EUPHORIA 7

7

Ka nuin min rawn kaitho a, zan lam ka mut that loh vangin zing lamah ka lo muhil deuh chauh a, thawh ka hai phah. Chaw ei an lo siam vek tawh a, ei chakna pawh ka nei lo. Ka nu ngaih that nan tlem chu ka ei a, ka inbual sawk sawk a, tlai hlau zetin ka chhuak nghal. Ka pa mamawh leisak ngai a awm nual a, chu pawh ka haw lama ka tih mai loh chuan hun ka nei tawh lo.

“Nakinah thil hrilh tur che ka nei” office chhung ka luh pahin Mimii chu ka va bia a, min lo nuih seih.

Nilengin kan buai a, zan lam mut that loh nen ka rit deuh luk mai. Mimii pawh calls turin a chhuak a, kan buai dun ve viau mai. Tun thla chu target a sang deuh a, rilru a hahdam lo deuh. Ka hna piah lamah buaina neuh neuh ka lo nei ve bawk si hian ka hna a nghawng lo thei lo. Dar 6 velah haw turin ka insiam a, Mimii’n min rawn call chiah.

“U Rin, ka rawn let leh duh kher angem?” a rawn ti.

“A ngai tawh lo ang, hei ka haw dawn chiah” ka ti a.

“Enge min hrilh tur kha?” a tih chuan sawi mai ka tum a, mahse, chutia phone a han sawi mai chu ka duh leh lo.

“Naktukah zawk a ni mai” ka ti leh ta rih.

Ka pa mamawh lei ka la ngaih bawk si avangin ka chhuak zui nghal a, garage atanga ka tlan chhuak chiah hi traffic jam karah Sawmzuala a rawn nui var var. Ka scooty lam pawh ngaihsak ta lo chuan ka ban ka lo vai pek a, a ri dawt a, ka tlu nghal tawp. Khawvel chu a thim vek mai hian ka hria, ka zak lutuk chu khuk ral daih ka duh.

“A na em?” tih ri ah ka hawi chhuak ngam tawk a, Sawmzuala chuan rem leh rem lo hian a motor chu a hung tha a, traffic police in a rawn hau nghal bawrh bawrh bawk. Ka ding dawn a, ka ke chu a na ve zawk zawk.

“Sir, scooty hi khutah khuan ka zu dah thla anga, amah hi ka phur haw mai ang” Sawmzuala chuan a ti a, traffic police pawh chuan a phal ve mai. Kan office lamah ka scooty chu min dah thlak sak ta ringawt, ka va han zak chiang ber tak!

Sawmzuala chuan min phur haw ta ringawt, kawng tluanin ka ngawi a, min rawn nuih leh deuh suk zel chu ka ngei ru tawp.

“Nangmah vang a nih kha” kan veng kan luh tan chuan ka ti chhuak ta nge nge.

‘Nia, ka inthiam lo khawp mai. Mahse, a nuam” a ti daih.

“Ka tlu I hmu kha maw?” ka ti lo vin hlur a.

“Aih, hetia ka thlah haw che a ngai hi maw le” a tia, a nui leh var var. Ka hmui ka lo tihpawrh khum a, min rawn melh leh a, a mitmengah engemaw ka hmu zawk.

“Ka pa in thil min chah teuh asin le” ka ti nuah nuah a, “Engati nge nichin khan I sawi loh? Kan va let leh dawn mi?” a ti a.

“A ngai tawh lo mai, ka ke hi a na tawh emai. Vawiin I hnathawkte chu I chau em? I dam kawr chauh sia, I lo feh leh hmanhmah a” ka ti hlak a.

“Engvak mah ka thawk hleinem, huan ka va hmu chu ka dam sawng sawng zawk asin” a tia, a then sak a. Ka pa ang chiah, ina awm ai chuan huana kartluana awm nuam ti zawk kha a nia, ka lo ner nang. Ka nu ka ngaihtuahnaah a rawn awm nghal zat, ka pa hian kan hriat theih tirh pawh hian sorkar hna a hmu reng a, mahse, huan siam a thlang zawk anih kha. Ka nu nen pawh an boruak a that loh reng phah a, a kum tel chu boruak tha lo zetin kan hmangho tihte pawh ka la hre reng.

