A DANGLAM SI LO-3

 

3

 

Ruah a tla siar siar reng a, mut tinuam tawk chiahin a bang duh der lo lehnghal. Puia chuan a room tukverh chu a han nam hawng a, boruak vawt chuan a rawn tiharh ta deuh. A han meng a, a khum sira phone chu la kangin sana a en a, chaw ei a lo hun lek lek tawh tih a hriat chuan a han tho nghal zat a, a nu pawhin thawh a hai emawni tun thlenga a kaihthawh loh tih chu a ngaihtuah pah a, bathroomah lutin a inti fai zung zung a. Insiam peihsa in a room atangin a chhuak a, a nu chuan koh tumin step a rawn pen ve chiah a, a fapa a hmuh chuan a nui sak a, a let leh nghal a. Chaw ei a lo siam peih vek tawh a, an nufa chuan inbe em em loin an ei mawlh mawlh a. Pu Thansanga erawh chu zingkar atangin dawr lamah a liam leh tawh. A dam tha phawt anih chuan dawr kal loh mai mai hi a tih ngai loh a ni a, khua a nawm loh deuh vang ringawta thulh chi a ni hek lo.

 

“Vawiin tlai kha I theihnghilh ange aw” Pi Ramtei chuan a han ti a. Rosangpuia hmelah chuan zawhna a hmu nghal. “Valpuia’n chaw a rawn ei dawn kha” a han ti leh zat a.

 

Puia chu a han thaw hak a, ni tak e, Valpuia’n an khuaah zirtirtu hna a hmu a, a haw chho dawn a, chumi hmaa chawei pui an tum a nih kha. A ngaituahna tawi leh tuk thin chu a duh lo ngei mai. Rinpuii thlan chiah hnutchhiahin a awm dawn ta, a nu leh a nuta ten an khuaah an hawsan hlen tur anga a han ngaihtuahte chuan a thin chu a na vawng vawng. A lainat zual a ni ber ang chu, a putea te chhungkua awm tho mah se a nu leh Valpuia ang em chuan a thlan pawh an ngaihsak a ring si lo, a hnukte pawh a ulh lek lek zawk.

 

A hnathawh kar lakah chuan tukverhah chuan a dak leh zawk thin a, ruah chu a sur tawh chiah lo na a tiau chhum a zing chuk a, a vawt vur bawk si. A dawhkana Rinpuii nena an thlalak chu a han chawi kang a, engtikah tak fam zun ngaih hian kal san ang maw?

Valpuia'n chaw a rawn ei chuan an chhungkua chu an ngui deuh rawih, Rinpuii ai awh ve ber tu kha a ni thin a, ani lehzel hmuh tur a awm tawh lo tur chuan rilru a tihrehawm a ni ber ang chu. Pu Thansanga meuh pawh a hnukte a ulh ve hial a. 

"U Pui, ka u chu a kal tawh a, a rawn let tawh dawn lo. Nangpawhin amahah beiseina nei tawh lo la, ngaihzawngte neiin nupuite nei la, chu chu ka u duh dan tur tak pawh a nia" chaw an eikhama Puia rooma an awm hnu chuan Valpuia chuan a ti a.

"Valpui, a rawn let tawh dawn lo tih ka hriatchianna hian beidawnna thuk deuh hi min pe thin alawm maw le. Ni e, hma lam pan pawh ni ila tunah hi chuan i u pawhin min dem tawh in ka ring lo" a lo ti ve a. 

Unau anga lo awm hman kha an ni bawk a, Rosangpuia pawhin engmah zep a nei lo. An vengah tleirawl hmeltha leh mit la deuh an awm thute  chu a sawi ve bawrh bawrh a, Valpuia pawhin bawhzuia ngaihven turin a lo ti ve nghal zat. Tunah chuan rilru nuam takin a awm ve thei tawhin a inring a, chutiang bawkin Valpuia pawhin ngaihtha takin a hawsan ve thei tawh ang.

