VALTEA 9

 Nine

“U Valtea nen hian in inngaizawng a ni lo maw?” chaw kan ei laiin Tebawihi’n a ti ta chiah, ka signal a man si lo a, a va hahthlak thei tak.

 

“Tunge unau naua ngaizawng ngai, thusawi awm leh awm lo deuhte hi hre ve la” ka nuin a lo ti a, thawven huai awm tak a nia, ka thaw a ipik telh telh.

 

Mi zawng zawng thlir dan tur a ni miau a, engang hmuhin nge min hmuh ang tih hi ngaihtuah pawh ka ngaihtuah ngam lo zawk. Ka insiam mawlh mawlh laiin Tebawihi chu ka room ah a rawn lut a, ka khumah a rawn bawk thlawp a.

 

“Zep I nei chiang mai, ka hre chhuak tho ang” min chhuahchhal lek lek hian a ti a.

 

“Enge khatiangte ka nu te bula I rawn sawi chhuah kher a?” ka lo ti hluk a.

 

“Aw, u Mathana a lo leng tawh ngai si lo a, U Valtea zawk nen hian ka hmu ngun em cheu alawm” a ti.

 

“Min hmu ngun kher lo ange” ka han ti ve bai bai a.

 

“Hmanzanah kan kawtah pawh…” sawi zawm duh lo hian min melh ralh a, min lo hmu reng a nih dawn hi.

 

“Hmeli” tih pahin a mawngah ka han beng a.

 

“Hmelchhenu, ka lakah hian inzep buai lo mai rawh” ti fuh inti fe hian a ti zui zat.

 

“Aw le, ni rawh se” tih pahin ka bag ka la a, chhuah ka tum a.

 

“U Mathana ai chuan a chhe lo fe zawk, hmanah khan lo thlan zawk daih tur  alawm” a rawn ti leh hram. Ka va hawi let a, ka lei ka chhuahkhum a, ka chhuak daih.

 

Nilengin ka awm a nuam lo, mi min sawi nazawng huat ka tum lo a, ka hlauhthawn ber zawk chu ka chhungte hi a ni. An hriat hma hian kan inkar ka titawp leh mai dawn em ni tih thlengin ka rilruah a awm. Chutiang tur em chuan Valtea hi ka lo duh lutuk tawh, tin, a rilru tihnatsak chu harsa ka ti dawn lutuk.

 

Zanah Mathana a rawn leng a, len min rawn dil thlap hnua ka phalna hmua lo kal a ni. A tan beisei tur ka awm tawh lo tih hrilh chian ka tum vang a ni a, keimahah beisei nei tawh lo se ka duh vang a ni. Valtea bulah chiang takin chu pawh chu ka sawi a.

 

“Zanin bak ka phal dawn miah lo a nia” a rawn ti ngei.

 

Thingpui ka lum a, ka nu nen nidang ang thoin an titi leh bawrh bawrh a, rei tak a reh hnua a rawn len leh vang hian ka nu hi a hlim tih ka hre reng. Kan veng nuho hian Mathana hi makpa atan an it tih kan hre tlang vek a, hetia kan inkawp nghet hnu hian beiseina an nei tawh lo mai pawh a, a hma chuan keini aia khawsak nuam fe fe hian an fanu te tan an hak ve hiam thin. Chutiang a nih avang chuan ka nu pawh a bang bik hauh lo a, makpa atan a duh tih a tir atangin a sawi tlang nghal hmiah. Ka puitling lo chung pawha min dawh theih em avangin keipawhin khawdang ka hawi lo hrim hrim a, ka pasal turah ka ruat nghet ve tawp thin a nih kha.

 

“I reh lutuk a, Mawipuii bulah ka lo zawt deuh reng a” ka nuin a tih chuan Mathana nen kan inmelh fuh chiah a, ka hawisawn nghal daih.

 

“Nia, ka buai ve thei lutuk a, ka zin chhuak ve deuh reng bawk nen” te a ti nawi ta vel mai mai a.

 

Ka nu in rei min thutpui lo, an room lamah min luhsan a. Ka pa a committee a, Tebawihi a roomah a awm tawh bawk.

 

“Zanin hian kan awm dan tur hi tichiang thei ila ka duh a, chuvanga rawn kal pawh chu ka nia” tiin bul a han tan a, hei leh chen hmangaih taka min dawmtu bula ka tawp tawh thu han sawi chu harsa ve tak a ni.

 

“Engmah sawi hreh nei lo la, min pawm thei tawh lo a nih pawhin puitling takin min hrilh la, hriatthiam ka tum ve em em ang” a tih chuan ka tah a ti chhuak.

