A DANGLAM SI LO 2

 

Krismas ni chuan chawhma chu a chhungte hmaizah vangin Rosangpuia chu a han inkhawm ve a, gallery ah thuin a ngaihtuahna chu a kawm melh melh a. Kohhran thupuan a zawh meuh chuan darkar chanve lai an lo inkhawm hman tawh a, a ning ru hle. A bula tleirawl pahnih lah chu an phun sep sep a, an nui khur leh ngat ngat thin a, a rilru nen inmil lo zet hian amah lah chu an rawn nawk fuh leh zauh thin. Tanna hla sa tura an ding chu a bul ami chuan a hlabu chu a han thlauh thlawp lehnghal a, a ke bul maia a tlak avangin han chharsak loh em chu ni theiin a hre lova, a han chhar a. A neitu zawk chuan inthlahrung hmel tak hian a lo ban a, “ka lawm e” hmui phun hian a lo ti sep a. Mak tak maiin Rosangpuia chuan chu tleirawl chu a melh ta reng a. Chu tleirawl lah chu a biang a sen chek a, a hmaa tawng barh barh reng kha a ni tih a hriat tawh hauh lo. Inkhawm chhung zawng chuan a nungchang a tha tluan ta pharh a, chutiang taka amah thlak nghaltu chu a bula tlangval, a vawikhat hmuhna pawh ni lo, an thianho ngaihzawn rawn Rosangpuia vang chu a ni. Chu tleirawl hming chu Zorini a ni a, tleirawl kan han ti tak na a, kumin atangin puitlingah a awm ve tawh a, nula tia han sawi em tur chuan a la nau deuh tih chauh a ni. An bulah chuan Rosangpuia chu a thu ve tih reng an lo hre lova, a thiannu nen chuan an insik ru ta ngat ngat ringawt a ni.

 

“Awi, U Rosangpuia hmelthatzia kha” Romawii chuan biak in atanga an chhuah chuan a thiannu a hrilh sap a. Zorini lah chuan a thiannu thusawi pawh ngaihsak lo chuan Rosangpuia chu a lo zawng rilru a, inkhawm an tam em avangin a hmu mai thei lo lehnghal.

 

“U Rinpuii kha a la theihnghilh thei awm si lo a, ka khawngaih e” a thiannu thusawi nena inpersan deuh hian a ti a.

 

“A thihcham kum khatnaah khan thlanah a thu tlaivar an ti asin” Romawii bawk chuan a han ti leh a.

 

“Keipawh ni ila, ka ti ve tho ang. Hmangaih ber chan chu a na dawn em alawm” Zorini chuan a lo ti niah niah a.

 

Chawhnu inkhawm naah te chuan Rosangpuia chu hmuh leh inbeisei deuh hian a han hawi kual thin a, a vang em em mai bawk si. A ruk tak chuan a hnual rawih thei, a chhungte nen a pi leh pu tlawha veng danga len tum an ni a, Rosangpuia a hmuh  chak vangin a kal ve ta lo kha a ni a, a inkhawm chhan ber lah chu a rawn lang leh si lo. Inkhawm banah pawh chuan a thiante lennaah kal ve peih ta lo in a haw tlang ta a. A inthlak zawhah chuan inchungah nilum ai turin a chho ta daih a, a mitthlaah Rosangpuia’n a hlabu a chhar sak lai kha a lang leh thin a, a duh aiin a vei chho dawn niin a inhria. Chutianga a ngaihtuahna a kawm lai mek chuan an veng thlanmual penga bike-a a rawn tlan chu a hmu thut a, a inrin hmain a ding ta hluai a. An inchung atang hian chu lai hmun chu a lang chiang em em mai bawk si a. Rinpuii thlanah a kal tih hrilh hranpa a ngai tawh lo, nidanga amaha awm ngai lo thikna te chu a rawn piang a, a indawm ta ngawih ngawih a.

 

Rosangpuia inkhawm bang kha thingpui pawh dawh ve ta lo chuan a haw tlang a, Rinpuii thlana dah tur pangpar a lei sa chu inah a la a, thlanmual lam pan chuan a inkhalh chhuak ta kha a ni a, mak tak maiin Zorini kha a mitthlaah a hmu leh zauh thin lehnghal.