 

Zorini pawh khua a nawm loh em avangin class kal peih lo a, tunah hian PUC ah B.Sc 4^th semester a zir mek a ni a, an exam a hnaih tawh avangin class kal pawh an tam lutuk tawh lo. A lehkha zir laklawh laite hian Rosangpuia hmel chu chiang em em hian a mitthlaah a rawn lang thin a, a zirlai a tibuai lek lek chu a ni ber. A nu in a koh chu a hre  reng a, eih pawh a tum hran lo. A room kawngkhar a rawn inhawng a, a nu chu a rawn dak a.

 

“Koh I va hre thei lo ve. I thil dil kha I tling ve a nia” a tarmit kar atangin a rawn melh a, Zorini chu a inperh tho nghal vat.

 

“A ni maw? Tak tak em? Dawt I sawi lo tiraw?” a ti chul a, a naupanlai atang tawha a dream nurse nih theihna kawng chu a inhawng ve tan ta. Kum hmasa lamah a ti tawh a, a tling lo a, amah pawh a hnual hman lek lek a, college te an luh hnu phei chuan thiante nen ni tin inhmukhawm reng an nia,  tih chhunzawm pawh a rilruk ta vak lo. A nu thiannu Synod Hospital-a thawk hian zir tur an la leh dawn tih te sawiin form te a rawn laksak a, inbuatsaihna em em pawh nei loin a exam ve a, tihian tling chho zelin a lo zir thei ve dawn a lo ni.

 

Nihnih chhung workshop an neih hnuah Rosangpuia pawh district hrang hranga training pe turin a zin chhuak a, group hnihah inthenin an zinna tur an insem a, hahthlak loh theih ang ber turin ruahmanna an siam a, tun ang hun hi chu an hah ber hun a ni hrim hrim. A rilru kilkhatah Zorini a awm ve reng a, ‘naupang deuh lo se la chu aw’ a ti vawng vawng fo. Rinpuii awm loh hnua a ngaihven hmasak ber a nih vang nge a hre lo a, a thinlung atangin a paih thla thei der lo lehnghal.

 

Champhaiah an awm mek a, nihnih training an pe dawn a, a nikhatna chu an zo tawh a, ani pawh a tih tur a zo tawh a, a thianpa in a tukah a pe dawn thung a ni.Hotel Chawngthuah an thleng a, a awmna hmun hi Champhai khawchhung laili ber a ni a, a nuam pawh a ti viau. A vawihnih kalna a ni tawh a, a kal hmasak zawk erawh chuan zan an riak lo thung. Tun hi zanriaka a kal hmasak berna a ni a, a boruak zo deuh raihte chu a ril rem zawng tak a ni. Tukverha dakin phai leilet lamng ut chu a thlir vang vang a, khawharna hian a rawn tuam a, a mitthlaah Rinpuii a rawn lang nghal vat. Ani kha la dam nise chuan chhungkua an din ve ngei dawn si a, chung ngaihtuahna chuan a nunhluiah a let pui leh ta vawng vawng mai.

 

Mu pahin whatsapp ah a lut a, an veng group hrang hranga an thu post te chu a chhiar kual a, pakhat chuan a mit a la nghal zar a, chu chu Zorini nurse training tur chungchang lo awm ve chu a ni. Synod Hospital Durtlanga B.Sc (Nursing) zir turah a tel tih a chhiar chuan a lo thaw hak a, a tum hauh loh in group ah chuan a number a zawng ta. Mi 250 vel chu a bih thla char char a, hming awm lo leh thlalak hmuh theih loh lah an tam, chung zingah chuan  a tel tawh anih a ring. A tawp thleng en law law tuma a bih leh chuan a hnuai lamah chuan ~zorini25~ tih hi a hmu a, a dp erawh a hmuh theih loh. An vengah Zorini dang an awm em tih uluk takin a ngaihtuah leh a, chumi hnuah an awmin a hre lo a, a number chu a save ta thlap mai.

