VALTEA 15

 

Fifteen

 

 

“Vawiinah kan rawn kawi a, I lo chhuak daih a”

 

Valtea rawn haw chuan ka lo ti a, min melh rauh rauh.

 

“Thil ka lo ei chhuak daih a” a ti a, thilsual ti hmel pawh a pu lo.

 

“Tunen?”

 

Ka thil tih lai ka ti mawp mawp a, ka phih deuh sawk sawk a ni zawk ang.

 

“Rspi nen”

 

A sawi awlsam lutuk chuan ka thin hi a vih ngut ngut. Bathroom ah a lut tlang a, ka mittui tla tur chu duh loin ka hawisawn a, ka han khep let a. Tinge awlsam lutuk a chutiang a sawi theih, ka chunga a awm dan a hre vek a, min tawngkhum dan zawng zawng pawh, chuan ka thik tih pawh a hre vek.

 

Ka chawhmeh siam chu a rawn bih duk duk a, thlalak hmuh ka tum pawh kha ka peih leh ta lo. Engahmah a ngai chuang lo a, hua anga awm kha ka peih bik lo.

 

“I bungraw tihfel theih loh chu a fel ta em?” a ti a.

 

“Um” ka ti hmuk.

 

“Ngurpui, thil hi chu huat tur kan zawn tlat chuan a awm reng dawn. Kan insawn a nih ngawt loh chuan Rspi pawh I tawng fo dawn, engmah kan inkarah a awm lo a, min rin ngam tak zet chuan ka hmangaihna chiah che hi I hmu lian anga, heng thildang hi chu I enliam vek thei mai ang” a ti dam dup a.

 

“Ani ber kher chu enliam harsa ka ti” ka lo tit ho.

 

Ka darah a rawn vuan a.

 

“Rspi guardian ka la nih tlat avangin vawiinah pawh khan an college ah ka va kal a, ka tih zawhah ka let leh nghal. Roy-a khan a sawi ngam lo aniang, ka bialnu hlui buaipui leh anga ka lang tur kha a duh bik lo ang. Mahse, engkim hrilh zel che hi keichuan ka tum, dawnsawn a harsa maithei a, mahse, kan inkarah hian thuruk awm lo se ka duh vang a ni” a tita a, ka rilru pawh a dam huai mai.

 

“Ka neihchhun I nia, chan che ka hlau tih I hria tiraw?” ka ti a, nghet zet hian min kuah a.

 

“Ka neihchhun liau liau I ni ve tho alawm, engtikah mah phatsan che duh ngai lo ang” a ti a.

 

Kawng hrang hrangin Rspi che mah se Valtea ka ring bur a, a sawi ang tak khan Rspi chungchang a nih chuan min hrilh chhuak dap zel. A phone hi vawikhat pawh ka khawih theih loh turin a la dah chhin ngai lo a, sawi duah lo mah se a takin rin tlak leh rin turin a awm a ni tawp.

 

Nikhat chu ka thil thawn zo Feli te inah ka kawi a, nau a pai ve tak avangin leh a nau pai a chian chiah loh avangin keimahin kan sumdawnna pawh ka khawih rih a, help erawh ka sem ve vek zel. Eitur kan siam a, kan pahnih hi chuan kan inmil bawk a, kan inkawm ngeih ve em em tawp. Mi ti zawk zawk lo a ni a, mihring ti phawr phawr chi ka ngaina lo bawk a, Feli hi chu ka mize ngainat zawng tak a ni hrim hrim.

 

“Ka chhungten ka rai thu hi an la hre lo a” a hmel chu a ngui ve raihin ka hria.

 

“Tapuia nen in cheng dun tih an hria em?”

 

Nidanga ka zawh ngam loh chu ka zawt ta phawng.

 

“Hre lo, chuvang chu a nia ka huphurh em em. Dik tak chuan Mawipui, I bulah chuan sawi mai mai ila maw, nun kan lo uluk lo lutuk hi a pawi a ni tawp mai” a ti a. “Phai ka awmtirh kha chuan nungchang tha lawmmante kha ka dawng ve thin a, mahse, a rei a, nun kan lo thlahdah ve tial tial a, tihian nei si lo nghei si lo antih ang hian kan awm chu a ni mai a, Tapuia lah hi a nun hi a ho ve si a, ka hma hun hi ka ngaihtuah thui duh lo” a tih chuan ka lo khawngaih tawp.

