VALTEA 1

 

One

 

Bazar atanga ka haw chu ruahin min nan nghek a, ka zawr hnep mai. Ka kal dawn khan ka nuin nihliap keng tur khan min ti a, ruah a sur ka rin loh em vangin ka keng peih ta lo kha ania, ka tifuh lo kher mai. Bathroomah ka lut tlang a, ka inbual ta nghal a, a ruk tak chuan ka nu chuan sawi fuh a inti leh ngawt ang. Ka sam chu ka chhem ro mek a, khuma ka phone dah chuan message ka dawng tih hriattirnan a rawn ri kauh a, tawlh phei hretin ka va ban a, Mathana a lo ni. Ka nui sak a, a message chu ka han chhang let ve mual mual a, ka khi leh var var thin, min hrechiang ve bawk a, ka duhzawng leh lawmna sawi pawh hi a thiam, kei lahin ka lo hlimpui veng veng zel bawk a. Ka nu in chaw ei tur a min rawn koh thlengin kan inbia a, kan inbiak tawh hi chuan thil dang hi ka hre chang lo fo thin.

 

“Niminah u Mathana te office ah ka kal a, awi, keichu a lerh hi ka ring tawp” kan chaweilaiin ka nau Tebawihi chuan a ti a, ka lo melh hrep.

 

“Ringawt zel a, mi an chhungril kan hriatchian loh chuan ngaihdan lo siam zung zung loh tur tih kan chhungkaw thuvawn anih kha” ka nu in a lo ti a, ka nau chuan a hmui a lo tipawrh.

 

Ngurthanmawii ka ni a, Mawipui tiin min ko thin. Ka hming hi nalh lo ka ti thei hle a, ka pu phuah a nih avangin an sawisel ngam lo tih ka nu in tun hnu hian min hrilh. Hetia ka lo puitlin hnu hi chuan ngaiah ka nei a, ka naupanlaia ka zahpui ang khan ka zak tawh lem lo. ‘Nguri’ tia koh erawh huat tak tein ka haw thung. Kan unau hi pahnih chauh kan ni a, kei hi upa zawk niin ka nau nen hian kum chhirin kan piang. Ka nu leh ka pa ten min la duhkhawp lo viau mah se an nei thei ta lo a, tihian kham lo takin pahnih min enkawl ta a ni. Ka pa hi high school zirtirtu a ni a, ka nu erawh chuan a pasal fanaute min enkawlin a hun pum a hmang tawp a ni. Tunah hian M.Com zir zo tawhin ka nau hian M.A a final semester a bei mek thung. Kan nungchang leh mizia hi a inang lo hle a, keiin inchhunga tawma lehkhabu chhiar melh melh nuam ka tih laiin ani erawh chuan pawn lam hi nuam a ti a, thian tih tham ka neih loh laiin ani erawh chuan kawi tinah a nei duah thung. Chutiang tak chu ni mah se ka thu erawh a awih em em a, hei hi ka chhuan ve em em na chu a ni.

 

Mathana nen hian veng khata awm kan ni a, ka tleirawl chhuah atanga ka ngaihzawng a ni a, amah lo hi ngaihzawng sawi tur ka la nei lo. Kei aiin kum 5 velin a upa a, Forest Department ah UDC hna a thawk mek a ni. Tlangval smart tak, veng chhungah pawh an hawlh lar ve a ni a, kohhran leh khawtlangah a phak tawkah a inhmang a, a chhuanawm ve veng vawng hle. Kumin hi kum 5 kan inzuina chiah a ni a, ka tan sawisel ngaiin a la awm ngai lo.

 

Inkhawm turin ka insiam a, Mathana min rawn sawm hun nghakin sitting room lamah ka chhuak phei a, Tebawihi’n Tv a lo en mek. Inkhawm tur hian ka sawm fo a, sunday bak hi inkhawm lo turah a ngai ni mai hian ka hria.

 

“Karleh atangin ka inkhawm dawn I ti ve sia” ka tih chuan min rawn nuih sawng a.

 

“KTP OB ka ngaihzawn ve hunah” a rawn ti kher nih chu. A malah chuan ka va beng a, a lo te hlar a. Chutih lai tak chuan Mathana a rawn lut a, Tebawihi’n lei min chhuah zuk.

 

Biak in lam pan chuan kan kal ta a, kan in pelh deuh atangin a phone a rawn ri a, an la inbe rei em em zui. Kan thlen tepah an inbe zo ve chiah.

