VALTEA 11

 

Eleven

 

“Mawipui, vawiina ka hmuh duh chhan che chu nangpawhin I hre thoin ka ring a. Mo atana kan duhzia che pawh I hre vek a, engmah chhungkua atangin harsatna in tawk lo a, hei leh chen hi Mathana nen inkawp pawh in ni reng a. Inngaihtuah chiang leh la ka duh khawp mai. Valtea hian engtin emaw a lo dawi a che a ni lo maw?”

 

Nu Machhuani chu ka melh tlawk tlawk ringawt a, chuti taka Valtea a puh duh chu ka thin a rim bawk.

 

“Nu Machhuan, Mathana nen engkim sawiin kan inkar pawh kan titawp a, Valtea’n engmah inrawlhna a nei lo. Mathana chungah engmah lungawi lohna pawh ka nei lo a, kum hei chen dawhthei taka min enkawlnaah pawh ka lawm em em bawk” ka ti a.

 

“Mi ngaihdan tur cheu hi a pawimawh asin. Valtea kher ni lo se chuan hriatthiam dan pawh a awm anga, Mathana nen in inkawp tih hre lo pawh an awm lo a, tuna hetianga mi hriata in hming a mawi lo tur hi nu leh pa rilruah chuan na deuh a nia. Khawngaih takin lo ngaihtuah tha leh la ka duh khawp mai” a tita a.

 

“Keinipawhin a tir phat atang khan heng hi chu kan tawk dawn tih kan hre tho a, mahse, a lo thleng ve tawp” beidawng zet hian ka ti a.

 

“Mathana nen innei ula, Valtea I duh emaw I tih hi a reh mai ang. Valtea nen innei ula engtin nge in awm ang? I nu leh pa pawhin an remti lo reng reng ang, ka fapa mah nise a puitlin lohzia lah ka hai hek lo” a tih chuan ka lo na zawk.

 

A theihtawp chhuahin a insiamtha chho ve mek a, hetia a chhungte ngei ngei pawhin an ring lo lutuk hian amah min khawngaih zualtir. Ka hma hun ngai ang vekin an lang a, mahse, Valtea lam an ngaihtuah duh hauh si lo a. Chu chuan amah min hmangaih zualtir lo thei lo.

 

Nunui te inah hrilh lawk loin ka lut kawi a, inah a awm leh dawn tih ka hriat vanga be hmasa duh lo ka ni. A nu in rooma a awm thu a sawi chuan ka kal tlang ve mai a. Thawveng angreng tak hian kawngkhar chu hawn mai ka han tum a, tawng ri ka hriat avangin ka tawp chawt.

 

“U Mathana chu a van mak em em?” Nunui’n a tih chuan a hmalama an sawi ka hre si lo a, an sawi leh tur chu ka lo ngaithla tawp.

 

“Mawipuii rilru na lutuk tur ka ngaihtuah khan ka tawrh tir tawp thei lo a ni.Chuvangin a hnaiha awm zel kha ka tihtura ka ngai, chu erawh hre kher lo turin ka duh a nia” Valtea ve thung.

 

“I fel hrim hrim a nih chu. A mak ka ti reng a, mahni u te bialnu hlui han duh tlat kha a tir pawhin ka hrethiam lo a lawm. I rilru hi chu a tha ve maw le” Nunui’n a tih chuan ka ngaithla thei tawh lo. Ka inher a, ka kal chhuak ta hmawk hmawk a.

 

Valtea hian min duh ve tak tak vang ni loin min khawngaih vangin min ngaizawng der ni ta berin ka hria, ka rilru a na a, ka tha a na bawk. Ka chhungte leh a chhungte pawhin thlah tura min tihlai pawha a lama ka lo tang tlat te chu a ka in ti em em a, mihring ka rin apiangten hetianga min tina zel hi a mak ka ti.

 

Kan chawei kham chu thut pawh ka thu khawmuang peih lo, ka mu tawp a, ka nun buai chuar bik em em hi chhut ngaihna pawh ka hre lo. Ka phone ka switchoff a, muthilh ka tum a, a har lam hret chu a ni. Valtea’n min rawn biak a tum ngeiin ka ring a, a mangang angem tihte chu ka ngaihtuah neuh neuh. Nunui bulah a hlim alawm, a duh leh a leng leh mai ang chu. Ka thiantha bera ka lo chhal ve pawhin ka hriat lohah chuan min lo sawi ve duh tho a, tumah hi rin tur ka hre tawh lo. Keimah hian ka thurukte hi pai ila, a him ber bawk ang.

