VALTEA 5

 

Five

 

Zan nga vel chu min hmu turin Mathana a rawn kal ziah a, room atangin ka chhuak duh ngai lo. A beidawng ve a ta aniang, a reh ve ta hmak a, a reh takah chuan hrehawm ka ti leh ngawih ngawih lawi a, ka tahna lamah ka lu te hi a na luk thin. Chutianga awm ta chu ka chhungte pawhin rin dan an lo nei thiam ve deuh mai a, thuchiang erawh engmah ka hrilh lo. Engemaw inhmuh thiam lohna kan nei tiin ka sawi a, min zawh chhunzawm bik lo.

 

“In innei tawh dawn emaw tia, lo inthen leh rih chu,,, I senior duh awm” Tebawihi’n a lo ti leh hman tawh a, ka pa in a khap.

 

A chang chuan ngaihdam hmiah a, inneih mai te pawh ka duh a, mahse, ka ring ngam tawh si lo. Amah nen engkim ka hma hun hi ka lo suangtuah thin a, a mak tihna hian ka khat. Zana ka mu lai te hi ka mumang mai nia thanharhsan thei turah te ka han ngai thin a, a ni si lo a, a va han hrehawm ber tak.

 

Kar hnih vel chu mu thei si lo, chaw pawh ei thei si loin ka awm a, ka taksa pawh a tla ve dawk thei. Ni khat chu ka rin loh deuh hian Valtea a rawn lang hlawl a, ei tur min rawn pek zan atang khan a reh ve vang vang a, kan inbe lo bawk a, tun hi ka hmuh leh hmasak berna a ni.

 

“Thil ei chhuak ila” tiin min rawn sawm a, lu thur bumin ka lo awm a, ka sam chu ka han bawk nawk nawk a.

 

“Ka chhuak peih lo ee” ka lo ti a.

 

“A nih leh ei tur siam rawh” nui suk hian a ti a.

 

“Um, kan siam dawn nia. I va reh thei ve a” ka tih chuan min melh ngar a.

 

“Karhnih chhung chu mahniin bei la ka duh a, a bak chu a awlsam ve zut tawh a nia” a ti a.

 

“Hm, a awlsam lo aniang, zu pawh..” sawi zo loin ka lei ka chhuah zuk a.

 

“Engtin maw?” nui chung hian a ti a.

 

“Zu pawh I la in tho sia” ka ti zuih ta vel mai mai a.

 

“Ka inchhir reng asin, zu nena ka lo tuar kha a pawi a nih hi” a ti ve ta sap a.

 

“Mahse, I in lo thei tho sia”

 

“Nia, ka in khat tawh alawm. Ka rawn kal zan khan ka in a, ka in lo char char a, nizanah ka in leh chiah a” a ti a.

 

“I u chu ka thlah zalen tawh bawk a, nuam a ti ngawt ang” ka lo ti daih a, a hmel a nur deuh nang.

 

“A tuar na ve lutuk, chaw pawh a ei thei vak lo” a tih chuan ka lo awih lo lutuk.

 

“Engmah tawrh nat tur a nei lo e a” ka lo ti hluk a.

 

“A inchhir dawn chauh, a nupui tura a dah kha I ni ve hrim hrim a” a tih chuan ka lung a rawn phu rang lutuk.

 

“Engtin nge a theih le?” tiin ka han thaw hak a.

 

Min chhang lo in a tho a, tukverh lamah chuan pheiin a dak voh voh a.

 

“Kan duhdan ni miah lo hian kan chungah hian a lo thleng thin si a, ni e, a mak ngawt mai” a ti a.

 

“Ka rilru ka thlak, ka lu ka su lawk anga, thil chu ei chhuak ang” ka ti ta a, boruak ngai reng hip hi ka ning ve hrim hrim.

 

Thil ei tur chuan kan inzui chhuak ta a, Valtea bulah hi chuan ka nih ang ang hian ka lang vel mai mai. Ka duh leh ka be tha hluah a, ka mood a fuh loh leh ka be leh peih lo, ka bialpa nau a nih ang ai mahin thian angin ka en reng reng. Kan inkawmna la rei lo mah se kan hun tawn mek a lo inang bawk nen thinlung tak hian kan inpawh a, kan inhriatthiam tawnna hian min innel tir zual bawk.

 

“Nunui tlawh kawi ila” tiin kan haw lamah chuan ka sawm a.

 

“A ngai lo” a ti bung hmuk a, kan inah kan haw tlang.