 

“Valtea a rawn haw dawn a, a haw dan tur velah khulama a thiante nen kan inbia a nih kha” a ti a. Valtea chu an unaua naupang ber a ni a, kan inrual chiah. Inah a awm tlem em vang hian kan innel lem lo a, hostelah a awm reng thin a, pawl sawm a pass hnu phei chuan phaiah a awm daih a, a rawn haw ve pawhin kan inhmu ngai mang lo. A tawng tlem hle tih ka hria a, a bak chu amah hrim hrim hi sawi zawm tur ka hre lem lo.

 

Mathana hi Branch ah secretary a ni a, a thupuang te hi a puang fel duam zel a, ka lo chhuang thei tawp. Ka thian kawm ve ber Nunui chuan ka malah a rawn sik a, ka va hawi chuan kan piaha thute chu a rawn kawk zeuh a, ka va en ve chuan Mathana thla an lo la tih ka va hmu. Ka nui sak a, tleirawlah hian a tla na ve a, makah ka ngai lem lo. Inkhawm kan ban chuan kan inlam panin kan inzui a, nidang aiin Mathana chu a ngawi chawi riau hian ka hria. In kan thleng a, ka chhungten thingpui an lo in dawn chiah a, Mathana nen kan in tur ka lum ve nghal a. Ka nu te awm lohna lamah ka thut thlak pui a, thingpui no dawm pah chuan engemaw hi a ngaihtuah vung vung a, ka ngaih tha lo chuan ka zawt ta ringawt a.

 

“Valtea hian min tibuai ve lutuk a, zu a in nasa lutuk an tia, khulama a thianten min rawn be tawp a. Kan chhungkuain kan han ngaihtuah tlang a, rawn haw mai se kan tia. Dik tak chuan kan unauah hian a danglam bik lutuk a, a luhlul bawk si a, hetia a rawn haw duh laia a rawn haw loh chuan a buaithlak zawk kan hlau si a, kartawpah a rawn haw dawn a” a ti a, a thaw hak a.

 

“Hetah chhungte bulah chuan a nun pawh a sim maithei asin” ka lo ti a.

 

“Ni e, chumi beisei vanga chah haw chu kan ni alawm. Mahse, ka nu leh pa rilru tihah tur ringawt hian a lo haw ang tih ka hlau a, a tha ber ngaihtuah chhuah a harsa khawp mai” a ti a, a thingpui chu a han lem khalh a.

 

“A entawn tur I awm tho a, ka ngaihtuah lo” tiin ka lo nui a, a nui ve ta suk a.

 

Exam tur neuh neuh ka neih avangin ka lehkhabu ka chul nel leh viau, ka nuam tih zawng a nih ve vang hrim hrim hian hrehawm ka ti lutuk ngai lo, ka tlin leh tlin loh chu thuhran nise. Ka chak ber hi chu sumdawnna engemaw tak khawih hi a ni thin a, mahse, nu leh pa rilruah erawh chuan hetiang chen kan lo zir ve tawh a, hna tha tak thawk tur hian min beisei tih ka hria a, chuvangin ka theih ang ang han exam hi chu ka tum thung.

 

“Hepa hi ka star rap” tih pahin ka roomah Tebawihi a rawn lut a, ka khumah bawh thlawp pahin a phone chu min pe a, a star pa chu engtiklai maha min hip ve ngai lo tur a ni tih ka lo chiang nghal tawp.

 

“An sual hmel thei e” tih pahin a phone chu ka pe let a, a hnar a tum dat.

 

“Anu thusawi kha I hrelo mi, mi judge zung zung loh tur a tih kha” a lo ti a, ka lo nui vur vur.

 

“Va chhuak tawh rawh le, lehkha ka zir” ka tih chuan zawi deuh hian a tho a.

 

“Aw le, ka u fel leh hmeltha em em” tiin a han bu zauh a, Korean drama ka ngaina tih a hria a, an tihdana han tih vel hi a ching thin.

 

“Kamsahamnida” tiin hmui phunin ka lo chhang a, nui ver ver chungin ka room a chhuahsan a, ka nau chimawm thiam deuh hi ka duh thei ve a nia.