 

“A fel ve viau a ni lawm ni?” tiin Tapuia chungchang chu ka zawt a, a ngaihsam tih mai loh hi chu a fel viaua ka hriat vang a ni.

 

“A sual chu ka ti hran lo a, mahse, a puitling hlawl lo. Valtea tikhawpa a danglam thei anih chuan tiin a danglamte hi ka beisei ve thin a nia, mahse, tunah pawh nau ka pai tih a hria a, zu a la nghei duh chuang lo a” a tih chuan ka khawngaih ngei mai.

 

“I chhungte I hriattir vat an ngai dawn nih chu, heti ringawt chu engemaw pawh in tawng thei a” ka han ti a.

 

“Ka pa in a hriat chuan min rawn hruai haw duh mai ang. An fanu an chhuan ve em em kha hetiang hian ka awm chu a ni sia” a ti a.

 

Valtea ka nei ka vanneih bikzia ka lo ngaihtuah daih, a thianten zu in vek mah se a in ngai lo. Vawi khat mah la in lo tihna a nih chu, a thutiamah a ding nghet a, a din ngheh zel pawh ka ring.

 

Ka zan mu thei lo zing lamah ka lo mu tui a, ka harh meuh chuan Valtea’n engkim a lo ti zo vek tawh. Vawiin chu an chawlh ve ni a ni a, nizan lama a sawi lawk tawh avangin ka lo inthalhdah ve hrim hrim bawk. Ka intihfai zawh chuan breakfast chu kan ei nghal a, ka awm a nuam lo deuh chu ka hrethiam chiah lo. Nidangah artui ka duh theih tehlul nen ka luak a tichhuak tlat a, ka pum chu a nuam lo deuh tlatin ka hria.

 

“I nuamsam vak lo a nih ka ring reng a” min ngaihtuah hmel zet hian Valtea chuan a ti a.

 

“Ka nawm loh em em pawh ka hre lo, mahse ka pum hi a no deuh tlat mai” ka tive mai a. Artui ka va melh leh kher chu ka inring hman lo, ka uak ta vak vak a, bathroom ah ka tlan lut nghal a. Ka chau hnawk theiin ka hria, bathroom kawngkhar nghengin Valtea a lo ding a, a hmel chu a mangan hmel tawp.

 

“Hospitalah kal ang” a lo ti nghal a.

 

A dinna bula calendar ka va melh chuan ka harh chhuak deuh, thla hmasa khan ka period miah lo tih ka hrechhuak.

 

“Valte, pregnancy test kid va lei lawk la” ka ti a, ka lo rai leh si lo ang tih erawh ka hlau viau. Vawihnih chu ka in test thlawn tawh a, a rukin. Tun tum erawh chu engpawh lo nise a hriat pawi ka ti tawh lo.

 

Minute 10 vel a thang hnuah a rawn let leh a, hmanhmawh zet hian min in test tir a, ka thin chu a phu deuh dap dap. Maimitchhing titih hian ka han en a, pahnih a lo inrin kalh mai, ka au nghal chul a, bathroom kawngkhar chu ka pawt hawng pawp a, Valtea’n min lo pawm nghal. Vawikhatmah naupai chungchang hi ka tana ngaihthlak hrehawm turin  a sawi ngai lo. Fa neih a chak thu vawikhat a sawi ve zeuh bak kha chu a sawi nawn tawh lo bawk a, chutichung chuan fa neihsak ka chak em em thin. Tunah chuan Pathianin ka tawngtaina min chhansak ve ta.

 

Ka sumdawn ve na zawng zawng min tihtawp tir vek a, inah ka awm deuh ngawt ngawt a ni ber. Nikhat chu ka rin loh deuhin mikhual kan nei thut a, ka hamhaih em em lehnghal. Doorbell a rawn ri a, ka va hawn chuan Mathana chu bag khai chungin a lo ding reng a, min hmuh chuan a thaw huai a, lut tura sawm nachang pawh ka hre lo.

 

“Ka lo lut thei angem?” a tih chuan ka harh chhuak zawk, ka ding sawn a, inchhungah a rawn lut a.

