A DANGLAM SI LO 5

 

5

 

Zorini hostel luh hun a hnai zel a, a tir ai mahin Rosangpuia chuan a huphurh tawh. Zan tin deuh thaw a leng phei a, a len theih dawn loh pawhin tlaiah a office ban pahin a tlawh ngei ngei thin. Chutiang chuan a hunawl neih ang ang chu Zorini tan a hmang zo vek a, a awm loh hunah chuan hrehawm a ti ve khawp ang.  

 

Zorini mamawh tur leiin an chhuak dun a, thawhtanah a luh tawh dawn avangin inrinni te a lo ni bawk a, an chhuak tlang thei hlauh a, a tihzia viau mai. Hmeichhia hi chuan mamawh neuh neuh kan ngah bawk a, rin aiin an indapkhawm rei. Chutiangah pawh chuan Puia chuan ning awm pawhin a lang lo a, engkimah Zorini chu a ngai pawimawh thiam a, ti lang chiam lo mah se a ngaihsak tih a lantir thiam a, Zorini pawhin nuam a ti a, a thla a muang ve em em bawk. Dawr pakhat atanga an chhuah chuan mipa la upa lutuk lo tur hi a rawn lut ve dawn chiah a, Zorini a hmuh chuan a ding chawt a.

 

“Ehe! Zorinfel..” tih pahin Zorini chu a rawn pawt deuh nawk a.

 

“Awi, nang elaw?” tih pahin Zorini chuan a dinchilh ve nghal a.

 

“Engtikah nge I luh dawn tak? I awm loh chuan khawhar tur kan va tam awm ve” a han tihzawm a.

 

“Thawhtanah kan lut tawh dawn a, hei mamawh kan han lei ve a nih hi. Kei deuh ania lungleng dawn, ka ngai ngawt ang cheu” a ti a.

 

“Hawh, kan inhmu khat tawh dawn sia, thla la lawk ang” tih pahin a phone a phawrh a, Zorini chu a han kuah nghal a, Puia mit chu a lo kham ru viau.

 

A ngawichawi ta riau chu a chhan a hre reng, a rin aiin a thikthu a lo chhe daih tih a inhre ve chiah. Rinpuii nen khan puitling ve ve inngaizawng an ni bawk a, hetiang zawnga mit tikham tur hi an tawng ngai lem lo bawk a, a hrethiam lo lek lek chu a ni.

 

“U Pui, enge I ngaihtuah?” motor a an tlanchhuah hnuah Zorini chuan a ti a.

 

“Engmah ngaihtuah chuang lo e” a lo ti ve mai a.

 

“I ngawi char char bawk sia, I thinrim a ang” a lo ti ve a.

 

“Thinrim lo e. Mahse, khapa kha tunge?” a tih chuan Zorini a lo nui hak.

 

“U Pui, I thik a ni maw?” tiin a nui var var a, Puia pawh za lo deuh chuan a nui ve a. “Kan college kalpui a nih kha, thawveng deuh mai ania, enliam tawp chi ang hi” a han ti ve a, Puia a lo thaw huai.

 

Tlaiah Puia te inah Zorini pawhin chaw a ei dawn a, a tang ve ngang mai, Inchei uchuak a hlau si, mawi loh lutuk a hlau si, Mapuii a rawn ngun leh teh e!  dar 5 velah Puia’n a rawn hruai a, veng khat an nia, inhre ngai lo an ni lo bawk a, Zorini pawh zak viau mah se a zia tak pawh a awm. Pu Thansanga pawh dawr atangin a rawn haw hma a, a fapa hlim hmel hian an nupa a tihlim a, a hmaa an inthiam lohna thin zawng zawng pawh a zavai chuan reh phah lo mah se tlem tal chu a tihziaawm phah a, chu ringawt pawh chu an tan chuan a hlawk tawh hrim hrim. Chaw an ei hmain Puia chuan a room te a enpui a, chumi zawhah inchungah chhoin khua chu an chuan vel a. Zorini chu a hlim tak zet tih hai rual a ni lo. A lo suangtuah fo thin kha a takin a thleng mek a ni si a, tuna an hlimna hi reh thei lo se, bo thei lo se tiin duhthu a lo sam ru mawlh mawlh a.

