EUPHORIA 8

8

Ka zing tho pawh ka nui deuh reng, hetiang taka ka hlimpui tur ka tawng leh hi ka lawm ve em a, a mizia rintlak leh dam thlap te,nui hmel pu reng thei a nihna te hian min hip a, ka rin loh deuhin ka tum aia hmaah ka tlu lut te pawh ti ila a dik tho ang. Kum khat zet zawt Ruatdika vanga ka tawrh hnua mi thar hlak, mize tha em em ka tawn leh avang hian lawm lo thei ka ni lo.

“Vawiin tlaiah Ruatdika’n chaw a rawn ei dawn a, in ban veleh I rawn haw tlang dawn nia aw” ka nu chu ka room ah a rawn lut a, ka inthlak mawlh mawlh lai chu ka dah a.

“Engvangin nge a rawn ei ringawt dawn a?” ka ti ha a.

“Inrinniah a chhuk thla leh tawh dawn a, chumi hma chuan in inkar ching fel ang che u. Ngaihdam a dil che tih ka lo hria a, ngaidam ang che” a tia, a chhuak leh nghal.

Ka thaw hak a, ka nui chhuak hawk ringawt, puitling ka ni ve tawh a, ka duh dan angin ka nung ve ang chu, engvangin nge ka kawp tur lehzela inrawlh a tum? Ka u te pawhin an duh zawng leh an hmangaih ber nei turin an ti ziah a, keimah ka nih vanga duh ka thlan theih loh chhan tur hi ka hre bik lo.

Nilengin ka mood a fuh lo, Sawmzuala nen lunch laiin kan in videocall a, tlemin ka hlim deuh. Tunlai chu a taxi a service regu deuh a, kartawpah chiah huan lamah a kal. Thla thar atangin riah luh a tum bawk si a, a theih ang anga sum lakluh a tum vang tih min hrilh. Ka ke pawh a rah luih ngam tawh a, scooty erawh ka la khalh ngam meuh lo, tihluih talh duh chuan ka khalh thei tawh tho.

“Ka rawn hruai ang che aw” kan ban dawna ka call in a rawn ti a, pawi ka ti hran lo. A duty na hmun a hlat avangin nidangah chuan ka hnial thin a, vawiin erawh chu amah hmuh ka lo chak ve bawk nen ka hnial duh lo.

Sawmzuala a rawn thlen chuan pawnah ka lo nghak tawh a, khua a thim chhelh tawh a, Mimii clients meeting tura a chhuah nilen vangin kan inhmu lo. Sunday hmang turin U Tetea a rawn haw dawn a, an inkar siamthatna hun remchang tak a ni dawnin ka hria a, ka lo lawm ve em em ringawt.

“Ka haw tlang peih lo a nia aw” ka tih chuan mak tih hmel zet hian min thlek a, ka maimitchhing hmak.

Kan tlan zel a, khawi lam nge kan pan tih pawh ka hre lo, ka men leh chuan Zemabawk lamah kan tlan tih ka hmu chiah. Ngawi rengin ka kut a rawn vuan a, min nuih sak a, a bulah hi chuan ka hahdam ngawih ngawih zel. Motor a hung tha a, Aizawl khaw chhung eng phe tuar chu kan thlir vang vang a, a darah ka lu ka nghat a.

“Sawmzual”

“Umm..” thuk zet hian min chhang a, min duatna ri ka hre thei.

“Engpawh kan inkarah hian lo thleng se min phatsan suh aw” ka ti a.

“Aw le, ka phatsan lo ang che, I thatna tur zawk thil a awm anih erawh chuan na mah ila pawi ka ti lo ang” a ti a.

“Ka tan awm reng la, chu chu ka thatna tur chu a ni mai” ka tih chuan a rawn nui nghawr dat a.

“Kan hlim reng ang tih chu ka tiam thei bik lo che a, mahse, ka lama I tan chhung chuan kalsan che hi ka tum lo” a ti a, ka kawngah a rawn kuah a. “Kum hnih emaw kum thum ermaw min nghah a la ngai dawn ania, I thei ang maw?” ati a.

“Kum 30 ah pasal neih ka tum a, ka ni vel chiah dawn anih chu” ka lo ti fiam a, fiamthu angin ka sawi na a, ka tum dan tak tak a ni.