 

“Lo leng leh rih la” tia ka sawm chuan tihtur a la neih thu sawiin a haw tlang ta a.

 

Thian ka kawm tam lo a, Nunui pawh ka thiantha ber a ni a, chutihrual chuan a ni chuan thiantha tam tak a nei a, kan inzui tam lo. Ka chhuak mai mai ngai lo bawk a, inkhawmnaah hian kan inkawmin kan inzui nasa a, a bakah hi chuan kan inzui tam lo khawp mai. Ka rilru nat em em lai pawhin min hnem nasa tu a ni a, mahse, Mathana hi ngaidam turin min ti thung. Ka rilru nen a inmil vak lo a, a tira ka hrilh bak kha ka hrilh tha vak duh lo. Hei vang tak hian ka tan Valtea hi a hlu em em a, min enliam hunte, min hnem hunte hi a hre em em a, a tak ngeia a lo tawn tawh vang pawh a ni maithei.

 

Chutiang chuan hun a kal ve zel a, thla a lo ral ve ta hial a, ka thinlung na pawh dam vek lo mah se a tir ai chuan ziaawm tak a ni. Zan khat chu ka nau nen in kan nghak a, ka nu leh pa thil pawimawh tiin an chhuak a. Sitting room ah lehkhabu ka chhiar a, ka chhakah Tebawihi’n TV a en thung. Doorbell a rawn ri ral ral a, Tebawihi’n a lo chhawn vat a. ka rin loh deuhin Mathana leh a thianpa Tka an lo ni. Ka thutna lamah an rawn thu thla a, ka lehkhabu chu dahin ka lo insiamrem a.

 

“Khawnge I chhungte?” Tka chuan a ti a, an chhuahna te chu ka han sawi a.

 

“I va reh thei ve a” tiin min han chhuahchhal a, ka inkhawm khat ve deuh a, chu chu a sawi chhan tih ka hria.

 

“Nia, ka han inthlahdah ve lawk mai mai” tiin ka chhang a.

 

“Mawipui, thil sawipui che ka duh a. Hei thianpa hi I tello chuan tha pawh a nei lo ania” tiin a han nui a.

 

“Keinite chu engmah kan ni hleinem, duh ber dang an awm chuan tangkaina kan nei ve lo ang” ka lo ti a.

 

“Mawipui” Mathana chuan a lo ti nghut a, ka lo nui lui hak.

 

“In pahniha sawi chi a niin ka hria, Tebawhi khi TV ka lo han en pui ange” tiin Tka chu a insawn chho nulh a.

 

Mathana chu nidang ang lo takin a zam tih ka hre ve reng, engmah ka sawi duh der si lo a.

 

“Ka insawifiahna tal hi chu ngaithla ve la ka duh”

 

Ka va melh a, zam angreng tak hian min lo melh ve a, tlem chuan ka khawngaih ve deuh.

 

“Aw, sawi la, tun bak chu sawina hun I nei kher lo ang” ka lo ti a.

 

A thaw deuh halh a.

 

“Ka thiam lo tih chu ka hria, mahse, I hriat ang kha a ni bik lo tih ka sawi duh hmasa duh a. Remruati te nen hian school kan kalho thin a, kan inzui ve nasa thin. Min lo rinawm lohsan vanga inthen kan nia, zep lo chuan ka duh ve em avangin chutiang hnu pawh chuan ka pawm leh a, rei vak lo chu kan inkawp leh. Mahse, ka ring tak tak thei tawh lo a, chuvanga inthen leh ta kan nia. Ka nunah I lo lang a, Remruati ka lo duh ve hlea ka hriat thin kha nang hian a dik lo tih I rawn nemnghet a, ka tan hian I hlu lutuk ringawt. Ka hmangaih em em bawk che a, neih ngei che pawh ka duh a, ka chhungte pawhin min pawmpui vek. Remruati rawn lan lehna hi a la rei lo, kan thlalak hlui hmangin hma a rawn la chho a, I hmuh ang kha a ni a. Ka hlauh ang ngeiin kha khan a tina ta reng che a, chet la tawh lo tura ka tih hnuah vawikhat chiah amah tlawha zin tura min tiin vawikhatmah a rawn inrawlh tawh loh tur thu min tiam a. Chuvangin nang chan che ka hlauh em vangin ka zin thla ta a ni.

