VALTEA 2

 

Two

 

Kar khat chhung vel chu Valtea ka hmu nawn tawh lo, an ina chaw ka ei tlai atang khan mak deuhin amah puih chakna ka nei a, vawi khatmah buaipui ngaiin a la awm ngai lo a, hetianga chhungte buaipui  ngai khawpa a awm hian chhan a neih ka ring tlat a ni. Mathana bulah pawh ka sawi nghe nghe a, harsatna engemaw tak sawi duh si loh hi a pai hian ka ring tlat.

 

Exam tur ka neih avangin tlai hlau takin kan exam an tur lam ka pan a, Tebawihi’n min thlah a tum viau na a a la tho lehpek lo a, class a kal dawn loh hi chuan kaihthawh hi ka khawngaih ve thin a, kei lah hi lirthei han khalh ve ngam chi ziazang ka ni  si lo, ka buai phah fo. Kawnah Valtea ka hmu a, Pu Doa dawr kawtah thuin meizial a lo zu hlat hlat a, min hmuh chuan min rawn melh run a, ka hawisawn daih. Taxi stand a lo ruak hiai a, ka sana melh zawk pahin rawn tlan an awm leh awm loh ka melh zawk zawk a.

 

“Ka u I nghak mi?”

 

Ka han hawi chho a, min lo melh reng, ka lu ka thing a.

 

“Nghak lo e” tiin ka chhang tel ta tho a.

 

“Ka lo thlah dawn che mi?” a ti leh a, ka kut ka lo phar nghal hluai a.

 

“A ngai lo, ka lawm e” ka ti a, taxi a rawn tlan phei chiah. Ka lo phar a, a lo ruak hlauh, ka kal tumna sawiin kan tlan chhuak nghal a, side glass atangin Valtea hawi voh voh chu ka va hmu.

 

A rawn haw tirha a hmai pem nung kha a lo reh tan tawh a, a bek thuina erawh a langsar reng tawh dawn a nih hmel. A u te an fel tehreng nen hetia a han awm tlat hi a mak ka ti a, chutihrual erawh chuan fel rual ta vek bik ta se a fair lo viau maithei. A chhan chu chhungkaw fel leh tha kan tih te hian buaipui tur pakhat tal hi an lo nei ve zel a, chutianga fel hlang lutuk an lo awm chuan vui mai te pawh a awl thei ang. Kan chapo tur dal nan te, khawvelah hian a famkim theih bik loh tih lantir nan hetiang hi kan kawl deuh theuh niin ka hria. Mathana te chhungkua pawh chutiang chu ni ve maiin ka hria a, an rawngbawlna tura chung lamin a pekte pawh a ni mai thei a sin.

 

Ka exam chu ka chhang tha ve viauin ka hria, tun ang laia hna hmuh a harsatzia erawh ka hre reng. Min sawipuitu tur kan neih lohzia pawh ka hria, chutiang karah ka thiamna hmang ngeia ka lo hmu thei anih chuan chu chu ka lawmna ber tur a ni. Ka haw pahin Nunui te inah ka leng kawi a, ani hi ka thiantha ber a ni a, kan veng tawn tirha awm an ni.

 

“Awi Mawipui, lo kal teh” tiin a room a tangin min rawn ko nghal a, a room lam pan chuan ka chho tlang a.

 

“Enge i tiha a i chhuah ve ngei a?” a ti a, ka exam thute chu ka han sawi luam a.

 

“Valtea a lo haw tih vawiinah ka hre ve chiah a, kawnah thil lei turin ka chhuk a, Lal pu Doa dawrah a lo thu kur a, awi, ka mur vek” a tih chuan ka va melh haw a.

 

“Engati nge I mur a?” a ngaihna hre lo zet hian ka lo ti a.

 

“Ka star kumhlun a nih si” nui ar ar chuan a ti a.

 

‘Awi, Ramthanpuia maw?” ka ti tha leh ngat a.

 

“Aw, I bialpa Mathana nau Valtea” a ti a, a khumah chuan a ke a leng deuh awr awr a.

 

“A van mak” ka lo ti tawp.

 

“A bengbeh inhmehzia te kha, ka van duh tak” a ti ta ngawih ngawih a, ka lo nui tawp. Ani nen hi chuan kan duhzawng hi a inang ngai lo hrim hrim a, khawvel mi deuh deuh hi a duhzawng an ni zel a, ngaihzawng kan inchhuhsak hi a rinawm loh hrim hrim.

 

“Bialpa I neih reng kha I lerh lutuk” tih pahin a malah ka beng a.

 

“Bialpa nei chung pawhin star a neih theih reng a lawm” a ti vel mai mai. Kan ngaihdan hi a in ang lo thei teh e. keiin inngaihzawnlai atangin rinawm bur ka thupui laiin ka thiannu hi chuan han ck zeuh zeuh pawh a hreh lo a, ka nau nen hian inkawm zawk awm takte pawh an ni.

