VALTEA 13

 

Thirteen

 

Kimkimi te in kan thlen chuan an nupain min lo la nghak a, inhnuai lamah min hruai thla nghal a, Valtea’n ka kutah a chelh tlat.

 

“In pahnih hian a tawp thleng in invuan tlat tur a ni. In chunga thil thleng thei chu in ngaihtuah lawk ve vekin ka ring a, chung harsatna zawng zawng tawrh huam chuan hetiang hian in awm tawh a, in lama kan tanna hi a intih thlawn loh ka beisei” Kimkimi chuan a ti a. 

 

“Puitling in ni tawh a, thil tha ber chu a ni lo tih in hre ve tho a, mahse, hmangaihna hi chu kan duh loh dana min hruai theitu a ni miau a, in inhmangaihna hian damchhung daih phawt mai sela, a bak chu a fel mai ang” U Ropuia ve thung.

 

Inchunga an chhoh hmain tawngtaina nen min thlah thlap a, ka thla a muang deuh huai. Kan thil tih tum hi an hre lawk emaw tih tur khawpin ka nu leh pa an meng rei a, an mut hnuah pawh thawm an chhuah zeuh zeuh. Tebawihi muhil lai ka kaitho a, min pui turin ka ngen tawp kha a nia, nidang ang chu nise ka nu leh pa bulah min hek turin a kal leh ngei ang. Mahse, min lainat ve ngawih ngawihtu a ni a, a theih ang anga min puih tumin zanreiah a rawn tho ve a, a chungah hian ka lawm reng tawh ang.

 

Kimkimi te in kan thlen hma ringawt pawh khan Valtea’n ka inchhir a hlauh thu vawi thum a sawi hman a, ka rilru ka thlak a nih pawhin a hriatthiam tur thu a sawi vek a nih kha.

 

“Nangmah zawk i inchhir a ni lo maw?” tia ka zawh let khan min kuah vang vang a, a hnuk a ulh tih ka hria.

 

“Khawvelah hian nang aia ka tana hlu an awm lo, ka lam i tan tlat vangte, min rin tlat vang hian ka lawm em em zawk asin. I nawmna leh i hlimna tur tam tak erawh ka tichhe ngei dawnin ka hria a, chu chuan min tina” a ti a, sawi leh tur chuang a awm lo. Kan pahnih hian kan tawn tur hre lawk lo pawh ni ila inthlah tur chuan a harsa tawh em a ni.

 

Khumah chuan ka mu a, thil tam ka ngaihtuah lo thei bik lo. Valtea chu tukverhah a dak dauh dauh a, ral leh lamah an in a awm a, hmuh theih chiah loh mah se chu chuan thil tam tak a ngaihtuahtir ve ang tih ka ring. In leh lo tha tak an nei a, engmah thawk lo mah se an inluah man lak atang ringawt pawhin nuam ve pangngai taka khawsa thei chu a ni hrim hrim. Amah lo awm tha duh loin han sual ve viau thin mah se engmah tlachhamin an siam ngai bik lo a, keimah avang erawh chuan nunkhawchhuah tumin hna tam tak a thawh a ngai tawh thung ang.

 

“Valte”

 

“Um” min rawn melh zawk a.

 

“Lo mu tawh la” sawi tur dang em em pawh ka hre bik lo.

 

Tukverh a khar a, a rawn phei a, khum bulah chuan a rawn ding a.

 

“Chhuatah hian ka mu mai ang a?” tiin min rawn a. Nichin atang khan ka rilru a buai char char tawh a, mu tlang nghal tur anga ka inngaihtuah khan ni theiin ka hre lo a nih kha.

 

“Pawi i tih loh chuan” ka ti sap a, a lo nui suk a.

 

“Engkawngah mah hian i inpeih hmaa nawr che ka tum lo. Mahse, i bula ka mut chuan ka nawr lui palh ang che tih ka hlau, chuvang chuan ka inthiarfihlim phawt ang” nui chung hian a ti a, a malah ka lo chum a.

 

A mutna tur ka siam sak a, khum bul chetah a ni a, ka la lai deuh tho mai. Mi pawh an inru fo a, an inruk zan hian engtin nge an awm thin ka lo hre si lo a, nupa anga inngaih ringawt lah chu a ni chiah lo in ka hre bawk nen ka buai kual vel nuai mai. Mahse, Valtea zawkin hetia awm hi a rawt ta hlauh a, ka lawm khawp mai.

 

“I muhil tawh em?” 

 

Ka inlet nghal vat a, Valtea mu chu ka zuk en a, lukhamah a lo inbeng kang a.

 

“I muhil thei lo mi?” ka tih chuan a bu nghat a.

 

“Valte.. engtin  nge kan awm zel ang le?” ka han ti ringawt a.

 

“Naktukah chuan engkim a chiang vek tawh mai ang. U Ropuia’n zingkarah ka va kal ang a tih kha” a han ti a.

