VALTEA 12

 

Twelve

 

A rukin engmah ka ti peih tawh lo, kan inah a rawn leng lut lo tih mai loh chu. Ka office tur min hruai a, min rawn lam leh bawk. Ka haw lamah hi chuan min rawn lam ngai miah lo a, mahse, tun hnai atang khan min rawn lam a ching a, engmah ka lo sawisel duh bik lo.

 

“Naktuk atang chuan office I kal a ngai tawh lo ang, I pa in vawiinah I aikal tur a ruai fel tawh” zanriah kan ei laiin ka nuin a ti a, Tebawihi nen ka nu chu kan melh rual thawt.

 

Kan pu ber hi Valtea pa thianpa ber a nia, an lo sawi hmuh tih hriat reng, ka ngaihdan hi a va ni lo thin tak.

 

“Min rawn ve tur alawm” ka ti ve kher a, min rawn dawn lo tih chu ka hre reng tho.

 

“Pawn I chhuah tam loh hi a tha” ka pa chuan a lo ti hmuk a, ka lo nui sak.

 

Ka chaw ei pawh a tui nek lo e, ka thleng ka chawi a, ka ei kham daih. Ka eizawn ve na zel pawh min dang duh ania, kawng engkimah min dan pin an tum vek a ni berin a lang tawh. Tunhnai atang khan Valtea pawh a thianpa rawng hnawihna lamah a zui a, a hna dil ve ang pawh result te a la chhuak thei lo a, a theih ang anga hnathawh chu tul a ti ve bawk si a, a rem rem a thawk ve lawp lawp.

 

Inchungah ka chho a, ka phone chu la in Valtea ka call a. A hnathawk a chau ve thin bawk nen hrilh hriat nghal chu ka hreh ve deuh. Ka hrilh loh erawh chuan a hnathawk tur kal paha min thlah thin avangin a hrilhhai dawn tih ka hre si a, hreh angreng deuhin ka hrilh ta tho.

 

“Ngurpui, pawi ti reng reng suh. Ka dam ve tek tek chhung chuan rethei lutuk chuan I awm bik lo ang” tiin min rawn hnem.

 

Zan rei tak thleng kan inbia a, kan hma hunah enge kan tawh dawn hre lo mah ila kan pahnih kan nih chuan huaisen takin paltlang ka ngam tih chu ka chiang. In lamah lawm a hlawh bik lo tih ka hria a, ka harsatna zawng zawng sawi chhuah hi ka duh bik lo a, kan pahniha kan inbiak tal hi chuan hlim taka awm hi ka duh.

 

Nikhat chu Kimkimi’n min rawn be hlawl a, Valtea nen kan chanchin a lo hre ve chiah a ni awm e. Valtea lamtang awmchhun a ni a, a sual lai zawng zawng pawha a lama tang reng thin a ni.

 

“Mawipui, vawiinah ka nu nen kan inbia a, in chanchin ka lo hre ve chiah a. Valtea mizia hi ka hrechiang a, chuti mai maia rilru thlak chi a ni lo a, nangmah hi a tawp thlengin I tang ngam lo ang tih hi ka hlau ber a, ka nau kehchhe nawn leh tur hi ka ngaingam lo a nia” a rawn ti.

 

“Ka tan a din ngam chhung chuan kalsan hi ka tum bik lo, ka hmangaih alawm” ka lo ti a.

 

“Ka tah inti chhuak, in a emai” a ti leh rih a, a rilru chu ka hrethiam lutuk.

 

“Kan lama tang awmchhun I nia, I hlu lutuk ania” ka han ti a, a insut hraih.

 

“Ka khawngaih lutuk che u” a ti a.

 

Ka rilru a no zo ve vek mai, Kimkimi a lo lan hma kha chuan Valtea nena kan relationship min pawmpuitu kan tawng miah lo a, tunah chuan lamtang kan nei ve ta. Ka nau Tebawihi hian tihtheih han nei deuh se chuan ani pawh hi min lainattu a ni a, ani zawng nu leh pa thlazar hnuaia la tal ve mai mai a ni si a.

 

Sunday chawhma inkhawm ban chuan Kimkimi te in lam panin ka kal nghal a, in hrang an lo chang tawh hlauh a, a tihzia tak tak a ni. Ka thlen chuan Valtea a lo awm tawh a, keini aiin an bang hmasa a ni ngei ang. Min hmuh chuan min lo nuih sak a, kartluana hna an thawh hnua a chawlh hahdam ve theih chhun sunday ah kan inhmuh a ngai ve zel si a, hah pawh a sawi thei lo, kan inhmuh theih hun a ni miau a.