 

“Ricky pawh a rawn exam asin” tiin a bialpa ka hmuh chu ka hrechhuak thut a.

 

“Aw, ka exam dawn a ti tak. A message pawh ka la hawng miah lo, ka theihnghilh chiang lutuk” tih pahin a lukham hnuai a dap rawk rawk a. “Valtea ka hmu a, kan pa pawh ka lo hrechang hleinem” tih pahin a nui leh ar ar a.

 

“I mak, lo reply rawh, ka haw dawn” tih pahin ka tho chhuak a.

 

‘I hmanhmawh thei si ka ning tlat” tih pahin a rawn tho ve a, an kawt thleng min thlah a, kan invai liam ta a.

 

A chang chuan Nunui te anga eng vakmah lungkham neih loh hi ka chak thin. University kan chhuahsan hnu khan tihian inah a tawm vel mai mai a, hna hrim hrim  hi thawh a tum lo a niang ka ti thin, engmah han sawi a nei ngai lo. A chhungte laka inthlahrunna ang pawh hi a neiin ka hre lo. Ka pa chawmhlawm ni reng tur anga ka inngaihtuahte hian ka inthlahrung ngawih ngawih a, min phut dawn loh tehlul nen nuam erawh ka ti chuang lo. In ka thlen chuan Tebawihi’n chhuat a lo nawt ve ngei a, ka nuih suk a, min melh rum rap.

 

“I ke va tat tha leh rawh, I rap bal a nia” a lo ti hlar a. Ka let leh a, ka ke chu ka va tat tha leh a, a nui ta var var a, a lung tih awite chu ka hneh ve emai.

 

Ka roomah lutin Mathana nen kan inbia a, ka exam chungchangte min zawt a, min phur pui thei bawk a, zawhna min zawhte hian nuam ka ti. Zaninah branch committee an neih dawn vangin a rawn leng thei dawn lo tih ka hria a, duhtawkin drama ka en thei dawn tihna.

 

Chaweikhamah chanchinthar ngaithlain kan thu thap a, room a luh vat hi ka pa in a phal ngai lo hrim hrim a, chhungkuaa thut tlan tam hi a tha tih thupui vuantu kan ni a, a turah kan ngai tawp tawh. Tebawihi thuthlengah a mu zal zal a, ka pa in vawihnih a hau hman. Ani hi chu thu hle hle thei lo, mu deuh zun zun reng chi a ni hrim hrim a, ka nu nen hi chuan kan en liam tawp zel. Ka pa erawh chuan ngaiah a nei hlei thei lo a, a hau leh thin. Dar 8:30 rik dawnah ka room lam ka pan a, midang chuan tv an la en a, drama en duh ka neih tawh avangin zan dang aiin ka lut chho hma. Dar 10 vel bawrah Nunui’n min rawn text a, ka thil en ka lo en tui deuh bawk nen a message chu ka lo hmu mai lo a, ka mut dawnah ka hmu ve chiah. Mathana leh hmeichhe pakhat inzui lai thlalak a lo nia, a hmeichhia zawkin a banah a vuan a, ka hmuh rualin ka lung phu a rang nghal.

 

“Enge a awmzia?” tiin Nunui chu ka call nghal a.

 

“Chu chu ka zawhna tur ni awm tak zawk a ni. Khanu kha IG ah lo va en ve rawh a profile ka lo thawn che” a rawn ti a, phone kan dah.

 

Ka han en ve tak tak chu an pahnih thlalak a lo post teuh, ka screenshot pawp pawp a, ka awm zawn a rawn sa chhuak hem hem bawk. Comment a off zel avangin engmah han en zui tur chu a awm chuang lo a, chungte chuan ka thinrim a tizual ngawih ngawih. Ka thil screenshot ho chu Mathana ka thawn nghal vek a, a la en hman dawn lo tih ka hre tho a, mahse, ka insum zo tawh lo.

 

Muhil thei loin ka meng kar a, ka rin em em hian min lo bum reng tihna a ni thei angem? Chutiang ni tur chuan ka ngai phal bawk si lo, ka hah tawp! Ka phone a rawn vibrate rual chuan ka han lekkang a, Mathana a lo ni a, ka han pickup nghal vat a.

 

“Engahmah ngai suh, hmanlai thlalak tunah a rawn post thar leh mai mai anih kha” a rawn ti a, tlemin ka thawveng deuh huai, mahse.. engemaw hi a awm deuh tlat.

 

“Ka ring che alawm” ka han ti a, a rawn nui suk a.

 

“Tutemah hi an inngaihzawnna a tluang purh ngai lo tih I hriat kha, keini pawh min beitu an awm ve a ni mai” a ti a, dik ka ti.

 

Chutiang chuan ngaihthat loh chhunzawmna pawh ka nei ta em em lo a, mahse, a khat tawkin khanu account kha ka stalk thin tih erawh ka zep lo.