 

Thli thaw deuh heuh heuh chuan ka muhil lai chu min tiharh a, tukverh ka lo khar lo chu niin, ruah a lo tla deuh seng seng lehnghal. Ka tho vat a, ka va khar phui a, muthilh leh mai tumin ka han maimitchhing a, ka phone chu ka zuk delh palh a, ka mutsan dan danin a lo la awm. Mathana nen kan inbiak khan chhuak tawh loin ka lo muhil nge ka hre lo a, kan mut a chhuah dun tawh avangin kan in mangtha ta kha ania, tunah a lo la online vu tih ka zuk hmu. Ka han meng zau deuh a, sana chu ka han melh zauh a, dar 1 a la ri lo deuh. A muthilhsan emaw ni chu ka tih dawnin a out a, a lut leh thin a, biak chu a nei ngei ang tih ka ring. Zingah hian min thawh khalh ziah avang hian hetia kan inmangtha hnu hi chuan a mu ve maiah ka ngai thin a, committee zan te a nih erawh chuan a meng rei thin tih ka hria a, ka ngai thu tak lem lo. Tun ang zanah tak hi chuan mut hma a duh ve thin tho avangin a mu ve maiah ka ngai a, ka check kher tawh ngai lo. Min rawn be lem si lo a, han biak talh chu ka duh ta bik lo, ka mut a lo chhuak ve bawk nen ngaihtha lo ru deuh chung chuan ka muhil leh ta a, ka mutui leh ta viau.

 

Zingah chuan ka thawh hmain message a lo dah leh hman vek a, a workout duh thin vangin zing hi chu a tho tlai ngai lo hrim hrim. Engemaw thil pawimawh tak a ti a ni ang tiin ka inhnem a, han rinhlelh ngawt chu ka duh bik lo. A office kal pahin min rawn tlawh a, naktuk hi a nau rawn haw hun tur kha a ni a, a room rawng te thlansakin kan thenawm dawrah chuan ka luh kawi pui a, rawng pawh keiman an inah ka lo va dah phei dawn a ni.

 

“I zak lo ang tiraw?” tiin min nuih deuh sung a.

 

“Zah thuah chuan zak e” ka lo ti a.

 

“Zak lo tur khawpin kan inkawp rei ve tawh alawm” a ti a, ka lo nui ringawt.

 

“Ruah sur reng zel sia, kan hnawih lo leh thin a. Mahse, nizanah ka ngaihtuah a, a room te hi han thar var se, a rilrute pawh a tithar maithei asin tihte ka rilruah a awm a, ka ti leh ta thut alawm maw le” a ti a.

 

“Nang nge nge” tiin ka han fak hlak a, office lam panin a tlan chhuak ta. Keipawh a rawng lei chu an ina dah turin ka kal a, ka vawikhat kalna a ni lo chung hian ka zah hi a la reh chuang lo. An chhungkuain Mathana nen kan inkawp dan engkim an hre vek a, chaw pawh ka ei ve zeuh zeuh, chutichung chuan mahnia ka kal vawikhatna tur a nih avangin ka tha te chu a la khur der der. An kawtah Nu Machhuani a lo awm a, Mathana nu a ni.

 

“Mawipui, I thianpa in a rawn tir che a ni maw?”tiin ka thil khai lai chu a lo dawng sawng zung zung a. “Lokal rawh, lo lut phawt rawh” a ti a, inchhungah kan inzui lut a. “Hei hi ka lo lei tawh a, rawng chihnih velin han hnawih ila a hmuh a nuam ang a ti leh tlat sia, I buai ve phah ta a nih hi” a ti a.

 

“Ka buai phah hleinem, a ho lutuk” ka ti a.

 

“Valtea rawn haw tur chu I hre tawh tho anga, naktuk hi a lo thlen hun tur kha a nia, chaw I lo ei ve anga tiraw?” a ti a.

 

“A.. A ngai chuang hleinem” ka ti a, chu aia thiama han hnial dan ka va hre duh tak.

 

“I rawn ei ve ngei ngei tur a ni, Mathana’n a office ban hunah a rawn sawm che anga, ka lo bawl kep dawn che nia” a ti leh ta zel a.

 

Nilengin ka rilru a nuam lo, chutia an chhungkaw kim tur chaw lo ei ve ringawt chu ka hreh lutuk, thildang vang chu thuhran nise, tun tum kher kher hi chu ka huphurh ve thlawt.

 

“Min lo phatsak mai la” Mathana bula ka tih lahin a ngai ho ropui si.

 

“Ka nu in a tih chuan hnial loh kha a tha zawk, a ngai pawimawh ve che anih kha” a ti awlsam et a, ka va ngei tak.

