VALTEA 3

 

Three

 

KTP sport kan nei dawn a, group hrang hrang kan tang hle a, Mathana pawh hruaitute an nih vangin a buai viau mai. Valtea sawm chhuak ngei turin min beisei a, keipawhin chu chu ka lo tum ve hrim hrim. Zirtawp zanah kan tan dawn a, chhun atangin Valtea chu kal turin ka sawm tawh a, ‘ka lo tum ang’ tiin min chhang a, a thulh ang tih ka hlau rilru viau. Zanah Mathana kal hma a ngai bawk si a, keiman Valtea chu ka va sawm ringawt. Ka rin ang ngeiin tv a en a, thutthlengah a lo mu a, va kal lo ila chu a kal dawn lo tih ka hria.

 

“Awi, a u in a kalsan si a, chhuanlam a lo zawng chhen a, I lo kal chu ka va lawm tak” Nu Machhuani chuan a lo ti a. Valtea pawhin engmah sawi loin a room lam a pan a, rei vak lo hnuah a rawn chhuak a, kan kal ve nghal.

 

“Thil sual ka tih in hlau mi?” thui fe inbe loa kan kal hnuah a rawn ti chhuak a.

 

“A.. chutiang pawh a ni chuang lo” ka lo ti ban charh a.

 

“Inah ka awm dawn tho a, ka chhuak dawn chuang si lo a” zawi deuh hlek hian a ti a, ka lo nui mai mai.

 

Biak in kan thleng a, kawtah Nunui’n min lo nghak a, chutia Valtea nen min hmu chu a lo meng phawk deuh, mitmeiin ka han khap a.

 

Hall ah kan inzui lut a, kan thlen hnu lawkah programme kan tan a, a  hlimawm kan thleng chho a, kan thawm pawh a ring tan viau.

 

“Ngurpui”

 

Ka han hawi chhuak a, Valtea chuan min lo en reng a, keimah maw tih nana ka han inkawk a, a lo bu nghat a.

 

“Chutiang pawhin min tuman min koh ngai si loh” ka ti hmuk a.

 

“Aw, keiman ka ko che alawm” a tia, a hawi sawn leh nghal.

 

Hnuai lam bih chuan ka han nui ru suk a, ‘Ngurpuii’ tih chu engemaw titakin a common lo riau a, Nguri tih ka duh loh tehreng nen Ngurpui tih chu ka haw em em miah lo.

 

A tan zan a ni bawk a, kan rei lutuk lo. Nunui kan thlah kual a, min sik ru tluan zak. A lo duh ve tak tak a nih dawn hi ka ti rilru neuh neuh a, a insawi kaw leh mai thei turah ka ngai. Nunui kan thlah zawh chuan kan in lam pan chuan kan kal a, sawi tur a vang thin.

 

“I thiannu kha Nunui em ni kha?” a ti a.

 

“Aw, ni e. A chhelo I ti em?” tiin ka han fiam a, min nel theih nan ka fiam lui ve deuh bawk.

 

“Chhia tih tur chu a nih loh kha” tiin min chhang a, han sawi zui viau ka chak na in a la hun lo deuhin ka hre leh si. Kan in kan thlen chuan kawtah kan ding a.

 

“Haw tlang nghal la aw” ka ti a, a nui suk.

 

‘Khawnge ka kal anga?”

 

“An lo sawisa leh ang che”

 

“Min ngaihtuah a, ka lawm e”

 

“Ka lo thlir ang che kal rawh le”

 

“Aih, lut hmasa zawk rawh”

 

Ka lut ta nge nge a, a haw tlang turah chuan ka ngai.

 

Ka mut fel hnuah Mathana nen kan inbia a, ani pawh a haw chiah thu a rawn sawi a, Valtea pawh a mut tawh thu te, naktuk lama sawm chhuak leh turten min rawn chah a, keipawhin ka lo tum sa ve hrim hrim.

 

Inrinni chhun lamah outdoor games kan khel dawn a, zing atangin Valtea chu ka sawm a, ani pawhin min hnial lem lo. Bazar tukte anih vang hian kan hma lutuk ngai lo, chaw kan eikham hnu rei vak loah a rawn thleng a, Nunui kan sawm chho a, field lam panin kan chhuak ve ta a. Intihsiakna hrang hrang kan nei a, volleyball ah Valtea pawh a chhuak ve a, ka rin ai daihin a lo ti thei lehnghal a, kan group a champion pui nghe nghe.

 

“Awi, vawiin phei chu a shades khu a inhmeh si, ka va han duh zual tak” Nunui chuan a ti a, a ni lah tak a, vawiin chu keipawhin ka hmu chhe lo ve deuh. Kan en dan a inang lo a, chutiang ni lo se chuan chhelo ka ti viau ve maithei.

