VALTEA 6

Six

 

ka inbual zawh chuan ka sam chhem ro leh tumin plug bulah ka ding a, ka sam chu ka chhem hauh hauh a, naktuk atang chuan hna thar thawkin ni tin ka chhuak ve tawh dawn. Ka han nui deuh suk a, chutih lai chuan kan kawta hlim thla ni awm tak chu ka zuk hmu a. Ka thiltih lai ka tawp chawt, ka hlau a ni berin ka hria. Ka en rei deuh hnu chuan mihring niin ka hria. Ka han dak chhuak a, ka mit vai a reh deuh hnu chuan Valtea tih ka zuk hmu. Ka grass duat em em chungah chuan a ding a, a ke a chhir deuh kauh kauh a, nidang ang chu nise a dinna chu ka ui lutuk anga, ka hau leh hrep ang. Muangchangin ka kawr ka ha a, inhnuaiah chuan ka chhuk ta a. Kawngka kan kalh tawh chu thawm dim thei ang berin ka han hawng a, ka chhuah rualin veranda light a in on nghal a, Valtea a rawn hawi phei nghal.

 

“Engati nge I la haw loh a?” ka ti a.

 

“Hetatang hian lo ven che ka tum asin, tinge I lo chhuah a?” tiin min lo zawt let a.

 

“Min be duh tawh lo emaw ka tia” ka ti sap a, min rawn pan hnai a.

 

“Ka lawmpui lutuk che aw. Hei hi ka rawn ken che a, ka pek theihnghilh che a” tiin a ipte atangin pen hi a rawn phawrh chhuak a.

 

“Ka lawm e” tiin ka lo la a.

 

“I hlim tih ka hria a, ka hahdam” a ti a, a  thle deuh bak a, zanina ka hmuh khan a rui vak pawhin ka hre si lo a, a lo inbelh a ni ngei ngei ang.

 

“Va haw tawh rawh, zan a rei tawh sia” ka tih chuan min rawn melh run run a, a nui ta suk a.

 

“Umm… nia, aw le. I tihte chuan” a ti a, kal a tum a, engemaw hi a chhuih deuh khut a, a tlu tur chu ka va dawm a.

 

“Ka lo thlah dawn che em ni?” ka ti a, in a thleng zo lo ang tih chu ka hlau.

 

“Ka thlah let thei dawn si lo che a, ngai lo mai rawh se” a ti a.

 

“Mathana ka be dawn em niang?”

 

“Mathana..” a lo ti nghal sup. A thaw ri halh a, “Aih.. “ tiin ka vawnna chu a phelh a, a kal ta a.

 

Ka en reng a, kawng kawia a tlan liam thleng chuan ka en a, ka hriat chian ngam chiah si loh thil hi a awm. A nihna takah chuan Mathana nen hma hun eng tak kan nei a, chutih laia a nau rui ve thei deuh lo buaipui hi ka tihtur a ni miah lo. Ka lu chu ka han thing a, inchhungah chuan ka lut ta a. Ka khumah thuin a pen min pek chu ka han en chiang a, ka awh theih em em kha a ni tih ka hria. A man pawh a tlawm viau lo, ngaihlu tak hian ka drawer ah ka dah lut a.

 

Muhil thei loin ka phone chu ka han bih a, whatsapp status ho chu ka en kual a, Valtea pawhin a lo update ve ngei. Status hi a nei ngai mang lo a nia, nichin lawka a dah a ni lehnghal. Tin, min lo unblock tawh tih ka hre chiah bawk.

 

*what if I told you that I love you* tihte mai hi a hmang a.

 

Ka khap fak fak a, ka inngaihbel chu ka ti ngam lo a, mahse, tunhnaia ka chunga a awmdan nen ka awm a tinuam lo.

 

Ka hna thar pawh ka zawm tawh a, zakzum angreng tak ka nih vang hian a tirah chuan hrehawm ka ti ve deuh. Lut thar pahnih kan awm a, a tirah chuan kan inkawp deuh chawt a. Kar khat vel kan kal hnu erawh chuan kan mizia a inang lo ve deuh bawk nen kan tla hrang ta daih. Thla 3 chhung training turin Kolkata ah kan kal dawn lehnghal a, ka huphurh angreng viau mai.

 

Kolkata khawpui lum leh mipui zi nuai nuai karah thla khat chu kan awm tling ve ta, ngaiah ka nei hlei thei lo. Ka hriselna te hian a tuar mai dawn hian ka hre thin a, eng em erawh ka la ti bik lo. Thla khat chhung chu zan lamah class kan la tel  a, hunawm kan nei mang lo tih theih a ni. A hautak zual erawh kan zo tawh a, tlemin a nuam ve tan deuh tawh ang.

