VALTEA 16

 

Sixteen

 

“Office ah ka riak ngei alawm. Rspi chungchangah kha chuan engmah insawi thiam tur a awm lo, chutiang turin engmah ka ti lo bawk a. Feli te ina a kal tur kan intawng a, chu zawng chu a ni mai” a ti a.

 

“Dan anga I nupui ka la nih loh vang hian min zuam a nih saw, I awm reng laia thusawi te kha ngaihtuah let rawh. Khatianga min ti min ti tur pawh a ni lo” ka ti a, ka thin chu a rim ngawih ngawih.

 

“Ngurpui, Rspi vang hi chuan buai fo lo teh ang” a ti a, room a chhuahsan nghal hmak.

 

Ka nui hak a, ka hlim vang ni loin ka thinrim lutuk vangin ka nui. Kan buai fo nachhan hi keimah vang a ni em ni? Ka suitcase chu ka khai chhuak a, sitting roomah a phone a lo bih ngur a, ka thawm chu hria ang pawhin a awm lo. Khawiah nge ka kal dawn hre lo mah ila he in chhuahsan phawt hi ka duh.

 

“I inchhir lo ang maw?”

 

Ka va hawi let a, chiang zet hian min lo melh a.

 

“Ka thutlukna siamah ka inchhir chhin ngai lo” tih pahin ka chhuak.

 

Pawn chu a lo vawt deuh vur a, ka thinrim lutuk na lamah khua a vawt tih pawh ka lo hre chang lo. Ka college kalpui thin Rody te inluah lam ka pan tawp a, chutatang chuan tihdan tur ka ngaihtuah tha leh mai ang chu. Rody nen hian ka sumdawnna lamah kan inchhar chhuak a, vawi thum lai an inah ka kal tawh. Coaching kalin helamah a rawn awm leh hi a lo ni a, a nau nen chauha awm an ni bawk a, nihnih thum tihbuai chu ka hreh em em bik lo.

 

Ka va thlen chuan an unauin min lo dawngsawng tha em em a, nungchang tha ve nguah nguah tawp, tawng tam lem lo an ni a, kan inkawm ngai em em lo na in hetiang hunah chuan tihbuai ngam tur khawpin kan innel thung. Valtea a  reh hmak a, heti teh tawpa kan awm hi a mak chu ka ti reng. Mahse, ka rilru a dam hlawl lo a, ka ngawi reng thei lo a ni. Zan a lo ni a, ka lung chu a leng tak zet, Valtea telloa zanhnih ka riahna tur a ni tih ka hriat rualin ka han thaw hak a, ka ngai lutuk chu ka na ngut ngut theiin ka hria. Hmeichhe luhlul leh tih har ka ni a, chu chuan min nawr kal mai pawh a.

 

Nihnih lai chu Rody te inah ka awm tawh a, Mizorama haw chhoh ka tum a, ka tum ang erawh chuan haw na tur ka tifel mai thei lo. Helai hmuna hetianga awm ai chuan mahni ram ngeia awm ka duh zawk, ka chhungte erawh ka tlawh lo ang. Ka dul chu ka han chul a, ‘naute, lo tuar hram hram rawh aw’ tiin ka han phun sap a.

 

Rody class a rawn la bang lo a, a nau Bawiha nen kan awm a, ani room lamah a awm avangin inchhung vel chu ka tifai a. Chutia ka chet mawlh mawlh lai chuan thawk leh khatah ka lu a rawn hai thut a, ka inring hman lo, ka hma zawngin ka tlu deuh thlawrh a, ka vai nghal ruai a ni mai. Engtin nge ka ke ka khawih fuh ka hre lo, thisen a rawn luang tih ka hmuh chuan hlauhthawnna hian min tuam nghal hlup a, Rody inchhung rawn lut au nghal chul chu ka hriat hnuhnun ber a ni. Ka harh leh chuan damdawiin khumah ka lo mu tawh a, nurse pakhat hian min lo en vel mek a. Thil hrechhuak thutin ka pum chu ka han dap a, nurse chuan lainat hmel zeta min melh in a lu a thing a, ni lo, naute kha ka chan thei lo.