 

“In puiah ka phei ve dawn nia aw, I u Ropuia te pafa an awm tlang a” Kimkimi chuan a ti a, min kal chhuahsan a, pawn lamah kawngka a rawn kalh leh thlap. An in pui nen hian in 5 vel chauhin a dang a, kan haw duh huna va phone mai kha a harsa lo.

 

“I chhungten an lo ngaihtuah viau lo ang che maw?” Valtea chuan min ngaihtuah hmel deuh hian a ti a.

 

“Chawhma inkhawm banah ka haw lo thang a, ka haw an ring lo ang” ka lo ti ve mai a.

 

“Kan inhmuh theih hun a ni ve si a, a thlakhlelhawm ve bawk sia” tih pahin min pawt hnai a.

 

“Kan pahniha kan awm hi chuan kan chhungte chungchang chu theihnghilh ang” ka lo ti a, a nui vei suk.

 

“Nimin chu inchungah ka lawn ve a, ka tla tep a” tih pahin a ban a rawn hlim a, a lo pilh phung mai.

 

“Keimah vangin I thawh ngai miah loh pawh I thawk a ni sia, a hrehawm e” ka lo ti a.

 

“Shh. Chutiangin sawi suh. Nangmah vangin khawvel ka thlir dante hi a danglam tawh a, lawm zawk ta che” a ti a, ka khawngaih lo thei chuang lo. Unau zinga naupang ber, duh duh neia awm ve thin khan a thlan vang pawh ni loa ni tina hnathawk tura a chhuah a ngai thin hian min hmangaih zual tir lo thei lo.

 

“Engtin nge kan awm zel ang?” thil tam tak ka ngaituah hnuah ka ti chhuak hlawl a.

 

“Engmah thutlukna chu ka la siam fel lo a, mahse, ka zirlai ka la zawh loh hi ka exam veleh dawn mi ka ti deuh a, enge I ngaihdan?” tiin min zawt a.

 

“A tha ka ti tho a, mahse….”

 

“Enge mahse…?”

 

“I awm bo leh vang vang dawn tihna mi?” huphurh zet hian ka lo ti a.

 

“Thla thum chauh a ni mai, a rei em?” a ti sap a.

 

“A van rei tak, chumi chhung chuan kan chhungte hian chet an lo la mai thei asin” ka ti a.

 

Mathana nen kan inneih tur chungchang an rel hnu khan an chet deuh vut vut kha ka ring deuh a nia, rin ai takin an muang leh ang lawi a, engemaw chu tum an neih ka ring tho.

 

“I lokal ve daih mai dawn mi?” a han ti a.

 

“Awi a…” ka ti hluai ringawt.

 

A nui suk a, min rawn kuah a.

 

“Ka exam loh pawhin a pawi ka ti chuang lo a”

 

Ka va melh a, a lo maimitchhing daih. Thil tam tak a ngaihtuah ve dawn tih ka hria, kan inkar hi a ping rih viau a, mahse, hlim taka kan awm hun chu a la awm ve ngei ang.

 

A muhil chu ka en reng a, a chau ve ngang a niang. A awmah beiin ka kawngah a kuah thung a, a thaw ri sak sak chu ka ngaithla reng a, a tello chuan engmah ka ni tawh si lo a, min kalsan hi a ngai ang tih ka hlau ngawih ngawih.

 

“Ka muhil rei em? I muhil ve lo mi?” chiang zet hian kan inmelh a.

 

“Muhil char char ta che, ka lo veng dawn che alawm” ka tih chuan a nui suk a.

 

“Muthilhsan char char che chu I uiawm alawm” tih pahin min rawn fawp zeuh a.

 

Mihring induh leh inhaw ta lo chu han infawh vawng vawng takah chuan kan lo danglam ve thuai thin. Hetiang hunah hian Valtea hi ka fak a, ka ngaisang bawk. A insum thei em em a, hei vang hian keipawhin ka ring hmiah thin. Vawiin ni erawh chu kan tum aiin kan tlheng thui ve ta hret, ka puan inhlim chho chu ka han pawt a, ka mal a lo lang deuh huau. Ka kutah a rawn man a, min nawr deuh paha min rawn fawh chuan ka danglam ve vek, ka sawi fiah thiam chiah lo, hetiang tak hian ka la awm ngai lo a, engkim chu nuam ti deuh hian ka lo dawngsawng a ni ber mai.

 

“Valte..”

 

Min fawhna chu la sawn duh chuang loin min rawn en a, a hmel chu a pelh ve phangin ka hria.

