LALROHLUA 1

 

1

 

“Pastor fate pawh hi eng an lo ni bik lo, an lo sual ve tho a nih hi. Engtin nge anni mahin an enkawl that theih loh chuan keini phei chuan fa tha vek kan neih theih bik ang?” kan thenawmnu chuan a rawn ti bawrh bawrh a, ka lo ner sak a.

 

Kan pastor fapa Lalrohlua chungchang a sawi tih ka hre mai. Mi fate sual vanga ngaih tihthat ngawtte, inthiam deuh talh tum hi a tha ka ti lo a, ka duhzawng pawh a ni lo. Keini pawh kan inchhungah sual hian min kal kan bik miah lo a, kan u hian zu a in ve thin. Ka hlauh ber chu ka nu leh pate hian mi bula an sawi naah midang fa sual an ve hmer tel ve talh ang tih hi. Vawiin ni thleng chuan an la ti lo chuan ka hria a, chu ringawt pawh chu ka lawm tawk em em.

 

Thalai inkhawm zan a nih avangin inkhawm turin ka insiam a, ka u pawh inkhawm a tum ve tehmial. A insiam zawhah min rawn au a, min nghak lawk turin ka ti a, tha tak chuan min lo nghak ve mai. In atanga kan chhuak chu kan ngawi dun roh roh a, tleirawl sual pawh nei loa hetia puitlin hnua zu a in hi ka hrethiam lo fo a, tawngtai erawh ka bansan ngai lo.

 

“U..” ka tih chuan min rawn melh zawk a. “Zu hi I in lo thei tho sia, nghei ve mai la” ka ti a, a thaw deuh hak a.

 

“Te, nghei hi chu ka duh ve lutuk alawm. Mahse, a har ve rih em a ni” a ti hul hak a, sawi leh tur pawh ka hre lo, ngawi rengin kan kal ta a. Biak in kan thlen dawn chuan pastor quarter atanga Rohlua rawn tlan chhuak chu kan tawk a, ka u a hmuh chuan a ding nghal chawt a.

 

“Tinge?” a ti deuh sup a.

 

“A.. zanin chu ka’n inkhawm ve phawt ange. Banah ka rawn kawi ang” ka u in a ti a, ka thin a lo rim nghal at.

 

“Anih ka lo nghak ang che” tih pahin a tlan chhuak ta a.

 

Inkhawm chhung zawng chuan thildang ka ngaihtuah thei lo, inkhawm banah ka u chu a kal tak tak angem tih mawlh chuan ka rilru a luah. Vawiin pawh a hna atanga a rawn haw rui miah loin a lo thleng a, chhungkua kan lawm ve ania, Rohlua nen an inhmu kher chu ka thin hi a rim deuh tlat. Inkhawm kan bang a, group member inhmuhkhawm kan han ngai lehzelte chu ka mang a ang, ka u chu a thu leh dawn lo tih ka hre chiang nasa si a. Kan leader in inhlawh chungchang a sawite chu pakhatmah ka hre lo, ka rilru a hmanhmawh em em ringawt. Minute 10 hnuah kan zo a, ka tlan chhuak nghal a. Biak in ka chhuak a, ka u hmel reng reng ka hmu lo. Rilru beidawng angreng tak hian step ah ka chhuak a.

 

“Te”

 

Ka va hawi phei a, ka u chu thim thamah a lo thu reng chu niin, ka thaw ta huai huai.

 

“I kal tawh emaw ka tia” ka tih chuan a nui ri suk a.

 

“Rohlua bula ka kal I hlau a nih kha” a ti a, a la nui sung zui.

 

“A.. nia” ka ti ta tho.

 

“Pawi ka ti ngawt mai, hetiang tak hian ka chhungte rilru ka tihah tih ka lo hre ngai lo a. Inkhawm chhung zawng khan ka lo ngaihtuah ve a, engpawh nise ka nu leh pa chu hrilh chuang lo la, zu nghei hi ka’n tum ve reng reng ange aw” a tita ta a, ka mittui a tla chiang ngei mai.