 

Valtea hmel ka hmuh rual chuan thinrimna in ka khat nghal. Inthlahrung fe hian ka bulah a rawn thu a, ka lo inhersan hmak. Naute ka chan hi ama thiam loh ah ka puh hauh lo, mahse, ka chunga khatianga a awm thei leh min tihlungawi aia ka awm dan ang anga ka awm pawi a tih lohna rilru kha ka haw ngawih ngawih.

 

Kan haw lamah pawh vawikhatmah ka tawng lo, Rody te inah ka thawmhnaw la in kan kawi a, kan inluah lamah kan kal tlang a, a hmela inthiam lohna leh inchhirna chu hmu mah ila chu chuan ka na hi a tidam zo thlawt lo. In kan thleng a, ka inbual fai sauh sauh a, ka mu nghal daih. Ka taksa chau leh na ai hian ka rilru na hi a thuk zawk, ka mittui chu a rawn far fap a.

 

“Ei chak I nei em?” tia min zawh chuan ka lu ka thing a, min biak zui zel a tum tih ka hriat chuan ka thaw hak a.

 

“Min be suh” ka ti hlur.

 

Engkim hi ka haw vek. Ka fa lo piang tur ka nghahhlelh ve em em kha ka chan a, thildang zawng aiin ka naute kha ka duh asin. Ka harsat lai berin ka bula awm tura ka duh leh ka beisei kha a awm lo bawk, ka natzia hi min hriatthiampui lo zawk ang.

 

Nihnih chhung chu ka mu ngawih ngawih a ni ber e, engmah ka ti peih lo a, Valtea hnathawh hlana lo chhuah daihte chu ka chak a, mahse, chutiang ti tur pawh chuan tha ka nei lo. A vawikhatna atan ka nu leh ka pa, ka nau ka ngai ngei mai. Ka chunga an thiltih ka ngaihtuah hi chuan ka thin a rim a, mahse, a chhe berah chuan kan chhungte tho tho hi kan tan an lo hlu tih ka hrechhuak ve ta. Hetiang zawng kher lo hian ka nu leh pa hi nawr ka tum ngai miah lo a, runluihna hlirin ka lo khat thin tih ka inhmuchhuak ta. He khawvela kan hmuh theih Pathian an ni a, an thu awih loh chuan rah tha a chhuah khat khawp tih pawh kan naupanlai atanga min zirtir dan a ni a. Ka lo puitling ve a, mahni tha tih danin ka awm a, a tawp ka khar dan chu hetiang hi a nit a a nih hi. Khum bulah chuan ka thingthi rawp a, tihtakzeta ka tawngtai theih lohna pawh a rei ta. Mittui tla zawih zawihin ka tawngtai a, thinlung lungchhia leh inchhirin ka khat.

 

Valtea rawn haw chuan ei rawng ka lo bawl a, chutia ka lo che peih chu a lawm hle a. Chawhmeh ka duh zawng hlir a rawn lei haw lehnghal, phur deuh hian a inbual a, a inbual chhungin a thawmhnaw ka lo khai fel sak a, bathroom atanga a rawn chhuah chuan min kuah deuh ringawt.

 

“Enge? Hei min tibuai” tiin ka lo nam a, a nui sang a.

 

“Kan naute ka venhim zawh loh vangin min ngaidam rawh aw” a tita sap a.

 

“I thiam loh a ni hleinem” ka ti a.

 

“Ka nupui luhlul zet hrem ka tumna lamah ka lo kal thui hret a ni, ka tihpalh lutuk” tih pahin ka chalah a fawp a.

 

“Valte, thil tam hi kan ngaihtuah a ngaiin ka hria. Kan chhungte lakah hian tlawm a hun tawh I ti ve em? Hetiang hian kan awm reng dawn mi?” ka ti a. Khumah chuan min thutpui a.

 

“Ka hre lo” a ti a, a thaw deuh hak a.

 

“A harsa ang tih chu ka hre tho a, mahse, kan tum thei lo mi?”

 

Min kuah a, a thaw deuh ham ham a.

 

“I duh chuan I chhungte chu bia la” zam dup hian a ti a.

 

“I rilru a dam dawn loh chuan ka biak kher pawh a ngai lo a”

 

“Aih, I hlimna hi ka duh ber”

 

“Valte”

 

“umm”

 

“Ka hmangaih che”

 

Amah en thei tur hian min kuai her a.

