei thu tawh loin thingpui an in zawh chuan an haw ve ta a, keipawh ka room lam ka pan leh nghal. Ka rilruah Sawmzuala a awm deuh reng a, chhuna ka biak khan a aw kha a chauh hmel riauin ka hria. Ani hi a thawk nasa lutuk a taksain a zo lo anih ka ring. Whatsapp ah ka lut a, a last seen pawh chhuna kan inbiak hun lai vel kha a ni daih, engtin emaw tak hian ka ngaih a tha zan lo. Mahse, biak erawh chu ka be ta lo, ka rilru hi ka tilang dawn mah mah hian ka hre ve a, engahmah min lo ngaih loh phei chuan a zahthlak dawn emai. Ruatdika nen ka mitthlaah an rawn lang a, an mizia leh an hmel engkim hi a inang lo vel vek. Ruatdika hi chu zahawm deuh khap, zahawmna ngaipawimawh chi a ni a, amah pawh hi ti deuh thlip thlep chi a ni. Sawmzuala erawh chu rilru zau tak, hlim thei tak, englai pawha hmel hlim hmuh tur awm reng a ni a, a hna a zahpui ngai lo. Tlangval a la ni ve a, chutichung chuan kuthnathawh a zak ngai lo. Tupawh abulah chuan kan leng halh a, a zaidamin a mizia hi a dam thlap mai a ni. Mize inang lo em em pahnih ka nunah an lo lang a, Sawmzuala nen chanchin sawi tur nei lo mah ila ka tan erawh a special em em tawh. Chu chuan a mizia in min hip zia chu a hriat theih awm e.

Sunday nilengin Sawmzuala a la reh, ka insum thei tawh lo, ka call ta ringawt a. Nutlingin a lo pickup chuan ka dah leh daih tep.

“Sawmzuala a biak theih em?”inthlahrung fe hian ka ti a.

“A nuamsam meuh lo a, nizan atangin a khua a sik hluah mai a, hei a mu char char a”a rawn tit a, ka rin dan ang chiah a ni.

Ka rilruah a awm zui vang vang, nimina kan inbiak lai pawh khan a nuam vak lo tih a sawi a, engtin nge a haw kawngah te a awm ang tih ka ngaihtuah a, ka khawngaih reuh lutuk. Zawmi’n zan inkhawm turin min rawn sawm a, kan kal tep tihah Mimii a rawn lang heu. A mittui a tla deuh pur bawk si a, kalsan chi ah ka ngai lo, Zawmi chuan min kalsan ta a. Ka room lamah Mimii chu ka hruai a, a mit chu a bui deuh chuk.

“I nu bawk em ni?” ka tih chuan a lu a thing a, a ngaihna ka hre lo viau mai, bialpa a neih awm ka hre si lo a.

“Aw le, awm hahdam la, min hrilh dawn nia. Ka’n inthlak leh mai ange” ka ti a, ka inthlaksan ta a.

Ka inthlak zawh chuan ka lukham bawhin a mittui chu alo hru a, ka khawngaih thei reuh emai.

“I inpeih tawh em?” tih pahin a bulah chuan ka mu thla a.

“Im.. U Tetea nen kan boruak vel ania. Heta kan inhmuh hnu khan ka rilruah a thar tawp a, zak chung chung leh inthlahrung chungin ka han bia a, ka rin aiin min lo dawngsawng tha, ka rin phak bak a nih chu. Chuan, kan inbe leh ta zeuh zeuh a, ani pawhin min theihnghilh bik lo tih ka hria, min lo biak dan velah, mahse, mi ngai dik lo laklawha, thil  a fel thei tak tak lo a” ti a, a nui lui deuh sak a.

“Um, chuan?’ ka lo ti a.

“Ka sawi hreh lutuk hei tak hi chu, mahse, ka sawi ngei ngei a ngai sia. U Tetea lakah khan nau ka pai a” a tawp chawt a, ka lo meng phawk nghal hru. “Thla hnih ka pai hman a, ka chhiat leh a, chu chu tun thleng hian ka ti tlaah a ngai a, ka rilru hi a na ve asin” a ti a, a tap chhuak ta hawk a, a darah ka lochul a, ka khawngaih lutuk.

“Engvangin nge I titlaah a ngaih?” ka ti a.

“Khatih lai khan kan collegeah min ngaizawng nasa deuhtu hi a awm ve a, u Tetea bulah khan min lo hek char chartu an lo awm a, ka kawp angten an lo hrilh a, kan buai kan buai ve a, khatia nau ka chhiat takah chuan amah kalsan tum vanga titla ah min ngai ta tlat a, kan boruak kha a tha lo chho a, min ring lo lutuk kha ka rilru na ve sia, keilahin kan inkar siamthat ai chuan runluih kha ka chak ve tho a, atawpah chuan kan inthen ta hial a ni. Ka hmangaih em em reng a, mahse, thudik hriat tum loa min kalsan theih vang khan amah ngaia hnunglam hawi kha ka tum bik lo, mahse, vawiin thleng hian ka la theihnghilh ngai lo” a ti ta a.

Chuti teh hrepa hmangaihna vanga an lo tuar chu ka khawngaih a, hrehawm ka lo ti ngawih ngawih. Ka tawrhna chu ka hmu nep nghal vek a, itsiktute vanga inhmangaih em emte inthen a ngai chuan ka thinlung hi a lo tina veng veng.


'U Tetea chu keiman ka be dawn aw?"ka ti a.

'Aih, a thinlunga ser hi a reh tawh dawn lo, min rinna tak tak a neih theih tawh loh chuan ka na tho tho dawn a, khatiang tawrh hrep kha ka peih tawh lo" a ti sap a.


Tukverhah chuan ka dak a, Mimii muhil bam chu lainat zet hian ka va melh leh zawk thin, an inkar siamthat hi ka tihtur dik tak a ni tih ka hrechiang tawh. Ka phone a rawn khur cher cher a, ka han en chuan Sawmzuala a lo ni. 


'Hello" zangkhai thei ang berin ka lo ti a.


'Vawiinah min lo call ni maw?" hlim tak hian a rawn ti a, hepa hi chu a va danglam tak. A nat lai pawhin awka hlim takin min chhawn thei reng bik a.


"Enge i an tawh le? " tiin ka lo zawt a.


"Ka tha tawh lutuk, damdawiin min chhawk ve a, ka nuam huai tawh mai" a rawn ti a.


"I taksa dim nachang hria la aw, tiang kha chuan i tlin lo vat dawn nia" ka tih chuan a nui hak hak a.


"Min ngaihtuah tih hriat chu a nuam lo lem lo e" a ti a, ka lo nui ve sak.


"Muthilh leh vat tum la, naktuk zingah dam takin i tho dawn nia" ka ti a, min chhang mai lo.


"Rin.."


'Umm"


"A.. nidangah zawk a ni mai" a ti ban leh deuh charh, ka nawr lui duh bik lo. Kan in mangtha hnuah ka mu ve ta a. 


Whatsapp message rawn thleng chu amah tho anih ringin ka han hawng vat a.


*Chance min pe leh thei angem?*


Ruatdika message zawk a lo ni.


Note: August thla-a ka hlawh $20 vel chu ka chân ta vek mai, rilru nat thlak, ka ni nghulh😪 Ziah zel châkna te pawh a bo mai alawm le.. engpawhnise kan bei hram hram aniang chu 🥴