VALTEA 7

 

Seven

 

Kan in bulah chuan kan indinchilh ran a, hetianga mahni bialpa naute buaipui hian ka buai ang tih ka ring pha ngai lo.

 

“Tinge zu ringawt hi I buaipui a?” tiin ka han hau hlak hlak a. Ka chhungten kan thawm an hria ang tih ka hlau bawk si.

 

“Zu ringawt ka buaipui lo” a ti deuh hmuk.

 

“Vawiin ni te chu I u pasal neih ni a nia, insum ve hram hram tur che a nia” ka han ti a.

 

“Min kalsan daih a nih kha” tih pahin min melh run a, ka lo hawisawn tawp.

 

“A thuhrimah….” Ka sawi zo hman lo, min rawn fawp a, ka lo nam kiang rang lutuk. “I u bialnu ka nih hi, tinge khatia min tih?” ka mittui a rawn tla tawp.

 

“Tihpalh.. ka tihpalh lutuk. Ka tum lawk a ni miah lo a nia” tiin intiam lo zet hian min rawn hnaih a.

 

“I awmdan hi ka duh miah lo a nia aw. Va haw tawh rawh, ka lut tawh dawn” tiin ka inher a.

 

“Ngurpui, ka rilru puthmang hi ka duh bik miah lo asin. Ka thunun theih piah lam a ni miau a, tihsual ka nei em ni? Mahse, i rilru chu ka hrechiang a, I lak atang chuan ka lo inthiarfihlim tawh dawn nia” tiin a motor ah a lut a, ka en duh bik lo. Inchhungah ka lut a, ka thin a rim deuh ngawih ngawih a ni ber.

 

Chumi zan atang chuan Valtea nen kan inbe tawh ngai lo, ka laka a chetdan kha ka rilru a dam vak bawk lo nen chutia a reh chu pawi tihna ka nei lo. Nikhat chu office chawlh a ni bawk a, mamawh lei tur ka lo ngah ve tawh bawk nen Mathana nen kan chhuak dun a, hetiang hunte hi kan nei khat tawh angreng. Kan inlei fel hnuah ineipuar tumin restaurant ah kan lut a, mi an lo tam viau lehnghal. Ei tur nghaka kan titi mawlh lai chuan hmeichhe pahnih hi kan thutna lamah an rawn kal a, min rawn din chilh nghal ran a.

 

“Kan lo thu ve thei angem?” cher sang zawk chuan a ti a, thutna awl a lo awm tawh lo bawk nen lo hnial chu a tih chi chiah lo, ka bag ka la sawn a, kan chhan hma hmain an rawn thu thla nghal.

 

“Mathan, min hre tawh lo mi a?” a te zawk leh hmai bial deuh hlek chuan a han ti leh a, “Goldie kha ka nia, Remruati thiannu’ a ti leh nghal zat a. Ka thin a rawn sa nghal hat.

 

“Aw, ka hria che alawm” Mathana chuan cool deuh ruih hian a ti a.

 

“Hmanni I zin thlak chungchang vel chu nizanah group ah a rawn sawi a, in va hmang nuam awm ve” Goldie chuan a ti a, ka lo melh kual tawp.

 

“Engmah sawi tur a awm ka hre hleinem. A thian hlui ka nihna angin a request ka tihhlawhtlinsak a, chu zawng chu a ni mai” a ti a. “Tin, hei hi ka bialnu, ka nupui ni mai tur Mawipuii a nih hi” tiin ka kutah a rawn chelh a.

 

“Wow.. a va hriat loh theih thin ve! Ka lawmpui che” tih pahin de sawr hian min melh a, ka lo nui lui ringawt.

 

“Naute pa niih chungchang vel kha a hre vek tawh em?” sang zawk khan a ti a, ka lo hawi a nasa mai.

 

Kan thil ei chu ka lem hlei thei lo, khamite pahnih khan ka mood an rawn tichhe vek. Naute chungchang te kha an ti nuai a, ka hrethiam hlawm tehhrep lo e.

 

“Enge naute tih vel kha?” tiin kan haw kawngah ka zawt a.

 

“Nakinah ka hrilhfiah ang che” a ti a, kan inkawp hnua a hmel confi loh ber tum a nih ka ring.

 

Kan inah kan inzui lut a, ka chhungte an lo reh thap. Sitting room ah kan thu thla nghal a, Mathana hmel zum deuh dui chuan ka thin hi a tirim hlur bawk si, boruak tha lo inmung a ang.

 

“Remruati chungchang tunhnaia sawi chhuah a ngai ta fo hi a hrehawm khawp mai. A hmasain min ngaidam la, sulhnu pawr tak ka lo neih khan min la umzui zel a nih hi” a ti a.

 

“Ka hre vek duh, hetia an rawn tihbuai reng che hian chhan a neih ka ring” ka ti a, mangan hmel zet hian min en a.

 

“Min then phah angem?”

 

“Engmah ka tiam thei lo che”

 

A thaw hak a.

