LALROHLUA 3

 

3

 

Rohlua nen kan inzuina pawh thla khat a tling ve ta. Ka hnena a intiam ang ngeiin zu a la in lo a, a lam a la hawi lo a ni ber. Inkhawm turin ka la sawm chhuak thei zel a, a tirah chuan hrehawm a ti tih ka hre ve reng. Mahse, tuna a tih luih loh chuan a harsa telh telh dwn tih ka hria a, chuvang chuan ka nawr lui ve tang tang a, inkhawmna thawmhnaw a lo nei lo em em lehnghal. A rawn inkhawm hmasak bera a thawmhnaw rawn hak vang chuan ka nui hak a, zawi zawiin a insiam rem turah ka ngai. 

 

KTP inkhawm zan a ni a, tlai atangin inkhawm turin ka sawm tawh a, theih loh tur thu pawh a sawi bik lo. Dar a ri a, ka u nen kan chhuak ve nghal a, biak in hi kan hlat lutuk lo a, kea kal phakna chauh a ni. In atanga kan chhuah chuahn Rohlua ka call a, a pickup thei miah lo. A insiam buai a nih ringin ka call duh ta lo a, kan group a inang lo a, kan thu tlang thei dawn chuang lo. Biak in kan thlen hnu chuan an in lam chu ka hawi vang vang a, zan dangah chuan tun ang hunah hian biak in kawtah min lo nghak tawh thin. Ka u in lut tura min sawm avangin ka lut ta a, an group thutna chu ka en leh zauh thin. Tan dar a ri a, an group thutnaah a hmel ka hmu ta hauh lo, rilru kilkhatah a awm ve veng veng mai. Sermon inkhawm zan a ni a, kan rei lem lo. Ka u in lenna tur a neih avangin keimahin ka haw a, Rohlua ka call pah bawk. A inkhawm loh chhante tal hria ni ila chuan ka ngaihtuah lutuk bik lo tur a nia, hlauhthawnna hian min tuam lo thei thin lo.

 

In ka thlen chuan kan sitting room ah a lo thu reng, min hmuh chuan a nui sak a, ka lo tum bar thung. Ka nu nen an lo titi a, ka pa hmel erawh ka hmu lo.

 

“Han inthlak la, thingpuite lo in rawh u. I pa ziahfel pui tur ka nei a, ka luhsan ang che u” ka nu chuan a lo ti a, ka pa chu room ah a awm tawh a nih hmel.

 

Ka inthlak hnuah hmanhmawh lo fe hian ka chhuak thla a, Rohlua chuan ka thawm pawh a hre lo aniang, a melh ngai a melh ran a, engemaw tak a tawk anih ka ring.

 

“Tinge I inkhawm loh a? Tlaiah pawh inkhawm tur ang tak khan I awm sia, I inkhawm dawn loh pawhin lo sawi ve tur a nia” ka ti nghal bawrh bawrh a. A thaw hak a, chutah ka lam chu a rawn hawi a, uluk fe hian min melh a.

 

“Inkhawm tawh loh mai hi ka duh” a rawn ti sap.

 

“Eng a?”ka lo ti vin hlar a.

 

“Insiamthat tum pawh hi enge maw a sawtna awm le?” a ti a, han vin leh mai ka tum chu a hmel khawngaih thla la zet vang chuan ka thulh leh a, a bulah ka insawn nghal.

 

“Eng harsatna nge I lo tawh a? Min hrilh teh” ka ti a, ka kut chu a rawn ban a, a hmer vang vang a.

 

“Tlaia kan inbiak zawh khan ka nu hnenah thawmhnaw lei ka dil a, dik tak chuan biak in ema smart lo lutuka inkhawm chu a hrehawm ka ti ve a, chuvanga dil pawh chu ka nia. Thla khat zet chu zu ka in tawh lo a, ka theih ang tawkin that ka tum ve a, ka lo tihsual tawh siamthat tumin ka theihtawp ka chhuah ve a, mahse, min chhan letna hian min tina em a ni” a ti a.

 

“Engtin?” ka lo ti sek sek a.