 

Nilengin ka buai, ka vawikhat chaw eina tur ni awm takin ka phili a, ka roomah chuan ka lo vei leh chhen thin. Dar 3 velah chuan ka inbual ta a, ka tha khur deuh rengte chuan ka awm a tinuam lo. Ka inbual zawh rualin ka phone ri a lo tawp ve chiah a, ka han en chuan Mathana a lo ni a, ka han call back nghal a.

 

“Ka rawn haw hma deuh dawn a, ka lo chhuak dawn chiah e” tih thu a rawn sawi.

 

Ka thawmhnaw ka thlak zung zung a, darthlalanga ka hmel lo lang pawh ka duh ang takin makeup nasa lutuk si lo in a timawi tawk chiah a, tihi chuan mahni inringtawk taka chhuah chiah ka hmabak ta. Ka chhungten ka chaweina tur an hriat tirh khan min chhaih zuk zuk a, tawng zen zen lo ka pa takngial pawhin min fiam hlut a, “Pasal neih kan la phal miah lo ania” a ti ve ngei.

 

“Nu, ka inchei mah mah em?” tiin ka va chhuak a.

 

“Thla khatah vawikhat I inbual ve a, I inbual chhun hi a hriat theih lutuk” Tebawihi’n a lo ti, lei ka han chhuah vak a.

 

“A tawk chiah alawm, veng dang daih pawh a ni lo a” ka nu ve thung.

 

Dar 4 velah chiah chiah Mathana a lo thleng a, an in lam pan chuan kan inphur phei ta a.

 

“Vawiin te chu chhungkua in inhmuh khawm hun tur a nia, min lo phatsak mai tur che a nia” ka ti a.

 

“Kan kim ni tak chuan ka nu in a tikim zual turin a duh che a ni mai alawm” a ti puat a, a la nui tak ang vur vur a.

 

An in kan thlen chuan Valtea tih loh chuan an lo awm kim a, a pi leh pu hian an la dampui a, nawm hmel ka ti thei khawp mai.

 

“Mawipui, hetah hian lo thu rawh” a pi in a lo ti vat a. An bulah chuan ka va thu a, hmanlai chanchin min sawipui hi nuam a ti thin a, ngaihnawm ti taka ka ngaithlak thin vang hian ka bula sawi nuam a tihzia hi ka nu bulah a lo sawi ve thin.

 

“Ka va inthlak ve ange aw” Mathana chuan a ti a, ka lu ka lo bu nghat a.

 

Min mikhual chei viau ngai lo a, ka duh dan ang anga awm tur hian min en liam ve tawp zel. Keipawhin chutiang chu nuam ka ti zawk, a pi in karhmasa lama an room a tluk dan leh a insawh nat vak lo thute min lo hrilh leh melh melh a, an kum a upa ve tawh a, an insawh na ang tih ka lo hlau thin.

 

“Mawipui, inhnuaiah tel min lo lakpui lawk la” Kimkimi'n atih chuan ka tho vat a, an inhnuai hi dawr a ni a, a hma chuan anmahni hian an siam thin a, tunah erawh midangin an siam tawh.

 

Tel case chu kan zawn chho dun a, step ah chho zawnga zawn kan ni bawk a, kan posi chu kan han innuih leh rih a, nui deuh ruh ruh chungin inchhungah chuan kan zawn lut a, ka pen luh rual chiahin ka ke ka chhep sual a, ka te deuh hlut a, ka tlu dawn emaw ka tih laiin ka hnung lamah min rawn dawmtu an awm a, mangang zet hian ka han hawi chhuak a, Valtea chuan ka tlu tur min dawm pah chuan kan thil chawi lai chu a lo vuan a, awm lo se chuan ka tlu mualpho ngei ngei ang le!

 

“Ka lawm e” ka ti sap a, a mitko a san ak a, kan thil chawi lai lak pahin a kal ta daih a.

 

“A na em?” Kimkimi chuan a ti a, ka lu ka lo thing a.

 

“Tuman an hmuh loh che kha aw, a zahthlak miah lo ania” tiin min hnem nghal a, ka tum loh deuhin Valtea chu ka lo va melh nawn leh hram a, chiang zet hian min rawn melh ve ta kalh a.

Note: Story thar nen let leh nghal pawp ila, thawnthu sei chiam ni lo turah ngai ang aw. Like & comment hian min tiphur thin tih in hriat kha.