“Kan thleng ta”tih riah ka harh chhuak zawk a, Sawmzuala chu chhuakin kawngkhar min hawnsak a, ka bai saih saih mai. A tira na vak lo kha a na ve viau tawh. Inchhungah min kai lut a, Sangbawihi leh ka nuin mak tih hmel zet hian min lo en dun reng ringawt. Ka ke ka tihnat thu Sawmzuala’n min sawi sak zung zung a, ka tluk dan chiah kha chu a sawi duh bik lo.

“Sawma, Mama a awm bawk si lo a, biak in bula Pu Rema min va panpui lawk mai te che” ka nuin a ti a, Pu Rema chu ruh hmeh thiam a ni. Sawmzuala ho chuan Pu Rema chu kan va pan a, ka ke chu min lo hmeh rem sak a, ka ulh tih a sawi bawk. Ka tum loh deuhin ka inti na chu a ni reng mai, office kan buai zual lai tak a ni lehnghal a, a tihchi viau loh.

“Ka tibuai hle mai che vawiin zet chu” zana Sawmzuala’n min rawn call chuan ka lo ti a.

“I tana ka buai ve thei chu ka lawm hle zawk alawm” a ti dam leh dap a, a bulah hi chuan ka thla a muang nghal huai zel.

‘I chau awm sia, mut hma te tum la aw” ka ti a, a rawn nui ri hak, “Enge?” ka lo ti nghat a.

“Min ngaihtuah hmel deuha min biak hi chuan ka danglam vek zel” a ti ve ngei.

Rei vak lo kan inbiak zawh hnu chuan kan in mangtha ta a, ka phone chu enin ka khi var var. Whatsapp message a lo thlen chuan ka hawng duh lo tep, Ruatdika a nih avangin. A mak lutuk, tun a rawn haw hnu lawk hian amaha ka beiseina zawng zawng kha a bo vek. Ka engahmah a thawk tawh lo ka tih chuan a dik chiah lo maithei, mahse, a hnena let leh duhna engmah ka nei tawh lo. Sawmzuala hian ka nun a thlak vek, ka ngaihsan zawngte thlengin.

Nihnih chu inah ka tawm tawh, ni tina chhuak thin ta chu ina han tawm reng chu a ninawm hma khawp mai. A khat tawkin movie ka en a, a bak zawng chu lehkhabu chhiar nan ka hmang. Lehkhabu atchilh tlat thin ka ni a, ka hnain a zir ta lo nen chhiarna hun pawh ka nei ta mang lo. Kawngkhar a rawn ri dawt a, Mimii a rawn lawr nghal zat.

“Ka rawn awm dawn che” tih pahin ka khumah a rawn bawk thlawp a.

“ka ngai vak lo che asin” tiin ka lo fiam a.

“Ka thil rawn ken I hriat chuan tuna I thusawi kha I inchhir viau ang” tiin min han vau ve nghal a. A tho a, a bag chu hawngin ei tur a rawn ken chu a phawrh chhuak a, puar tak chuan kan han ei dun leh phawt a, ei tur kan duh dun bawk a, kan duhzawng pawh kan inhriatsak tawh.

“Nizan chu U Tetea’n min rawn bia a, tha deuha kan inbiak pawh hian a tawp lamah chuan kan inhau leh ngei ngei zel, a mak ngawt mai” a ti a.

“In induh lutuk a nih chu” ka lo ti a.

“U Tetea hi chu ka lo hmangaih ve ngang aniang, min tina em em chung pawh hian ka la ngai ngawih ngawih a” ati niap niap a, an inti na tawn vel mai mai tih ka hre daih tawh.

“Ani hi chu kan naupanlai atang tawhin a danglam tawp, a natna tur ngei ngei pawh nise a ngaihdan a pelh hi chuan a ti duh vek zel. Mahse, nangmah bikah hi chuan a tlawm em em ang, lo en reng mah rawh” ka ti ta a.

Zanah Ruatdika leh Chhana an rawn lut leh hlawl. Tv ka lo en a, ka nu in ka ke kham lutuk chu min lo hmeh sak mek a, ka pa pawh a rawn haw a, chaweikham hnu lawkah a mu tawh.

