VALTEA 4

 

Four

 

Ka phone chu ka bih ngar ngar a, vawiin ni lengin Mathana hnen atangin call ka dawng lo a, tunah zan dar 8 a ri tawh a, ka be dawn nge dawn lo ka inngaihtuah mek. Khumah ka theh thla a, ka han thaw halh a, kum 5 hnua rilru nuam lo a ka awm hmasak ber anih avangin awmdan thiam a har ka ti. Ka phone chu a rawn ri a, rang fe hian ka han ban a, Valtea zawk a lo la ni zui.

 

“Hello” 

 

Ka aw pawh a zangkhai hlei thei tawh lo.

 

“Ehe! Tinge?” a rawn ti ta reng a.

 

“A.. enge.. Ve tehhlawl che chuan” tlema tawngkam dam deuh chuan ka han ti a.

 

“Thingpui rawn in kawi kan tum a, mahse, I nawm loh hmel emai, kan tlang mai ang” a ti a, ka nui suk. A chhan chu hetiang hian vawi khatmah Mathana’n min la ti ngai lo a, ka mood fuh leh fuh lohte hi a ngaihtuah ngai lo. 

 

“Rawn in rawh u” ka han ti na in tha takin min mangtha ta zawk.

 

Ka mu a, ka muhil thei chuang lo. Ka phone chu ka han phawrh chhuak leh a, a hma a IG a ka stalk thin nu kha va en leh ka tum a, a account a lo dah private daih. Rei fe ka inngaihtuah hnuah Valtea ka va text tawp, ka muhil thei dawn chuang si lo a. IG a a indah dante chu ka hrilh a, follow turin ka va ngen tawp. Minute 30 dawn ka nghah hnuah a screenshot a, min rawn thawn a, ka lo haw hawk. 

 

*Ngurpui, enge a awmzia? Ka u bialnu hlui tihna em ni? Ka u nena an thlalak a va post hnem ve* tih a rawn thawn tel bawk.

 

Ka phone ka dah a, ka mittui a rawn baw zawih a, phatsan ka ni ve a nih chu! Ka phone rawn ri cher cher chu lak tumna ka nei miah lo, eng dawt hmangin nge a insawifiah ang tih hriat ka chak lo a, ka natbelh dawn tih lah ka hre chiang si.

 

*Valte, phatsan nih natzia chu ka hriatpui ve ta che* tih ka thawn a, engtin nge ka awm tak zel ang le? 

 

Zingah pawh tho peih loin ka nawm loh chhuanlamin ka mu reng a, chhin khat mah ka chhing lo a nih kha. A bialnu pakhat zawk hmu turin Shillong ah a kal tih hi ka thinlungah a rawn ri dut dut reng a, a va na tak em ! Vawi khat mah hetiang hian min la pelhe san ngai lo asin, engtiklai atang khan nge kei hi min duhkhawp loh a, midang a lo neih tel tih pawh ka ngaihtuah thiam lo. Ka chhungte an chhuak vek a, dar 11 velah tho chhuak vein engemaw tal ei tha ka ti a, ei chak erawh ka nei miah lo. Thingpui lum ka tum lai takin doorbell a rawn ri a, ka va hawn chuan Valtea chu kawngkhar bulah a lo ding reng. Ka hmuh rualin ka mittui a baw nghal zawih a, min ngaihtuah tih hriat zet hian a rawn lut a, ka darah a vuan a, ka lo tah khum ta zawih zawih a.

 

“Ngurpui” a ti sap a, chu chuan ka rilru a ti no zual. Thutthlengah min thut phei pui a, ka thinlung tawt zual pui a reh hma chuan dawhthei takin min kuah ta hle hle a. Ka lungchhe zual a reh chuan min kuahna atangin ka talchhuak vat a.

 

“Ka tihpalh” ka ti a, min nuih sak a.

 

“Kei tluka hrethiam tur che an awm hleinem” a ti dam diai a.

 

Ka thingpui lum tur ka kalsan tak chu hrechhuakin kan pahniha kan in tur ka han lum a, dining table bawhin a kut a khawng ri kauh kauh a, enge a ngaihtuah ve ang tih ka hre lo. Thil pakhat erawh ka hrechiang, a nunhluiah a let mek tih chu.

