A DANGLAM SI LO

 

1

“Rinpuii hi I pawm thei dawn lo anih chuan keipawh I fapa nih reng hi ka duh bik lo. ka hmangaih ber ka neih theih dawn loh chuan keipawh min chan ve nghal ang” Rosangpuia chuan a ti fiak thak a.

 

“Rosangpui, chutiang zawng chuan min nawr miah suh aw” Pu Thansanga chuan a ti a, a fapa chu kut thlak mai duh hmel a pu. An inkarah Pi Ramtei chu a rawn inrawlh vat a, a pasal leh a fapa boruak chu chuti maia dai tur a ni lo tih chiang takin a hria.

 

“Mama, I pa anih hi, chutiangin zahlo takin an ti ngai lo. Nangpawh Mama pa, I fapa chunga I thiltih hi ngaihtuah nawn leh rawh” a lo ti ve a. An inchhung chu a reh ta tlawk tlawk a.

 

Rosangpuia hi Pu Thansanga leh Pi Ramtei fapa neihchhun a ni a, farnu pahnih neiin pasal an nei ve ve tawh a. Rosangpuia hi hmeichhe ngaihsak ngai lem lo, a tleirawl chhuah atanga bialnu a neih pawh an hriat loh a ni a. A farnu te pahnih hian nei turin an nawr an nawr reng thin. Mahse, ngaihzawng a nei tih an hriat rualin an phurna kha a bo nghal vek, a chhan chu a ngaihzawng Rinpuii hi an venga hmeithai fanu a ni mauh si a. A pa rilru tur an hriatchian em avangin an hnual nghal rawih rawih. Amah Rinpuii tak hi chu a fel em em a, puanthui a thiam avangin chu chuan a nu nen an intung nung ve a, a nutapa hian college a la kal thung. Kohhranah a tangkai em em a, kohhran aia zirna ngaisang zawk Pu Thansanga rilruah chuan duh ngaihna a awm lo reng a ni. Pu Thansanga hi sumdawng hausa, a pute atang tawha mi hlun an ni a, amah hian lehkha a thiam lem loh avang hian a fate pawh zirnaah a thlen san tir hlawm hle a, a nupui Pi Ramtei erawh Nursing Superintendent niin Civil hospital ah a thawk mek a ni. A fapa Rosangpuia hian M.Sc zo tawhin tunah hian MBSE ah Academic Officer hna a chelh mek a, a fapa neihchhun a ni a, a chhuan pawh a chhuang viau nghe nghe. Puia rilruah tak hi chuan Civil service lam a awn ve reng, mahse, a vanduai kan ti dawn nge a thleng sang viau thin a, a tling zo leh thin a, a kawng tur a ni lo a ni ang tih ringin tunah hi chuan a hnaah chiah a insawrbing tawh.

 

Rinpuii erawh chu kan sawi tawh ang khan a nu hoa khawsa, chhungkaw khawsak pawh harsa ve tak an ni a, a pa hian a thihsan hma avangin ani pawhin pawl sawm thleng chauh zirnaah a kal a, a nau Valpuia erawh theihtawp chhuaha zir puitlintir a tum tlat thung. Pawl sawm a zir zawh khan zirna chhunzawm tawh lovin Industry hnuaiah puanthui a zir ve tlauh tlauh a, a zir chhuah hnuah private-ah thla thum a zir leh a, a kawng tur dik tak ni mai awm takin a kuthnu a mawi em em a, a zir chhuah atangin ‘I thui ngei loh chu’ titu an awm chho ve ta mawlh mawlh a ni. Tunah phei chuan a thui sen loh order a hmu a, a nu hian a hah lutuk a hlauhpui hial zawk thin. An inbulah hian a puanthuina tur lian vak loin in an khawr pum ve a, ni tinin a inthui ve tlauh tlauh thin. A nau Valpuia hi mipa mah ni se an chhungkaw khawsak a hrechiang bawk a, a class kal loh karlakah hian a u chu a pui ve thin a, chhungkaw inngeih leh hlim tak niin hun an hmang chho ve zel a ni.