“Ehe Ruatdika te chu, rawn leng rawh u” ka nuin a ti lo hluai a, tul lo ka ti rilru tawp.

‘Lalrini meuh damlo chu kan rawn kal ve a ngai alawm” Chhana’n a lo ti a.

“Lalrini hi min ti kher ziah suh” ka lo tih chuan tifuh intih hmel deuh hian a nui nghal huah huah.

“Enge I an tawh a?” Ruatdika’n a ti a, “Hei a ziaawm tawh lutuk, a room leh sitting room inkar pawh a kal mawi ve tawh lutuk” ka chhan hmain ka nuin min lo chhan khalh leh.

A zirlai chungchang leh a hna thawh chhoh dan tur vel an sawi kai a, hman atanga lo inhria leh innel tawh an nih vangin mak ka ti hran lo, mahse, a fanu ber nen kan inkarah engmah a awm tawh lo a, chutia a lo be tha huam chu ka duh lo tak zet.

“Kan inkarah pawh engmah a awm tawh lo a, khatia lo tih vak kha  a ngai lo e” an haw hnuah ka ti nghe nghe.

“Mawl viau suh, mi tha hi chu chelh dan zawn ve tlat tur” ka nuin a tita a nih chu, thinrim tun chungin ka room lam ka pan a, khatiang khawpa ka ngen chung pawha min kalsantu hnena let leh hi ka tum lo. Tin, ka nu rilru pawh hrechiang viauin ka inhria, ani duh vanga danglam ka tum eih lo bawk.

Ka nu a school a, ka ka nen inah kan awm a, inchhung khawih ngai awm neuh neuh chu a khawih pah a, a khat tawkin thingpui a lam a, ka tih theih ve tawk a nih avangin thil dang pawh ti lo in amah chu ka vil deuh tawp.

“Pa, sorkar hnathawk kher hi pasal atan enge an that bikna?” ka tih chuan min rawn melh deuh khui a, ka pa zia ve reng a nia, engah ka ngai lo.

“Sorkar hna an thawk emaw thawk lo emaw, mawhphurhna hlen mi an ni em tih a pawimawh zawk” a ti a.

“Nu leh pa tam tak hian kut hnathawh hreh loh tur tiin an sawi fo ka hria, mahse, an fate nupui pasal atan an duh leh si lo hi a mak ka ti” ka tih leh chuan ka thusawi a man thiam ve maiin ka hria.

“Ka fate hian an hmangaih ber an nei tur a ni, in thlang sual a nih chuan tawrh pawh in huam tur a ni” a ti a, ka u te bula a sawi dan ang chiah a ni.

Karkhat chuang ka ke na vanga ka chawlh hnuah taxi in office ka kal thei ve ta, ka la bai na in a tih luih theih ve tawh. Sawmzuala bulah taxi in ka kal tih ka sawi tlaiah min rawn hruai nghal.

“Tunkar chu ka hruai char char ang che, huan lamah tih tur a awm rih lo a” a ti mai a. A tlan niah a duty tel tih min hrilh vangin tlemin ka inthlahrung lo deuh.

Kan laklawh deuh avangin taxi danga haw tumin Sawmzuala pawh ka call duh lo a, dar 7 velah haw turin ka insiam chiah. Ka phone rawn riin min rawn call ta tho a, ka haw dawn chiah tih ka sawi chuan nghak turin min rawn ti. Pawnah ka ding a, rei ka nghah hmain a rawn thleng ve nghal, mahse, hmeichhe pakhat a rawn phur a, a hmaah ala chuang zui.  Ahnungah chuan ka thu lut a, khua a vawt deuh nen ka ke chuan min tur ut ut.

“Khua a vawt sia, I ke na a zual em?” tia min rawn zawhte chuan, “Zual lo” tih zawngin ka chhang. Chu hmeichhe chuang vein nel hmel taka a biak leh a chhaih vel chuan ka thin a tirim ngawih ngawih.

“Tah hian ka lo chhuk ang, ka u te inah chaw ka ei dawn a” a tih chuan ka thep deuh nghal suai.

“Rawn thu thla la” tiin min rawn nuih a, ka lo hawisan hmak.