 

Hma hun tam tak sawi tur kan nei lo a, huai taka hmachhawn tur erawh chuan kan infuih ve char char a, ka chhungte thinrim dan tur hi ngaihtuah chhin pawh ka ngam lo. Engtin tin emaw kan lo muhil ve a, darkar thum vel lai chu kan lo muhil ve ang, room kawngka rawn kik dat datah ka harh a, Valtea a tho chhuak hmasa zawk thung. 

 

Kimkimi chu a lo ding a, ka phone sana ka han en chuan dar 7 a lo ri tep tawh. 

 

“I u Ropuia a kal dawn chiah a, kan chhungte pawhin an hre tawh aniang nichin khan ka nuin a lo call a, mahse, ka pickup rih lo” a ti a.

 

“Va inphih fai hmasa la “ Valtea’n a tih lai chuan chhuata a mutna chu Kimkimi’n a lo melh nasa mai. A hnuah a rawn nui chhuak phut a, Valtea nen kan inmelh tawp.

 

“Awi, in mu hrang ngei elaw? Nupa han mut hran nghal chu” tiin min fiam a, ka lo sen nghal tawn tawn mai.

 

“Han chho mai mai teh” tiin Valtea’n a nawr chhuak a. “Hawh le ka nupui ni tan ve deuhte” tiin min kai a, bathroom ah chuan min hruai ta a.

 

Nupa, chu hming ka rilruah a rawn awm rual chuan ka hit deuh seng seng mai. Heti teh thuta kan awm a ngai hi a pawi ka tih rualin Valtea nupui han nih chu a nuam dawn hle in ka hre bawk a, hmangaih berte hlutzia ka hre thar bawk. Bathroom atanga ka chhuah chuan khumah Valtea a lo thu a, ka phone a lo keng a.

 

“Message i dawng a” a ti a, ka va la ve mai a.

 

*mi hriat tam hma hian rawn haw leh rawh u, engmah ka sawi lo ang, ka ngaidam vek ang che u*

 

Mathana message, ngawi rengin ka phone chu khumah ka theh thla a, Valtea a lo thaw hak.

 

“Ka u i neih chuan i nuam zawk anga, retheihna engmah i hre lo ang. Kei erawh chu tihian kan buai tan nghal der chu a ni sia” a ti sap a. A darah chuan ka zuk chelh a, ka hmer deuh vang vang a.

 

“Valte, haw leh mai mai turin ka zui lo che, a hrehawm deuh a nih pawhin kan pahnihin kan tih kha” ka ti a.

 

“Ka hmangaih che” a rawn ti zawi ta sap a, a bulah chuan ka thu thla a.

 

“Maw?” ka han ti a, tihderna tel miahlo fiah kaka min melh chung hian. “Ka hmangaih lutuk che” a han tinawn leh a. Ka lo khi ta var var mai.

 

U Ropuia beidawngin a rawn haw a, ka rin lawk a ni hrim hrim a, mak ka tih ber zawk erawh chu ka nu leh paten min tuithlar! 

 

“Kan thu a awih lo a, kan thu lo angin a awm a, keinipawhin fanu ah kan ngai thei tawh bik lo” an lo ti a tih thu chu dawnsawn thiam a har angreng viau.

 

Kimkimi te nupa an chhuak a, u Ropuia a office dawn a, Kimkimi erawh chu naute vaccine la tur leh bazar pah turin a chhuak. Kan mutnaah chuan kan han mu leh ringawt a, tihtur dang awm ta lo chu ni a rei phian lehnghal.

 

“Engtin nge kan tih ang?” tiin Valtea chu ka zawt a.

 

“Engpawh nise, Delhi ah kan chhuk phawt chu a ngai dawn a nih hi. Thla hnih thum kan awmna tur chu ka pawisa khawlsa atang hian a la daih anga, a bak chu hnate ka zawng anga, kan awm thei ve em em ang” a ti a, amahah hian ka innghat pumhlum tawp.

 

Keipawhin tam lo mah se pawisa chu tlem azawng ka account ah ka la nei a, Valtea ruahmanna hnuaiah engkim kan ti tawh ang. Chumi zan chuan rilru nghet tak pu chungin Valtea tan ka thianghlimna chu ka hlan ve ta a, kan chhungten min pawm lo tih ka hriat kha chuan Valtea hi ka pasal dik takah ka pawm nghal hmiah. A tan a hmasa ber ka nih avangin a lawm a, keimah ka lawm bawk. 

 

Tunah chuan engkim kan pahnihin kan hmachhawn zel a ngai tawh dawn a, chhungten min pawmpui lo mah se khulama kan chhuk hunah insuihthat vat chu kan tum ruh ve hle. Man leh mual engmah sawi theih a la ni lo bawk a, mahse, min lainattu hi an lo bo vek bik lo. Ka nu first cousin,  putea bera kan neih hian kan chanchin a lo hre ve a, ka nu leh pain ka man dawng duh lo mah se aman a dawn tur thu a sawi a, Delhi lama kan chhuk hunah kan la ngaihtuah tha leh ang chu.