 

“A theih anga tam inbiak ka duh dawn ania. Nang chu thiante I han nei anga, I khawhar lutuk pawh a ziaawm mai dawn a, keimah zawk hi min rawn ngaihtuah tel ve la aw” a tih chuan Zorini chu a lo kiai sak a.

 

“U Pui, ka ngai ngawt ang che. Nizanah phei chuan ka zir leh lo mai dawn mawni ka ti rum rum a” a han ti a.

 

“Chutiang chu ngaihtuah pawh ngaihtuah suh, I tan vek ania, kan pahnih tan tho tho. Lunglen leh khawhar chu a tuar ve theih zel a, mahse, lerh miah suh ang che” a han ti a.

 

“Ka ngaihtuah fe zawk che, dik tak chuan I luck ropui si” Zorini’n a han ti bai bai a, Puia a lo nui suk. “Kha, nui ringawt suh aw. Ka thinrim chuan ka rawn be dawn miah lo che ania” a han tih zawm zat a. Puia chuan a va din hnaih a, a kuah a.

 

“Tian ti ang, miin engpawh lo sawi se, keimahni hnen atanga kan hria a nih ngawt loh chuan awih loh kan ti ang” a ti a, Zorini chu a lo bu nghat a.

 

“Chhuk tawh ila, I chhungte ngaih a tha lo ange” a lo ti daih.

 

“Umm, ni mai zel e” tiin an inzui thla ta a.

 

Chaw ei hmain Pi Ramtei chuan hun hmangin a fapa te pahnih chu thu tha tak tak a hrilh a, tin, Zorini pawh a zirlai tha taka zir turin a fuih mawlh mawlh a. Chumi hnuah tawngtainate neiin chaw chu an ei chhunzawm a. An nula Nupuii an tih mai chuan Zorini  chu a en duh khawp mai a, a lo melh leh deuh reng thin. Chu chu Zorini’n a lo hmu fuh thei riau lehnghal a, nuam lo a ti lek lek mai. Chaw an eikham chuan thlengte chu a seng pui ve a, Rosangpuia pawh chu eng lutuk tih tur hre chuang loin a lo vei ve chhen bawk a.

 

“Ka pa thingpui tur lum rawh le” tih pahin thingpui lumna hmanrua vel chu a kawhhmuh zung zung a.

 

“Ka lum tui thiam vak lo ania aw” Zorini’n a tih chuan a lo nuih mai mai a.

 

“A paw hangin I siamsak dawn nia. Chaweikhamah a in ngei ngei tih kha hre tawp la” a ti a. Thingpui lum chhung chuan gas bulah an indinchilh deuh ran a, an piahah Nupuii chuan thleng a sil bawk a, a khat tawkin Puia te pahnih chu a va melh leh thin a, enge a ngaihtuah ve ang tih chu anni pahnihin an hre hauh lo.

 

Rei vak lo an awm leh hnuah Zorini te in lamah an phei dun leh ta a, tunlai chu inzui tam ve tak chu an ni. An vengchhungah pawh an inzui tih an hre fur tawh a, Puia chu an lawmpui em em vek. A thil tawrh kha an hriatpui vek a, an lainat em em vek si a. Tunah nun thara nunga hetianga mi thar a tawng hi an thinlung takin an lawmpui em em theuh niin a lang. Tlangval fel leh an vengah pawh an chhuanvawr ve tak a ni a, khatia lu a han sun chhoh khan kohhran leh khawtlangah pawh a tlem nghal a, a ruk tak chuan an ui a, a dinhmun atangin an hrethiam em em lawi si. Chuvangin tuna a hlim hmel an han hmuh leh pawh hian an lo lawmpui em em theuh a ni.

 

Zorini pawh hostelah a lut chho a, Puia leh Zorini nuin an thlah. A room turah a bungruate  an han dah fel a, vawikhatmah chhungte telloa la khawsa ngai lo a nih avangin a nu chuan a ngaihtuah viau mai. Chutihrual erawh chuan puitling an ni ve tawh a, harsa em em lo turah a ngai tho bawk.