Kan tlan zel a, kan veng kawn kan thlen chuan kan in lama tlan lo chuan field lamah a tlan a, ka thu ding nghal zawt a, a front glass atangin min rawn nuih suk. Field bul kan thlen chuan a ding a, a chhuak nghal a. Kan piah lawka in eng phei uar chu hmuhnawm tih hmel zet hian a thlir vung vung a, a rawn luh leh mailoh vang chuan ka chhuak ve a.

“Rin” a bula ka va din chuan min ko sap a. “Inhmu tawh lo ila a thain ka hria” ka hre sual a nih beiseiin ka va melh a, kan hmazawn chu a lo en daih.

“Engvangin nge kan inhmuh loh ang?” ka ti a.

“Ka duh aiin I lakah ka rilru ka pe thuk dawn tlat” a tita.

“Chu chu I duh si lo em ni?” ka ti a, chutia han intih deuh thlawt chu ka rilru a lo na ve a ni.

“A rem dawn lo tih hi ka hmu tlangin ka hria, kan nat hmain duhtawk ang” a kekawr ipte a zen a, ka feelings engkim a man ve vek tih ka hria.

“Sawmzual, kan awmdan hi enge tia zawh che a, sawi dun tur kan nei nia ka inhriat laiin min hnaih zel duh loa kan inhip tawnna te pawh tihtawp I tum hi ka hrethiam lo” ka ti a, chutianga ka sawi ngam ringawt chu mak ka inti zawk.

“Zan tam tak ka ngaihtuah ve asin. He thutlukna siam tur hian ka bei nasa ve bawk, mahse, I nakin hun tur ka ngaihtuah hian ka rilru zawng zawng hi ka phawrh ngam lo” a ti a.

“Ka nakin hun tur chu I hria em ni? Sawmzual, ka duh che. Engmah dang ka duh lo, ka rilru ang hi I pu ve tho tih pawh ka hria a nia” ka tih chuan a maimitchhing a.

“I la inchhir dawn asin” a ti a, ka tah a chhuak nghal vek.

‘Ka inchhir nachhan tur ka hre lo, awlsam taka min kalsan thei anih pawhin keichuan harsa ka ti tawh. I rilru ka hriat hma hauh atang tawh khan keichuan ka thlang fel vek tawh che” ka ti a. Ka dar tawn tawnah chuan min rawn vuan a, uluk fe hian min thlek a.

“Kuthnathawk, bul tan ve chauh, hlawhtlinna a hmu dawn nge dawn lo tih pawh la hriat loh lakah hian tang lo la ka duh a ni. Tunah chuan a hrehawmna I la hre vak lo ang, mahse, a rei anga, bialpa lehkha pawh zir sang lo leh kuthnathawk mai mai chu I zahpui hun a la awm dawn, chung zawng zawng ka ngaihtuah chuan ka rilru dik tak hi ka sawi ngam lo leh thin. Ka hmuh hmasak ber atang che khan ka vei em em che a, mahse, ka cho rual I ni lo tih ka hriatna hian min tina fo asin” a ti a. A tawngkam tin chu uluk taka a lo ngaihtuah lawksa tih ka hrethiam.

“Engtikahmah ka zahpui lo ang che” ka ti a, engmah ka sawi zawm thei tawh lo. Min rawn kuah a, a kawngah nghet zet hian ka lo kuah let ve a, a thaw ham ham chu uluk fe hian ka lo ngaichang a.

“I inchhir lehna tur awmtir ka duh lo, zanin chauh chu inngaihtuah leh la” a tih chuan ka lu ka lo thing a. “Inngaihtuahna hun ka pe tawh dawn lo che sin” a tih chuan, ka han hawi chho a, min lo melh kar a.

“Ka mamawh tawh lo” ka tih chuan min chhang tawh lo, zawi muangin a rawn kun a, min rawn fawp ta vawng vawng a.

Note: thiante u, ka blog chu min la hrem tho na a, thla hmasaa ka hlawh kha a lo lut e. Ka thian dangten an hloh tawp2 naah keichu a bo a bang awm loin a rawn lut a nih chu, hnukte pawh ulh dawn lawm😊