 

Chhun lamah ka nu nen kan kawmthlang huan kan thlo a, ka chau ve deuh nen zan ka mu hma angreng viau. Thawm ri deuh laih ka hriat rualin ka inher a, kawmthlang lam ri niin ka hria. A reh leh mai turah ngaiin muthilh leh mai ka han tum a, a aia thawm ring a awm takah chuan ka tho chhuak hlawl a, tukverh chu keuin ka han bih ve a, intibuai an awm tih ka hre nghal. Ka chhungte thawm ka hriat chuan inhnuaiah ka chhuak thla ve a, ka nu ka pa pawn chhuak chiah chu ka va hmu hman. Ka va tlan chhuak ve a, kan kawmthlangah an lo ri deuh luai luai a, tute nge tih hriat tumin ka va hawi kual a, Valtea ka va hmu. A bula mi chuan thing hian a lo tin deuh uai a, thenawmte leh ka pa te chhuak chuan an va thelh hman chiah.

 

‘Valte, nangni a ni maw?” ka nu chuan a ti a, a rawn hawi a, a meng a deuh ruai.

 

“Lokal rawh, kha I lu a thi a nia” tiin ka va kai a, ka tihdan ang angin a awm tawp.

 

Engtin nge an tih zel ka hriatpui tawh lo, Valtea lu chu ka hruksak a, damdawi te ka hnawihsak a, tuna a awm mek dan hi a hriat pawh ka ring lo. minute 10 hnu velah ka nu leh pa an rawn lut a, Valtea chu ka lo buaipui zo chiah.

 

“Mathana ka’n bia ange” tiin ka phone chu ka phawrh nghal a.

 

“Be suh, ka haw thei” tih pahin Valtea chuan ka ban a rawn chelh a, ka nu te ka en tawp.

 

“Kawng lakah te pawh an lo la chang thei che a, mahnia haw chu a tih chi loh, be rawh” tiin ka nuin a lo ti a, a hnial tawh bik lo.

 

Mathana rawn thlen lai chuan a lo bu deuh lawp lawp a, motorah kan kai phei a, hmuh hrehawm ka lo ti tawp. A lu ka tuamsaknaah khan thisen a rawn tlang leh tawh a, damdawiin kal pui phawt ngaiin ka hria.

 

“Ka lo kal ve dawn em?” tiin Mathana ka zawt a, ka nu te a hmaizah ve bawk nen min hnial ta a, kal pui ka duh viau na a ka nu te thu hmu loa kal chu ka hreh ve tho. An tlan liam thlengin ka thlir zui a, thla khat vel chang chang a la awm a, hetiang hi a tawk nghal mai chu a ni sia. Ka han thaw halh a, engtia tih chi nge maw ni dawn chu!

 

Tebawihi car khalh zir chu ka en reng a, scooty pawh ka khalh ve ngam hma in lirthei khalh thiam hman vek a tum a niang, tunah pawh car a khalh thiam leh der tawh.

 

“Ka unaunu neihchhun dawih em em te, lokal rawh ka lo phur ang che” tiin a rawn au a.

 

‘I khalha chuan ai chuan kea kal char char ka duh” ka lo ti hmuk.

 

Vawihnih vel a kual leh hnu chuan a duhtawk ta rih a, an motor khalh balh chu kawtah ka lo phuh fai sak a, ka nau che phawr phawr zel hian a tifai leh lawk dawn lo tih ka hria a, ka hmu thei thin lo.

 

“Awi…. News ka hria ania” tih ri ah chuan ka han hawi a, Nunui chu kan kawtah a rawn tlan lut mek.

 

“Eng news nge a?” ka lo ti a, ka thiltih lai chu ka chhunzawm lehnghal a.

 

“Hmanzanah B-1 mual tlangvalhoin Valtea an lo sawisak rawn a ni awm e, ka khawngaih tawp” a ti a.

 

“Engtin nge I hriat a?” ka lo ti puat a.

 

“An sawi ka hria alawm, nizanah ka va text zan a” a tih chuan ka pipe chu ka hand ah a.

 

‘I text maw?” ka ti hluai a.

 

“Yes,, min lo chhang tha rap” a ti zui ham ham.

 

“Ricky-an a hria ange” ka tih chuan a nui a.

 

“A ho e, hre mah se engah mah ka ngai lo. A fel lutuk hi a boring ka ti, ka ning” a tih chuan ka lo melh rum tawp.

 

“Hawh, lut ang” tiin inchhunga luh ka han sawm a.

 

“Chumi hrilh tur che chuan ka lo kal lawk alawm, ka pa in thil min leitir a, ka let leh nghal dawn” a ti a, a in turn a, a tlan leh nghal daih.

 

Ricky te ang tlangval fel lutuk a chhuah anih chuan mak ka ti viau ang, eng rilru nge a puta Valtea ringawt a buaipui le? Zu a heh tih a hriat ngawih ngawih si a, hre sa a ni lehzel chunga a duh thei chu mak hi ka ti em em tawp a ni. Ka lu chu ka han thing a, ka buaina tur a ni lo tih chu ka han inhrilh a.