 

Whatspp ah message ka dawng a, lehkha ka chhiar lai a ni a, ka en mai lo a, a hnu deuhah ka en ta chauh a. Nunui a lo ni a, Valtea nena an thlalak deuh hlir a ni.

 

*tunlai chu a fel lutuk a, a inkhawm vel tluk tluk mai* tih vel a ni.

 

Ka phone chu ka han dah a, midang nena ka hmuh tlan apiangin Valtea hi ka rilruah a awm zui ziah. Ka phone a rawn rik chhunzawm nghal a, ka la phu chiang em em lehnghal. A chhan chu Valtea a ni tlat.

 

“Hello” zangkhai thei ang berin ka lo chhang a.

 

“In va bei ngawrh awm ve, I reh thei hle mai” a rawn ti a.

 

Kan training kalphung leh kan buai ve thinzia te chu ka lo hrilh ve luam a.

 

“I inkhawm tluk tluk tihte ka lo hria a, ka lawm hle mai” ka tih chuan a nui deuh hak a.

 

“Zu ka la in tho alawm” a ti.

 

“Nunui thu kha lo awih viau la aw” ka tih chuan a nui vei huk huk.

 

Mathana pawh an hna an buai ve bawk chu thuhran nise, kohhranah a buai tel bawk nen hunawl a nei mang lo a, a hah ve viau thinin ka ring. In lamah a mawhphurhna a lo sang bawk nen, Valtea heti hian a thle mai mai si a, Kimkimi lahin pasal a nei dawn a, engkim ngiahtuahtu Mathana tho tho a nia, a indaih lo hian ka hre ve thin. Kumin hi chu Kimkimi’n pasal neih a tum thu a lo sawi lawk ve tawh kha a ni reng reng a, upa ber mah nise Mathana hian ka thu a ngaihchan ve zel avangin a nauin a tihkhalh dawn ta a ni.

 

Thla thum chhung ka awmbo hnuah mahni inah ka han haw leh a, a hahdamthlak vawng vawng. Ka haw zan hian message duhawm lo zet zet ka la dawng lehnghal a, tui taka muthilh vang vang ka chak nen a inmil lo kher mai. Mathana ex Remruati leh a thianten min rawn tibuai nasa a, chhang let miah loin ka block vek.

 

*a bialnu nghet nen hian an inthen thei chuang lo, inneih puiah nizan lawkah pawh a rawn sawm. I duh chuan Mathana pawh kha I zawt thei ang* tih angreng te, a tam lutuk.

 

Ka screenshot a, Mathana chu ka va thawn a.

 

*Min tihbuai zui kha chu ring tawp rawh. Engahmah ngai lo la, ka hmangaih che tih kha lo hre reng rawh* tiin min rawn hnem a. Hetiang reng reng hi chu ka hne ve ngawih ngawih tawh.

 

Kimkimi pasal neih ni chu chawlh a ni hlauh a, keipawh kal turin ka inbuatsaih ve nasa. Chaweikham atangin Nunui a rawn inphur phei a, hetiang nikhua hian ani hi ka makeup artist a nia, confi takin ka chhuah ve theih phah thin. Min han chei fe hnu chuan ka duhthusam a ni ve ta, darthlalangah chuan ka han inen a, ka nui var var.

 

“Valtea’n min rawn hruai dawn a, ka scooty chu in inah hian awm mai rawh se” a ti a.

 

“Nunu, Valtea nen hian in ni deuh a mi?” tiin a hma atanga ka zawh chak tawh chu ka zawt phawng.

 

“Ka hre bik lo, ka ni awm ve tawp. Dik tak chuan hetiang tluka ka vei ngawih ngawih leh ka duh hi an awm khat em a, a awmdanah hian min hnar bik chuan ka hre lo a, mahse, official deuha sawi engmah kan nei lo bawk” a ti a, a hmai chu a chei malh malh a.

 

Ka thiannu hi kei aiin a luck zawk a, college kan kal chhung zawng zawngte khan mipa mit fukna pakhat a ni thin a, college miss hial a ni tawh. A pian a nalh em em a, ka chhuang hle thin. Min tluk lohna erawh pakhat a nei ve, chu chu ani aiin ka vun a nalh zawk.

 

“Ka sawi chu I hria em?” tiin darthlalang atang chuan min rawn en a.

 

“Aih, thildang ka lo ngaihtuah daih a” ka tih chuan a hnar a tum dat a.

 

“Min lo zawhsak tawp la ka ti, enge in pahnih hian in ni ami tih velin” a rawn ti a, ka lo bu nghat.