 

Kan in piaha Valtea motor ding chu ka hmu reng a, hmu lo derin taxi rawn tlan chu ka lo phar ding a, ka lut daih. Office kawtah ka chhuk a, Valtea’n min lo thlen khalh.

 

‘Ngurpui, inbe lawk ang”

 

“Ka hman tawh lo”

 

Ka kal tlang a, ka banah a lo chelh hman hram.

 

“A rei lo ang” a ti sap a.

 

“Tah hian sawi mai rawh” ka ti ve tlat a, a hawi kual thuak a.

 

“Tinge nizan atangin ka biak theih loh che?”

 

Min khawngaih hmel anga a awm te chuan ka thin a tirim vek.

 

“A chhan chu I lo zawng chhuak ve mai dawn nia” ka ti hmuk a.

 

“I sawi loh chuan engtin nge ka hriat anga ?”

 

“I khawngaih ka ngai lo, keimahin ka paltlang thei” tih pahin a kut chu ka theh sawn a, mak tih hmel deuh hian min rawn en.

 

“Ngurpui..” a ti zawi sap a.

 

“Tun atang chuan I hlimna turin nung la, min ngaihtuah a ngai lo ang. Min ngaihtuahtu chhungte ka la nei ve a, ka mal bik lo” ka nui lui sak a.

 

“Ka sawifiah thei”

 

“Aih, engmah sawifiah a ngai lo, va haw tawh rawh. Ka lut tawh dawn” tiin ka kal ta a.

 

Ka mittui chu tihtlak loh hram ka duh. A hmel ka hmuh hian ka chak loh phah ziah tih ka hria, hmuh fo loh ka duh tawh ang. An mawhphurhnaa min ngaih vang ringawt te, loh theih loha an chunga tla an tih a ngaih vang ringawtte, min khawngaih vang ringawta min hnaih an nih chuan chu chu ka duh bik lovang a, ka lo pawm thei bawk lo ang. Nunhlui ka nei a, chung ka nunhlui zawng zawng chuan a tihbuai loh a, keimah hi keimah ka nih vang chauha min hmangaihtu chiah ka mamawh.

 

Nunui a reh hmak a, a nu hnen atangin khami ni khan an inah ka kal tih a hriat ngei ka ring a, room a lut siloa ka haw leh danah an thusawi ka hria ah a ngai bawkin ka ring bawk. Engmah pawi tih ka nei lo a, inthiam lo zawk leh inthlahrung zawk an awm a nih chuan an dik lo zawk tihna a nih ngei pawh ka ring.

 

KTP inkhawm zan a ni a, keimahin ka inkhawm a, Tebawihi exam lai anih avangin ka sawm chhuak duh lo. Kan ban veleh haw nghal tumin ka chhuak vat a, gate bulah Mathana a lo ding a, min lo koh avangin ka han ding dat a.

 

“Nizan atangin Valtea a rawn haw lo a, a awmna I hre mial em?” a ti a.

 

“Aih, hre miah lo” tiin ka chhang.

 

“Mawipui, ka nau chu hetiang mi hi a nia, I hriat tlem vangin bumin I awm mai mai a ni” a tih chuan ka ding chawt.

 

“Mahni tha inti ngawih ngawih ai chuan mahni sualna pawmte hi ka dah sang zawk fe” tih pahin ka kalsan ta daih a.

 

Mihring hian tihsual kan nei thei a, vawikhat kan lo tihsual tawh vang ringawtin kan ngai sual lutuk tur a ni lo tih hi ka ngaihdan nghet tak mai a ni a. Mathana pawh a nunhluia a lo dai sual tawhna te hi ka hmuh hniam phah ngai lo, Remruati nen an chungchang pawh kha ka hrethiam em em a, amah ka duh theih tawh loh vang chauha a hnena let tawh lo ka ni bawk. Remruati nen an chungchang pawh kha a tirah min hrilh vek sela, a zin thleng khan engkim hria ni ta ila, ka rilru hi a danglam kher ka ring lo. Ka ring thei tawh lo a, chuvanga danglam tan ka ni reng a. Mihring tihsual nei lo, famkim ang maia Valtea a sawi atang phei kha chuan ka hmu hniam hle bawk. Valtea ka tan zawk tihna ni loin, mahni nihna anga lang ngam, famkim lohna inhria Valtea bula awm a nawm zawkzia ka lo hretawh miau a!