 

Ka thianpa te inah ka thleng a,  amah ka thlen chilh lo a, ka taksa pawh hian insawi theihna turin neiin a khawih lo tih hi Pathianin a hria a, Remruati pawhin a pha thei lo ang. A duh ang chu tihhlawhtlinsakin engmah tihdik loh nei lo a inhria in ka lo haw chho a, mahse, chet a lo la leh ta tho a, tunah hian min biak pawh theihna zawng zawngah ka block vek nghe nghe. Mawipui, chan che hi ka ngaihtuah ngai loa, ka ngam lo bawk. Chance vawikhat min pe leh hram rawh” a ti ta a.

 

A thusawi chu uluk fe hian ka lo ngaihthlak sak a, dawt a sawi dawn lo tih ka hria. Mathana hi chu ka hrechiang ve a, hetianga mam hian dawt a sawi thiam lo tih ka hre ve reng. Chumi vanga awlsam taka nem erawh ka tum hauh lo.

 

“Kan hre chho zel ang chu” tiin ka lo thlah ta kha a nia, ka lo tawrh ve vek hnua awlsam taka let hi chu ka tum lo bur.

 

 A hma ang chiahin a inkhawm dawnah min rawn sawm a, banah min zui haw a, zan awlah a rawn lang leh zut bawk. Engmah awka ka la pawh lo chung pawhin pawi tihna a nei lo a, ka chhungte lahin kan tha leh tawhah an ngai hmak bawk, engmah ka sawi vel peih lo.

 

*ka u nen chuan in lo tha leh tawh maw? Ka lawmpui che u*

 

Valtea message chu ka mut dawnah ka chhiar a, kan inbe khat tih ka hrechhuak chiah. Ka chhan letna tur ka type mawlh mawlh laiin min rawn block hmak. Ka en reng a, ka hrilhhai lutuk chu ka nui tawp. Enge a hriat a? A number chu ka han dial a, a lo pickup leh chut tho sia.

 

“Enge min block kher a?” ka ti nghal tawng a.

 

“Ngurpui, inbe tawh lo ang” a rawn ti ta a nih chu.

 

“Inbiak tawh loh I duh maw? Aw le, I duh dan chuan le” tiin ka dah ve ta hmak a.

 

Chutia chhan awm lo leh sawi loa min be duh lo chu ka la na ngang mai, a number chu ka han delete dawn a, tlawmah ka la deuh si a, tihian awm vel mai mai teh se.

 

Ka hna dil kha ka rin loh lutukin ka tling ve nawlh a, mak ka ti lutuk chu ka ringhlel rum rum. Mathana’n min rawn hrilh a, Nunui’n min rawn hrilh bawk a, ka pa in min rawn hrilh bawk. Keimah mai kha chu ka in ring zo lo a, chutia mi pathum laiin min rawn hrilh leh hnu chuan ka awih ve chiah.

 

Ka joining report pek niah Mathana’n min hruai a, engkim min tihfel pui a, kan tha leh a ni deuh maiin ka hria. A ruk tak chuan ka ui ve tho a, midang nena bul tan that leh vel hi ka peih lohzawng tak mai a lo ni bawk nen hetia kan inkara hnawk a awm tawh loh chuan han sawisel em em pawh ka nei lo. Mahse, thil pakhat erawh hai theih miah loh ka nei. Chu chu a hma ang khan Mathana hi ka thlahlel tawh lo, ka rilru zawng zawng hi a nei tawh lo tih hi.

 

Ka thianteho min nawrna vangin ka hna thar lawmna chu thiantha zual tak tak sawmin kan han nei ve a, Nunui leh Valtea rawn inzui lut ka hmuh chuan engemaw hi keimahah a awm, enge a nih ka hrethiam chiah lo na in ka va melh tha duh vak lo. Tka’n programme engkim a ruahman vek a, aman a duh duh danin a ti bawk a. Ka lo hawi vel mai mai. Eng eng emaw kan tih hnuah cake zai turin min sawm a, cake pawh hi a awm dawn tih ka hre lo, min surprise ve chiang khawp mai. Cake zai tura ka chhuak chu Mathana a’n ko tel kher a nih chu.

 

“Changtupa nen an lo zai dun ang” a ti a, an lo au chul hlawm a. Mathana pawh lai zet hian a rawn ding chhuak a, ka chemte ken lai chu Tka’n kan pahnihin min rawn hum kawp tir a, kan zai ta. Enge hmuh ka tum pawh ka hre lo, ka sir lampang chu ka va hawi a, Valtea pawna a chhuak tur ka va hmu phe zuai a.