 

Chu zan chu kan chhungkaw tana zan duhawm leh kan hriat reng tawh tur a ni, a chhan chu ka u zu nghei zan a ni miau a, a tirah chuan hlauhthawnna nen ka awm a, a hnaa a kal rualin ka room ah ka tlan lut a, ka tawngtai a, a rawn haw dawn hnaiha ka hriatah ka tawngtai leh thin. Ka nu leh pa pawhin bang loin an tawngtaipui tih ka hria a, a tira hlauthawng em em a ka awm kha thla thum a ral hnuah chuan hahdam takin Pathian thiltih mak chu ka thlir ve thei ta. Ka u in zu a thlah a ni lo a, Pathianin a thlahsak tih hi ka hriatthiam dan a ni. Kan chhungkaw tah vawng vawng thinna kha hlim nuiri in a khat tawh a, nu leh pa tam takin min awhzia an sawi ve thin. Hun lo kal zel turte, kan hma hunah enge thleng dawn tih hre lo mah ila Pathianin hna a thawh tawhnaah chuan mihring tan rinhlelh mai mai chi a ni lo tih ka hre chiang tawh. Ama thahnemngaihna ringawt chuan thla khat pawh a nghei thei lo thin kha a ni si a.

 

Hna thawh tur duh viau mah ila han thawh mai tur awm bik lo ta chu ka college kal lai atang tawha ka lo buaipui tawh sumdawnna lam chu ka khawih a, ka theih tur nia ka hriat leh thil harsa tak tak ni lo chu ka ti deuh vekin ka hria. Khawchhak bungrua hi khaw hrang hrangah ka thawn deuh ber a, nuam ka ti tawhin a hlawkna ka pawh ve tawh bawk nen, sorkar hnathawh hi ka chak tawh miah lo. Ka u aiin ka thla khat lakluh hi a tam tih ka hre ve a, a chet fuh reng theih loh rualin mahni tuina leh midang mitmei ven ngai loa thil tih hi nuam ka ti chho telh telh. Ka pa erawh chuan sorkar hna zawng turin min ti fo a, damloh nikhuain tuna ka thil tih hi chu a innghahna tlak loh tiin min phur pui tehchiam lo. Ka u erawh chuan ka duhzawng leh chakzawng a nih phawt chuan ti zel turin min fuih a, dawr ka siam duh pawhin loan min laksak a inhuam thu a sawi fo thin. Chu erawh kumte han thar se kan la ngaihtuah tha ang chu.

 

Dar 6 a ri tawh a, ka u a rawn la haw theilo. Vawi thum call tumin ka bei tawh a, a pickup thei lo. Ka nu leh pa pawh an rilru a hah tih ka hre mai, a nunhluiah a let leh mai ang tih hlauhna hian min rawn tuam leh hlup thin a, ka rilru chuan ka tawngtai pah mawlh mawlh. Unau dang nei ta lo chu ka u nen hian kan inkawm nasa em em a, zu a in hnu hian kan inthlah a ni deuh chauh a, kan ngaihzawng thlengin kan inhriatpui thlip thlep zel. Chutiang lai kara min han sualsan pawh kha ka la na em em a, ka lakah pawh a inthlahrun phah nasa thin. Tuna a let leh a nih ngat phei chuan ka kehchhe vek dawn hian ka inhria.

 

“Um, eisan mai ang u” ka pa chuan a ti nghat a, a lungawi vak lo tih ka hria. Chhung inkhawm kan hmang a, ka nu chuan a mah maia tawngtai loin tawngtai rual a rawt a, kan tawngtai zawh rual chiahin ka phone a rawn ri.

 

“Te, kawnah lo tlan lawk mai teh” ka u chuan a rawn ti a, ngaihbel tur takngial pawhin a aw ah rui anga hriat tur a awm lo.

 

“Kawnah lokal lawk rawh a tia, a rui loin ka hria, Lo ei mawlh mawlh mai rawh u” tiin ka tlan chhuak nghal a.

 

Kawn ka va thlen chuan ka hmu mai lo, a thim tawh bawk nen uluk takin ka hmazawn chu ka en zel a, a bike ka va hmu ta hlawl. Ka han ko vak a, a sir atangin min lo chhang a, Pu Muana te in sirah Rohlua nen an lo thu reng chu niin.

 

“Tinge hetah in awm a?” ka ti a, Rohlua chu rui tih hriat zet hian a lo thu deuh nuai a.

 

“Rohlua hi va thlah lawk mai ila, mahni chuan ka ti hlei thei lo a” ka u in a ti a, ani chu zu a in lo tih ka hre tawh.