 

“Hawh, an tui in tur va khai leh lawk ila” tiin ka sawm a. Football khelho in tur tui chu kan va khai a, kan let leh chuan Valtea chu ka hmu mai lo.

 

‘Kha, min kalsawn pui a ka hmu tawh miah lo ania” Nunui chuan a ti lehnghal a, a lokal veleh mai ang chu.

 

Tlai kan ban dawn tepah ka hmu leh hlawl a, thildangah ka buai ve bawk nen ka lo ngaihsak zui hman bik lo a, khawiah emaw a awm ve ni turah ka ngai ringawt.

 

Kan group tshirt ka thleh fel lai chuan ka bulah a lo kal a.

 

“Ngurpui, kan la haw dawn lo mi?”

 

Ka hawi chho nghal vut a, zu rim nam hak kha ka hriat sual a nih hram ka beisei.

 

“Khawnge I kal daih a?” a zawhna pawh chhang lo chuan ka ti a.

 

“Ka awm reng kha” tiin a nui a, a nam chiang lutuk.

 

Ka thaw hak a, a dar a san ak thung.

 

Kan haw kawngah te chuan ka be peih lo, mi reng reng hian ka beisei an phak loh chuan min tihnuai vek zel a, ka insiamrem mai thiam thin lo. Chhun kan chau ve bawk nen zan pawh inkhawm loin ka mu ta ringawt a, a mak lutuk ka rilruah Valtea a awm zui vang vang. Ka ngaizawng lo tih ka hrechiang si a, chutia ka rilrua a rawn awm chu ka duh miah lo. Mathana nau anih vangin ka kawm a, a nunkawng harsatna a tawh mek lak atanga hruai chhuah ka duh bak hi chu engmah hnaih duh chhan ka nei lo.

 

*ka tihpalh aw, a harsa ve thin em a ni*

 

Chu message min rawn thawn chu ka en reng a, ni e, vawilehkhata insiam that nghal chu a harsa ve maithei.

 

*aw le* tih zawngin ka chhang a.

 

*I duh chuan min kawm lo thei ania, ka u I hmaizah vang tih ka hria a, harsatna thlen che hi ka duh bik miah lo a*

 

*Valte, enge I harsatna chiah hi ka hre lo a, min hrilh I inpeih hun hunah min hrilh dawn nia, I tum phawt chuan I talchhuak thei tih erawh ka hria ania*

 

Ka thawn hnuah chuti teh duaha ka ti chu tul ka ti lo leh viau, han delete leh daih erawh ka tum ta chuang lo. Min chhang tawh dawn lo emaw ka tih hnuah min rawn chhang a.

 

*Ngurpui, phatsan nih natzia hi a la tuar lo tan chuan hriat a harsa asin* tih min rawn thawn. Ka en reng a, phatsan a lo ni tihna a nih chu. Ka ngaihtuah chiang a, ka khawngaih thar ta viau.

 

Keipawh hian vawi tam ka ngaihtuah tawh, Mathana hian min phatsan ta se ka awm dan tur hi ka ngaihtuah ngam lo zawk. Amahah ka innghat a, ka hma hun zawng zawng pawh hi amah nen ni turah ka ngai vek, ka ring tawk a, a rintlak pawh ka ring. Chutiang chu niloin min lo phatsan ta anih chuan thih daih ka chak ka ring. Valtea pawh ka dem ta lo, chutih rual chuan tal chhuak thei tura ka puih erawh a ngai tih ka inhrilh mawlh mawlh a.

 

Ka exam ve na result kha a chhuak a, written ah ka lo tling ve reng tih ka hriat chuan ka lawm khawp ma. Interview hmachhawn turin ka inbuatsaih ve a, inziah tlin mai hi chu ka huphurh ngai lo hrim hrim. Interview tak hi ka huphurh thin, chhang tha intih ve viau pawhin tling tura beih ngai tam takah hian ka tlakpui tur thil a awm tih hi ka hre thin a, politics zawnga chet hi ka pa duh loh ber a nih piah lamah keipawhin ka duh lo a, chuvangin a chang chuan sorkar hna hi chu beisei loh law law ka duh phah thin.

 

Mathana a rawn leng a, keimah ka lo buai piah lamah a buai ve tho bawk nen a rawn leng lut khat a, ngaih pawh ka ngai ve khawp mai. Tv kan en a, ka chhungte an mu tawh a, a dar nghengin ka thu awn duai a, a hmel chu ka lo chik lo a, a chauh ve hmel riau hian ka hria.

 

“Karleh chu zinchhuah kan tum deuh a” a ti a, remote a keng a, a malah a khawng kauh kauh a.

