A DANGLAM SILO 4

 

4

 

Rosangpuia leh Zorini pawh a hmaa Puia’n a lo tiam ang khan Zorini pual liau liauin an dineout dawn a, nilenga nghaktu Zorini tan chuan ni chu a rei duh ngat ngat viau. A thawmhnaw hak tur pawh a thlang rei tawk viau, a u nupui Mapuii chu a in endiktir a, vawithum a inthlaknaah a lung a awi ve ta hram. Puia pawh a mawng a za tluan ve thak tho, nidang zawng aiin ni chu rei riau hian a hria a. Chumi avang ngawta office atanga haw hma chu a duh der bawk si lo. A file inhung chhawng deuh dul chu a han melh a, pending neih loh hram duh thin a ni bawk a, a pen chu tivir kual chungin file chu a indawtin a han ban leh a, chutiang chuan hun a hmang ve bawk.

 

Ban rual rualin hmanhmawh zetin a inkhalh haw a, a chhungte bulah chaw a ei chhuah tur thu a sawi tawh avangin inah tlang loin Zorini te in lam panin a tlan tlang a, an kawt a thlen chuan a han inbeng fai leh nawk nawk a, tleirawl te a ngaizawng a ni a, puitling khupa awm loh hram dan pawh a ngaihtuah ve reng. Inchhung a luh chuan Mapuii chuan a lo dawngsawng a, sitting room ah Zorini chu a lo nghak ran a. A chhungte dang an la haw ve lo nge a hmu lo, Mapuii chuan thingpui a duh leh duh lohte chu a rawn zawt a, a lo hnar thung. Minute 5 vel a thut hnuah Zorini pawh inchung atangin a rawn pen thla ve ta a. A pian hi a mawi reuh phian a, a vun a nalhin hmeltha hluah hluah tih tur ni lo mah se a chhelo em em lawi si, a hnar ngul invuah fuh zet leh a mitmeng bial lian lek lek chu a mawipui a ni ber ang chu. A nuih zawnga a biang sum chaing lo riai a lo lang ve thinte chuan a ti hmuhnawm zual bawk.

 

“Ka rei em?” tiin Puia chu a han dinchilh a.

 

“Rei lo e, ka lo thleng ve deuh chiah alawm” tiin a lo chhang a.

 

“Au Mapui, kan kal aw. Anu te chu ka hrilh tawh tho a, min lo hrilhsak leh mai dawn nia” a ti a.

 

“Ka rawn thlah leh dawn nia, lo ngaihtuah lo ula” Puia pawh chuan a han ti ve a. Hetiang thuah chuan an ngaihtuah hauh lo, chutih rual erawh chuan fimkhur tur chuan a tir atangin an fanu chu an chah ve mawlh mawlh tho.

 

Chaw ei nana a la hma deuh avangin khawchhungah chuan an han tlan kual ve a, Zorini chuan a khupah a kut chu dahin thil tam tak a ngaihtuah ve a. Hetia a thinlung taka a vei em em Rosangpuia nen an han inngaizawng ve ta chu hlim tawp loh hian a hlim a, tihlan chiam erawh a hlau ve tho. Puia hi fel hle mah se mipa tam tak hian an bialnu ten an duh lutuk tih an hriat hian ngaihnep chin an nei ve thin tih a hre reng a, chuvang chuan a tir atanga fimkhur chu a tha a ti ve reng reng.

 

Darkar khat dawn chutianga an tlan kual hnu chuan Puia thianpa Samu-a te dawr lam panin an tlan leh ta a, anni hian restaurant lian leh changkang zet dinin tunah hian hotel tur an sa mek bawk. Puia thiantha ber a ni a, kum tir khan nupui a nei a, Puia pawh hian a dinpui nghe nghe a ni. Veng hranah an awm na a, an inthianthatna erawh a thuk em em a, harsatna tawp khawka inpan dun chawt zel an ni. 

 

“Lokal r’u, helamah hian ka lo hauh sak cheu” tiin Samua chuan a thianpa leh a bialnu thar chhe lo tak chu a lo ko vat a. Zorini chu a melh vang vang a, a khi ta sak a. A thianpain a sawi tirh khan nula pangngai ve tawh tak a nih a lo ring a, a hmel a hmuh chuan a kum tur awm ang a hrethiam mai, a thianpa mizia a hrechiang a, tih tak zetin a ngaizawng leh dawn tih pawh a hre vek. Thil pakhat hlauhthawn erawh a nei, Zorini hi a la upa dawn lo tih a hre si a, a thianpa rilru tihahtu a ni mai ang tih chu a hlau deuh.

 

“Zorini maw I nih? Samua ka nia, in pa best hi ka nia” tiin an thutna tura a hruai hnu chuan a inhmelhriattir a.

 

“Aw, ni e. Nia, U Puia hian kan rawn kal lamah khan a sawi a” a lo ti fel ve thlap a.