 

Rinpuii leh Rosangpuia hi biak in atanga inchhar an ni a, KTP member inkhawmkim zan a nih avanga inkhawm ve Puia chuan a vawikhat hmuhnaa chutiang hmeichhia a vei zui tak hi an la awm ngai lo. A thianpa Zaia kaltlangin an chhungkaw khawsakte, a mimal nun hrim hrimte chu a hre fai ta vek a. A thinlunga thi leh tawh ngai lo tur a ni tih hemi zan atang hian a hre nghal bawk. Inkhawm ngaihsak lem lo, mahni that thata tha ve mai mai thin kha sawm pawh ngai loin a inkhawm ve ta ziah a, a nu chu a lawm ru hle. Nidanga a tirh luih pawha Sunday chawhma bak inkhawm peih ngai lo kha tunah chuan inkhawm apiangin a chhuak ve ta ziah chu a nia, a tawngtaina chhanin a awm ta te pawh a ni ang. A tuma tum tak tak ta chu reiloteah Rosangpuia leh Rinpuii chu an innel vat a, engtik laiin nge inngainatna kha inngaihzawnaah a lo inleh tih Rinpuii chuan a hre hman lo. A hriat meuh chuan a lo lut thuk tawh lutuk a, an chhungkaw khawsak inthlauhzia a rilruah a rawn lang hmasa ber. Mahse, chhuak turin a lo lut thuk tawh lutuk a, chhuah ngaihna a hre tawh lo.

 

“Pui, kei chu a tir atang khan heng hi chu ka hmu lawk ve k alawm. I pa pawh a demawm loh, kan dinhmun hi a inthlau em a ni” rilru hah tih hriat zet hian a puan thui lai chu a kheuh sek a.

 

“Rinpui, a tawp min thlenpui ngam dawn lo a nih chuan ka rawn hmu tawh lo ang che” Rosangpuia chuan a ti hmuk thung.

 

“Chutiang a ni lo, tunah rih chuan a thute pawh chu han ngaichang ve phawt la” Rinpuii chuan dawih aw lek lek hian a ti a.

 

“A tlawm zawka ka tang a nih chuan engtikah mah ka pa rilru hi ka hneh tawh ngai lovang. Pathian zarah hna ka nei a, kan in leh lo engmah chang dawn lo mah ila kan rethei lovang. Chu chu ka rilru dik tak a ni” tlema tawngkam nem deuh zawkin Puia pawh chuan a ti ve ta a.

 

Tumah tawng tawh lovin an ngaihtuahna ve ve chu an kawm zui ta a, thla liamta atang khan chhungte dodalna an tawk tan a, Pu Thansanga, pa chapo ve zet chuan tlangkam atangin a fapa te chungchang a lo hria a, rum takin inthen turin a ti nghal chat a. A fapa tawng mawh ve tak, a nu leh pa thu hnial ngai lem lo chuan a thu a zawm mai pawh a beisei a, mahse a rin loh deuhin huai takin a chhang ve ta tlat. Khami zan atang khan a fapa mizia chu a hrechiang tan dawn chauh a lo ni.

 

Office chawlh ni a nih avangin Rinpuii puanthuina dawrah Rosangpuia chu a tawlh hrut hrut a, engemaw changa an titi leh zauh thin tih lohah chuan mahni buai buaiin an buai a, an inbe tam lem lo. Rosangpuia chuan a phone a kheuh neuh neuh a, a nui leh hak thin a, Rinpuii erawh chuan a thil thui laiah a rilru zawng zawng a pe tih hriat zet hian Puia thil buaipui chu a va ngaihven hran lo.

 

“Palai hi rawn tirh mai ka duh” tih ri-ah chuan a han hawi chhuak a, Puia’n thutak fea a lo melh reng avang chuan ani pawhin a thil thui lai chu a han dah a.