 

Zorini mu tur chuan a phone charge lai chu a va phawi a, whatsapp message lo awm reng chu a han hawng a, chutah a inring hman lo, a khek ta raih a, a zuang ta tawr tawr a, a mumang mai a ni ang tih hlau zet hian a phone chu a han bih tha leh a, a mumang mai zawng a ni bik lo e.

 

*Group kha ka lo chhiar ve a, i ti tha hle mai, hlawhtling ngei turin zir la aw*

 

A thawntu chu tu dang an ni lo, Rosangpuia a ni tlat alawm.

 

Rei fe chhan dan tur a ngaihtuah hnuah tihian a chhang ve ta a.

 

*nangmah awm lo la chuan ka zir thei lo ang, a hun takah ka marksheet min siamsak leh a, I chungah ka lawm lutuk*

 

Chutiang chuan a han chhang let ve ngei a, a nuihte pawh a za deuh. A chhan dan chu puitling riauin a hria a, a nuih a za ve a ni.

 

*a nih chuan thingpui tal chu ka hlawh turah beisei ang aw* tih chhan letna chuan a tihlim a ni tawp.

 

Thil eng engemaw an sawi chhunzawm a, an inmangtha meuh chuan dar 11 a lo ri der tawh. Chumi zan ang reng renga Zorini muttui chu a awm kher awm lo e. Amah chauh a ni bik lo, Rosangpuia pawh a hlim ve viau mai, khi var varin a muhil ve a, beiseina te pawh a nei thar ve leh ta.

 

Chau hnawpin in a thleng a, kawng chhe lutuk chuan a taksa chau ve deuh a belhchhah a, tihian Lunglei lamah a tukah an liam leh nghal dawn a ni. A nu in tui alo lumsak chuan sa ver vawrin a inbual a, len tumna a neih vanga a thlen veleha inbual nghal a ni tih chu tuman an hriatsak lem lo ang. Nidangah hi chuan mut dawna inbual hi a tihdan a ni reng thin a, zanin erawh a dan a dang ve ta.

 

“Puia, chaw ei ka siam zo e” a nuin a rawn tih chuan a thawmhnaw a thlak zo chiah a, darthlalanga inen zuaiin a phone a ak a, room atangin a chhuak ta a.

 

“Naktuk chu dar engzatah nge in chhuah leh dawn?”a a pain a ti a.

 

“Chaw eikhamah muang changin a niang, a hla lo a, hmanhmawh a ngai lem lo ang” a ti a.

 

Thil dang sawi tawh loin chaw chu an ei a, a helhhawlh deuh nge ni dawn, a ei tam lem lo. An nula a nawmsam vak loh avangin a nu chu thleng a seng pui leh phawt a, chumi hnuah muangchangin in atangin a chhuak ta a. Kawn a va thlen chuan a thianpa Bsa kuhva lei nen an inhmu a, nula rim nan hma ala ti ve deuh a ni ang, Bsa te inah chuan a lut kawi a, a fate pahnih lah chuan an lo ngai ve em em a, a tum aia rei mah a leng ta a. Bsa te in atanga a chhuah chuan huphurhna hian a rawn tuam ve deuh a, ngaihzawng pakhat chiah a la nei a, amah nula mi tak a lo ni lem lo bawk nen a thianpa a lo sawm lo chu a inchhir leh deuh. Chutiang a ngaihtuah chhung chuan Zorini te in chu a thleng ve mai a, naupang chhia pawh kan ni tawh hleinem tih rilru puin a lut ve ta a, an chhungkua an lo awm kim hle lehnghal.

 

“Ehe, Puia chu, I lo len ve tehmial a” Zorini pa Pu Tluanga chuan a lo ti a.

 

Zorini inchung atangin a lo chhuk thla chiah a, an inchhungah ngei Puia a hmu chu a tak tak a ni lo ang tih a hlau em em ringawt.

 

“U Pui, I van fel ve, lo thu rawh” a ti ve nghal sawk sawk a, a zah a hlau ve a ni.