 

“Enge I lo tih dawn?” tiin ka zawt nghal a.

 

“Thla hnih lai training in ka rawn awm tawh a, vawiinah kan zo chiah a, rawn tlawh loh tawp cheu chu ka hreh ve deuh sia” a ti a.

 

Ka pasal u a ni miau a, lo hnar ngawt thu a awm bik si lo a, Valtea erawh whatsApp ah ka va hrilh nghal.

 

*naktuka a haw tawh dawn chuan a pawi hran loh chu, min duh lo hmasatu an nia, min rawn tlawh pawp leh hmasa a nih chuan engmah sawi a ngai lo* a rawn ti.

 

Thutthlengah a muhil a, a chau tawngkhawng ve te pawh a niang. Valtea rawn haw lai pawh chuan a la muhil a, ka kaitho duh hran lo.

 

“Engtin nge a tih a?” tiin min han zawt ringawt a.

 

“Thla hnih ka awm tawh a, naktuk ka haw hmain ka rawn tlawh ve cheu a tia” ka han tih chuan a nui suk a.

 

“A va ho ve” a ti leh ringawt tawh, sawi tur a hriat loh apiangin a ti ve ziah.

 

Kan eirawng bawl thawmah Mathana a rawn harh a, sawi tur a vang bawk si, min rawn tlawh kher chu ka ngei angreng zawk.

 

“Ka nu te hi rawn bi aula, tlawm zawkah te rawn tang ula” chaw kan ei lai chuan a ti a.

 

“Engvangin nge tlawm zawkah kan tan anga?” Valtea’n a lo ti hmak.

 

“An thinrim lai chuan thutlukna te pawh an siam ve rum rum anga, an rilru na tihdam kha in tih tur alawm” a ti leh a.

 

“A tuartu zawk kan nih hi, a hrehawm zual leh harsa lai chu kan paltlang ve tawh. Kan hlim a, kan la hlim ve zel bawk a, midang kan mamawh hran lo”

 

“Ramthanpui..”

 

“Kan nupa nunah hian tumah inrawlh ka phal lo, a tidiklo tu hmasa zawk an rawn tlawm a nih loh chuan tu khawngaihna mah dil ka tum lo” tih pahin a thleng a la a, a tho chhuak ta daih.

 

“Mawipui, in chungah kan tidik lo tih ka hria, mahse, nu leh pa malsawmna tello chuan rei in tluang dawn lo a nia” a ti a.

 

“Mathan, engmah sawi tur ka hre lo. Valtea rilru hi a na em a, chuti maia awlsam chuan a tlawm thei lo ang” ka ti a.

 

“Ka pawisa rawn thawn cheu kha in lo hmu thin maw?” a tih chuan ka chaw ei lai a tawp hmak. Tu rawn thawn nge tih kan hriat loh kha Mathana min rawn thawn a lo nih chu. Ka han hawi chhuak a, Valtea a lo awm hnai tawh lo.

 

“Ka rawn transfer leh vek ang che” ka ti sap a.

 

“A ngai lo, I duh lo anih pawhin ka nau ka puih ve na angah lo ngaih sak la, a hriat chuan a duh dawn lo tih ka hria a.” a han ti a, sawi tur pawh ka hre tawh lo.

 

Valtea lungawi thei lo chu a mu deuh bul a, ka thawmhnawm suk ro tawh ka thlep tha a, ka va melh zauh zauh a, sitting roomah Mathana a mu a, tlaia a mut hriat loh khawpin a muhil leh nghal thei.

 

Ka mut hman meuh chuan Valtea chu a lo muhil ve tawh, keipawh ka chhungte hnena ngaihdam dil hmasa tur anga ka indah chuan harsa ka ti lutuk tlat. Valtea dinhmun pawh ka hrethiam, an rorel dik loh vanga inthiam lo zawk tura kan ngaihten ngaihdam dil zawk tura min ngai chu kan hrethiam thei lo a ni e.

 

Ka zun chhuakin min tiharh a, thawm dim thei ang berin ka tho a, ka va zung a. Kan rooma luh leh mai ka tum lai chuan Mathana’n min lo ko a, a muhil a lo harh leh tawh aniang.