 

“Ka hmangaih che, tutee maw vang mai maia kalsan tur khawp che in hei chen hi ka kalpui lo che. Ka kianga ding reng tur leh kan tlin lohna indawm tawn reng tur hian ka thlang tawh che. Khawngaih takin ka nunhlui a mite vang mai maiin min ringhlel tawh suh aw” a tih chuan ka mittui a lo tla a, duat tak hian a hru a.

 

“Ka tihpalh” ka tih chuan a nui a.

 

“I chak lohna leh I panna lai a hriat vangin khatianga awm kha a achak ve mai mai a nih kha. Tin, ka duatzia che leh ka hmangaihzia che a hria a, a thik bawk che. A hmaa a zawng zawng keimah atanga a dawn thin midangin an dawng tih a hmuh khan a tina a nih kha, chuvangin beih hram zel dan che a ngaihtuah a nih kha” a ti a, a awmah chuan ka bei ta hle hle a.

 

“Nangpawh, Mathana vangin ka chungah tikhan I awm vak a nih kha” lungawi lo awm ang tak hian ka ti a.

 

“Ka hriat lohin pawisa in lo inpe thin nia ka hriat khan tlawm ka inti em a lawm” a ti a, a dik ve reng mai.

 

Ka nu number chu vawi tam ka hmetchhuak tawh a, be loin ni ka hmang liam tam leh ta. Valtea hian engtinmah a chhungte hi a be dawn lo tih ka hre bawk, keimah hi ka pawimawh ber tih ka inhria, a taka tawn erawh har ka ti ve tho bawk si.

 

“Hello”

 

Ka inrin hman hmain ka nu number chu ka dial a, a rawn chhan chuan ka thin a phu deuh dap dap.

 

“Nu…”

 

A reh vang vang a.

 

“Bawihte..”

 

Ka mittui a rawn tla nghal tawp, chutianga min koh lohna chu a van rei ta em! Darkar khat chuang fe kan inbia a, a changin kan tap a, a changin kan nui a, nu leh fate inhmangaihna hi a lo va thuk em! Zanah ka pa hoin min rawn be leh a, ngaihdam in dil tawnin boruak kan siam tha leh ta, nun hi a famkim ngawih ngawih.

 

“Ngurpui”

 

Ka va hawi a, mu pahin ka phone ka khawih a, Valtea chuan lehkha a la chhiar thung.

 

“Cake bake chu I zir duh em?”

 

A pen chuan a lehkhabu a khawng karh karh a, hmanah khan ka chak thu ka sawi tawh a, a lo la hrereng a nih chu.

 

‘Aw, duh lutuk” ka tih chuan a nui a.

 

“Mahse, thil pakhat min phalsak ve a ngai ang”

 

‘Enge?”

 

“Junior Intelligence officer ka exam ang”

 

Ka ngawi vang vang a, ka duh vak loh vang hian ka lo aw tha duh ngai lo a, an hna hi ka phurpui zawng a nih loh vang a ni pakhat.

 

“I exam tawh  chiang mai” ka ti thut a, a nui vur vur a.

 

“Engtin nge I hriat?” a ti, ka hre der si lo, ka dawp a ni reng sia.

 

“Hman daih tawh khan exam a nia, tun hnaiah exam tur thu a awm lo hrim hrim” ka confi tawh rap.

 

A lu a hiat nauh nauh a.

 

‘Nia.. A.. aw” a ti vel ta mai mai.

 

“Enge I lo inzep vel” tih pahin ka tho a, ka va beng deuh chawrh chawrh a, a lo nui tak ang vur vur a.

 

“Dik tak chuan Delhi a awm zel theih hi ka duh a, Mizoramah te chuan awm pawh kan la awm thei anga, tunah hi chuan helai hmuna dinhmun sawhngheh phawt hi ka duh a” a ti a.

 

“Mizoramah ngei thawk la ka lo ti ve thung em em a” ka tih chuan a malah min pawt thu a.

 

“Naktuk tuk leh hian trade test tur ka nia, ka zep tlang dawn emawni ka tia, ka ngam ta chiah lo a” a tih chuan ka hnuk a ulh deuh.

 

“Valte, ka nawm loh I hlau em em reng a, kei ve chuan I hna tui zawng leh duhzawng pawh ka hre lo a, ka hnen atangin support-na pawh I dawng lo a. Nangmahniin tun hi I lo thleng a nia, ka indem lutuk” ka ti a.