 

“Ni e, engpawh lo thleng dawn se, ka hrilh vek ang che. Remruati nen hian Shillonga school kal tlanga, college thlenga inzui chho kan nia, tleirawl chhuah phat atanga inngaizawng kan ni tihna a nih chu, ka atchilh ve viau thin. Engtin pawhin awmse ka enliam thei vek a, vawi tam tak min rinawm lohsan hnuah pawh ka lo pawm leh zel, chutiang khawpa ka duh chu a ni ve thin. Shillong hi anmahni khua ve hrim hrim ania, a pa hnathawhna avanga awm a, inbengbel hlen ta an nia. A chhungte pawh hian min ringtawk a, keipawh ka theih ang tawk chuan rin ngamin ka awm ve chuan ka hria. Mahse, tun thlenga ka inchhirna tur thil tih ka nei erawh kha chu ka damchhungin ka inchhir tawh ang. Krismas hmang tura ka haw dawn zanin tihpalh thilthu tak meuh meuhin kan chesual a, rilru nuam lo reng rengin Krismas leh kumthar pawh ka hman phah a.

 

Ka tum dan takah chuan college naupang mai mah ni ila sex ka hman pui kha chu ka nei ngei ngei ang tih rilru ka pu bawk. Tichuan kum tharah class tan leh hmain ka chhuk thla a, engkim sawipui ka duh vang  a ni a, mahse, ka rin phak ngai loh thilin min lo hmuak ta zawk a. Remruati chuan midang sex a hmanpui thu leh engah tanmah min tih tawh loh thu min lo hrilh ta a, ka khawvel kha a chhe vek hian ka hria. Thla hnih vel zet chu class pawh kal mumal loin ka awm phah nghe nghe a. Zankhat chu kan hostelah min rawn hmu hlawl a, a rai thu min rawn hrilh a, ka lo nui tawp. Chumi zan atang chuan min rawn tibuai tan leh ta a, ka rilru siamfel tak tak hma a lo ni bawk nen, amah ka lo duh hneh ve em bawk si avangin engtin tin emaw chuan kan inbe tha leh chu a ni mai a, naute tihtlak a sawi pawhin ka phal ngai lo. Ka fa a ni emaw ni lo emaw pa dinhmun ka pe ang tiin thutlukna ka siam ta a, chuvangin ani pawhin a pai tlang ta a ni.

 

Chutiang chuan ka mawhphurhnaah ngaiin a naupai lai nen chuan ka pawm thlap a, mahse, exam zo ka haw laiin min then a duh thu a rawn sawi leh a, midang a kawp thu a rawn sawi ta a ni. Keipawhin chutah zet chuan thlah hmak tumin min biak theihna zawng zawng pawh ka titawp ta vek a, a hmaa ka rilru natna kha thinrimnain a thlak a, let leh tumna ka nei ngai lo. Pathianah piantharna ka chang chho ta bawk a, ka nun buai chuar  tak lak atangin min chhanchhuak ta a a ni. Tichuan, nang I lo lang a, Remruati nen kan chanchin hliahkhuh vekin chanchin thar ziah dun tur kan nei ta a, kum 5 chhung zet chu keipawh hlim takin ka awm ve ta a nih hi” a ti a, a thusawi chhung zawng khan ka kut ka lo hum ruh a, ka na thum hian ka hria.

 

“Tichuan tun hnuah a rawn tibuai leh ta che a, eng hmangin nge a rawn tihbuai che hi ka hrethiam thei lo a ni” ka ti a.

 

“A fanu hmang hian min rawn bei let leh char char a, ‘I fanu a ni’ ti dawt si lo hian pa nihna ka lo pek tawh hmang khan min tibuai a ni ber ang chu”

 

‘I fanu pawh alo ni maithei asin. A ni lo tih engtin nge I chian theih?”

 

“Ka hre bik lo, ka hre bik lo reng a lawm. A chang chuan ka fanu nia hriatna hi ka nei ve thin. Mahse, kohhrana ka nihna te hi ka han inen a, ka nunhlui vanga mualpho mai thei ka ni tih ka inhriatna hian thu dik zawn chhuah harsa ka tih phah a ni” a tita a.

 

Ka inring hman lo, ka mittui a rawn baw zawih a.

 

“I na dawn tih ka hriat vang hian ka sawi ngam ngai lo a, min ngaidam rawh aw” a ti a.

 

“Tuna ka ngaihdam che hian enge siamthat theih a neih chuang?” ka mittui kar atang chuan ka va au tawn tawn a.

 

“Hmanni ka zin pawh kha a fanu damloh vang a nia, a pa hmingah ka hming a lo ni vek tawh si a, pa telloa zai kha a theih si loh a, chuvanga min rawn chah a ni. Thudik ka hrilh ngam loh vang chein min ngaidam dawn nia” a ti a.

 

“I fanuah I ngai anih ber tawh chu” ka lo ti hmak a.