 

“Rinpui, zingah ka rawn lan loh avangin min ngaidam rawh aw. A mak khawp mai, vawiin chu Zorini, Senior dept.a I zirtir thin kha kan thutlang a, ka tum loh deuhin ka rilruah a awm reng mai. I thinrim lutuk bik lo ang tiraw?” tiin Rinpuii thlanah chuan a be mawlh mawlh a, engpawh ti dawn se Rinpuii rawn hi chu a tih tur ngei ngei ah a ngai tawp tawh mai a ni. 

 

Thlan sir velte chu a han tifai a, a pangpar ken chu a chhungte dahna sirah dah vein thlanah chuan a thu ta reng a. Rinpuii chu la dam se chuan chhungkuate an din ve tawh anga, fa te pawh an nei tawh hial maithei asin. Mahse, chung ngaihtuahna chuan a tibeidawng chawpchilh leh mai thin zawng a ni si a. Thlanmual atanga a haw meuh chuan chawhnu inkhawm pawh an lo bang der tawh. A inbual fai a, a rilru tihthawven tumin a thianpa Rinawma te in lam chu a pan ta a. 

 

Krismas leh kumthar pawh harsatna em em tawk lovin an hmang zo ve tawh a, Rosangpuia pawhin a hna lamah a rilru a sawrbing a, thil dang intih buai tir hi a peih lo a ni ber. Zorini pawh kha a hre chhuak veleh hlawl thin a, mahse, an kumte a la naupan bakah ngaihzawng han nei leh mai tur hi chuan a rilru hi a la inpeih tak tak lo tih a hria.

 

“U Pui, Zorini ka nia, ka class xii marksheet a bo a, ka thil dil turah hian ka mamawh sia, tihdan min ngaihtuahpui thei angem?” Zorini chuan zam chung chung hian Rosangpuia chu a han bia a.

 

Tu Zorini nge tih a ngaihtuah mek laiin a han hrechhuak chawpchilh ve nghal mai bawk a.

 

“A va zia lo ve, tinge I lo tihbo mai mai a?” tiin nelawm thei tur ang berin a han chhang ve a.

 

“Nia, anu in a dahthatna a hre chhuak thei lo a, karlehah hian ka hmang mamawh dawn sia, ka buai lutuk a” tiin nawr lutuk anga lang si lo hian a han ti a, Rosangpuia pawhin tihdan tur chu tha takin a hrilh ve mai a.

 

“Naktukah lo kal la, ka tihpui dawn che nia” tiin an inbiakna chu an titawp ta a.

 

Zorini chuan a phone chu nghet zet hian a hum a, a tha khur dar dar chu tihreh tumin thawk a han la halh a, hetiang em ema mipa hnaih a tum hi an la awm ngai lo mai ni loin a aia upa daih chungah hetiang rilru hi a la pu ngai lo hrim hrim. A thiannu thurawn pek angin chet a han la tan chu a ni a, eng chen tak thleng thei ang maw?

 

Phur takin a theihtawpa nalh nia a hriatdanin Zorini chu a inchei a, nidanga insiam nana hun duh rei ngai lo kha a duh ang taka a inchei fuh theih loh avangin vawithum lai a inthlak tha a, a nuih chu a za ru hial zawk. A tawpah chuan a lungawi ta a ni ang, a room atangin a pen chhuak ve thei ta.

 

“Bawihi, Puia chu I be sa tawh maw?” a nu chuan a lo ti a.

 

“Aw, amahin alawm vawiinah hian kal turin min ti, min buaipui thei dawn a” tih pahin tui chu a han in a.

 

“A that nasat chu, a lo awm hlauh chu a lawmawm hle mai” tiin a fanu tlanchhuak tur chu a en zui ta a.

 

MBSE office kawtah chuan a scooty chu a ti thi duk a, a zam thar leh ta riau chu a duh lo tak zet. A phone chu a han phawrh rak rak a, Rosangpuia number chu a han hmetchhuak a. A ring quit tep tihin a rawn chhang ta hram a.

 

“Aw, U Pui, in office kawtah ka awm tawh a” a han ti a.

 

“E, lo hawi chho rawh, hei hi ka room a nia, I rawn hre thei mai angem?” tia a rawn chhan chuan a han hawi chho nghal a, tukverhah rawn dakin ngainatawm tak hian a rawn nui sang a.