 

“Ka chakna I nia, ka engkim I ni. Nangmah vangin hlawhtlinte hi ka chak em em a, min nawr kaltu, ka tana mi hlu tawpkhawk I ni, hre reng ang che” a ti a.

 

A muhil lai chu ka thlir reng a, ka khawngaih zawk. Kan hun hman mekte, kan hun kal tawhte, Valtea kianga ka himzia te, tunah chuan kan inhmangaihna pawhin rah tha a chhuah ve dawn ta in ka hria.

 

Ka phone a rawn ri ral ral a, bathroom atangin ka tlan chhuak a, ka han chhang a.

 

“Mawipui, engtin nge in inluah kan rawn hriat theih ang?”

 

Ka tawng chhuak mai thei lo, Nu Machhuani, Valtea nu a lo ni. Kan awmna lai leh an rawn kal dan turte chu taxi driver bulah ka han sawi ve nawk nawk a, ka mittui chu a tla reng mai.

 

Kan inchhungah ngei ka nu leh Nu Machhuani an awm a, ka mumang ang ka la tit ho.

 

“Min ngaidam dawn nia, nu leh pa nih kan lo tling lo em a ni”Nu Machhuani’n a ti a.

 

“Keimahni zawk min ngaidam dawn nia” ka han ti ve a. Tlawm zawk nih inchuhna hmunah chuan remna a lo piang a, hlimna in a zui thin a lo ni.

 

Valtea rawn haw chu a lai deuh tut tut a, a nu nen an in chibai laite chuan a hmel a dang vek, ka va nuih a, min melh rum tawp.

 

“Mumang a ang tiraw?” a ti sap a.

 

Ka nu te pahnih mut hnuah keinipawh kan mu ve a, khumah kan titi mai mai a.

 

“Umm, keipawh mak ka ti” ka lo ti a.

 

“Pathian hi a lo awm ngei a nih hi. Ihmaw, ka nun beidawng lutuk thin khan a awm pawh hi ka ring ngai lo a. Mahse, nangmah nen nun bul kan han tan a, tun thlenga min vengtu hi an awm tih ka hai ngai lo, tawngtai ve zeuh zeuh ka ching chho tan a, ka nu leh pa ten en inrem taka kana wm leh theih nan hian ka dil ve thin asin” a tih chuan ka lo hrethiam lutuk tlat.

 

Hlim takin ka nute cham chhung chuan kan awm a, insawi thata inkutsuihte pawh a ngaih dawn avangin haw chhoh tumin rilru pawh kan pu ve a, mi min ngaihdan tur ka ngaihtuah thlen erawh chuan ka huphurh, mahse, kan chhungte berin min pawm a, chu baka ngaihhlut tur kan nei lo. Haw kan tum hma ni chiahin Valtea te result a chhuak a, vanneihthlak takin a tling ve hlauh mai a, duhthusam kha a tak ram a chang chho ta. Kan awmdan hi thawnthu sawi thiam deuhin a duh ang anga a her rem a, changtute chan tha a chantir takte pawh kan angin ka hria.

Valtea thlahnih training a ngaih nghal dawn avangin ka nu te rualin ka haw chho a, a training zawh veleh insuihtha turin a rawn haw nghal dawn a ni. Valtea telloa haw chhoh chu a hrehawm, ka lung a leng ngawih ngawih. Ka chhungten min duat a, a hma zawng aiin min duhsak zawk niin a lang. Nu Machhuani te lah ka chungah an lawm, an fapa an beidawnsan lek lek tawh kha tunah chuan officer a ni ve dawn ta a nia, keimah vangah an ngai nghet bur a, lawm tak te hian an lawm.

 

Ka haw chhoh hnu thla khat a liam hma deuhin Mathana pawhin nupui a nei dawn a, Remruati nen an innei dawn. Ka lawmpui em ka hre chiah lo, a chhan chu a fa ni miah lo hi a fa ang tak taka a en theih loh ka lo hlauhpui.