 

“Hei in phawt ang” tiin thingpui chu ka han pe a.

 

“A rawn bia che em? Tiin rei fe kan ngawih hnuah min zawt a.

 

“Nizan khan min lo biak a tum a, ka pickup duh lo a, vawiina a rawn haw tur thu message a dah a, chu pawh ka chhang chuang lo a, a hrethiam ve tho ang ka ring” ka ti a.

 

“Ngurpui, ka u kher kher a ni hi pawi ka ti ngawt mai. A duhzia che kan hre tho sia, hetianga a awm thei hi a mak ka la ti fan” a ti a.

 

“Keipawhin mak ka ti, tihian inneih min sawm reng tho bawk si a” ka ti a.

 

“A hmeichhia hi dem ngawt ka duh miah lo a, mahse, a tum ve ngang a nih ka ring. School an kaltlang thin tih chu ka hre ngei mai a, mahse, Shillongah hnathawkin a awm tih kha nizana ka va en khan ka hre chiah a. Engpawhnise, rawn haw phawt se, inhmu ve phawt ula” a ti a.

 

“Ka hmu chak lo eee” ka ti a, hrethiam takin a bu nghat a.

 

“A insawifiahna ngaihthlaksak ve phawt la, tiraw?” tiin min rawn en a, ka lo melh ve chiah. A mitmenga min ngaihtuah hmel tak kha ka hrereng tawh ang.

 

Zanah Nunui nen kan inbe reng a, thil awmdan engkim ka hrilh a, ani pawhin mak a ti. Valtea sawi ang deuhin kan in duh tawnzia an hrechiang ve si a, mak tih loh rual a ni lo. Ka chhungte hrilh ber hi ka huphurh, Mathana hi an ring em em a, ani nen anih chuan engpawh ka tih an phal vek. Chutiang khawp chuan an ring ve si a, tuna ka chunga a thiltih hi sawi ta ila an rilru a na dawn tih ka hre reng. Tin, ka hmangaih ve em em a, a hmingchhiat pawh hi a duh hek lo. Ka pawm theih ka ring tawh lo a, mi bulah a chhan dik tak sawi lah ka tum hek lo. Tihian kan inthen anga, Shillong meuha a zuk pan vang vang nen chuan innei rawh se, chu chu harsa ti tak chunga ka thutlukna chu a ni.

 

Ka room ah Tebawihi a rawn dak a, inleng ka neih thu a rawn sawi a, Mathana a ni dawn tih ka hria. Tukin zingah a rawn thlen thu Valtea’n min rawn hrilh tawh a, a rawn lan hun hi ka lo nghak ve tawp. Ngawi renga inthen thu awm hek suh, engkim tawp law law rawh se.

 

Sitting rooma ka nu nen an lo inkawm mawlh mawlh chu kal pelin chokaah ka lut tlang a, tui a in phawt loh chuan ka chhungte bulah ka insum thei lo ang tih ka hlau. Tui chu ka in khawlh khawlh a, ka pum sa hut hut pawh a ziaawm deuh. Ka nu bulah ka thu a, mak ti deuhin Tebawihi’n min rawn en. Ni e, ka chhunge awmlai pawh nise a rawn len chuan a bulah ka thu zel thin a, ka zak lem lo a, kan chhungkua kan inpawh tlang bawk a, makah an ngai hek lo. 

 

“Naktuk Kohhran hmeichhe inkhawm ka thusawi zan a nia, ka han inbih leh ange” tiin ka nu chuan an room lam a pan a, Tebawihi pawh rei a thu lo. 

 

Kan pahnihin kan thu ran a, ka bulah a rawn insawn laite chuan kalsawn daih ka chak, ka ten deuh tlat.

 

“Min va ngai lo ve a” a tih chuan ka hmui ka lo tipawrh a.

 

“Hei ka lo hawn che a” tih pahin polythene hi a hnung atangin a rawn phawrh a, min pe a, ngawi rengin ka lo la hmak.

 

“Ka call I chhang thei bawk si loa, message I chhang bawk si lo a” a tih chuan ka thaw hak. Chutianga ka awm a nih chuan dik lo a awm tih hriain enge tih a zawng tur a ni a, nidang ang bawkin ka lungawi lohna a hrethiam leh miah lo. Thildangah sawiselna tur ka neih ka hre ngai lo a, hemi bikah hi chuan a hlawhchham ve a ni.

