VALTEA 10

 

Ten

 

Inah kan inhmu thei lo a, pawn lama ka chhuah pawh min veng ru tu an awm chuan nuamin ka chhuak thei chuang lo. Ka nu rilru pawh hriatthiamna chin ka nei ve tho a, midangin an hriat vak hmaa tawp turin min duh tih sawi lo mah se ka hre ve tho.

 

Ka inkhawm bang chu inah haw tlang tumin midang pawh nghak loin ka kal a, Nunui te in bul ka thlen chuan Valtea motor ka hmu. Ka ding deuh dat a, va luh ve tur nge tih ka ngaihtuah a, tul ka ti leh ta lo. Ka inthlak zo a, ka mu zal vel ta mai mai a. Nihnih chhung Valtea nen kan inbe tawh lo a, kan thu a inhmuh chiah loh vang a ni pakhat. A chhungte hrilh ve tawh mai tura ti hmasatu ka ni a, mahse, ka rilru thlak lehin hrilh lo turin ka ti leh a, chumi thu inhmu fuh lo laklawh chuan ka be duh lo a, a nikhat naah kha chuan min biak tumin a rawn bei nasa a, nimin lam erawh a reh ve hmak. Kan inngaihzawn dan a awlsam lutuk hi a chang chuan inthen leh pawh kan awlsam ang tih hi ka hlau ru deuh thin.

 

“Ngurthanmawi”

 

Nunui min ko ri ka hriat chuan ka han eih vak a, ka room ah a rawn lut tlang leh mai dawn tih ka hria. A rawn lut ta reng bawk a.

 

“Enge I mut zun zun zel a, tho rawh” tih pahin ka bulah a rawn thu a.

 

“Ka lu a nuam vak lo a” tiin dawt ka lo sawi a.

 

“Damdawiinah min kalpui lawk la ka tia, ka lo hruai dawn che” a tih chuan a hmel ka han en a, thutak fe hian min lo en ve.

 

“Ka nu in chhuah a phal vak lo tunlai chu” tiin pehhel angreng deuhin ka ti a.

 

“Ka dil dawn lawm, nge a in lak strict thar em em a” a ti hlak hlak a.

 

Ka rilruin ngaihdam ka dil mawlh mawlh, kei aiin Valtea hi a duh hmasa zawk a, a duh tih hrerengin ka kawp a nia, min haw dawn hian ka hre lutuk.

 

Ka nu hnenah thiam taka a dil leh meuh chuan ka nu pawhin a phal veleh mai. A scooty in kan in phur a, ka nu in tukverh atangin min en zui tih pawh ka hre reng.

 

Damdawiin lama kal ta lo chuan an inah min kal pui a, theihnghilh a nei ah ka la ngai mai. Mahse, kawta Valtea motor la ding chuan damdawiina kal tur kan ni lo tih a tichiang nghal vek. Engmah a sawi lo a, ka sawi bik lo, ngawi rengin ka zui tawp a, a room min panpui a. Room kan luh chuan tukverh thlang lamah Valtea a lo dak vung vung a, kan thawm hriain a rawn hawi a, min hmuh chuan a nui ta suk a.

 

“Tinge?” ka ti hluai a.

 

“Hmeli, in pahnih chungchang hi chu I hnen atanga hriat ka lo inbeisei asin. Ka lawm lo khawp mai aw”Nunui chuan a ti a.

 

“Tihpalh, engmah thiamthu sawi tur ka nei lo. Ka hrilh ngam thlawt lo che a ni” ka ti a.

 

“I mawl lutuk mai” a ti hlak a. “Tikhan lo inkawm ru, ei tur ka va siam ang” tih pahin a chhuak ta nulh a.

 

Chair ah ka thu a, Valtea chu khum kotlangah a thu a, engmah sawi loin min melh deuh run a, ka zam ve deuh bawk nen hawi pawh ka hawi chhuak tha ngam lo.

 

“Lokal teh ka bulah hian” tih pahin min pawt tho a, a bulah chuan min thuttir a. “Ka bialnu lunglian em em hi ka lo la hrechiang lo hle a ni”tih pahin min nuih suk a.

 

“Ka lungawi lo tih hrereng chungin min en liam tawp thei ania” tiin ka lo vui thung.

 

“Nangmahni ang hi chu ka enkawl thiam lutuk, in lungawi loh laia tih vak chuan in pawr telh telh a” a tih chuan ka inrin hmain ka nui huk, a dik lutuk a.