 

“Mawipui, ka nupui neih hma ngei hian thil pakhat chiah hrilh che ka duh a, thu dik hrilh ngam lo chein ka hmasial takin neih che ka lo tum thin a, min ngaidam dawn nia. Remruati fanu kha ka fa ngei a lo nia, mahse, ngaihdam harsa ka tih em vanga ngaihven zui duh lo ka nia. Tunah chuan ka tihsual tawh ah huaisen takin mawh ka la tawh dawn a, chu chu ka hrilh ve duh che a ni. Kan chhungte pawhin an hre tawh a, ngaihngam taka in awm hi ka duh bawk” a ti ta a.

 

Chu thu ka hria chu ka inthiam lohna zawng zawng kha bo ve ta vek mai, ka tihdik loh a awm lo ti thin mah ila inthiam chawp ka ang tho a, tihian thudik chu a tawpah a dingchang ta a nih hi.

Valtea rawn haw ni a ni a, airport a lo surprise ka tum tehreng nen ka luhai ka tho kang peih meuh lo. Zing atangin ka tho chhuak peih lo a, ka chet deuhin ka luak dawn zelin ka hria a, ka che tha ngam lo. Tebawihi’n ka room parda a rawn hawng vek a, puam huhin ka chal min hrensak bawk a.

 

‘U Valtea rawn haw tur I helhhawlh a nih kha” tiin min la fiam zui.

 

Ka nu ka rooma a rawn luh chuan nurse pakhat hian a rawn zui a, ka awmdan chu chiang fe hian ka nuin a sawi a, nurse chu a nui var var a.

 

‘Hei Mary a nih hi, kan inhnuai luahin arawn awm a, I hre hman lo ang” ka nuin a ti a, ka lo nuih ve a.

 

“Engtikah nge nau a chhiat in tih kha?” tiin ka nu a zawt a, a sawi ve mai a.

 

“I taksa hi a chak lo lutuk a, damdawi in lamah awm lawk ula ka duh ngawt mai” tih pahin drip min khai sak a. “Nakinah I thawh peih hunah lo in test rawh aw” tih pahin pregnancy test kid hi min chhawp bawk a, ka nu nen min chhuahsan leh rih. Ka awmdan ber pawh hi ka hrethiam lo, nau ka pai em ka hre lo a, thla hnih lai hre loa awm tur chuan ka inring chiah si loa, period ka lo skip ve fo bawk nen rindan pawh ka nei thiam lo.

 

Ka lo muhil char char a, ka harh chuan khua a lo tlai duai tawh. Ka room kawngka a rawn inhawng a, Valtea a rawn lut chiah.

 

“Ka nupui duhtak chu tinge I lo dam loh a?” tih pahin min rawn pan a, ka chalah a rawn fawp a, “Ka ngai lutuk che” a ti a. Engmah kan sawi leh hmain midang an rawn lut ve a, ka han hawi kual vel a, ka lu hai pawh a lo reh tawh.

 

“Ka tho duh” ka tih chuan Valtea’n min lo ban vat a, khumah chuan min thuttir a.

 

“I zun a chhuak em?” ka nu ve thung.

 

“um” tih pahin ka tho a, ka drip an khai pawh a lo zo chiah.

 

Dawhkana test kid chu ka hum zeuh a, bathroom ah ka lut nghal a, ka rai ka inrin loh vang a ni maithei, ka phur tehchiam lo. Ka thil ken chu ka han en a, pahnih chu a lo inrin ve, mahse, pakhat zawk a fiah lo hle thung. Ka chhuak a, ka nu ka pe nghal a, anin midang a lo hmuh ve a, ka rai angin an pawm vek.

 

Valtea haw phei tur chu huphurh tak te hian a huphurh, kal ve tura min tih lahin a ni thei chiah si lo, hreh ru tak hian a phei ta hnak hnak a, ka khawngaih zawk. A training zo rawn haw chutia kan awmhran a ngai chu a hrethiam lo lek lek a, mahse, dan angin a nupui ka la ni miau lo a, ka thiam ang angin ka han hrilhfiah pah bawk a, chumi zan chu kan inbe rei viau mai. A tawpah chuan engtin tin emaw alungawi thei ta hram a, kan mu thei ve ta.