 

“Zu ngawlvei chuti maiin an tha thut thei lo. A hma pawhin I inkhawm duh ve takin tiin thawmhnawm man to tak tak kan lei a, I zu ruihna thawmhnaw kan ti to a ni ringawt zel. Tunah mai chuan kan lei lo ang” a tia, min rinna nei miah lo tan hian that reng hi a tul ka ti bik lo” a ti ta a.

 

“I pa awm lo mi?” ka ti a.

 

“Awm lo, dil nawn pawh ka tum tawh bik lo” a ti a.

 

“Rohlu, vawi tam tawk I lo ti beidawng ve tawh a, chuvang chuan tunah mai chuan a rilru pawh a la buai ve a nih chu, nangmah talin hriatthiam tum hram hram rawh. Tin, mihring mithmuhah ni loin Pathian mithmuhah zawk that I tum tur a ni. Kan mihringpuite tihlawm hi chuan rei a daih lo a, engtik lai pawha min hmutu tan zawk hian kan nun kan uluk tur a ni” ka ti a.

 

“Pastor nupui I ni duh em?” a lo ti daih.

 

“Ka tlin ve lo ang” ka ti a, ka lo nui hak a.

 

“Pastor nupui ni tur awm zawk tak I ni” a tia, a nui deuh huk.

 

“Naktuk enge tih ang?”ka ti a.

 

‘Ka hre lo le, chawhnu lamah chuan ka pa nen tihtur kan nei a” a ti a.

 

“Bungraw thawn ka ngai dawn a, I hman tak leh min thawnpui la” ka ti a, a lo hnial bik lo. 

 

Inngheng rialin kan thu a, a phone a khawih a, keipawhin ka thil thawn tur vel buaipuiin ka phone chu ka khawih ve bawk a, ngaihzawng nei ngai lo ka ni lo a, mi fel tak tak leh kohhran leh khawtlangah pawh tangkai tak vek an ni. Rohlua ang hi ka bialpa atan ka suangtuah ngai lo a, veng tana mi hnawksak tak angin ka lo ngai thin. Mahse, ruihhlo bawiha tang mekte ka thlir dan leh endan danglam vek tirtu chu amah hi a nia , lainatna nen ka en theih phah ve tawh. Mi tumah hi an nun chhungril ber hrechiang lo chuan lo dem ngawt tur an ni lo tihte pawh ka zir chhuak ve in ka hria. Ka u ngeiin zu a in lai khan veng chhunga ruihhlo tite tan ka tawngtai ve thin a, mahse, a nihna tak takah chuan ka u bak hmangaih taka dilpui ka nei ngai lo. 

 

“Ka va haw tawh mai dawn mi niang?” min rawn melh pah hian a ti a.

 

“A la hma alawm” ka lo ti ve mai a.

 

“Kal kawina tur ka nei lawk a” a ti a, ka lo melh ha a.

 

“Khawiah?” ka tih chuan a phone chu a ak a.

 

“Ka rei lo ang” a ti zo chiah a, a phone a rawn ri nghal. “Aw, ka lo chhuak dawn chiah” a ti a, uluk fe hian ka lo thlek. “Thil sual deuh ti tur ang chuan min en kher lo la” a ti dam dup a.

 

“I kalna tur sawi phawt rawh” ka ti a.

 

“Thinrim lo la aw” a ti te te a. “Bike racing naah ka kal dawn a, hei hi chu thla liam ta atanga kan lo ruahman a nia, chutia phat leh chi a ni tawh lo a” a ti a, ka lo ngawi hmak.

 

A hma pawhin hetiang hi a nuam tih zawng a ni tih ka hria a, ka u pawh a tel ve zeuh zeuh tih ka hria, mahse, a nun a thlak atang hian a kal leh tawh ngai lo. Ka u anga a nunhlui zawng zawng kalsan vek tur hian ani pawh ka lo ngai a, ka lo dik lo deuhte pawh a ni ang.

 

‘Thinrim suh ka tih kha, dawt sawiin ka kal thei reng a, mahse, dawt sawi ka duh loh vang a nia” a ti leh a, a dik tho mai.

 

“A tul lo hle a ni” ka ti ta tho. 

 

Pawn thleng thlah tumin kan inzui a, ka u leng a rawn haw ve chiah bawk, an inbe luam a, an inbiak zawhah kawtah kan inzui chhuak a.

 

“Engemaw I va tawh ka hlau ania” ka tih chuan min rawn dinhnaih a, ka kutah chuan a rawn vuan a.

