VALTEA 8

 

Eight

 

Rilru mumal pawh ka pu thei lo, Valtea pawhin min nawr duh miah lo a, chutichung chuan min ngaihven reng thung. Mathana’n min rawn be ve reng bawk a, amahah ka bei nghet thei tawh lo tih erawh chu a hre ve reng.

 

“Mawipui, kumkhuain I rilru a dam tawh dawn chuang lo a, inthen I duh pawhin sawi hreh lo la” Mathana chuan a ti a. Kan inah a rawn chuang kai khat a, kar khat a reh hnua a rawn len leh hmasak ber a ni.

 

“Ni e, nangpawhin nuam I ti tak tak lo ang. I fanu niin I ngai tlat bawk si a, a nu chu nei mai rawh” ka ti a, a kun deuh lap.

 

“A pawi ngawt mai, ka nun ka lo uluk loh rah tuna ka tel tur hi chu. A nu erawh chu ka nei lo ang, ka ring thei tawh lo” a ti sap a.

 

“A nunte pawh a sim tawh maithei asin” ka tih chuan a lu a lo thing a.

 

“Ka fanu a ni chiang em tih erawh chu test ka duh a, Remruati hian a phal loh danah ka fanu a ni lo mai awm e tih chang chu ka ngah mai. Mahse, kan vawikhat inhmuhna atang khan pafa ang mai hian kan inzawm tlat a, thisen zawmpui chu a dan a dang ngeiin ka ring bawk a. Khutia fahrah a ni mai tur ka  ngaihtuah hi chuan ka hlimna dah that a ngai tih ka hre leh thin” a ti a, a thaw deuh hak a.

 

Rilru nghet takin awm la, tun atang chuan ka mitmet ven I ngai tawh lo ania” ka ti a, min en reng a.

 

“Mahse, kum hei leh chen hi kan inzui ve tawh a, ka hmangaih em em bawk si che a, ‘move on’ tawp chu ka thei dawn lo a nia. Ka lo biak chang che pawhin min lo chhang ve thin tho la aw” a ti a, ka lo bu nghat a.

 

Ka ngaihtuah thin a, mihring perfect lutuk nia ka lo hriat pawh hetiang a nih chuan mi rin ngam hi a har duh awm mange. Tin, keimah indemna lian tak ka nei bawk. Nidang ang chu nise kan boruak tawn mek vang hian ka a deuh thaw in ka ring. Mathana hi ka pasal tur ang maia ka lo ngaih tawh kha a ni tlat a, Valtea vanga na lutuk lo ka ni tih ka inhre kur bawk nen, mahni inthiam lohna in ka khat.

 

Ka office bang chu kawtah Valtea a lo awm reng a, min hmuh chuan a nui suk a.

 

“Enge I rawn tih dawn?” tin ka han bia a.

 

“Ka lo hruai dawn che” a ti zawi sup.

 

“Awi, a tul lo thei e” tih pahin ka han hawi kual a.

 

“Hawh le” tih pahin car ah min nawr lut a, kan tlan chhuak chu a ni nghal mai.

 

“Valte, keichu ka inthiam thei thlawt lo” tiin ka han thaw hak a.

 

“Ka Ngurpuii hian engmah tihsual a nei lo” tih pahin ka kut a rawn vuan a, a nui suk a.

 

“Mathana nau I lo ni kher hi a pawi emai” ka ti leh hram a.

 

“Ka u nen in inkar inchingfel tawh em? “ a tih chuan ka lo bu nghat a.

 

“A that chu, ka kutah dah tawp la, a tha vek mai ang” a ti ta a.

 

Chumi ni atang chuan Valtea nen chuan kan inngaizawng tan a ni deuh der. Ka chhungten an hriat hunah chuan engtin tak ngai ang maw? Ni lo, Valtea chhungte, kan veng chhung hrim hrim hian min sawi nasa dawn tih ka hria. Chung zawng zawng paltlang tur chuan ka chak tawk ka ring si lo.