“Kum 33 ka lo ni ve tawh thung anga” a ngawi dat a, “A tawk chiah dawn alawm tiraw?” a ti a, kan nui dun a.

Ka phone a rawn rik chuan ka bag chu ka han hai rak rak a, ka nu a lo ni. Pickup loh ka tum zet na in a ngaih a tha lo kual leh ang tih ka hlau si a, ka pickup ta hram.

“I rawn haw dawn tawh em?” dam diai hian a rawn ti a, ka rilru hneh a tum apiangin hetiang hian a tawng ve ziah.

“La dawn lo deuh, min lo eisan mai ru” ka ti a.

“Kan lo nghak ang che, I pa pawh a lo haw mek a, in lo thleng rual vel ang” a ti leh hram.

Sawmzuala’n min lo melh khiau a, “Chaw ei tur kan nei a” ka ti ringawt.

“Anih chuan, kan haw mai dawn em niang?” a ti a, ka hreh ru viau.

“Engtik nge I lo len ang?” ka tih chuan a malah a kut a khawng kauh kauh a.

“Sunday zanah aw” a ti a, ka lo bu nghat.

Motora ka lut tur chu min pawt let a, min rawn fawp zeuh a, ka lo duhtawk teuh lo, ka lo pawt bet ve a, chutah uar tak leh inthlahlel tak hian kan infawp ta vaawng vawng a. Kan haw kawngah chuan a huan chanchin min hrilh malh malh a, kan bank ah khan loan kha dil tam vak lo a, a chhan ka zawh chuan, “Tuna sangha dil siam nan khan ka mamawh a, ka pa pension na zawng zawng huan lei nan leh bul tan nan khan ka hmang tawh si a, tihngaihna vak ka hriat tawh loh hnuah ka cousin pakhat hian in bank atanga bike loan a lak thu a sawi ka hre fuh a, ka rawn risk ve tawp a nih kha. Ka rawn kal lo ang tih hi ka hlau asin” tih pahin min rawn nuih a, hlim zet hian ka lo nuih ve a.

Kan kawt kan thleng chuan ka pa gypsy pawh a lo ding vang tawh.

“Rawn lut kawi la” tiin ka han sawm mawi ve a.

“Sunday zanah kan inhmuh dawn kha” tih pahin ka biangah a rawn piai a.

“Fimkhur la aw, chaw ei tir kan nei sia, ka rawn be hman lawk dawn lo che nia, tih tur a tam thin si” ka han ti a.

“Ka hmu che a, ka hahdam tawh alawm, min lo biak hman loh pawhin I mut dawnah lo sawi la aw” a ti a, a hmui ka va tuai zeuh a, ka kut a lo man nghal vat, a fawp zauh a.

“Chaw ei tui aw” tiin ka kut a vawn chu ka la thla a, a tlan liam thleng chuan ka thlir a, kan inhmu zo hlawl na a ka ngai nghal veng veng.

Inchhung ka luh chuan Ruatdika leh ka nu gas bulah an lo ding a, ka pa inbual zo bathroom atangin a rawn chhuak chiah a, Sangbawihi’n salad a lo siam mek.

“I lo haw ve ta maw? I pa nen in rawn thleng rual tawk vel ang ka tih kha” ka nuin a lo ti a, chhang loin ka room ah ka lut a, Sangbawihi’n min rawn zui lut nghal.

“Au Rin, ani saw ka ning lutuk, u Ruatdika nen in inkar siamthat lam a sawi char char” ati a, a tum ve hmak. Ka chunga thil thleng engkim min hriatpui bawk a, a thinrim chu a mak lo.

“Sawmzuala nen kan leng kawi a” zawi deuh sap hian ka ti a, a mitmeng a rawn phur nghal sarh.

“Awi, U Sawmzuala kha a pa eee… chhuah miah suh aw, u Ruatdika angin a chapo ve bawk si lo” a ti a, a tawng rin deuh vangin ka lo kheuh nghal vat, kan han nui dun leh rih a.