 

Zorini pawh chu tlemin a zam lutuk tur a zia sawtin a hriat, Rosangpuia awmna zawn nia a hriat lam chu a han pan a. Step ah chho zelin ‘Rosangpuia, Academic Officer’ tih intarna room ah chuan a lut ta a. 

 

“Ka rawn chhuak lo mai, ka lo laklawh deuh a” a lo ti zung zung a.

 

“Aih, a ngai chuang hleinem” tiin Zorini chuan a lo chhang fel ve hle a.

 

“Hei hi ka ti zo lawk ang aw” tiin paper hi a rawn lek kang a, Zorini pawh chuan a lu chu a lo bu nghat a. 

 

A computer bula thlalak a hmuh chuan a thinlung hi a na zawk a, Rosangpuia leh Rinpuii thlalak, frame a mawi taka in tar chu a inhung a, mitthi tawh pawh hi an lo thikawm thei hle dawn a lo ni. A chil chu a han lem khalh a, engvanga lo na ve ngawt nge a nih tih chu a inhrechiang khawp mai.

 

“Ka hman ta e” tih ri ah chuan a hawi chhuak a, a ngaihtuahna a lo kawm tui lutuk a, a awmna hmun pawh a hai thelh a ni.

 

“E, Aw.. “ a ti bah niai a.

 

Rosangpuia zarah a marksheet dublicate pawh a nei thei veleh ta, mahse, a hma a beiseina a lo neih ang kha  a nei thei ta hauh lo. A rilru a hnual em em a, hma han lak ngaihna vak a hre si lo. A tha ber tur chu a lo chhuak ve em ang chu!

 

Khatia a marksheet bo a buaipui atang khan Rosangpuia rilru kilkhatah Zorini chu a awm reng a, a nihna takah chuan Zorini rilru chu a hmu tlangin a inhre ve bawk. Mahse, Rinpuii phatsan tur ang tlata a inhriatna chuan ke a pentir thei lo. Lungphun an tum hnai tih a hriat phei chuan a thinlungah a thar nasa em em a, kumthum tal ral se a lo ti ve em em ringawt a, a nupui a la nih miau loh avangin thu neih erawh a ngam teuh si lo.

 

“Valpui, lungphun chu in va hmanhmawh ve, kumin te chu han liam ve phawt se tha in ti lo em ni?” tiin a zawt ta phawng a.

 

Valpuia chuan, “Ka nu leh ka putea te thutlukna a ni si a, ka hnial ngam lo a. U Pui, a hrehawm duh khawp mai. Ka nu phei chuan kan khaw lama let leh a tum a, kei hi ka zir laklawh si a, engtin nge maw ni dawn ni?” a ti a, a rilru chu a buai ve hmel tak zet.

 

“Engati nge in khuaa let chu a tih kher a? Khawpuiah hian eizawnte pawh a awl zawk si a” Rosangpuia chuan a ti leh hram a.

 

“Ni e, mahse, ka nu chuan, ‘I u sulhnu a tam emai, ka awm thei lo, ka dam rei lo mai ang’ a ti mauh si a, hnial ngaihna pawh kan hre lo a ni. Ka u khan pawisa a lo khawl ve nual hman a, ‘chu chuan dawrte ka siam anga, ka nun a hlim ve mai ang’a ti a, atha maiin ka hr eta a. Nangmah pawh engmah ka la hrilh lo che a, min zawt hlauh chu a tha zawk” Valpuia chuan ti ta duah a.

 

A haw kawngah chuan Rinpuii lungphun chungchang chu a ngaihtuah ve nasa khawp mai, a hma atang tawhin ruahmanna a lo neih ve tawh chu tihhlawhtlin ngei a tum ruh hle. Valpuia bulah a la sawi lang duh lova, an hnial ngeia a rin vangin a la sawi duh lo mai mai a ni. A nu leh pa thurawn erawh lak a duh a, an remtih ngei pawh a ring.

 

Chumi hnu thla hnih a liam leh chuan Rinpuii lung pawh an phun fel ve ta, Rosangpuia’n thlan lung a tum a, chu mai ni loin vawk talh tur a lei bawk a, chutiang chuan a hmangaih ber Rinpuii hun tawp ber chu a tling tla ve ta a ni. Valpuia chu an inah a awm chhunzawm dawn a, a nu erawh chu an khaw lamah a let leh dawn, a demawm hran lo e, a fanu a innghahna a awm ta si lo a.