 

“Min ngaihtuah lo la, tun hma pawhin rui chungin lawm kan tih thin. Tunah te chuan rui miah loin ka tel dawn ania, min ngaihtuah mah ta che” a ti a, ka lo nui lui ringawt.

 

Ka mut hnute chuan ka ngaihtuah nasa mai, min ngaihtuah suh tih vang ngawta inngaihtuah loh theih lah a ni der mai si lo a. Ka sana ka en a, dar 1 a ri thuak tawh, ka call ta ringawt a, a la chhang thei lo zui, thinrim ru teuh hian ka phone chu ka dah a, muthilh chu ka tum lui leh ta a. Egntin tin emaw ka lo muhil ve aniang, ka harh chuan ni in ka room chu a rawn chhun nasa tawh. Ka phone ka ban vat a, Rohlua message a lo awm a, dar 3 rik hma deuhin a mu fel chiah tih min lo thawn, ka tum bar a, morning wish pawh ka dah duh lo.

 

Chaweikhamah ka inkhalh chhuak a, a haw tlai si a, ka sawm buai peih vel ta lo. Ka thil thawn tur ka thawn fel a, hmanhmawh chhan tur ka nei tawh lo bawk a, ka thiannu dawrah ka lut kawi ta a, ani hi kan venga awm reng thin an ni a, quarter a awm thin an nih avangin veng dangah daih in an nei a, an sak zawh hnuah an pem a, a rem dan ang ang hian kan la inkawm ve zel tho.

 

“Tenun, min va tlawh khat em em” ka hmel a hmuh chuan a lo ri hluai a. 

 

Ani pawh bungrua a thleng thar a, a la inrem zo lo nasa mai. Ka awm chhung chuan ka pui ve ta a, a chang chuan hetia amah anga dawr siam law law hi ka chak thin a, mahse, tun ah rih chuan ka kaldan pangngai hian sum chu ka la lut hnem rihin ka hria a, hetiang reng erawh a ni thei lo ang tih chu ka hre ve tho.

 

“Tinge nang hi sorkar hna nghette hi I ngaihtuah miah loh a?” min han ti thawr a.

 

“Sorkar hnathawh tumin lehkha ka zir ngai reng reng hleinem”ka lo ti nghal zat.

 

“I thiam theih tehreng nen maw, I thluak ka ui” a ti leh hluai a.

 

“E, lungngai mah ta che, tunah hian ka chhawr tangkai lutuk”ka lo ti veleh mai a.

 

“Nizan chu ka nau bike racing naah a lo kal ru chu niin, ka man chhuak a, a buaithlak a nia” a ti a, a nau hi a khawvel mi ve deuh avang hian an buaipui veleh chak chak thin.

 

“A nazawngin an kal chuang em ni?” ka lo ti a, Rohlua ka rilruah a rawn awm nghal tho.

 

“Thla khatah vawihnih khat bak chu an ti lo a, mahse, chumi vang ngawta ngaihthah theih pawh a ni lo. Nula lepchiah tak tak hi an tel ve zel si a, chungte nen chuan lo dai pelh hlauh se a pawi dawn em a, chutiang kher lo pawhin a tha lo a ni mai”a ti hmarh hmarh a. Ka lo thaw ve vak ringawt. Rei vak lo hnuah ka haw a, ka haw hnuah pawh Rohlua’n min rawn la be lo a, a message pawh a la awm lo.

 

Ka insu a, chumi hnuah inchhung ka ti fel leh a, a ruk tak hi chuan hlauhthawnna hian min la chenchilh reng. Ka phone a rawn ri a, ka han ban chuan whatsapp message a lo nia, Rohlua hnen atangin a ni. A thu min rawn thawn erawh chuan min tina ngut ngut a, ka thaw a chham lo chauh.

 

*mu tui dawn lawm ni sweety..*

 

Chutiang thu min thawn ringawt turin engmah ka thawn lo a, tin, vawikhat mah sweety tiin min la ko ngai hek lo. Chutia ka inseh ruh lai chuan chu message chu a rawn delete ta chiah a, a chiang viau e, nizan khan tuemaw chu a va hmu ngei a ni. A nih loh pawhin kei hi kawp ka ni.