 

“Kan kal thui dawn ania” tih pahin ka han namsawn deuh a, a thaw nghal hawk.

 

“Ka ti hlau che em?”

 

Ka lu ka lo thing a.

 

“Ka insum zo lo teuh thin hle mai a” tih pahin a inlahrang a, min nuih var var a. Ka sam hnawk niai chu a han hui khawm a, min hnungchhawn zawng hian a han inlet a.

 

“Ka hmangaih che” tih pahin a kawngah ka va kuah a, ka kut chu a lo chul heuh heuh a. Vawikhat mah min hmangaih thu hi a la sawi ve miah lo a, ka beisei ve thin. Mahse, hmangaihna hi sawi aiin a taka tilang an awm bawk a, min hmangaih tih sawi lang lo mah se heng bak chu a awmin ka hre chuang lo.

 

Minute 5 hnu veleh a rawn inher a, a nui ta suk a.

 

“Han sawi leh teh” a ti a.

 

‘Ka hmangaih che”

 

Min rawn fawp ta vawng vawng a.

 

Kimkimi te rawn haw chuan chawhnu inkhawm pawh an lo bang fel der tawh. Min ngaihtuah viau mah se thlah haw chi ka ni si lo a, hreh tak chungin kan invai liam leh ta. Engtia rei nge hetiang hian kan awm dawn ka hre lo a, ngaihtuah pawh ka duh lo. Valtea ah hian ka innghat hlawm tawp a ni mai.

 

Nunui a rawn lang hlawl a, thla hnih zet hnua kan inhmuh leh hmasak ber a ni a, chutia a a rawn lang hlawl chu mak ka lo ti deuh.

 

“Mawipui, min ngaidam thei angem?” tiin ngaihdam min rawn dil a. Ka thiannu a ni a, ka rilru tina ve viau mah se ka neih chhun a ni a, ngaihdam min dil anih chuan ngaihdam mai kha ka tihtur a ni bawk. Kum hei leh chen ka tan a awm tawh a, vawikhat ka lung a tih awi loh vang ringawtin ka hawisan hlen thei lo ang.

 

Hlim takin kan inkawm a, Ricky nen an lo tha leh tawh a, a tana tha ber a nih a hai bik lo. Keipawhin ka duhpui em em a, hetiang baka mipa rintlak hi an awm bik lo tih ka hria a, innei ngei se ka duh bawk.

 

“Bazarah chhuak lawk ila, lei mamawhte in nei ve lo mi?” tiin min sawm a.

 

Zingah khan ka nuin thil lei tur min hrilh nual a, Tebawihi lo haw hun ka lo nghak a, Nunui a hman takah chuan a ruala kal mai chu tha ka ti leh zawk. Ka insiam sawk sawk a, kan chhuak ta a. Kan mamawh ang kan lam khawm hnuah haw leh mai kan tum laiin Valtea’n min rawn call a. Bazara kan chhuah thu ka hrilh chuan a chhak lawkah hna an lo thawk reng hi a lo nia, tlawh kawi tura min tih avangin Nunui chu ka han hrilh a, a lo hreh bik lo. Kan han thlen chuan inchungah a lo inkhai a, an rawng hnawih lah chu a hautak hmel em em lehnghal. Kan thlen hnu rei vakloah a rawn chhuk thla ve a, a thianten an lo chhaih nghal sap sap.

 

“Hei in la” tih pahin ka thil leisak chu ka pe a, nui sak chungin a la a.

 

“Ka lawm e” a ti sap a.

 

‘Vel a cheu” Nunui chu a lo ner nang a.

 

“Ka bialnu hmeltha zet I rawn hruai avang hian I chungah pawh ka lawm aw” Valtea’n a tih chuan an inchum taih taih a, ka lo nuih hak a.

 

Awm reng thu awm hek suh, kan haw veleh ta. Zanin chu inhmuh ruk kan lo tum ve hrim hrim a, chhuanlam pawh ka nei tha tawk viau a, ka chhungten min dan ka ring em em lo. Kan kawtah Nunui’n min drop a, a haw tlang nghal a. Inchhungah ka thil lei nen bawr zet hian ka lut a, ka nu leh Valtea nu leh ka pitei an lo awm a.

 

“Hei ani pawh a lo haw ta alawm, kan thurel kha hre ve se” Valtea nuin a tih chuan a ngaihna hre lo zet hian ka hawi a.

 

“Thla thar ni 3 ah pasal I nei ang, Mathana nen” ka nu in a tih chuan ka mumang mai a ni lo tih hriat zet hian ka thil khai ka thlauh a, ka keah tla thlain chhuatah a darh ta nuai a.