Ruatdika hi induh, chapo tia hriat a hlawh ve hrim hrim, a mizia hriatchian loh chuan chutianga sawi mai chu awl ve tak tur a ni. A chapo a ni hran lo a, a mizia ve reng a ni a, mahni inngaipawimawh chi, zahawmna ngai pawimawh chi ka tih ang kha a ni. A thiante tan chuan mi inphal tak, engmah ui nei lo a ni. Kan inzui chhung pawh khan ka tan engamh ui a nei ngai lo a, chutiang bawkin ka chhungte tan a theih ang angin a tangkai ve bawk. A bik takin ka nu hian a chhawr nasa a, thil chah apui kha a ngah thin, phunnawi loin engkim kha  a tih sak a, an inngaina hi a mak lutuk pawh ka ti lo. Chutih rualin kan inthen chhan engkim a hre chunga ka tana tlawm thlak zeta a khawsa erawh ka nu a nih na vang vang a, ka haw deuh.

“I chau em?” chaw ei ka siam laiin Ruatdika chuan min rawn bia a.

“Chau lutuk lo e” tiin ka lo chhang tha ve mai. A nih tur ang a ni vek tawh a, han biak that duh loh chu a puitlin loh  thlak ka ti vet ho.

“Engtia rei nge I zuk awm leh ang?” ka nuin kan chaw ei lai chuan a be mawlh mawlh a.

“Thla khatah chuan zo fel thei turah ka inngai a, helamah exam pe turin ka rawn chhuak chho leh nghal ang” a ti a, ka thawk a lo sak nghal vek, ka nu hmel erawh a nung sarh a, melh pawh ka melh tha duh lo, ka thin a rim dawn zel.

Sitting room ah ka nu leh ka pa nen, Ruatdika nen kan paliin kan thu a, thingpui ka lumsak chu an dawm far a.

“I rawn haw dawnah min rawn hrilh la, thil chah duh che ka nei leh dawn nia” ka nuin atih chuan ka lo melh vak, ka pa in min rawn en lai tak a ni ve bawk a, ka rilru a hrethiam ngeiin ka ring.

“Tihbuai fo a ngai lo” a lo ti hluk reng a.

“Ka buai phah hleinem, rawn haw dawn chuan bazaar kha ka ngai dawn hrim hrim a” Ruatdika’n a lo tih chuan ka ding hluai, min rawn melh thap a.

“Vawiin ka chau deuh a, ka mutsan ang che u, tluang deuhin I chhuak dawn nia aw” Ruatdika melh chung chuan ka ti a, a lu chu a bu nghat a, a mitmeng tim deuh dai chu ka hmu ve reng. Ka room lamah ka luhsan a, ka haw kha ka inbual hman tak loh avangin ka inbual sawk sawk a, ka mu nghal daih.

Sawmzuala ka call a, a aw ka hriat hian ka tah a chhuak ve ziah.

“Ka lo mu chiah a, I mu ve hman tawh em ni?” a ti a.

Ka inbual zo ka mu chiah tih ka sawi a, ka ngaih thu ka hrilh chuan a rawn nui a, a nui ri te hi hriat a nuam a ni tawp. A rilru te hi a hah ve ngai lo em ni ka ti hial thin, hetiang khawpa kan inbiakna a rei ve tawh chung leh kan inkawp hnu thleng pawh hian engpawh sawi ila, hlim takin min dawng sawng thei reng a, mi mak tak zawnga ni e. Kan inbiak zawh chuan whatsapp ah Ruatdika message a lo awm reng, a haw tawh a nih ka ring.

*I awm ka tihnawm loh phah chuan min ngaidam rawh aw, kan inkar hi siamthat ka duh tak zet a ni. tunah min chhang nghal turin ka beisei lo che a, ka rawn haw leh hunah chuan min lo ngaihdam tawh ngei ka beisei*

A thisen a sang ka ti ngawih ngawih, na deuha chhan tumin message ka type vek tawh a, mahse, ka tireh leh phawt. Ka ngaihtuahna fim hun ka nghak a, tichuan heti hian ka thawn let ve ta a.

*A pawi ka ti, I tlai tawh, tunah chuan midang ka tawng tawh, engang pawhin tum mah la rawn let hi ka tum tawh lo. Ka nu beiseina hi ka beiseina a ni ve lo tih min lo hriatsak la, khawngaih takin ka thutlukna hi min pawmsak dawn nia* tiin.

Ka phone ka dah a, muthilh tumin ka inlet a, ka maimitchhing ta vang vang a.

Note: Tunkar atana a tawpna a ni leh ta, min ngaihhlutsaktute in zavaiin lawmthu ka hrilh cheu a, weekend nuam tak in hmang theuh dawn nia. Monday lamah Pathianin rema tih chuan kan Euphoria leh theuh dawn nia.