 

“Mathan, min hrethiam dawn nia” ka ti sap a.

 

“Um.. I awmdanah hian ka hmu tho a, mahse, hmaichhana kan sawi tlan chuan I rilru pawh I thlak leh mai rinna ka nei bawk a, chuvanga rawn kal hram ka nia. Ka hrethiam lutuk che a nia” a ti a, a hmel erawh a ngui ve hnawp mai.

 

“Min hrethiam a, ka lawm lutuk”

 

“I thinlungah midang an awm tawh tih hrethiam tur khawpin ka hrechiang ve che alawm”

 

Sawi tur hre lo in ka thaw deuh hle hle.

 

Rei thu tawh loin a haw ve ta a, a kal liam tur chu ka thlir reng a, ka khawngaih lo thei bik lo.

 

Tebawihi room ah ka lut chho a, phone khawih pahin a lo mu deuh dar dar a. Zan dang ang chu nise min lo vin leh hrep ang, ka hmel a hmuh chuan a lo thu chhuak vat a.

 

“A u, u Mathana nen chuan in inthen chiang tak mi?” a ti hu a, ka lu ka bu nghat. “Awi, ka van khawngaih tak. U Valtea nen in ni tawh tih hre phei se chu.. awi, ka ngaihtuah ngam lo” a ti lehnghal. Mi mah rilru nawm loh  naklaiin, ka awm a tinuam lo zual.

 

Valtea’n min rawn call tluk tluk a, pickup loin dawhkanah ka dah tawp a, ka mutsan. Thil tam tak ka rilruah a awm, Valtea then chu ka tum miah lo a, mahse, a tawp thleng kalpui tura huaisenna nei turin keimah leh keimah ka inhneh a ngai tih ka hria.

 

Zing chaw pawh ei loin ka hnaah ka kal a, dar 11 velah ka ril a rawn tam vawng vawng. Canteen lamah ei tur dap tumin ka chhuak thla a, keimahin kil khatah chuan ka chow chu ka thai let ka thai let a, ka bula rawn ding chu ka mitsirin ka hmu reng a, mi ka biak chak loh avangin ka hawi chhuak duh lo.

 

“Khatia thai let ringawt chuan puar a har lutuk ang” tih riah rang zet hian ka hawi chhuak a, Valtea chu a lo nui sak.

“Enge I rawn tih?” ka ti hluai a.

 

“Ka pa thil ka buai pui lawk a, rawn hmuh pah che ka chak deuh a. In office lam ka hawi vung vung laiin ka rawn hmu che a, ka rawn lut phei ve lawk" a ti a.

 

“Lo thu rawh” tih pahin ka han tawlh rem a.

 

“Nizan atanga min be peih miah lotu hmu chakin kan buai nghal der chu a nia” a tih chuan za lo zet hian ka lo nui.

 

“Mathana kha a rawn haw tlang em?” ka ti a, min chhang mai loin min han en phawt a.

 

“Imm.. a rawn haw a, aroom ah a lut tlang daih a. Dik tak chuan hmuh nuam ka ti miah lo” tih pahin tui chu a thli a, a in a.

 

“Chuan?” ka lo ti zat.

 

“A tawp thleng min kalpui ngam ang tiraw?” a ti leh daih.

 

Ral leh lam chu ka thlir a, amah pawh en lo in ka bu nghat nghat a.

 

“Ngurpui, ka chhuanawm lo tih hi ka hai bik miah lo. Mahse, nangmah vang liau liau hian danglam hi ka duh ve tak zet a, ka tum bawk a. A lai laklawha min beidawnsan loh hram ka beisei” a ti a.

 

Amah hmu thei turin ka han inher a, a mitah tak chuan ka han melh a.

 

“Engkim huamin ka thlang zawk che a, rin tlak loa I awm chuan ka chan tur chu I hriat chian kha” ka han ti ve a.

 

Min nuih suk a, rem leh rem lo hian dawhkan hnuaiah ka kut a rawn hum a.

 

“Ka duh lutuk che” hmui phun titih hian a rawn tita sup a.

 

A ruk titih deuha ngaihzawng neih hahthlakzia leh hrehawmzia ka hrethiam ta hle. A hma zawngin tu mitmei mah ven ngai loin Mathana nen kan lo inkawp tawh a, tuna Valtea nena kan inkawp erawh mi hriat hlau reng rengin ka awm thung. Hei vang hi nge ka hre lo a, amah lah hi ka duh tulh tulh a. Kan chhungte hnena sawi a duh tawh thu hi a sawi fo a, keimah zawk hi ka inpeih hlei thei lo. Ka nu beisei anga ka awm loh avanga kan chhungkua hlimna tla hniam tur te, Valtea chhungte mak ti lutuk turte hi ka dawn lo thei lol a, chu chuan hlauhthawnna min siam lo thei lo.