 

“Chu pawh chu nise” ka lo ti tho.

 

“Ka ngai lutuk che”

 

He thu a sawi hi chuan ka danglam vek zel, ka ngai che tih satliah ang hi a ni lo, a thuk bik hian ka hre thin a, chu erawh ka hrilh hre kher chuang lo.

 

“Keipawh”

 

“Enge keipawh chu?”

 

A ngeiawm thiam ve thei a nia.

 

“E, ka ngai che” nui chung hian ka ti a.

 

“Hei pawh ka ngai lutuk” tih pahin ka hmui a rawn khawih a, a hmuiin a rawn zui nghal. Min hmuh tawpna tur a ni ang tih theih tur khawp hian a duhthawh a, keipawhin ka thiam dan ang angin ka lo chhang let ve a. Ka zep lo, infawh hi ka zei thlawt lo, Mathana nen khan thil tam tak ngaia neih kha kan nei tam lutuk a, a nawmna ang pawh hi engmah ka pawh lo in ka hria. Inngaizawngte tih tur ve ania tih ang lek khan kan ngai a ni ber ang chu.

 

Min fawp chu a tawp thut  a, ka meng zui nghal a, uluk fe hian ka mitah a lo en a, ka lai leh nghal der. Ka biangah a rawn dawm a, zei leh dam tak hian min fawp leh a, duh ngawih ngawih tur hian min siam thiam lutuk a ni tawp. A hmel pa zet mitthla chunga lo chhan let chu thil nuam leh dangdai tak a niin ka hria.

 

“Ka kham thei dawn lo che a nih hi” a ti sup a.

 

Ka kut a kham leh vek tawh, ka tum loh deuh hian ka lo insangmar leh thin a, a awmzia pawh ka hre tawh lo.

 

“Tinge min khawih hreh theih em em a?” nui chungin a ti a.

 

“A, ka zak ve ni mai lawm” ka lo ti hlur.

 

“Kan hlimna chiah ngaihtuah la, zahna tur engmah a awm lo. Hei, hetiang hian” tih pahin ka darah a rawn dawm a, ka nui chhuak ve hak.

 

“Ka zei lo tihte chu ka hre ve reng” ka ti a.

 

“I zei loh dan hi ka duhtawk chiah, a ngaihthatthlak riau” a tih chuan ka tim ru deuh. A u nen hetiang hian kan infawp ve fo ang tih a hre reng awm sia, a chang chuan a u nena nunhlui nei min duh tlat hi ka hrethiam lo lek lek thin. Kei ni ila, thikna ka ngah dawn lutuk tih ka hre si a.

 

“Valte”

 

“Um”

 

“Ka nuin eng thu pawh sawi se ngai thutak suh ang che”

 

“Nangpawh aw. Miin engtin pawh kan pahnih chungchang an sawi ang, nghin phah suh ang che. Thil thleng thei tur zawng zawng hre reng chungin ke ka penpui che a, keichuan engtikah mah ka phatsan dawn lo che” a ti a.

 

Ka va thuthnaih a, a hmuiah chuan ka fawp zeuh a, a mit ko a lo san deuh ak.

 

“A rei lo e” tih pahin min pawt hnai leh zual a, min fawh chhunzawm leh nghal a. Keipawh ka zam lutuk tawh lo, a tukhumah ka kut suihin ka lo fawp let ve a, a nui suk chu ka hre reng. Kan inthlah hnu chuan min kuah ta hle hle a, a hmel chu a hlim sarh mai.

 

“I thiam chak mah mah dawn” tiin min han fiam leh a, mi fiam hi a peih tih ka hria a, ka haw duh tawh lo.

 

Chumi ni atang phei chuan Valtea chu ka vei ngawih ngawih a ni ber, ka hmangaih ni ber hian ka hre tawh. Ni khat chauh pawh inbe loa awm ka thei tawh lo. Mathana nen ka tehkhin lo thei thin lo. Kan inbiak loh tawp chang a tamzia pawh ka hria, hetiang hian ka danglam ngai reng reng si lo. Heti taka Valtea laka ka awm hi mak tih loh theih a ni lo.

 

*heti zat mi dang an awm lai karah tinge ka nau kher?*

 

Mathana message  ka hmuh chuan ka thaw kawk a, eng ang mi ah nge min ngaih ang tih ka ngaihtuah.

 

*min ngaidam rawh*

 

Tih ka thawn ringawt.

