LALROHLUA 4

 

4

 

Ka phone a call rawn lut zut zut chu ka en liam mai mai a, tunah hi chuan ka be peih hlawl lo a ni. Ka inbual zo a, ei rawng bawl nan a la hma deuh bawk nen inhnuaiah chhukin ka thil thawn leh tur ka thliar fel a, ka buai ve viau mai. Inchungah thawm a awm a, ka ngaihsak lem lo. Ka nu emaw ka pa emaw an rawn haw tawh a nih ringin ka thil tih lai ka tih zawm mawlh mawlh a. Darkar chanve hnuah ka phone a rawn rik avangin ka han chho ta a, sitting room-ah Rohlua a lo thu a, min hmuh chuan a nui a, ka hmu lo der hmak. Amah kalpel chuan ka phone chu ka va chhang a,  ka biak zawh chuan inhnuaia kal leh mai tumin ka inher a.

 

“Tenun” tia min rawn koh chuan chiang fe hian ka va melh a, a hmel chu a nui deuh sung a.

 

“Sweety te inah I kal haw lam mi?” ka lo ti ngat. A nui khur ta chur chur a, ka ngei lutuk bawk si chu inhnuaiah ka chhuk thla hmawk hmawk a, min rawn umzui rang ngei mai.

 

“I thinrim kha ka ring reng a… chuvang nih hi ka lo kal vat” a ti a, ka bungraw rem lai chu min rawn tihpui nghal vat.

 

“Hetiang mai maia intih hi ka duh miah lo ania. I duh anih chuan I nun hmasaah I let thei, ka dang buai lo ang che” ka ti leh tawn tawn a.

 

“Amak thei, min ngaithla ve phawt la” a ti sap a.

 

“Enge ka ngaihthlak dawn? I insawifiahna maw?” ka lo ti hlar a.

 

“Te, mahni ngaihdan ringawt hi an kaltlangpui ngai lo. Engmah insawifiah tum ka nei lo, chutiang turin thil sual pawh ka ti lo a” a ti dam dup a, ka lo melh rum nghal. “Hei hi en la, kan thianho uanzia I hre mai ang” tih pahin a phone min pe a. A tirah chuan lak ka tum lo a, mahse, fiah ve reng reng ka duh avangin ka la tat ho.

 

“Jerry-a a nih kha. Noctification ah a message a rawn lang a, chu chu ka reply emaw ka tia, nangmah rawn text che ka tum lai tak a lo ni bawk nen ka tisual a nih kha” a ti a.

 

Jerry nen an in biakna chu ka en ta a, a lo ho duh viau. Nizanah an racing naah Rohlua a chak lo a, chung vel a mu thei em tih a rawn zawh velna a nia, ngeiawm deuha lo chhan let tumin a lo ti ve a, chu chu ka lo dawng leh si a lo ni.

 

“Chu pawh nise sweety tih kher a tul lo emai a” tih pahin a phone chu ka pe let a, a lo nui deuh vur vur.

 

“Phone-a rawn hrilh ai che chuan hetia hrilh che hi ka duh zawk a, ka rawn tlan thla nghal a nih hi” a ti a, a ruk tak chuan ka hahdam huai.

 

“I pa nen thil tih tur in nei a ni lawm ni?” ka ti a.

 

“Um, nei e. Ka hlau zawk che a, ka rawn kal hmasa a nih hi” a la ti zui.

 

‘I haw tlai si, kei chu khawvel deuha I nun reng chuan ka thiam dawn miah lo a nia” ka ti a, ka bulah a rawn thu a, ka darah a vuan a.

 

“Tenun, ka theihtawp ka chhuah ve tih chu I hria alawm. Mahse, ka nun zawng zawng vawilehkhata inthlak danglam vek tur chuan a harsa ve a ni tih min hriatthiampui la, zawi zawiin ka sim chho ve zel mai ang” a ti a.

 

“Ka hria alawm, mahse, I nu runluih tawh suh” ka lo ti a.

 

“Ka tan hian I va hlu tak, awm lo ta la engtin nge ka awm zel ang le?” a ti a, min kuah ta vawng vawng a.

 

Hun a kal ve zel a, harsatna em em tawk loin kan awm ve zel a, kohhranah phak ang tawk tawkin kan inhmang a, Rohlua pawh sawm ngaiah ka dah tawh lo. Ama thuin a inkhawm a, KTP activities hrang hrangah a tel ve vek tawh a, min fak veleh luam hlawm thin. Keimah vang a ni lo tih ka hre chiang a, Pathianin hna a thawk tih ka hria a, lawmthu ka sawi ve nasa thin. A chang chuan ka mihring rilru hi a lo chhuak ve thin, a sual laia engatan maha ngai lotuten hetia a rawn awm that leh hnua an han be tha vel chiam ka hmuh hian ka ngei thin. A hmel a tha a, a pian a dik thlup bawk si, keimah ngei pawh hian chan hi ka hlau ve reng.