 

Kan kawtah motor a rawn ding a, Valtea a rawn chhuak nghal a. Coat ha-a a inchei ka vawikhat hmuhna a ni a, a chhelo tih ka pawm hmak. Min hmuh chuan a ban a rawn vai zeuh a, ka lo vai let ve a. Biak in lam pan chuan kan chhuak zui nghal. Nunui chu a front seat ah a chuang a, a tawng deuh barh barh a, enge a sawi ber pawh ka hre lo.

 

“Ka thlah haw leh dawn che'u nia, ka motor dahnaah hian kan innghak dawn nia” kan thlen hnu chuan a ti a.

 

“Awi, ka crazy vek tawh” Nunui chuan ka beng bulah a rawn ti sap a.

 

Inneih programme a zo a, thlalak chhung chuan step ah kan lo thu a, an chhungkaw thlalak ah te, unau thlalak ah te chuan Nunui’n a phone in a lo hmet ve zel bawk a, a hlim hlein ka hria.

 

“Ka thlah dawn che nia aw” thingpui kan in laiin Mathana ka bulah a rawn kal a, a pawi lo khawp ang.

 

Mathana kan nghah lai chuan Valtea a rawn kal a, haw turin min rawn sawm a.

 

“Changtupa’n a thlah dawn a” Nunui’n min lo sawi sak a, Valtea chuan min rawn melh a, a mitko a san ak.

 

“Anih chuan kal ila” tiin Nunui a sawm a, keimah min melh char char thung.

 

An tlan liam hnu lawkah Mathana pawh a hman a, kan inzui chhuak ve ta nghal a. Tih tur neuh neuh an la ngah avangin inah min drop a, a kal leh nghal. Kan kawta motor lo ding reng vang chuan ka han ding deuh dat a, Nunui scooty erawh a lo awm tawh lo.

 

“Ka rualin kan inah lo phei rawh"

Ka inher let vat a, Valtea chu a motor chhungah a lo awm reng.

"Tinge i la kal loh a?" Ka ti ta ringawt a.

"Ka hre bik lo" a ti tawi tuk.

Inchhungah kan inzui lut a, ka chhungte pawh an lo thleng ve chiah. Ka inthlak chhung zawng min lo nghak a, an in lam panin kan inphur chhuak leh ta a. An in kan thlen dawn chuan kal tlang ta lo chuan kawng hnuaiah a peng ta daih a, a ngaihna hre lo zet hian ka lo en tawp.

"Khawnge kan kal dawn?" Ka han ti a.

"Kan ride lawk dawn" tiin a nui suk ringawt.

"A tul lo e" ka ti zawi sup a, a nui mai mai.

"Motorah hian lo awm lawk rawh aw, ka rei lo ang" tiin in lo awm hmasa berah chuan a lut zuk a. Ngaihthat lohna em em pawh nei loin ka lo nghakve tawp. Minute 5 hnu velah chuan a rawn chhuak a, Mathana nen kan lo inbe mek. Valtea nen an in lam pana kan kal mek thu ka sawi lai chuan a rawn thu lut ve a, keini pawh kan inbiakna kan titawp chiah.

"Ka u em ni?" tih pahin motor a start a.

"Aw" tia ka chhan chuan a lo bu nghat a, engmah a sawi tawh lo. 

Kan tlan chho leh mawp mawp a, biak huphurhawm khawpin a hma lam a melh nasa a, ka lo ngawi ve reng ringawt. 

"Lokal la" Mathana'n ka banah chelhin min kai a, an in kan thlen veleh khan min rawn pan nghal a ni. Ka va hawilet a, Valtea chuan min lo melh run a, a motorah a lut leh nghal daih. Ka awmchhungin ka hmu nawn tawh lo a, ka rilruah engtin emaw tak a awm.

Bang nghengin ka ding a, Kimkimi a lawi tawh dawn a, Mathana pawh ka bulah a awm tha hman lo. Acousin te ho nen kan awm a, kan inhrechiang ve hlawm a, hrehawm ka ti hran lo. Mahse, Valtea ringawt ka rilruah a awm. A chhan ka hre lo a, ka duh miah loh thil a ni bawk. A unaute phe suau suau kara hmuh tur a awm ve lo te chuan min tihah ut ut a, nichina min kawi puinaah khan zu a in tih lah ka hrechiang si a, pawn lamah chuan hmuh tur a awm tak mialin tiin ka hawi kual chhen ringawt.

Ka chau ve bawk aniang ka haw kha ka inthlak fel hman tawk, ka muhil nghal bawrh bawrh a. Ka phone pawh ka lo silent hman tawh lo a ni ngei ang, ka phone riin min tiharh a. Mumang ang ruai hi ni maiin ka hria, ka han ban a. 

"Ngurpui"

Valtea a ni. Ka meng nghal kawk a. 

"Enge ni ta tun ang zan reiah" tiin ka han intiharh lui a.

"Ka ngai lutuk che" tiin a thaw chhuak ham ham a.