 

“I pa rilru hi chuti maiin a inthlak ka ring si lo a, palai rawn tirh chu duh ringawt mah ila chhungkuaa in rel ve a ngai ang chu” a han ti ban charh a, an pahnih chuan an han thaw leh deuh halh a, an inhmangaihzia hretu tan chuan an dinhmun khirh ru zet chu khawngaih loh theih an ni lo.

 

“Engpawhnise, tun tum chu I thu ka awih ve phawt ang, ka pa rilru chu hmin ka lo tum phawt dawn nia” Puia chuan a ti ta nge nge a.

 

Chutianga hun an hman chhoh ve mek lai chuan Rosangpuia chu a hna thilah training turin Delhi lamah a kal a ngai a, a kal hma zanah Rinpuii te inah lengin an hma hunte chu an sawidun leh a, Puia chuan a pa rilru hmin theia a inngaih loh thute sawiin Delhi atanga a haw veleh inruk mai a duh thu chu a sawi tlang ta ringawt a, Rinpuii pawh a hnial lem lo. Rosangpuia hi a hmangaih ve tak zet a, kohhrana a rawngbawlna hre reng chungin kumkhuaa chan ai chuan mualphopui ve mai chu a thlang tawh. Inngai leh inthlahlel tak chungin chu zan hun chu an hmang a, zanlai thleng rakin an inkawm a, karkhat chhung zet an inhmu thei dawn lo tih hriain an am ve hle a ni.

 

Khaw lum leh boruak uap churh karah training hautak zet an nei a, a rilruah Rinpuii a hre reng thin. Nihnih chhung chu a be thei tawh lo a, nikhat a nghah leh chuan a haw thei tawh dawn tih hriain biak dan kawng dang pawh a zawng hran bik lo. A nihna takah chuan an training hi a hautak em a, nileng leh zanah dar 8 thleng thak thakin an bei thin a, a lo chau ve thin bawk nen haw mai tur a ni bawka a ngai pawimawh duh lo lui ve deuh bawk a ni.

 

Lengpui airport a thlen chuan an office driver Matleia chuan a lo nghak reng tawh a, a chau ve ngang a ni ang kawng tluanin a muthlu a, an in an thlenin Matleia chuan a kaitho ta chauh a, an veng chu a reh deuh thap hian a hria a, a chhungte lah chuan tha tho loh hmel zet hian an lo hmuak bawk si, a ruk tak chuan thil thleng a awm a nih a ring ve a. Inchhungah a bag vel chu a han dah fel zung zung a, nidang ang lo takin a pa chu inah a awm ve tehmial a, a training a tluang em tihte chu a zawt ve luam a, an inbe tam ngai lo hrim hrim a, a nu erawh chu a tawng mang lo. Nidang ang chu nise office a kal pawh a ring, a room ah lutin a inbual ta sawk sawk a. A rilruah Rinpuii lo chu thildang a awm lo, chau viau mah se an ina kal vat chu a tum. A inbual zo chu a khumah a nu leh pa an lo thu a, mak ti deuh hian a melh tawn ta chhen a.

 

“Puia, lo thu phawt teh” Pu Thansanga chuan a ti dam duai a. Ani pawh chuan thuawih takin a nu leh pa hmachhawn zawnga thutthleng awmah chuan a thu a.

 

“Thil duhawm lo tak mai a thleng a, a pawi tih bak chu sawi tur pawh kan hre lo. Nimin piah khan Rinpuii a boral a” tih thu chu harsa tih hriat zet hian Pi Ramtei chuan a fapa chu a han hrilh a.

 

Rosangpuia hmel dang nghal lawp lawp chu hmuh hrehawm ti zetin an nupa chuan an inen a, an mittui chu a tla hial a!

 

“Engati nge?” thaw chham lek lek hian a rawn ti chhuak hrawk a.