 

“Ka rawn chhuk dawn” inkhawm ban chuan gate ah min lo nghak leh reng tawh a. Biak in bathlar atanga ka hawi thlak khan Zualite thianhoin an dinchilh kha ka hmu reng a, ka chhuk lawk duh lo a ni.

 

“Mut hma ka duh asin” ka ti a, a lo nui mai mai. Kan in lam pan chuan kan inzui leh ta nge nge a. Tunhnaiah hian a rawn leng tlem a, in lamah a buai ve bawk nen inhmuhna hun kan ngah lutuk lo. 

 

“Zing thawh hma I ngai leh em?” ka inthlak zawha a bula ka thut hnu chuan min zawt a.

 

“Naktuk zing chu ka mu rei thei” ka lo ti a.

 

“Hetia kual reng hi I tum mi?” a tih chuan ka ve melh a, a phone a lo bih a.

 

“Engtizawngin?” ka ti a, min zawhna ki chu ka hre reng tho.

 

“Ka sawi awmzia chu, hetiang reng hian I ti thei lo maithei a, hna nghet engemaw hi zawng la” a ti a.

 

“Ka tum ber chu sumdawnna lam khawih hi a nia, bul ka tan ve dek dek chauh a, hei aia zau zawk hi engemaw tih ka la tum zawk a, mahni tuina kawng zawh hi a tha mai lo mi?” tiin ka zawt.

 

A ngawi roh roh a, a hnuah a nui suk a.

 

“Hnathawh ka nei mang bawk si lo a, kan hma hun tur hi I ngaihtuah ve ngai em?” a ti a.

 

Ka chhang mai lo, a nihna takah chuan future plan hi ka la nei miah lo. Nula hausa nih hi ka mitthla nasa thei hle tih chauh lo chu.

 

“Kan ngaihtuah chho zel dawn alawm” ka lo ti ringawt a, min melh vung vung a, a thutak riau lehnghal. A hnuah a rawn nui ta a, ka awm a tinuam ve chiah.

 

A haw hnute chuan thil tam tak ka ngaihtuah ve a, a pa vang hian tun atanga reiloteah hmun dangah an awm a la ngai dawn tih ka ngaihtuah lai chuan engtin emaw hian ka awm. Hmun hranah awm ta ila kan boruak hi a tha reng kher lo maithei a, innei ringawt tur lahin kan la inpeih dawn lo nasa mai bawk si, ngaihtuah lo phawt teh ang.

 

Kan vengchhungah kan chanchin hria an awm ve nual a, thenkhat erawh chuan inkawm satliahah min ngai tho bawk. Kan KTP member te erawh chuan kan inkar an hre deuh vekin ka ring a, chumi vang erawh chuan kan inzui reng chuang lo. Heng hunlai hi Rohlua nen kan inkawp atanga thla sarihna vel a nih ka ring. A nunhlui a thlah ve zel a, biak inah a che tla tam a, a pa hlim hmel ka hmuh hian nuam ka lo ti ve em em ringawt. 

 

Zan khat chu kan inah a rawn leng a, inkhawm zan a ni lo a, ka chhungte erawh chu ka pute inah an leng a, Rohlua a rawn len avangin ka kal ve lo. A phone ka khawihsak a, ringhlel a khawih ka ni lem lo. Kan pahnih thlalak ka en kual mai mai a, ka la neih loh ka inthawn pah bawk a, chutih lai tak chuan message a rawn thleng a, en ka tum hran lo. Vawihnih lai a rawn thlen takah chuan a hmuh loh theih loh a, Zuali message a lo ni. TV ah inkhel a en a, a phone lam a ngaihsak hran lo a, midang phone lo ensak chu duh lo viau mah ila a rawn thawntu vang chuan ka en chak telh telh. Kan inkhawm ban hian biak in bula an dinchilh hi ka hmu zeuh zeuh a, chuvanga a message pawh chhiar chak ka ni.

 

*innu I rim leh tawh mi?*

 

Hei hi a message hmasa a ni a, a hnuhnung zawk ka chhiar lehnghal a.

 

*bialnu doctor chu I duh zawk lo mi*

 

Ka sa nghal pup pup a, bialnu a nei tih hre reng chungin midang a lo tihpui vel a nih chu. Ka thaw hawk a, ka thawmah Rohlua’n min rawn en vat.

 

“Doctor bialnu I duh em?” ka ti a, a nui suk a, TV lam a en leh daih.