 

“I muhil nange?” ka ti a.

 

“Thil pakhat ka sawi lawk thei angem?” a tih chuan ka inngaihtuah rauh rauh.

 

“Sawi la” thu chuang loin ka ti a.

 

A mu chu a han tho a, thutthleng chu a ngheng a, min rawn en a.

 

“Min ngaidam turin ka duh che a”

 

“Aw, chutiang sawi a ngai tawh hleinem” ka lo ti nghal.

 

“Ka nau nen hlim taka awm turin ka duh cheu a, duhsakna pawh ka hlan cheu. Khawngaih takin ka pawisa rawn thawn kha hmang hram ang che” a tih lai chuan Valtea a rawn lang thut a.

 

“Eng pawisa nge?” min melh run chungin a ti hmuk a.

 

“A.. Hmana pawisa rawn lut ve ringawt ka tih kha..” ka tih chuan a mitmeng a rum nghal ul.

 

“Thawntu zawng chhuak la thawn let rawh ka tih che kha” a tawngkam chu a nem fahran lo viau.

 

“Rilru chhe tak pu chunga ka rawn thawn cheu a ni lo. Ka nau I nia, in retheih ka phal bik reng reng lo” Mathana’n a lo ti a.

 

“In ka chhuahsan rual khan ka tan chuan in thi vek tawh. Ka hmangaih ber ka neih vanga min tuithlartute sum hi cheng khat pawh ka mamawh lo ve” tih pahin room ah a lut ta nghal a, ka umzui nghal.

 

“Thawn let tur leh chhui zui tura ka tih che kha I hre lo mi?”

 

Chhan let ngaihna pawh ka hre lo. Dik taka sawi chuan ka sumdawnnaah ka lo buai ve bawk nen ka rilruah a awm lo hrim hrim a, khawih erawh cheng khat pawh ka la khawih lo.

 

Valtea, mi zaidam tawpkhawkin tawngkam vin a hman ve meuh chuan engmah sawi ngam lo in ka lo awm tawp.

 

“Ka sum lakluh a tam lo tih ka hria, retheia I awm erawh ka thil hlauh ber a ni. Mahse, nawm loh I hlauhzia kha khan a tilang chiang khawp mai. I tan chuan hna hrehawm ber thawh pawh ka inhuam laiin khawi atanga sum rawn lut nge tih hriat loh hman pawi I ti lo a, I hriat hnuah pawh min hrilh I tum miah lo bawk a” a tih chuan ka va melh a, a rilru a nat hmel tak zet.

 

‘Valte.. nichin lawk khan ka hre ve chiah..”

 

A kut a rawn vai kang a.

 

“A rawn lut ziah tih min hrilh chuang hleinem. Engati nge ka hriat I hlauh? Ka u hnena kut dawh ang maia awm kha I zak lo mi?” khum bul bang chu a han beng pawp a, ka lo phu zawk.

 

Hun rei tak hnuah kan nupa kan han inhau ve ta chu a nia, mi ramah lehnghal a hrehawm ngawih ngawih a ni tawp. Valtea muhil chu ka en reng a, a rilru awmdan tur chu ka hriatthiampui tak zet. A sawi ang khan pawisa rawn thawntu hre chhuak tur leh dang turin min ti a nih kha, mahse, ka lo ngaihsam luatah inhriatthiam lohna a thlen phah ta.

 

Mathana kal chhuah lai ka hre lo a, ka harh meuh chuan Valtea pawh a lo awm tawh lo. Bathroom ah a awm ah ka ngai mai a, mahse, thawm a reh tak vang vang avangin ka va tho chhuak a, a lo awm lo. Zan lam ka mut tlem vang a ni maithei, ka luak a chhuak ut ut reng a, ka pum a nuam lo riai riai reng bawk. Nilengin Valtea a reh a, nidangah chuan ka thawh hmaa a chhuah pawhin min rawn call leh thlap thin a, vawiin erawh chu a reh hmak. A lung a awi loh em avangin ka call ngam miah bawk si lo, hetianga a awm hi ka hmachhawn vawikhatna a ni a, awmdan thiam a har a ni tawp mai.