 

“Mawipui”

 

“Sawn man pawh an rawn thing lo che u a, I fanu ah chuan a puh tak tak chuang lo anih chu. Chutianga tu nge a pa tih pawh sawi tur hre lo nen sulhnu in lo nei tih ka hriatna ringawt pawh hi ka chauh pui” ka lo ti hmuar hmuar a, ka thinrim mai mai ngai lo a, ka thinrim tak tak hi chuan min ngaihthlak tawp hi a duh thin.

 

“Nakina I la natna tur a nih hrerengin neih che ka tum a, mahse, I rilru damna ka ngaipawimawh ber. Hetiang ka ni chung hian min nei duh dawn em? I thutlukna chu engpawh nise, keichuan ka zawm ang” a ti a.

 

Ka hun hman dan a buai deuh nak a, ka thu hriat khan min tina ngut ngut bawk si. Kar khat chhung zet chu zan pawh ka mu mumal ngai lo. Mathana hi ka hmangaih tawk lo nge ka hre lo a, chung a nunhlui zawng zawng nena pawm hi harsa ka ti tlat.

 

Kan inkhawm bang chu Nunui te inah ka lut kawi a, Valtea a lo awm run. Min rawn melh zawk a, a hawisawn lehnghal daih.

 

“Enge I inkhawm loh ve ngawt a?” tiin Nunui chu ka han bia a.

 

“Hepa hi lawm, ka rawn leng dawn a ti tlat a” a tih chuan Valtea chu ka va melh a, min lo melh ve kur.

 

“I nuam loh lehpek emawni ka tia, chuvangin ka rawn kawi lawk maw le. Ka va phei tlang ange” tiin ka tho a.

 

“I mak thei e, I rawn len khat nen” Nunui chuan a ti bai bai.

 

Kan in thlen hma deuhin Valtea’n min rawn umphak a nih chu, ka haw dawn pawh khan a rawn chhuak ve miah si lo a. Ngawi rengin kan kal tlang a, kan inkawt kan thlen chuan min rawn pel vuk a.

 

‘Valte”

 

Ka inrin hmain ka ko.

 

A rawn hawi let a, sawi leh tur hre lo in ka lo nuih tawp a, “ A nih aw” tih pahin ka pen san ta a.

 

Khatia Nunui nen ka hmu tlang leh chiah kha a hmaa ka lo hriat tawh loh thikna ang hi a rawn awm tlat, chu ka rilru vang chuan ka inhaw em em bawk. Khami zana min rawn fawh ringawt te khan ka taksa a mur chhuak vek a, khatiang feelings kha ka neih ngai lohzia ka inhrechiang ve bawk. Tun thlengin ka ngaihtuah a, ka tum miah loh hian ka lo ngaihtuah veng veng zel tih thlengin.

 

*Ka u vang hian ka laka I rilru dik tak i lanchhuahtir thei lo a ni tiraw?*

 

A message chu ka en vang vang a, kan rilru kan inhriatsak tawn lutuk te hi ka thin a rim. Tinge Mathana nau kher a lo nih tihte ka ngaihtuah a, ka theihtawp chhuaha Mathana laka ka rilru pek ka tum pawh hian engmaw ti tak hian a thi deuh duk bawk si.

 

*Valte, kan rilru puthmang hi thlak ve ve ang, a rem thei dawn chuang lo*

 

Ka rilru ka thlak hmain ka thawn a, a chhiar vek a, a reh vang vang.

 

Ka phone chu ka han ban a, tun ang huna min rawn call tu hian zing mut ka thei lutuk tih hi a hre tawp lo a niange. Meng mang lo hian ka han pickup a.

 

“I room tukverh ah khan lo dak teh”

 

Valtea chuan zangkhai fe hian a lo ti a, ka rizai theh hlimin ka han thu chhuak a. Ka mit nuai chut chut pahin tukverh ka hawng a, kan kawtah Valtea chu exer la tih hriat fe hian a lo ding a, a ban a rawn vai a.

 

“Vawiin atang chuan Valtea thar hlir i hmu tawh ang, I rilru dik tak ka hre tawh a, engmah i sawi ve a ngai lo. Nakin hun kan ngaihtuah chuan kan buai mai mai, tun hun chauh hi ngaihtuah tawh ang” a rawn tita sap a.

 

Ka chhungte ka rilruah an lo lang hmasa ber a, chumi zawhah Mathana chhungte, khawtlang leh kohhran thlengin, ka thinlung hi ka zui a nih ngat chuan mualphona leh mi demna hlir ka hmachhawn dawn tih ka hria. Eng kawng hi nge ka thlan tak ang le?

Note: Nuam lo chung chungin ka rawn dah lut a, duhthu a sam lo viau maithei. Ka ngiahtuahna hi ka natna hian a ti tawi deuh tuk a, tunkar hi ka chawl tlang maithei. Ka dam dan azirin hma thei ang bera lo chhunzawm erawh ka tum tho ang.