 

“Ka  thianpa hian a atchilh leh tlut dawn che ania, a thikthu pawh a chhia a nia aw” tiin a han nui a, Zorini pawh lai zet hian a lo nui ve.

 

‘Umm.. keipawh ka thikthu a chhia” a lo ti ve sap a.

 

Inbe lem lo chuan chaw chu an ei a, a khat tawkin an inmelh a, an innuih sak zel. An ei zawh hnu chuan inchungah Puia’n a hruai chho a, inchung atanga khawpui eng phe iar chu a han thlir pui a. Zorini chuan hmuhnawm tizet hian a mit a han len vel a, thli rawn thaw her her chuan chulai hmun chu a tinuam zual. 

 

“Ka sawmna che min tihhlawhtlinsak a, ka lawm e aw” Puia chuan a han ti a.

 

“Keimah ka lawm daih zawk” tiin Zorini chuan a lo chhang ve nghal, an inen a, an nui dun hak a. 

 

Puia chu kal hnaiin Zorini dinnaah chuan a va dinthuah a, a hnung lam atangin a kawngah a han kuah a, Zorini ip deuh zawk chu a hre reng, a nui ru sak a. A darah a khabe dahin thawk a la vang vang a, Zorini chu a thaw tha ngam lo tih erawh a hre hauh lo.

 

“In hostelah chuan a inkan ve theih angem le?” a han ti chhuak a.

 

“Ka hre lo le, keimahni zawk pawh hi thla khatah vawikhat vel chu mamawh lamin kan chhuak ve thei maithei a ni” a lo ti ve a. Thla khata vawikhat, chu pawh zan riak lo lehnghal chu a huphurhawm ve duh fu in a rinawm! 

 

“Zorin, tunah hi chuan ka rilru ang hi I pu ve tih ka hai bik lo a, mahse, I zir hun chhung tur ka ngaihtuah hian ka tan chuan huphurhawm ve tak a nia. A chhan chu tunah I zir tan dawn chauh a, kum hnih thum I awm hnuah chuan I thinlungah hian ka tla na tawh kher lo thei a, engpawhnise, rilru dang min lo putsan ta a nih pawhin min hrilh hreh lo turin ka duh che a. Mihring chuan mahni tawkah chapona kan nei vek a, kawp nihte hi kan duh miah lo a, chu ai chuan tawrh dan thiam harsa mah se inhrilh tawp hi a tha ber zawk a, engmah zep nei ngai lo turin ka duh che a ni” a han ti a.

 

“U Pui, ka la naupang a, ka rilru pawh puitlin lohna tam tak ka neiin ka ring a, ka nei ngei bawk ang. Mahse, rinawm taka min nghak a nih phawt chuan rilru dang put hi ka tum lo. Keimahin ka duh hmasak ngei I nih vang hian keimahah pawh I tla na a. Chutiang maia ka rilru a danglam chu ka ring lo. Nangmah I rinawm phawt chuan” a lo ti ve a.

 

“Mi hrang hrang ngaizawng kual chi ka ni lo a, ka thiam lo bawk a. I hre vek anga, Rinpuii’n min boralsan hnu phei chuan ngaihzawng neih leh theih hi ka inring miah lo. Mahse, nang hian chung ka lo rindan chu I rawn tidanglam ta a nih hi” a ti a.

 

Rinpuii hming a sawi zawng chuan Zorini awm a lo nuam lo nghal, a thik a tih dawn chuan mitthi tawh han thik chu ni theiin a hre chiah si lo, a office dawhkana thlalak te kha a la intar reng angem tihte chu a lo ngaihtuah thleng daih.

 

“Enge I ngaihtuah vung vung a?” Puia’n a tih chuan a harh deuh zawk a.

 

‘A.. Engvak mah ngaihtuah chuang lo e” a lo ti a.

 

“Kan haw tawh mai dawn em niang, I chhungten an lo ngaihtuah ang che a” a tih chuan Zorini chuan a lo nghawk deuh a.

 

“Chutiang em em a naupang chhia ka ni tawh bik lo” a lo ti ve hlak a, Puia a then sak.

 

Zorini te in lam pan chuan an haw ta a, Puia hla play chu zawi te tein a lo zawm ve a, puia chuan a melh leh zawk thin tih a inhre hauh lo ang. An in an thlen chuan a chhungte pawhin chaw an lo ei fel tawh a, sitting room ah an lo thu a, anni pahnih chuan an va zawm ve a.

 

Mapuii thingpui lumte chu an han in a, Zorini chu a piang fal deuh a ni bawk a, an duat rawn tih a lang reng, an monu pawh hian pianpui nau ang tak takin a en a, a fate nen hian angkhatin a en ni maiin a hriat. Zorini hian tih takzeta ngaihzawng a neih a la hre ngai lo a, Puia hi a ralkhat ngaihzawnna a rei tawh tih erawh a hriatpui ve thlap. Hetia an han inngaizawng tak tak hi a lawmpui hle a, pasal tlak a nih avangin Zorini pawhin a zirchhuah chuan nei mai se tih thlengin a ngaihtuah a, a pasal pawh a hrilh nghe nghe. 

