VALTEA 14

 

Fourteen

 

Valtea rawn haw lai chuan khumah ka lo mu a, ka lo ngaihsak peih lo. A bialnu hlui khan ka mood a ti chhe vek. Khatianga min rawn tingam hrim hrim pawh kha ka lawm lo.

 

“I nuam sam lo em ni?” a rawn ti dam dup a, ka lo melh deuh hrep.

 

Ka bulah a rawn thu a, a thawmhnaw a thlak pah a. Ka la chechang duh chuang lo.

 

‘Ka rawn haw hunah kan insu dawn nia ka tih mawlh mawlh kha” ka lo insuk vanga ka chau ah a la ngai ta tho a.

 

“I bialnu hlui a rawn kal a” ka lo ti hmuk a.

 

“Tu maw?” a ngaihna hriat loh hmel deuh hian min melh a.

 

‘I bialnu hlui I bialnu hlui” ka lo ti bak hlar.

 

“A va tul lo tak ve” tiin a nui a, a nui te chu ka haw hlur.

 

“Engtin nge I u nen kan inngaizawng thin tih a hriat a?” tiin amah chu ka chhuahchhal titih a.

 

“Ka hre lo, ka hre lo tak tak. Eng thu pawh sawi se engatan mah ngai duh suh” a ti a. Ka mu chu ka han tho a.

 

“Rawn kal tawh suh se” tih pahin ka kalsan ta daih a.

 

Kan chaw ei lai thleng chuan ka la tawng tha duh lo. Valtea chuan min nuih suk suk a, thleng ka sil zawh meuh chuan ka ri leh barh barh tawh. A bulah hi chuan thinrim vak pawh tum ila a harsa lam hret chu a ni thin.

 

‘Ka hmangaih ber che a, ka nupui duh tak I ni bawk tih hi hre reng rawh aw” tiin zan kan mutnaah min hrilh a, ka lungawipui leh hmiah.

 

Valtea pawh a exam a zo tawh a, a thianpa bulah hnathawh tur a hmu hlauh a, ni tin a chhuak thin a, chhun lamah chuan ka lung a leng ve thin viau. A bialnu hlui Rspi pawh a la reh ve zel a, kartawpah Tapuia te ho an rawn leng thin a, kartawp hlimawm tak kan hmang tlang thin.

 

Nikhat chu Valtea’n an hnathawhna hmunah min hruai ve a, chawhma chiah kal an ngaih vang leh  chawhnu lam bazaar dun kan tum vang a ni. An room ah a thianpa Roy-a nen chiah an awm thin avangin inthlahrun ngai loin ka awm ve ta reng a, an pahnihin an buai dun mawp mawp a, kei erawh chuan phone ka lo khawih vel mai mai.

 

“Inpa I tawng hi chu I vannei khawp mai” Roy-a chuan min fiam zuk zuk a.

 

‘Amah kha a vannei fe zawk” ka lo ti ve a, an hlimpui dun tawp.

 

“Hna thar tha deuh ka zawnpui a nia, a fel viau chuan a hmuh ngei pawh ka ring” a tih chuan Valtea chu ka melh a, a lo khi ve suk a.

 

“Ka thluak hi ka sawi zawi leh fe loh chuan engmah ka ni lo” a lo ti ve a. Zana ka mut hnu hian lehkha a zir tan chauh thin a, a rawn mut lai pawh hi ka hre mang ngai lo. Kan chhungte hnen atanga support kan dawn loh vang hian a theihtawp bak hian a bei ve a, chhunah a lo chau ve thin bawk nen ka khawngaih thin.

 

“Ka hman ta e” tih riah chuan ka va hawi chhuak a.

 

“In nu awm vang a ni maw I thawh chak em em a” Roy-an a lo fiam leh zauh.

 

“Hei vang hi lawm nupui nei ve vat rawh u ka tih thin” tiin a lo chhang let ve a, ka nuih dun var var.

 

Ka phone-a message rawn thleng chu ka han en nghal a, ka account ah Rs 20,000 lai a lo lut.

 

“Ehe! Engati nge le?” tih pahin Valtea chu ka phone ka hmuh a.

 

“Tu tih nge niang le” a ti vung vung a.

 

“Ka hre bik lo, an tihsual emawni le” ka han ti ringawt a.

 

“I chhungte an ni lo maw? An pawisa kan mamawh lo tih an hre lo aniang” a ti hmuk a, a hmel a inthlak nghal vek.

 

‘An ni lo tawp ang. Min tuithlar tawh ania, engtin nge pawisate chu min rawn thawn tehlul ang?” ka lo ti ve a.