 

Kar khat zet chu Kimkimi te inah kan awm tawh a, a inthlahrunawm viau na a kalna tur dang kan nei mai silo a, chu bakah awm rei kan tum tawh chuan loh avangin insawn kual kha thil buaithlak a ni hrim hrim bawk. Valtea hnathawh a laklawh a, an zawh fel veleh kal mai tum kan ni bawk a, rilru nuam lo angreng takin kan awm a ni deuh ber. Kan vengchhungin kan chanchin an hre vek tawh a, ka chanchin an sawi dan chu sawi chhuah tlak loh khawpa tuihnai lo a ni hlawm. Valtea laka ka inthlahrunna tur vawng vawnga sawi dan lah an thiam bawk. Mahse, chung zawng zawngah chuan ka kianga ding tlat hi ka hrechiang a, chuti maia awlsama zam chu ka tum bik lo.

 

Khatia ka chhungten min tuithlar hnu khan Valtea chhungte pawh an rawn che ve phat a, hruai haw tumin a nu leh a ni an rawn kal a, Kimkimi te nupa pawhin keimahni vangin an tawrh nasat phah. U Ropuia hi makpa rangkachak kan tih ang hi a lo ni hlauh a, an zah ve em vang chauha chet la vak thei lo an ni nghe nghe.

 

“Tuna i rawn haw lo anih chuan i pa in rawn haw a remti tawh dawn lo a nia” Nu Machhuani’n a tih chuan ka lo kun tlat a, ka hawi chhuak ngam lo.

 

“Ngurpuii nen min pawm thei dawn lo a nih chuan ka rawn haw bik lo ang” Valtea’n a ti ve tlat a, anni pawh beidawngin an haw ta nih kha.

 

Zana kan mut hnute hian thil ka lo ngaihtuah leh ngut ngut thin. Nu leh pa thuawih lo ang maia kan awm a ngai ta hian min tina thin. Ka nu leh ka pa tia ka koh phaka an awm tawh lo ringawtte hian thinlung a ti na ve ngawih ngawih fo a, mahse, keimah chiah a tuartu ka ni bik lo. Valtea pawhin rilru na ngawih ngawihin a nu leh pa a kalsan a ngai ve tho a. Kan inhmangaihzia an hriatchian hunah min la pawm ve em em ang tihah ka innghat tawp.

 

Delhi kan awmna pawh thla a tling veleh tep tawh a, a hmaa Valtea inluah thin kha kan chhuk dawn hnaih khan a lo ruak hlauh mai a, zawn buai ngai loin kan lut thla nghal. Mizoram nen a boruak a inang lo lutuk chu kan thlen thlak hlim hian ka zo mang lo a, nithum lai chu ka han  nuamsam lo nghal ringawt a, pawisa inren kan ngaih tehlul a hrehawm duh ngei mai. Mahni lo khawsak tamna hmun leh awm tamna a ni bawk a, Valtea chu a mikhual loh mai piah lamah a thian tamtak an la awm a, a thenin lehkha an la zir a, a thenin hna an thawk a, min rawn pui bawmtu pawh kan tlachham lo khawp mai. 

 

“Vawiin chu college ah ka va kal lawk anga, nangmahin i lo awm hreh lo ang tiraw?” zing kan thawh hlimah Valtea’n a ti a.

 

“Hreh lo e, insuk tur kan nei nual a, ka lo insu dawn nia” ka ti a.

 

Kan chhuk thlak hnu hian vawikhatmah min la chhuahsan lo a, kan chhuah pawhin kan pahnih hlirin kan chhuak thin. 

 

“Lo awm mai mai la, ka rawn haw hunah insukte chu a theih reng alawm” a ti a.

 

“Min duat sual zo dawn” ka tih chuan a khi suk a, Valtea zaidamzia hi a mak tih piah lam a ni. Kan inngaihzawn chhoh lai pawh khan a zaidam tih chu ka hre tho a, mahse, mak zawk khawpin a lo zaidam, a mizia ka hriat loh ka hriat belh zingah chuan a hlu ngawih ngawih.

 

Ka insuk ka zar zo a, inchhungah ka lut fel chiah a, Valtea thiante an rawn leng lut ve chiah a. Pahnih chu Tapuia leh Feli an ni a, kan chhuk tirh pawh khan min pui nasa dun em em a, nula pakhat rawn tel ve erawh ka hmuh vawikhatna a ni. Valtea a chhuah daih avangin rei pawh thu ta lo chuan haw an tum a, chutih lai mek chuan nula ka hriat loh ber chuan min melh deuh ralh pah hian, “Nangmah hi mi Valtea u nupui hual ni thin chu” a  ti ta nih chu.

 

A thiannuin a kheuh zeuh chu ka hmu a, chutah a rawn nui a.

 

“I ropui ce hrim hrim" tih pahin a chhuak ta a.

 

“Awi, Ngurpui, hrethiam hram rawh aw. A ti zahthlak thei ania” Feli chuan a ti a.

 

“Tunge a?” ka ti sap a.

 

“Valtea ex a nih kha” a ti ta a.