 

“Rinzuali hian tunge tihpui che a tum a?”ka ti a.

 

“A thiannu a ni awm e, a sawi ve sek lehnghal” a lo ti tha mai a.

 

“Bialnu I nei tih a hre reng sia, I lo be tha deuh a ni lo maw?” ka tih chuan a ner sak.

 

“I duh duh danin chhang let rawh. Khatiang thu a rawn sawi khan ka la chhang let ngai miah lo” a ti a, ka ringhlel miah lo.

 

*bialnu nghet ka nei a, min lo hrethiam rawh* tih chu ka thawn ve kher.

 

Reiloteah a rawn reply leh a.

 

*Burma bungraw thawn kual vel mai mai bialnu neih kha I inhmeh lo* nui lai lem a rawn dah tel bawk.

 

Ka chhan zel chuan ka thin a rim mai dawn a, chat ka delete a, ka ngaihtuahna kilkhatah erawh tha natna a awm reng.

 

“I hau hrep em?” nui chungin a rawn ti a, ka tum hmuk a hmuh chuan min rawn thuthnaih nghal. “Te, engahmah ngai suh. Enganga doctor hlawhtling pawh nise tuman an tluk ngai lo ang che” a ti dam duai a, ka hnukte a ulh hialin ka hria. 

 

Ka tuina ber ka thawk tiin ka lungawi em em thin a, vawikhatmah hi sorkar hnathawh hi ka la chak ngai lo. Ka putea hi department pakhatah a hotu ber a ni ve a, vawitam an office a hnaruak min kawhhmuh tawh, thawh ka tum ngai lo hrim hrim. Tun tum erawh chu mahni thiamna hmang ngeia sorkar hnathawh ka chak ve ta tlat, chu erawh sawi chhuah kher ka tum lo.

 

KTP sport a awm dawn avangin group hrang hrang kan tang ve hle a, Rohlua pawh an group tan a thawhhlawk dawn viau. A tih that duh tak tak chuan thiam thil lah a ngah phian bawk sia, ka chhuang ve reng. Thil pakhat erawh hmuh ka ti ngang mai. Zualite nen an group a inang a, a thiannu doctor a tih lah kha kan vengah in a rawn luah tawh a, group khat an la ni lehnghal. Tunah rih chuan ka mit tikham thil ka la hmu lo a, thil engemaw thleng tur ang hian ka feel tlat.

 

Sport tan zan a ni a, group thutna bik a la awm lo a, Rohlua nen kan thu tlang a, kan hnungah Zualite thianho an thu tih a hnuah ka hre chiah. Rohlua chu a khat tawkin a rawn kheuh reng a, thil ho te te a zawt reng a, ka lo ning viau mai.

 

"Ban chu  Eli hi thlah ila" a rawn ti leh sar sar a.

 

"Ka hman lo" a lo ti hmuk, a ning ve deuh aniang.

 

"I van sual tak, in nu i thlah duh pawhin kan lo nghak thei reng che sia" a tih chuan ka ngei lutuk chu ka han hawi chho a, a lo la nui zui.

 

"Thlah ringawt a ni lo a, len te pawh a ngai ve lawm" tih pahin ka kut a rawn vuan a, hnunglam ami pawh a ngawi ve ta. Keichu khatiang reng kha chu ka peih dawn lo tawp mai, mi ngaihzawng nei tha lai intihbuai tum tlat hi ka hrethiam ve lo. 

 

Zan khatna a ni bawk a, kan rei lutuk lo. Mipahoin seat rem that an ngaih avangin pawnah ka lo nghak a, rawn len a tum tlat avangin ka lo nghak a ni. Rei vaklo hnuah an rawn chhuak ve ta a, kan in lam panin kan inzui a. 

 

"Zuali hi chu a over ve deuh mah mah" a ti hmuk a, a lung a la awi chiah lo tih ka hria.

 

"I luck em a ni" tiin ka lo nui a, min melh zawk pahin ka kut a rawn vuan a.

 

"Ka sual lai khan ka luck daih zawk" a lo ti mauh. Ka va melh deuh hrawk a, a mitko a lo san deuh ak.

 

Eli hmel kha ka mitthlaah a cham reng, zep lo ah chuan a hmel a tha thlawt. Mipaho mit fukna a ni tih ka hre ve reng a, khawvel thil tak pawhin doctor meuh chu ka tluk rual a ni lo tih ka hai lo. A vun ngo phet te, a hmel nelawm zet te kha ka ngaihtuah zui lo thei lo a, tunah mai chuan Rohlua tan hnar a la har hauh lo ang, a rei anga enge a an dawn tih chu ka lo ngaihtuah daih.