 

Kan bazaar zui ta bawk nen kan hrechang ta bik lo. Engpawhnise, tihian ka account ah lo awm ve phawt se, min rawn thawntu chu kan hre ve vat mai ang chu.

 

Kan haw lamah Tapuia te tlawh thain kan hria a, min rawn tlawh bak hi ka la kal ve miah lo a, an inluah min hriattir pah thaa a hriat vangin Valtea chuan min sawm a ni nghe nghe. Kan va thlen chuan an thian dangte pawh an lo awm a, ka tum aiin an lo tam.

 

“Inchungte ka lo sawm ve a, chaw eikhawm nghal law law ang u” Tapuia chuan a ti a. Ani hi chu phawk ta reng reng a ni bawk a, engmah ui lah a nei lo.

 

Feli nen hian inthenawm ang chuan an lang na a, an cheng dun a ni mah mah zawk. Hetiang hi vairamah chuan thil thleng ngai lo a ni hran lo a, makah pawh an ngailo zawk. Ka awm tirh kha chuan mak ka ti viau a, Valtea thianteho hi an nih deuh fur avangin mak ka ti lutuk tawh lo.

 

“Mawipui, salad vel hi siam ila” Feli chuan min rawn ko a. Kan pahnihin purun vel kan chan a, Valtea chet chhiatna eng engemaw min hrilh a, kan nui nasa kher mai.

 

“Hetah in lo awm daih elaw?”

 

Feli nen chuan kan hawi chhuak thawt a, Rspi chu kawng dawmin a lo ding deuh vah a, beer rim a rawn nam hak.

 

“Lokal ve rawh” Feli chuan tui loh hmel angreng tak hian a ti a, a hmaa kan lo hlim ve na boruak kha a rawn tichhe vek.

 

Mipaho roomah an inluh chhawk sek a, in tur a awm tih ka hre mai. Valtea chu ka va zawng deuh a, a nihna takah chuan zu a lo in nasa ve hman si a, a tal buai leh ang tih mawlh ka hlau. Ka thiltih lai ka zo a, pawn lamah ka chhuak phei a. Bathlarah ding chungin meizial a lo zu vang vang a, min hmuh chuan a lo nui sak a.

 

“In zo tawh mi?” a tih chuan ka lo bu nghat a.

 

“Tinge pawnah I lo awm daih a?” ka ti a.

 

“A lum em a” a ti ve mai a, a ruk tak chuan a in chak ve ka ring.

A hmai a lo khem nun a, a hmai lah chu a lo bal angreng sia, a ngaihna ka hre lo tawp.

"Tinge i hmai kha?" ka han ti a.

"Tah hian ka tla thla daih alawm" a tih chuan kan dinna hnuai chu ka han en a, chhuat a lo chim phei deuh a, a hlauhawm thei viau dawnin ka hria.

"A va hlauhawm ve" ka tih chuan a nui tak ang vur vur a.

"Hawh, bathroomah kal ang, a va mak ve" ka phone screen-a a hmai en pah chuan a ti a,  ka zui ve ta nghal a.

 

Chaw kan eikham meuh chuan dar 10 a lo ri tawh a, thut khawmuan an la ti fo, mut veng veng ka chak tawh. An kai hlawm angreng si a, an tawng a ring tulh tulh a, lu a vih deuh ngut ngut.

 

“Valte, in nu nena in intawn dante sawi ve la” Rspi chuan a ti a, mipaho in an lo thlawp tliar tliar.

 

“Pathian min pek a nia, intawn dan hran kan nei vak lo” a lo ti.

 

“I u nen an inngaihzawn laiin nangmah nen in inkawp an tia, tak tak a ni em?” a tih leh chuan Valtea chu a ding hluai a.

 

“Rosangpui, thu I hriatchian loh chuan engmah sawi ve suh” a ti fak a, “Hawh le, haw tawh ang” tih pahin min kai tho a.

 

“Bawiha, a uang ve mai mai aniang, thinrim lo ula” mipa thenkhatin an lo ti a.

 

“Haw rawh se, a ho emai a”nui sawng hian a lo ti a. Valtea’n min kuah a, chutih veleh chuan meng phelh phang hian Valtea chu a rawn melh a. “Valte, kei lo chu hmangaih I nei thei lo tih min hrilh kha, ka lo nghak ang che I tih kha. Tinge min nghah si loh?” a mittuite a tla vel.

 

“A zia lo emai, I rui anih kha. Roomah dah phei ru” Tapuia’n a lo ti a, mipa pahnih hian kaih an tum a.