 

Kum hnih kaltaa thil thleng kha ka rilruah a lo lang thar leh bawk. Mathana Branch OB a tlin tirh kha a ni nghe nghe. Member a ruka zu in te, one night stand kan han tih mai thin a hriat theihzia te kha, amah a fel em em tih ka hriat rual khan mak ka lo ti deuh thin. Ka bulah a sawi a, khatiang miten kohhran kawra hmanga an inhman ngam zel mak a tihzia a sawi bawih bawih te khan dik ka lo ti viau thin a. Mahse, mahni inhmuh hi  chu a lo har a nih dawn hi. Valtea ve thung chuan a nun chhuanawm lohzia te, hmasawn a ngaihzia a inhai lo. Chung chuan keimah hi min hneh zawk daih.

 

Inchhung ka lut tur chu ka banah min rawn pawt zawk a, ka au hmain ka hmuiah a rawn hup nghal hmiah. Kan veranda light in chiang lo ruaiin a hmel a chhun a, Valtea a ni tih ka hriat chuan ka hlauhthawnna a bo nghal vek. Kan insir cheh rual bulah min hruai phei a, a phenah min din tir a, light in a chhun pha lo chiah chiah.

 

“Enge I duh a?” ka hmui hupna a laksawn rualin ka ti nghal a.

 

“Khawngaih takin ka thusawi hi ngaithla ve phawt rawh” a ti zawi sap a.

 

“In unau hian ka hua che u”

 

Ka tah a chhuak nghal vek.

 

“Tihnat che hi ka duh ngai lo, ka tihpalh” tih pahin min rawn din hnaih a, ka lo tawlh hnung hrat.

 

“Nunui bula ka thusawi kha a then I rawn hre hman a nih ka ring a, ka ring sual loin ka ring bawk a. Eng chen nge I rawn hriat min hrilh teh” dam dap hian a ti a.

 

“I u vanga min khawngaih I nih thu I sawi” ka lo ti a.

 

“Ka pha hauh lo, a tir phatah chuan ka khawngaih che. Ka u a nia, sawi chhiat emaw a tlin lohna sawilan kha ka thei bik lo. Remruati a be tel thin tih ka hriata ka natpui zan atang che khan I chanchin lo chu ngaihven ka nei lo. A fiahna ka nei lo ka thusawi hi a dik tih lanna turin, mahse, chiang taka min chik ve a nih chuan I hai bik lo ang. Ngaihzawng then vanga zirna pawh chhunzawm thei lo a rawn haw ringawt, inhnem nana zu in thin lehnghal, ka danglam tawhzia hi I hmu lo em ni?” thuk raih hian min melh a. Ka danglam leh zo ta.

 

“Valte, keini pahnih induhna ringawt hi a tawk lo a ni. Kan chhungte hian engtikah mah an remti dawn lo tih kan hre tho a, a harsa tak tak hma hian titawp mai ang” ka han ti ringawt a.

 

“Tunah hian a la harsa lo I tia mi? Kalsan tur che hi chuan harsa ka ti lutuk tawh tlat” a ti a, ka kutah a rawn chelh a. “Min kalsan chu I thei ang maw?” ka kut chu a hmer vang vang a, ka lu ka lo thing a, a nui ta sak a.

 

"Khawnge nizanah i awm?" ka tih chuan a meng buai deuh a.

"Ka chanchin i ngaihven lutuk aw" tih pahin min nuih leh a, ka lo ner nang.

"Tak takin ka cousin inah ka riak daih, ka ngai che a, ka hmu thei si lo che a, ka thin a rim a, ka haw peih lo a" a ti ta a.

"Chutiang mai maiin awm tawh suh aw, puitling deuhin awm tawh la" ka tih chuan a bu nghat nghat a.

"Inzirna tur hlir ka la nei ve a, min hrethiam pah zel la aw" a ti dam duai a.

Ka room ah ka nau a rawn tlan lut a, lehkhabu ka lo chhiar a, chutia rawn tlan ta chiam chu a ngaihna hre lo zet hian ka lo en tawp a.

 

“A u, u Mathana nu leh pa an lo kal a, inneih chungchang vel an rel a nia” thaw hlawp hlawp hian a rawn ti a.

 

‘Eng inneih chungchang maw?” ka tih chuan a awm a han dawm a, a thaw kawk a.

 

“U Mathana nen in inneihna tur  chungchang” a tita a. Ka lehkhabu ken lai ka thlauh tawp a, ka tha a khur nghal der der. Kan chhungte chuan kan kawng dal an lo tum hle mai. An duh ang chu ka va hmuh tir bik awm lo tak!

Note: Ka tum aiin he story hi a thui zek! A tirah chuan tawi tea ziah tum ka nia, a kal laklawh zel a, kan heti ta a nih hi😆