 

*kan chhungte ve ve hian an pawm theih in ring em ni? engtiklai atang khan nge kei hi min lo bum dun a?*

 

Engpawh sawi se haw thei ka ni lo. Kan bum lo tih erawh hrechiangtu kan ni a, sawifiah kher pawh ka tum lem lo. Ka hnathawh tur inchhawp pawh chu ka thawk thei tawh lo. Inhnuaiah chhukin coffee ka thli a, pawn lama mi veivak chu ka thlir ta vel mai mai a. Ni e, kan chhungte hian min pawmpui dawn lo tih chu ka hrechiang, kawng a pinzia ka hai hek lo. Mahse, hmangaihna hian thil a lo ti thei khawp mai, mi dawihzep pawh huaisenna a pe thin. Tunah khan hmangaihna ka ti em ni? Aw, ni e, Valtea hi ka hmangaih tih ka inpawm a ngai, ka hmangaih lutuk tlat.

 

Ngawi rengin chaw kan ei a, ka nu a hlim loh chuan kan chhungkaw boruak hi a nuam lo vek thin. Chuvang chuan ka pa pawh hian ka nu deal dan hi a thiam a, hlim loh hi an nei khat reng bawk a. Tun hnaiah keimah vangin a hlim lo tih ka hria, thil tam tak sawi teuh chi a ni lem lo bawk a, chezia hian a tilang mai thin. Chaw tih tham pawh a ei lo, a eikham a, an room a pan zui nghal daih a.

 

“Mawipui, I nu thu awih mai kha in tih tur a nia” ka pa chuan dam thei ang berin a ti a.

 

“Pa, a harsa ve em a ni” ka ti thlawt.

 

Kan naupanlai atang tawhin an thu ka awih lo ngai lo bawk a, hetia keipawhin ka tih tlat danah hian a harsa ang tih chu a hre ve tho ang.

 

“Mathana nen hian innei turah a dah nghet hmak cheu a, hetia an unauah pawh a rintlak loh zawk nia lang I duh tlat hi nu hmangaihna a tang chuan pawm a har tih in hriatpui pawh a ngai bawk a” a ti kauh kauh a.

 

“Pa, zu pawh a in ngai tawh lo” ka tih mek laiin ka nu chu a rawn chhuak a.

 

“Zu ngawlvei nghei thut an awm ngai lo. Nangmah bum nan a nghei vel mai mai a nih saw, han innei teh u, a in leh em em ang” ka nu chuan a rawn ti a.

 

“Zu ngawl a vei lo” ka lo ti zawi sap.

 

“Ka thu I awih dawn lo a nih hi chuan i duh anga I awm ang bawkin I lakah kut kan sil; fai vek ang” a ti a, ka pa in a lo khap.

 

“Engpawhnise, duhtawk phawt rawh u. Kan chhungkua chu heti zat lek hi kan ni a, inthurual lo tham pawh kan awm loh hi” ka pa in a ti a, kan ngawi ta dial.

 

Ka mit a sen deuh ram a, ka thinlung erawh a luhlul telh telh. Ka hlimna tur kawng chu ka hr eve, chhungte thu thua ka dam hun chhung hman hi ka tum bik lo hrim hrim. Ka hmangaih tak ka nei ang, chu chu ka thutawp a ni.

 

Valtea’n ka office tur min thlah a, ka mit chu en chian tumin a rawn bih duk duk a, ka lo hawisawn daih.

 

“Ka tan I tuar tan der chu  ania, I tawrh a ngai hi hrehawm ka ti” a ti sap a.

 

“A harsa hleinem” tiin ka lo nui lui a, ka nuih luihna phena ka natna hi tihlan loh hram ka tum.

 

“Engtikah emaw chuan kan pahnih inhmangaihna hi min pawmpui hun a la awm tho ang. Beidawng lo in aw” a ti a, ka lo bu nghat a. Amah vek chuan, “Keipawh ka theih ang angin hna ka zawng ve zel a nia, kan chhungten min pawm dawn lo mah se mahnia ding thei turin ka theihtawp ka chhuah ang. Nangmah vanga ka danglam tawhzia te, hma ka sawnzia te hi an hmu fiah duh lo a nih pawhin a pawi lo, kan pahnih kan nih chuan engkim ka huam” a ti a. Engmah sawi lo mah se a chhungte pawhin a hre vek tawh a, ka nu rilru ang bawk kha an pu ve tih ka hre reng, sawi chhuah loh hian kan na tam lo zawk a, kan  inhrilh duh lo tawn tih ka hre tho.