 

Ei rawng ka bawl peih tawk tawk a, ka bawl zo chu ka mu leh deuh tawp. Ka taksa a rit vek a, ka awm a nuam lo hle bawk. Sana chu ka han melh zawk a, dar 10 a ri lek lek tawh a, Valtea a rawn la haw lo fo. A ni thei em em tawh loa hriain ka call ta ringawt a, a pickup thei lo. A hnu fe ah whatsApp ah message min rawn thawn a.

 

*office ah ka riak dawn, min lo nghak suh*

 

Ka mittui a rawn baw nghal zawih a, ka rilru a na em em bawk. Hetiang tur tih hria ila Mathana rawn thleng tur pawh ka lo hnar hmak tur a ni a, ka neihchhun a ni asin. Zankhuain chhin khat mah ka chhing lo, ka thiam loh tih hre tho mah ila min hriatthiamna a neih ka la ring fan asin maw le.

 

Hma takah ka tho a, Feli te in lam panin ka chhuak a, ina tawm ringawt chu ak thei tawh lo. An mu lai chu ka va kaitho ta ringawt a, chutiang huna ka va kal chu dik lo a awm tih a lo hre mai a, zingkarah Feli bulah ka va tap ta hlap hlap a. Ka nau pai bawk nen ka rilru hi a no zual vekin ka hria.

 

“Mawipui, a rilru chu ka hrethiam lutuk. Mahse, chutiang ringawtin a awm tur a ni hleinem, a thinrimna chu awm viau mah se nupui rai lai a nei tih a hre reng a, a riahsan tur che a ni lo hrim hrim” a tih chuan ka tah a tichhuak zual.

 

Chaw ka ei nghal a, chhunah pawh haw ta lo chuan ka awm tlang ta zel a, mahnia kan inluaha va awm kha ka chak hlawl lo a ni. Tapuia a hnaah a kal a, Feli nen chuan rilru tih thawl nan naute thawmhnaw vel online shopping ami ho kan en a, kan hlim dun ta phian.

 

“Kan pa rawn haw hunah kan va thlah dawn che nia” a tih avangin mahnia haw chu ka tum lo law law.

 

Eng engemaw sawia kan titi bawrh bwrh lai chuan kawngka a rawn ri rap a, Valtea a rawn lut a, ka lo en reng ringawt. A hnungah Rspi a rawn kal ve, ka melh tlawk tlawk tawp. Tlai dar 6 vel a ni tawh a, tun ang huna rawn inzui chu mak tih loh theih a ni lo.

 

“Thiannu, chaw ka rawn ei dawn” Rspi chuan Feli bulah a ti a, Valtea ka lo melh ngawt ngawt.

 

“Enge in rawn inzui luh ve tlat a?” Feli chuan min vengthawng tak hian a ti a.

 

“Khuanu samsuihte chu..”Rspi’n a lo ti zauh.

 

Ka bag ka la a, hmanhmawh zet hian ka tlan chhuak a, a ni em em tawh lo. Ka thiam lo tih ka hria, mahse, hetiang zawng hi chuan min ti duh suh se. Mahni kea ding ngam khawpin huaisenna te, tumruhna te ka la nei ve tih hi a hre lo a nih chuan min cho sual ang.

 

Ka kal hlawk hlawk a, Feli min koh pawh chu ka hre lo der tawp, ka pen deuh hlawk hlawk a ni ber. In ka lut chiah a, ka thawmhnaw ka khawm bawrh bawrh a. Ka mittui tla chu duh lo zet hian ka han tuai sawk a. Suitcase ah ka thawmhnaw ka khung luh fel rualin kan room kawngka a rawn inhawng a, Valtea a rawn lut. Ka thil ken chu a en vung vung a, a thaw hak a.

 

“I hmuh ang kha engmah a ni lo a nia” a ti zawi sup a.

 

“Valte, mi ka rin tawh loh hi chu ka ring nawn ngai mai mai lo tih hre tur khawp chu I ni vein ka hria. I chunga ka tih dik tawk loh chu ka hria, mahse, hetiang zawng hian min thungrul a, ka duh lo” ka tawngkam chu a vin leh pek hle. Engtin mah dam dap hian ka thinrim laiin tumah ka dawr ve thiam lo.

Note: Ka hman tawh thlawt lo, la tawp lo deuh mai rawh se😂