 

Ka roomah awm in ka lehkhabu thar ‘Ka hmaah dawhkan I buatsaih thin’ tih Rev. Vanlalbela lehkhabu chu ka chhiar a, Pu Bela ka ngaihsan hi a reh thei lo. Ka phone rawn ri ral ral pawh chu ngaihtuah duh loin ka thil chhiar lai ringawt ah ka rilru ka pe a. Ka darthlalang zawn chu a rawn ri kerh a, ka phu chiang em em lehnghal. Ka inher a, tukverh chu ka han hawng a, a zawnah chuan Valtea a lo ding  reng.

 

“I phone en rawh” a rawn ti sar sar a, ka phone chu ka ban vat a.

 

*I bialpa angin ka rawn leng dawn, sitting room ah lo awm rawh*

 

Ka chhiar nui vur vur a, ka lehkhabu chu ka han dah fel a, inhnuai lamah chuan ka chhuk ta a. Ka thu fel chiah tihah Valtea chu a rawn lut a. Ka nuin a lo be leh nghal luam.

 

“Tunlai hi Mathana a reh riau mai, a zin chu a ni lo maw?” tiin a lo zawt ta chat a, ka lo ip zawih.

 

“Zin lo e, an office lamah an buai deuh a, inah pawh a awm tlem khawp mai”tiin a lo chhang ve mai a.

 

Ka bulah a rawn insawn thla a, ka lai kual vel vek. A chang leh nep ka intia, Valtea tak pawh hian min dem deuh te ka ring rum rum. Mahse, thil mak tak awm erawh chu hei hi a ni, ka hlim ru veng veng tih hi.

 

“I chhungte bulah hian a thup reng theih dawn lo a nia” a han ti ngawt a.

 

“Valte, inngaizawng leh lo mai ang, nang angin ka huaisen thlawt lo a ni” ka ti a.

 

“Engmah ngaihtuah duh suh ka tih kha, mi chuan min sawi ngei ang, mahse, an sawi rei peih dawn chuang lo” tiin min han hnem ve a, hlim viau mah ila ka hlimna hi a kim thei lo chu a ni ber e.

 

A nun inthlak chho chu ka hmuh hmaih hauh lo, zu a in ngai tawhlo a, a zirna chhunzawm ngei a tum bawk. Ka fak hreh lo a, ani pawhin dawnsawn dan tawk a thiam bawk. Mathana nen kan inzui laia ka hriat ngai miah loh hi Valtea hnen atangin ka dawng fo a, chu chuan amahah min hnuk lut thuk tial tial bawk.

 

Ka nutei te inentirin an rawn zin a, rin loh deuhin damdawiin an lut lehnghal, Pa Thara hi a hrisel lo ve bawk em a, hmunpui lam hi an rawn pan fo tawh thin. Tun tumah hian in checkup satliah turah an rawn inngai ringawt a, an lo admit leh si a, kan buai ve thei laih laih viau. Damdawiina riak turin ka insiam a, ka chhungte chawei hmain ka ei fel a, Valtea’n min thlah dawn vangin pawnah ka lo nghak a, ka chhungte min hmuh lohna turah ka lo ding a, rei nghah a ngai lo. Kan inbiak khan lungawi lohna a neih awm ka hre si lo a, biak huphurhawm deuhin a ngawi run.

 

“I mood a fuh vak nange?” tiin ka han fiam a, min rawn melh zawk a, a hawisawn leh daih.

 

“Min thlah hman loh te chuan sawi mai tur a nia, taxi in ka kal mai dawn a” ka ti ve ngat a, min tum khum deuh bur chu ka ngaithei vak lo.

 

“Engtia rei nge kan chhungte bulah kan thup a ngaih dawn?” a rawn ti ta nge nge. 

 

A lungawi loh chhan ka hriat chuan ka khi sak a, a awm lo lem lo e.

 

“Reilote nghak leh lawk ila, chu lo chu Mathana pawh a zawhawm ve alawm” ka ti a.