 

A nu leh a pa chuan thil awmzia chu an man ve ta vat a, an titi pawh an lo thlak nghal vat. Amah Rosangpuia hi an veng chhungah chuan nu leh pa ten makpa atana an awh rawn hi a ni ve hrim hrim a, khatia Rinpuii nen an inngaihzawn pawh khan ui tak taktu an tam em em a, Rinpuii a han boral erawh kha chuan an lainat vek thung. A mizia tha dup maite hi an hrechiang em em a, ngaihzawng a neih leh mai mai hi an ring lo vek a, an rin ang ngeiin a ngaihsak lo chho reng bawk a. Tuna hetia Zorini a han buaipui ve anga alang hi Zorini nu leh pa tan chuan lawm loh rual pawh a ni lo.

 

“Tikhan lo inkawm rawh u, kan mutsan ang che u” tiin room lam an pan san pheuh pheuh a, an pahnih chuan inhmatawnin an thu ve ta ran mai.

 

Zorini te unau hi pathum an ni a, amah hi a naupang ber niin an upa ber hian nupui a nei tawh a, fa pakhat nei tawhin tihian an awm ho a, a milai hian phai lamah lehkha a la zir mek a ni.

 

“Thingpui I in leh duh em?” Zorini chuan a ti a, Rosangpuia chu a lo nui deuh a, nichin lawk khan an in tawh a, Zorini lai ve lutuk chu a khawngaih ve deuh a ni.

 

“I bulah khan ka lo thu ve aw” a tih chuan Zorini chu a bu nghat a, a insawn nghal a.

 

Bul han tan dan vak a hre lo, sawi chiam tur pawh a hre hran lo. An pahnih hian an induh tawn tih erawh a hrechiang a, mahni rilrua thu awm ang sawi chhuak thiam lo chi a lo nih lehzel chu tun hun atan hnawk a ti kher mai.

 

“Engtikah nge I luh chhoh ang?” tiin reife sawi tur a ngaihtuah hnuah a han ti a.

 

“Thla thar ni 10 hi luh kim ni chu a nia” Zorini’n a lo ti a.

 

“A va huphurhawm dawn ve” a tih sap chuan an ngawi dun roh roh a. Puia chuan a kum chu a lo chhut ru nghal a, tunah hian kum 31 a ni tawh dawn a, kum 4 chu loh theih lohin a hman ral a la ngai dawn tih a ngaihtuah a, a thlawnin chung kum 4 chu a ral vaih chuan  a uiawm ve khawp ang. Kum hi a kal chak si a, tunah lah Zorini hi kum 20 vel a ni chauh dawn a, ani in tih tak zeta a lo ngaihzawn laiin a nula ve chho tak tak dawn chauh a, amah a ngheh ang hian a lo nghet kher lo thei tihte chu a ngaihtuah thleng vek.

 

A haw dawn chuan pawn thlengin a thlah ve thlap a, an indinchilh ran a, Puia chuan ngawi rengin Zorini kut chu a vuan a, a han hmer deuh vang vang a. Thil tam tak sawi duh a nei a, sawi chhuah erawh harsa a ti thlawt a ni.

 

“Naktukah Lungleiah kan zin leh dawn a, ka rawn haw hunah kan lawm tha leh anga tiraw?” a han ti a.

 

“I tihdan dan a ni mai”Zorini chuan a lo ti a. Chutah chuan sawi aiin chetzia hian thil tam a hril tam zawk tih hre turin hringnun chu a dai tam ve tawk tawh, Zorini chu a han pawt hnai deuh a, a hmui fawh chakawm zetah chuan a han fawp vawng vawng a, Zorini chuan a lo dawh deuh tawp, a zak emaw, a zei lo ve hrim hrim emaw a ni ang.

 

Pheikhai zang angreng takin a mu a, Zorini mitmeng pawi sawi lo leh a hmui fawh nuam zet kha a mitthlaah a reh thei der lo. A phone ah message a rawn thleng a.

 

*U Pui, min duh ve tak tak a mi a?* Zorini rawn thawn chu nui sakin a chhiar a.