 

“Inthen ang” ka rin aiin ka tawng chu a pangngai.

 

“Maw?” a nui a, ka banah rawn vawn a tum a, ka lo phih sawk. “I ti tak tak em ni?” a ti a, ka fiamthu lo tih a hrethiam ve ta a niang.

 

“Fiamthuna chi chu a ni hauh lo a” ka lo ti a, a thutdan a han insiam rem a.

 

“A chhan ka hre thei angem?”

 

Ka phone chu phawrh chhuakin Remruati nen an thlalak ho chu ka hmuh ta a, Darjeeling thleng thlenga an kalna nen ka han hmuh chuan mak ti zet hian ka phone chu a en reng. A phone a phawrh chhuak a, IG ah en a tum a ni ngei ngei ang.

 

“I hmu tawh lo ang, a story –a a hman a nih kha” ka lo ti salh a.

 

“I hrethiam lo a nih kha, ka sawifiah thei” a ti a, a rilru chu a buai ve hmel tak zet.

 

“Khawngaihin min hawsan phawt teh, ka puakkeh mai dawn” tiin ka ding ta hluai a.

 

“Mawipui, ka hmangaihzia che chu I hriat kha, ka hrilh fiah vek ang che” a ti a.

 

“U Sena nen kan inhmuh atang khan thil diklo chu a awm ngei tih ka hre daih tawh asin. Ka hmangaih em em che a, ka hma hun zawng zawng pawh hi nang mah nen vek ka plan, rinawm lohna erawh engtikah mah ka ngaihthiam theih loh tur thil a ni” ka ti a, ka insum nasat tehreng nen ka mittui chu a rawn tla ta tho.

 

“Ni e, I ngaihthat loh ka hlauh vangin ka hrilh lo che a nih kha. Mahse, I ngaih ang kha engmah a ni lo a nia” a ti a, ka lo nui hak.

 

“Hmeichhia mahni chauha hnathawka awm I zinchilh rap mai ania” tiin ngeiawm fe hian ka han nui a, a mangang hmel chu pui tak a ni.

 

“Mawipui” a ti tham tiak a.

 

“Zanin atang chuan inhmelhriat satliah chauh kan ni tawh ang” ka ti ta a.

 

Hlim takin kan awm emaw tih laia inthen a ngai ta mai hi keipawhin ka hrethiam lo takzet a, hriatthiam ka tum lo law law. Zan ka muhil ngai lo a, chaw lah ka ei tha thei si lo. Ka nu te ngaihthat nan chaw pawh ka kil ve tawk tawk a ni ber. 

 

Tv enin kan chhungkuain kan awm thap a, doorbell rawn rik chuan ka nu in a lo chhawn a, tunge tih pawh ka ve en lo.

 

“Valte, nang I ni maw?” ka nuin a tih thawmah ka hawi chhuak a, inthlahrun hmel fe hian a rawn lut a.

 

“Lokal rawh, I va fel ve I lo len ve ngei a” tiin ka bula thu tur chuan ka han sawm a.

 

Ka nu in eng engemaw a zawt a, nu tawng duh tih takah zawhna lah a nei inpersan thei. Engemaw chen a len hnuah haw a tum ta a, thlah turin ka tho chhuak ve nghal a. Pawn thlengin ka thlah a, a bike bulah min hruai phei a, polythene khat tlatin entur chi hrang hrang hi min pe a.

 

“Chaw I ei thei dawn lo tih ka hria a, hei ka lo ken che a, ka rawn keng lut ngam lo a” a ti a, a nui suk.

 

“Ka lawm e aw” ka ti a, ka mittui a tling leh hman hram. 

 

“Im.. ka u vanga pawi ka tih chu thuhran nise, ka hriatthiampui em vang che ania” ati a, kan indin hmaih bawk a, rim hriat ka nei, ka hnar ka lo len vat vat a. “Aw, tlem ka in” tiin a lo inpuang nghal tawp.

 

“Valte, zu hi chu in tawh suh” ka tih chuan van lam a melh vang vang a.

 

“A la harsa ve em a ni” a ti ta sap a.

 

Note: Helai thleng chiah hi ka type hman, dah loh aia dah a ni e.