 

“Ngurpui, a harsat pawhin min vuan tlat rawh aw” a rawn ti thuk ruih a, ka thinlung hi a fan nghal vek.

 

“Ummm.. nangpawh aw” ka tih chuan ka kut a rawn vuan a, a hmer vang vang a.

 

Ka nutei te nupa chuan ka chaw kensak an ei mawlh mawlh a, Pa Thara cher deuh kuam chu hmuh a nuam lo. Engtiklai pawha mum nalh reng a nih thin vang a ni a, a hriselna  a that loh zual atang hian a tla nasa tawh hle.

 

“Bawihte, tumaw I thianpa hi a hming?” ka nutei chuan a ti a.

 

“Ramthanpuia a nih hi” ka tih chuan, “Rama maw I nih?” tiin a zawt nghal a, ka lo nui ri huk.

 

“Valte tiin min ko ber a” tiin a lo chhang a.

 

“Ramthanpui tiin ko ru” ka lo ti vat a, min rawn nghawk deuh sawk.

 

“Hming pangngai nei reng si in han hmang lo hi chu ka haw ngawt mai” tiin ka fiam a, a nui put put ringawt.

 

Hospital chung zawlah kan thu a, khua a thim tan tawh a, sawi tur hre lo in kan inkuah deuh chawt a. Chhungte veng thawng reng renga awm ai chuan a nuam hrim hrim.

 

“I nutei te ngaih a tha lo anga, kan chhuk mai dawn mi?” a ti a.

 

“A pawi chuang hleinem” tiin a tho nalh a, min pawt thu leh nghal zat.

 

“Chuti maia I kal ka phal I ring reuh emawni le” tih pahin a rawn inher a, ka khabeah dawmin min rawn fawp a, ka feel dan hmasa ber ang chiah khan ka awm leh tawh. Ka lo chhang let ve mawlh mawlh a, ka thinlung chhung hi a nghawr der derin ka hria. 

 

Ka hawi chhuak ngam lo chu amah en thei turin min ti lui a, ka biang sen vek chu ka duh lo ngei mai. 

 

“Ka bulah zah a ngai lo aw, I biang sen tek hi  I inhmeh lutuk”tih pahin min chhaih lehnghal.

 

“I sual lutuk”tiin ka han chum a, ka banah a lo chelh vut a, “I duh leh a ni maw?” tih pahin min rawn fawh a tum leh a, ka tlan chhe nghal daih. 

 

“In va hmuhnawm ve” tiin ka nutei chuan min lo fiam hlut lehnghal. Heng hi a nih ka ring, mahni rualpui ngaihzawn nawmna chu te ka tita mai mai.

 

Valtea haw hnuah ka nutei’n chiang takin min zawh chhunzawm a, Mathana kha a lo hrechiang ve si a, a nau tih pawh ka sawi ri ngam lo.

 

Ka nutei te nupa mu tui zet chu ka thlir vang vang a, tunah zan dar 2 a ri tawh a, Valtea nen whatsApp ah kan la inbe tlak tlak. Mathana nen kha chuan kan inah kan inkawm tam bawk a, phone hian kan in umzui tam lo khawp mai. Thil tihtur pawimawh a awm chuan call in kan inbe mai a, text hian kan inbe tam lo khawp mai.

 

Mit thial urhin ka tho a, zan lamah phone ka khawih rei bawk nen ka bui luk ten ka inhria. Ka nutei ka haw tir a, office chawlh a nih avangin chawhma lam chu Pa Thara awmpui ka tum. Investigation hrang hrang kan ti leh a, a chau veleh hnawk mai. Dam lo enkawl hi ka thiam lutuk lo na in kan chhungte hian ka awmpui hi an chak vek lawi a, a mak ve ngawt mai.

 

*Mawipui, vawiin ah test result a chhuak a, Remruati  fanu chu ka fa a lo ni lo e*

 

Mathana message chu ka chhiar a, ka lung phu a rawn rang nghal dawt dawt.

Note:  ka la dam chiang lo a, reh rei lutuk dalah ka lo dah belh lawk e