 

Ka inbual zo chu Valtea nen inhmuhna tur kan siamah chuan ka kal a, a lo thu leh vang tawh. Min hmuh chuan a lo nui sak a, holiday hi chuan inhmu turah kan in ngai tawh tawp.

 

“Nizan chu Nunui a rawn che nawi lutuk a” midang chanchin a sawi hmasak ngai loh nen a rawn ti chhuak ve hlawl a.

 

‘Enge?” a mah pawh en loin ka ti a.

 

“Leng turin min sawm ngawrh lutuk a, in inah a lo len theih chuang lo ka tia, ka va leng phei a. A chhungte bulah khan min bialpa chei deuh ringawt a, zia lo ka ti khawp mai. I hriat huna dawnsawn dan I thiam nan ka hrilh mai che a nih chu” a ti a, ka lo thik leh nghal hru.

 

“Len kher pawh chu a ngai mi? Ka thiantha ber tih I hre ve reng a, hnaih loh mai tur che ania” ka ti a, ka inthiam lo leh deuh.

 

“Ka hrilh mai ang ka tih lahin I phal si lo a” inthlahrung deuh tak hian a ti a.

 

“Keiman ka hrilh loh chuan a chi si lo alawm” ka tih chuan a nui tawp.

 

A harsa ve thei ngawt ang, kan chhungte bula sawi tur pawh hian min tur duh tawh lo, ka inpeih hun a nghak ve deuh tawp tawh. A rei tial tial a, ka hreh telh telh bawk si a, min nawr hi a hreh ve tumhrang nen, tihian rilru nuam zan lo chung hian kan haw leh ringawt thin.

 

Inchhung ka lut chiah a, ka nu thinrim hmel ka hmachhawn nghal.

 

“Hetah rawn thu teh” a tih chuan tim deuh dai hian ka phei a.

 

“I nau thusawi hi a dike m? Valtea nen in inkawp em ni?” aw zawi fiah zet hian a ti a.

 

“Umm” ka tin chu ka kheuh sek a, ka nu mizia ka hrechiang a, a ri tun tun ngai lo, hetianga zawi tea a thusawi hi kan hlauh thinzia ka hai lo bawk.

 

“Titawp nghal ang che” tih pahin a tho a, a kal sawn nghal.

 

Ka thaw hak a, inchung lam panin muangchangin ka chho a. Step tawpah Tebawihi a lo ding a, ka nuih lui sak a, min khawngaih hmel zet hian min lo en.

 

“I sawi ngam dawn lo tih ka hria a, ka sawi tawp a” a tih chuan a darah ka han chul a.

 

“Ka lawm e’ ka ti sap a.

 

Ka khumah chuan ka han thu a, ka huphurh ber hun ka thleng ta tih ka hria, huaisei taka hmachhawn ka tum nen ka nu bulah hi chuan ka zam chhe leh vek thin.

 

*ka nu in a hre tawh a, I chhungte hrilh ve tawh mai rawh. Kan tawn tur ang ang chu tawng tawh mai ang* tiin Valtea chu message ka thawn a.

 

*Kan thutiam kha aw, a harsa dawn tih hre mah ila invawn tlat kan tum kha* tih min rawn thawn let a.

 

Ni e, mualpho huamin ka thinlung ka zui a, eng pawh tawk dawn ila hnunglam ka hawi bik lo ang tiin ka infuih ta sauh sauh a, huaisenna pawh nei thar ta deuhin ka inhria. Tuin nge mahni hma hun hre ngai? Keipawhin hetiang hi ka tawng dawn tih ka hre bik lo a, hre lawk ni ila inven chi kimin ka inveng ve ang chu. Tuman kan hmangaih turte hi kan lo thlang lawk thei lo a, hun hian a rawn her chhuak ve tawp thin. Chu chu a hrechiangtu ber ka ni.

Note: note hi min lo chhiarsak thin u la aw, hetah hian info ka dah tel thin. Ka dah dawn hi chuan chhunah emaw tlaiah emaw ka dah tlangpui a, ka dah tawh hnuah hian zan lamah 'i dah dawn em' tih zawhna hi a awm thin a, engmah ka sawi loh chuan a ni tur zel a mi ka dah tawh tihna a ni tih min hriatsak bawk dawn nia. Kamsamida Sarangee vek u