 

“Khawiah?” ka lo ti liam mai a.

 

“Shillong lamah, thianho kal kan chak ve deuh mai mai a”

 

“Tute nen?”

 

‘Office lama thiante nen”

 

“Um, a tha alawm”

 

Ngaih that lohna engmah ka nei lo, kum dangah pawh zin chhuah leh zauh hi an ching ve a, chutiang bawk chu ni turah ka ngai.

 

“Enge ka lo hawn ang che” a tih chuan ka chal ti chuar nang chungin ka han ngaihtuah a.

 

“Ka hre lo, thil tha deuh a ni mai” ka ti a, ka kut chu lain a hmer vang vang a, engemaw sawi tum niawm tak hian a ka ang zuau a, a thulh leh ta aniang.

 

Inhmangaih thu inhrilh luamte hi kan ti ngai lem lo a, kum 5 zet kan lo inkawp ve tawh avang hian thil tam tak hi chu ngaiah kan nei tawh a, a tha ber lo tih chu ka hre tho a, mahse, ngai kan ti lo ve pawh a ni mahna, han infawh vawng vawngte hi kan nei khat khawp mai. Veng khat, inthenawm hnai kan ni a, kan inhmu fo bawk nen hian thil hi kan ngai neih tam tawh hle tih ka hria.

 

“Kumthar lam hi chuan inneih hi ngaihtuah ve tawh ila a thain ka hria” a ti a, ka zir chhuah hnuah kum 2 vel chu nulat ka la duh ang ka tih kha a lo hre reng a nih dawn hi.

 

“I thu vek lawm boss” tiin ka nui a, a rawn nui ve ta sak a.

 

A haw hnu chuan ka han ngaihtuah nawn leh a, pasal neih hi chu engtikah emaw a la ngai dawn tih ka hria, mahse, a hun a hnaih tak tak hian a lo chakawm miah lo. Tebawihi rilru puitling lo zette hi pasal neihsan tura ka inngaihtuah hian ka hreh phahin ka hria. Engpawh nise, Pathian thu thu a niang chu.

 

Ka lu hai muai leh ka hnar thi bawk si chuan min ti chau ngei mai. Lehkha ka chhiar nasa deuh a, ka taksain a tuar leh ta a nih hi. Lehkhabu atchilh tlat ka nih thin avangin ka naupan lai deuh pawh khan hetiang hi ka tawk fo a, mut nachang hre lo lek leka ka chhiar thin vang a ni. Tun pawh ka interview neih tur vang hian ka inchhiar nasa a, Mathana zin bawk nen hunawl ka ngah a, ka taksa zawh bakin ka lo bei leh pek a ni.

 

Intihharh pah tumin kawnah thil lei ka tum a, muangchangin ka chhuak phei a. Tlai eirawng bawl hun vel a ni tawh a, ka nu a awm tho avangin ka hmanhmawh lo. Nunui te kawt ka thlen chuan Valtea nen an rawn inzui chhuak hlawl a, kan inmelh deuh thap.

 

“Awi, khawnge I kal dawn? I van nawm loh hmel ve” Nunui chuan a lo ti sawk sawk a.

 

“Dawrah ka kal lawk dawn a, enge I tih zawk a?” ka ti a, Valtea chuan min lo melh chiang tawp.

 

“Hei ka thlah lawk dawn a” tih pahin Valtea chu a kawk a, ka lo bu zeuh.

 

An kal hnu chuan ka va hawi let leh kher a, ka hawi rualin Valtea chu a rawn hawi let ve chiah, rang em em in ka hawi sawn nghal a, ka mitko chu ka han san ringawt a. Nunui hian engkim min hrilh thin sia, engmah min hrilh miah lo, Ricky nen an inthen ta nge engmah ka hre tawh bawk hek lo. Ka lu chu ka han thing a, a tul a ti lo aniang chu.

 

Ka pa hritlang awmna in atuam ve a, nihnih chu a ai ka kalsal tawh. A nithumna ka kal zo leh chiah a, kartawp a lo ni bawk nen hmanhmawh lutuk duh loin kein ka haw a. Ka nu birthday a hnai tawh bawk nen a thil tur en pahte ka la tum. Ka bulah bike a rawn ding dawt a, U Sena, Mathana thawhpui a lo ni.

 

“Kan va inhmu khat ve a” tiin min rawn bia a.

 

“Ehe, u Sen, I zin ve nange?” ka lo ti hu.

 

“Khawiah maw?” tiin min zawt let a.

 

“Mathana tenen in zin dawn maw ka tia” ka tih chuan sawi fuh lo intih hmel zet hian a lu a hiat a.

 

“Eee.. Aa.. aw, kal ve lo” a ti buai ta nak a.