 

“Ka call I pickup thei si lo a, kan mangang lutuk a” ka ti bawrh bawrh a.

 

“Nakin kan sawi dawn nia” tih pahin a bag chu min pe a, ka lo ak nghal a. “Ka chawi anga, I scooty a phurh kha kan tum dawn nia, bike chu a buaithlak emai” a ti a. Rohlua ban chu ka han vuan a, ka u chu puih ve ka lo tum a ni.

 

“Tenun, I buaipui tlak ka ni lo” Rohlua chuan a rawn ti chuar chuar a.

 

“Rohlu, I nu leh pa rilru hi I tihah emai, a hun tawh lo ania” ka ti hlak hlak a. Kum 2 an rawn awm tawh a, a tir phat atanga kan kohhranin a buaipui chu Rohlua hi a ni nghal. A nu leh pa kan khawngaih em em vek a, a unaute an fel vek laia ani hetiang han ni bik chu thenkhat tan titi a titam lo thei lo.

 

“Tenun.. tinge hmangaih tlak ka ni ve lo mi?” a tih  chuan ka thinlung hi a rawn nghawr ve dat.

 

“Tikhan lo vuan rawh le” ka u in a tih takah chuan ka inthing harh vat a, engtin tin emaw chuan kan chuantir thei ta. “Kan pathumin kan inphur phei mai dawn nia” a ti leh a, a hnung atangin Rohlua chu ka veng a, a che hlei thei si lo, a va hahthlak ber tak.

 

Pastor te in kan va thlen chuan kan tlu lo chauh hi a ni mai, kan thawmah a pa a rawn chhuak vat a.

 

“Mama chu a va han zia lo thin e aw. Kima, I rawn buaipui thin a, ka va lawm em” a lo ti nghal sawk sawk a. A room kan luhpui dawn chuan a nu hi an room atangin a rawn dak a.

 

“Kha, I zu in pui thinte pawhin an ngheisan hmak tawh che kha, mawla, I mawl bik lutuk” a rawn ti a, room ah chuan a lut leh nghal daih. A rawn tih dan kher chu ka tha a na lutuk, Rohlua ka vawnna chu ka thlah hmak a, ka che sawn tawh lo.

 

“A nu leh ta mai mai thin hi a, a tul teh duah lo mang e” pastor chuan a ti a.

 

Kan pastor hi pa tha tawpkhawk, a lehpek awm tawh lo tur khawpa fel leh hawihhawm a ni a, tupawhin kan nel em em a, a bulah kan harsatna kan thlen ngam vek ang tih tur hi a ni. An nu pawh a langah chuan a sual hauh lo a, mahse, engtik emaw atang khan ka mil lo a, ka thil zuar min tawngkhum atang phei kha chuan hmuhdan riau hi ka nei tawh.

 

“Lawm ahneka khatianga lo tih kher” kan let leh hnuah ka u bulah chuan ka ti hlak hlak a.

 

“Te, chutin nula an ang tun tun ngai lo. Rohlua vang hian a nu leh pa rilru hi a hah ve tawh em a, hrethiam hram rawh” a ti dam dup a, chawplehchilhin ka thinrim pawh a reh ve mai.

 

Ka mut dawn tawngtainaah Rohlua tana ka dil ve tan ta, mak tak maiin lainatna riau ka nei a, hmangaihna dawng lo anga a inhriatna khan min tina deuh tlat. Mi ngaihah chuan pastor chhungkua chu famkim turah kan ngai vek a, kan hriat loh thil tam tak hi an chungah pawh a lo thleng ve thei dawn a lo nih hi. Ka mut pah chuan ka phone ka khawih a, fb ah ka lut kual mai mai a, chanchinthar chhiar nan leh story chhiar nan bak ka hmang ngai lo. Hman deuh tawh khan Rohlua khan friend request min rawn thawn a, kan in friend ve tih ka hrechhuak a, ka va stalk chak deuh tlat. A hming chu ka han search a, ka va lut ta ringawt. Thlalak hlui deuh deuh ka en kual a, a sual hma vel ni ngei tur chu ka en a, a hmel hi chu a tha thlawt. Han awm tha duh se chuan ngaihzawng pawh a hmuh that dawn nen, hetiang ringawta kum 30 mi vel lek a han awm thei hi chu a phenah engemaw tak a awm ngeiin ka ring.