 

Chawlh rei tak neia rawn haw a ni lo bawk a, kan inneih dan tur pawh chhungkaw pahnihin an rel zung zung a, holam taka tih chu kan duh dan a nih avangin kan chhungte tum ai leh duh aiin kan ti ho dawn, inneih nghehna a ni lo tih kan hria a, pawi kan ti lo dun nasa. Man hlan tukah kohhran hall ah kan inkutsuih ve ta a, tunah chuan nupa tak tak kan ni ve ta. A hmaa kan pahnih chauha mal taka awm thinte kha kan chhungte nen inrem takin inneihna kan hmang ho a, hlimna hian min la hmuak zelin ka ring bawk.

 

Vawiin chu kan hun kal tawh ka lo ngaihtuah nileng thak a nih hi. Ka fate pahnih inkawm chu ka thlir a, a upa zawk kum 5  a ni ve tawh a, a nau zawk kum 2 a ni ve tawh. Valtea nupui ka ni hi inchhirna ka la nei ngai lo a, ka tawn avang hian lawmna hlirin ka khat thin. Amah nena fapa duhawm tak kan han nei te hi ka hlimna tizualtu a ni a, pasal innghahna tlak, zaidam leh dawhthei lutuk ka nei hi lawm lo thei ka ni lo e. Engvanga vannei em em nge ka nih ka inzawt fo thin zawk. A mah vang hian thil tam tak ka zir ve a, zaidam te, nupa inhmangaihna te, engkim hi a hnen atangin ka inzir ti ila ka tisual tamin ka ring lo.

 

“Apa”

 

Ka fate thawmah ka hawi chhuak a, kan kawtah motor a rawn ding a, naupang pahnih tukverhah an dak chhuak nghal.

 

A te zawk ka pawm , a u zawkin min zui a, kan kawtah chuan chhuakin ka pasal duh tak Ramthanpuia, a nupui fanaute thlahlel taka rawn haw chu kan lo hmuak a, motor atangin bawm hi a rawn keng chhuak bawk a. Kan bul a rawn thlen chuan kan fapa u zawkin a pa chu a lo vuan a.

 

“Anu, apa, happy anniversary” a tita a.

 

Vawiin hi kan inneih champha a ni tih reng ka lo hre tawh lo.

 

“Ka fapa duat, kan lawm e’ tiin a lo chhang a. Anni pafa hi hetiang ti tur hian an lo inzirtir leh chiam aniang.

 

Inchhungah lutin a thil ken chu dawhkanah a dah a, ka han hawng a, anniversary cake a lo ni. A bulah bawm tetakte a lo awm tel a, hawng tura min tih vangin ka han hawng a. Zungbun pahnih a lo awm, kan inneih khan zungbun duhthusam kan hmuh loh vangin nakinah lei that leh ah a tih kha a lo la hrereng a nih dawn hi. Chu zungbunah chuan ‘This too shall pass’ tih hi a lo chuang kalh a.

 

“Khawvelah harsatna te, lungngaihte hi kan tawk fo dawn a, mahse, chung chuan min chamchilh reng dawn lo, an la liam anga, chung hunte chu a la herliam thin dawn a ni. Kan nupa nunah pawh chung a lo thlen chang chuan beidawng mai loin, heng hun hi a la liam dawn a ni tiin kan infuih fo thin tur a ni” a tih thin kha ka bengah a rawn ri nawn a, ka mittui a parawl kuang mai.

 

“Ka hmangaih che” tih pahin ka va kuah a.

 

“Ka hmangaih che, ka fate nu, ka nupui duhtak” tih pahin min lo fawp a.

 

Zungbun chu kan han inbuntir a, kan fate an lo phurin an hlim em em a, chhungkaw hlim leh awhawm tak min petu Pathian hnenah chuan lawmthu ka sawi ta mawlh mawlh a. Tun chauh ni lo, hun lo kal zel turah pawh chhungkaw hlim kan nih zel theih nan ka inhlan thar ta a.

 

-------------------xxxxxxxxxxxxxxxxx----------------------

 

Note: A tawp thlenga min support tu, min chhiarsak a, comment min per eng tut e, ka va lawm em! In duh angin a tawp kher lo maithei, mahse, ka thiamna in a tlin tawh lo ah ngai maiin ka tih theih tawk hi min hlutsak turin ka ngen a che u. In zavai chungah ka lawm em em e. Ka blog min suspend sak leh tawh a, thawnthu thar tihchhuah mai ka inring lo, phurna level a hniam rih emai kan chawl ve phawt ange☺️