 

"Naktukah kan sangha dil kan sah dawn a, rawn kal ve ta che" Pu Tluanga chuan a han ti a.

 

"Nia, U Pui, lo kal ve la" Zorini'n a lo ti vat a. A chhungte an lo then tha. Chhungkaw inkawmngeih leh inhmangaih tlang tak an ni a, engmah thuruk an nei ngai lo.

 

"Ka sawm ve hleinem che" a pa chuan a lo ti khauh a.

 

"Ka kal awm emai" a lo ti ve nghal zat.

 

"Nia, a chakawm khawp mai" Puia chuan a lo ti a. A kal chak tih chu zep rual a ni lo, mahse, thil pakhat a rilruah a rawn thar leh nghal zat; Rinpuii bawk kha! A putea te sangha an sah tuma an pahniha an kal kha a mitthlaah a rawn lang a, an hlim dunzia mawlh kha!

 

"Kan ring che aw" tih riah a hawi chhuak a, Zorini leh a chhungten an lo melh thap a, a ngaihtuahna a lo kawm nasa lutuka, an thusawi pawh a hre lo. Han zawh nawn em chu a hreh si a, a aw liam ve ta mai mai a.

 

Zanah rei vak lo an in text leh a, Zorini hi zan men rei vak a thei lo a, a mit that loh bakah a mu hma thang hrim hrim a, hetia ngaihzawng a neih hnu hian inthlak danglam kher tulin a hre lo a, a mut hun pangngai dar 10 a rik chuan a mu deuh ngei ngei thin. A lehkha zir lai pawhin hei aia rei hi a meng ngai chuang lo a, a tihdan than a ni ve reng reng. Zorini mut hnuah Puia chuan lehkhabute a han chhiar leh a, a inawm tleina ber a ni a, lehkhabu chhiar hi a atchilh tlut mai a ni.

 

Zan lama an lo sawi tawh ang ngeiin Zorinite chuan sangha sah turin an rawn sawm a, ani pawh a lo inpeih der tawh. Pu Thansanga te nupa hian an lo rinhlelh thil chu a tak a ni tih an hre chho a, an fapain ngaihzawng a nei leh ta tih an hriat chuan an thaw huai a, an lawm dun hle. Sangha dil an va thlen chuan a rin aiin a lo lian a, an thlen hlim rei vak loah tui an sah a. Chumi chhungin Puia leh Zorini chuan thingpuite an lum a, an chhungte chuan an pawh duh lo lui ve a ni. Inhmu lo vang vang tur an nih ve vangte pawh a ni ngei ang.

 

"U Pui, ka awm loh chhungin midang lo be miah suh aw" a han ti a.

 

"Be lo tawp ang, ka rinawm alawm" nui chungin a lo ti a.

 

"I serious lo" tih pahin Puia chu a han chum taih a.

 

"Tak takin, Zorin, keichu ka ngaihtuah awm hleinem. Tihian ka lo nghak ve ngar ngar dawn che a nia. Nangmah zawk hian midang min melhsan vaih chuan a ho duh ngawt ang" a han ti a.

 

"I rinawm chuan keichu rinawm tur chiangsa" a lo ti ve a, an inen a, an han nui dun a.

Puia chuan Zorini kut chu a khal neuh neuh a, an awmna hmun an lo theihnghilh lek lek a ni. A va thut hnaih a, a hmui a fawh kham theih lohah chuan a han fawp vawng vawng a, Zorini pawhin a thiam ang angin a lo chhang let ve. Ngaihzawng pangngai takin a la nei lo tia a hrilh kha a ringhlel hauh lo a, a laka a awmdan hian a ti chiang viauin a hre bawk. "Higher kan kal laiin pakhat ka nei tawh a, phone a inbiak bak kan inhnaih ngam ngai lo" tia a hrilh kha a awih hmiah.

 

Thawm an hriat chuan an inthlah vat a, Zorini u chuan a nau te pahnih chu a rawn ko a, sangha an man tan tawh dawn a lo ni. Duh berte nena chutianga han tal vel chu nuam an ti dun tih a hriat hliah hliah a, an sangha lah chu a lian tha nasa si a, a manha ngei mai. Zorinite chhungkaw zinga chen chu a nuam a tiin a nel em em vek tawh a, ti huam ai siloa an fanu tan an iai lo tih an lantirte chuan a ngaih a ti tha viau bawk. An haw ta a, Puia pawhin sangha tam tawk tak a hawn ve nghe nghe, a nuin manhla a ti leh dawn mange.