 

“Nimin piah khan a dawr a tifai a, a khawlte hung sawnin a hunna te a sawn a ni awm e. Engtin chiah nge a chetsual tih chu hre lo mah ila a khawl dahna kha a lo nghet lo ni tur a ni, carpet a phah that laiin khawl chuan a lu-ah a delh ta a ni. Damdawiin pan pui nghal a ni na a, damdawiin an thlen kha chuan a mar pawh a awm tawh lo a ni awm e. Puia, tawrhdan I thiam hram hram a ngai a nia” Pu Thansanga chuan a ti ta charh charh a. 

 

Rosangpuia tan chuan mumang ang ruai a ni vek, engkim chu a thleng rang lutuk a, awih tur nge awih loh tur tih pawh a hre thiam tawh lo. Mahse, Rinpuii te ina a va kal a, a hmel hmuh tur awm tawh lo te, thlana a hming lo awm ta vangte chuan engkim chu a tak vek a ni tih a nemnghet ta miau si a. A khawvel chu a thim ta vek mai.

 

Pu Thansanga te in chu hlim nui ri hriat tur a awm tawh ngai lova, an fapa thinlung natna chuan a vaw na vek a, a tawrh ang em chuan tuar ve lo mah se an fapa chu an chan ve ni mai hian an hria. A hnaah kal ngai lo a, a room ah a tawm ngawt ngawt mai a ni. Rinpuii thlalak thlirin ni tin hun a hmang a, chaw a ei thei lova, a mu thei bawk si lo. A taksa chhe chak lutuk chuan a nu leh pa thinlung a tina a, a tha nia a hriat apiang a nuin a ngaihtuahsak a, doctor lah a rawn tam phah, awmzia chu a la nei chek ang chu maw!

 

Rinpuii thih atangin thla ruk a ral tawh a, a thlanah chuan pangpar tharlam zet hi a inhung a, thlan hnunga pangpar pawh a rawn kuhmum  ve tan a, a buk leih bawk si a, chu lai hmuna kal chuan an thlir vawng vawng zel. Chung zawng zawng chu Rosangpuia chuan hmaih awm miah loin thla a lo thar chuan a tihturah ngaiin a ti vek thin, thlan chu a hnim hman ngai lova, a hnum hlarh reng a. Chulai hmuna zal chu tuemaw tan chuan a hlu tak zet a ni tih miin an hre lo ang tih chu a hlauh ber a ni. 

 

“Rinpui, min kalsanna pawh thla ruk a lo ni ta reng mai. Ka lo haw veleh kan innei ang tiin thu kha kan tiam si a, I ti ho ngawt mai. Mahse, ka indawm kun reng tawh bik lo ang. Ka nat reng hi I duh dawn lo tih ka hrechiang tawh a, chuvang chuan hma lam pan hi ka tum ve tawh ang” tiin Rinpuii thlanah chuan Rosangpuia chuan beiseina leh intiamna thar a nei thei ve ta.

 

Hun a kal ve zel a, hriat loh chhungin thla pawh a lo ral hnem ve tawh hle, Krismas boruak a awm chho tan a, mipui pawhin chu lam hawi chuan rilru leh ngaihtuahna an hmang tan tawh niin a lang. Rosangpuia chuan a office ah thingpui dawm pahin kumthar lama an hmalakna tur thenkhat a duansa chu a bih vang vang a, a rilru takah chuan Krismas lo thleng tur chu a huphurh ru hle a, Rinpuii telloa hmang tur a nih a inhria a, a chak hlawl lo. A pawnlam lan danah erawh chuan a rilru pawh a dam ve tawh viauin a lang a, a chhungrilah erawh a tawrhna chu a la na tak zet a, mipa takin a tuar ve ngat ngat ringawt mai a ni. A nu leh pa lahin theihtawpin tihhlim an tum a, Pu Thansanga tak pawh chu a khawngaihthlak zawk. A fapa hmangaih ber a lo dodal ve ringawtte khan tunah chuan a vaw na hle a, hun hi kohkir theih se hlim taka awm duntir chu a thlan ber tur a ni ngei ang.

Note: Ka ziah ngai miah loh danin ka rawn ziak tih in lo hre nghal em? 🤭