 

“Nguri, ka bialpa hlui kha nang aiin ka hrechiang zawk. Ka hnenah a lo let leh tho ang” a au tawn tawn a ni ber.

 

Feli’n pawn thlengin min thlah a, kan pathum hian harhfim awmchhun kan ni hial ang.

 

“Mawipui, a rui a nih kha, engahmah ngai suh aw” a ti a, ka mittui tling pam karah chuan ka nuih lui a.

 

Kawng tluanin kan tawng tawh lo. Valtea’n nghet zet hian ka banah a chelh tlat a, Rspi chhiatlohzia lah ka hmu ve reng a, khati taka Valtea’n a lo atchilh pawh kha a mak lo. An hausa tih a hriat ngawih ngawih bawk a, zanin khan a rui sual a ni ve mai a, khatiang reng chu a nih ka ring bik lo. Ka neihchhun ngawih ngawih hi min laksak ang tih hlauhna in ka khat.

 

“I inbual duh em?”

 

Thutthlengah chuan ka thu hnawk a, ka lu ka thing a, engmah ka ti peih lo.Valtea a inbual a, khumah ka lo mu a. Ka han mu tha dawn a, inbual loh chuan a muthilh theih dawn lo tih ka hriatchian em vangin ka tho leh hluai. Valtea inbual zawh rualin bathroomah ka lut ve ta nghal a. Ka inbual zo ka chhuah chuan Valtea’n phone a lo hmang zo chiah a, min hmuh chuan a nui sak a.

 

“Lokal teh le” tih pahin min kai a, ka sam a chhem ro vek a, ka rilru a fim tial tial a, ka ngaihtuahna pawh a pangngai leh tan.

 

“Ka hmangaih che tih I hria tiraw?” a ti a.

 

“Um..” ka tih chuan ka nghawngah a rawn fawp zeuh a.

 

“Ka hmangaih reng ang che” ati ta sap a.

 

Valtea muhil lai chu ka en reng a, ka neihchhun ngawih ngawih a ni a, ani hi chant a ila engtin nge ka awm ang tih ka ngaihtuah ngam lo. Khum sira a phone chu ka han ban a, nichin lawka a call kha ka en chak ve hrim hrim. Ka han en chuan number hlang a lo nia, a number chu ka phone ah ka save a, whatsApp ah lutin a dp ka en a, Rspi kha a lo ni. Ka han thaw hak a, buaina hian engvanga min umzui zel nge a nih ka hrethiam tawh lo.

 

Buaina leh harsatna em em tawk loin hun kan hmang chho ve zel a, kan buai zan atang khan Valtea thiante pawh kan tlawhpawh ta vak lo. Tapuia leh Feli erawh an rawn kal ve fo a, kan kal ve ngai lem hlei lo a. Keipawh Mizoram lama ka thiante be pawpin sumdawnna ho tham tete ka khawih tan a, secondhand bale te ka buaipui a, Valtea’n a remti chiah lo nain kan dinhmun sawhngheh a ngai ve tih ka hria a, ka tih theih ang ang tiin ka buai ve thei hle. Ka thiltih Feli’n a lo hria a, tel min dil ngun bawk a, mahnia tih ai chuan a tha zawkin ka hre bawk a, kan pahnihin kan ti chho a, ani tawng engkim thiam a ni bawk a, a tihchi ta phian. Thla thar apiangin ka account-ah pawisa a rawn lut ta zel a, ka ngaih a tha thei tawh lo. Valtea ka hrilh ngam chiah si lo a, tihian lo awm phawt se tiin ka khawih che duh ngai lo.

 

Nikhat chu kan thil thawn tur buaipuiin Feli nen kan chhuak a, kan bungraw thawn thenkhat a kim lo an tih vangin endik pah kan tum a ni. Valtea te office a luh kawi a remchang emai tiin kan han kawi a, Roy-a chiah a lo awm.

 

“Khawnge Valtea?” tiin ka han zawt a.

 

“A chhuak lawk aniang a, ka lunch laiin a hman lo a, a va ti ve lawk aniang” a ti mai a.

 

Keipawh ngaihthat lohna nei hran loin ka kal veleh mai a, mahse, zana ka message dawn chuan min thawng tak zet. Rspi leh Valtea te thlalak a ni a, an thlalak hnuaiah darzat leh ni zat achuang kalh a, vawiina ka tlawh lai vel kha a ni. Ka kut a khur der der a, thinrimna leh hlauhthawnna hian min rawn tuam chhuak vek.