 

“U Pui, hetatang hian ka lo be thin ang che, I mitthla thiam theih nan” tih pahin a room tukverh bulah chuan a han ding a.

 

“Ka ngai viau ang che” a han ti sap a, a nu a rawn luh ve nghal avangin engmah an sawi zawm tawh lo.

 

“I mamawh a la kim loh chuan I rawn sawi leh mai dawn nia” a nu chuan a ti a.

 

Midang pawh an lo thleng ve mek zel a, a roommate tur pawh a lo thleng ve ta. Siaha lam a nih hmel, a hmel a fai vang a, a landanah chuan a fel hmel viau bawk.

 

“Estheri ka nia” tiin inhmelhriattirna a rawn nei nghal a.

 

Zorini pawh chuan a hmingte sawiin a nu leh Puia pawh chu a han hmelhriattir ve nghal a, Estheri chuan Puia a chibai lai chuan hriatfiah theih fak si loh hian engtin emaw a awm. Puia chuan a lo thlah vat a, thil awm chu a hria pawh a ni hran lo, hmeichhe dang hi a enliam ve mai mai a, Zorini bak ngaihven a nei tak tak lo.

 

An haw tur chu Zorini chuan a thlah a, a lung a leng dawn hlein a hria. An invai liam ta, a nun bul a tan ve tak tak dawn a, a chhungte emaw Puia emaw tihbuai lutuk loh chu a tum ve tang tang. Chutiang a nih loh chuan a nih chak em em ni thei lo hian a awm a hlauhawm tlat.

 

Rosangpuia pawh khawhar takin a room-ah chuan a tawm a, Zorinite’n zan lamah programme hman tur an neih nghal avangin an inbe thei lo nghal pang a, tawrhchhel a ngai dawn hlein a hria. A sana chu a han en a, dar 8 pawh a la ri lo, zan a rei dawn hlein a hria a, Bsa te ina leng turin a chhuak ta nge nge a, ngaiah a nei chho ve mai angchu maw.

 

Zorini mu tur chuan a phone chu a han hmet eng zeuh a, Puia message a lo awm ran, a nui sak a. A chhan letna a type mawlh mawlh a, chumi pah chuan a khumah chuan a han inthawlh a. Esi bathroom atangin a rawn chhuak a, a zai deuh rat rat a, Zorini lo mu nui deuh var var a hmuh chuan a va nuih ve ta ringawt a.

 

“Vawiina rawn thlahtu che kha I u mi?” tiin a han zawt satliah a. A u a nih loh pawhin an chhungte anih a ring ve tawp, inngaizawng turah a dah lo hrim hrim.

 

“Umm” Zorini lah chuan a lo ti sam et a, Esi chu a nui ve ta sak a, vawikhat a hmuhnaa a thinlung khawih chetu a tawn vawikhatna a ni a, a mitthlaah a cham zui nghal vang vang.

 

Hun a kal ve zel a, lunglenga indawm kun reng thu a awm lo, Puia pawh ni tin a hnaah a kal a, an buai ve thin bawk nen chhun lamah hi chuan Zorini pawh a hre chang lo lek lek fo. A thutnaa a han thut fela mahnia a awm chiah hian khawharna hian a rawn tuam ve thin a, chu ber chu tawrh har a ti. Rinpuii nena an thlalak chu a han la kang a, dahsawn atum apiangin harsa a ti tlat. Zorini tan thil nuam lo tak a ni dawn tih a hre ve reng a, chuvang chuan a drawer ah chuan a han khung ta ringawt a, inthiam lohna tur awm tawhin a hre tawh lo bawk a, tihian ngaiah a nei chho ve mai ang.

 

Note: Ka blog a tha leh tawh a, ka rawn regu leh tan tawh dawn nia. Ads hi click vak lo mai ang u, a chhe leh thin a, a chhan a inziahnaah hian ads click nawn tum an awm vang ni hian a rawn inziak thin a, chuvangin kan internet a chak viau a nih loh chuan khawih lo law law zawk ila, han enchhin teh ang u.