LALROHLUA 5

 

5

 

Zotlangah ka thiante inneihnaah ka kal a, ka kal tur thu hi a hmain Rohlua ka hrilh tawh a, zing atangin ka biak theih loh avangin ka hrilh nawn tawh lem lo. Thianhlui inhmukhawm ta chu kan hlim ve khawp mai. Hun rei tak inhmu tawh lo kan ni hlawm a, inneih zawh hnuah pawh haw mai loa hun hman dan tur kan han rel chhunzawm a, kan phur tlang bawk a, a innei berte pawh kan ngaihsak zui lutuk lo. Hengho zingah hian ka ex Temuana a tel ve a, kan school kalho laia kan inhmuh bak tun hi kan inhmuh leh hmasak ber a nih ka ring. Kan serious lo dun ve nasa a, tuna kan inhmu leh pawh hi kan innuih liam vel mai mai.

 

“Kan nih lai khan tiang hian chhiat loh tur che alawm” a ti vel, ka va ngei tak.

 

“Nangni pahnih kha in lo ni leh ringawt ange aw” Muanzoa chuan a lo ti hluk a.

 

“Ka duh tawh teuh lo e” ka lo tih chuan Temuana tha a lo na ngang mai.

 

“Inngaizawng thinho hian thla la ve teh reng reng ang u” Zohmaa’n a lo ti bawk a, ani phei chu a ex te pahnih an la awm lehnghal, kan va hlilmpui tak.

 

Kan leng kual a, tumahin ruai theh lam kan ngaihtuah tawh lo tlang a ni ber ang chu, khua a thim ta mai a, ro hran kan han rel leh nak nak a. Kan chhungte bulah chaw ei nghal tura insawi kan lo nih deuh thup avangin dineout chu kan rawt leh chuk chuk a, kan inzui leh ta dam dam mai. Scooty keng loin Zorama rualin ka kal a, Temuana kutah min dah zui nghal hmak. 

 

“Bialpa I nei em?” kan tlan lai chuan min zawt a.

 

“Ka neih ve bawk lo in” ka tia, ka lo nui a.

 

“Then rawh, inngaizawng tha leh ang” a ti nghat.

 

‘Awi, ringawt a che. Kan nih tawh kha ka duhtawk viau e” ka lo tih chuan a bike chu a khalh muang deuh ngawt a.

 

“Tlan chak rawh, kan thianten min tlansan zo ania” ka tih chuan a ding chhunzawm daih.

 

“Tenun, ka ti tak tak ania. Kan inzui ve lai khan kan serious lo tih ka hria, mahse, bul tan that hi ka duh tak zet” a ti a.

 

“Ka uang bik hleinem, bialpa ka nei” ka lo ti a, min melh deuh vung vung.

 

“In serious viau mi?” a tih chuan ka lo bu nghat a.

 

“A va ho e aw. Ka nghak mai ang che” a ti a, a helmet a khum a, a tlan chhuak leh nghal.

 

Kan chaw ei chhung zawng chuan ka awm a nuam miah lo, Temuana min en dan hi ka duh chiah loh vang a ni ngei ang. Rohlua nen kan intawn hma thil kha nise chuan ka let leh duh maithei, a lo puitling ve tawh tak zet a, chu bakah ka dream boy dik tak a nih vang a ni. Khang hun lai khan kan invengthawng tawn tih ka hria a, serious kha kan duh lo ve ve. A chhan chu hmun hranah kan awm dawn tih kan hrechiang a, distance a inngaihzawn kha khang hun lai kha chuan kan ngam lo te pawh a ni ang. Chutichung chuan pawl sawmpahnih kan nih chhung zawng kha chu kan inkawp ve ang lawi a, kan thiante pawh hian tun thleng hian an la sawi bang thei lo.

 

Kan thian thenkhatten len leh an rawt na in haw ka duh tawh avangin Temuana’n kan in thleng min thlah a, kawtah kan inmangtha a, a kal leh nghal a. Kan kawmchhak step atanga Rohlua rawn chhuk ka hmu nghal a, ka phu deuh zuk lehnghal.

 

“I haw ve chiah a?” tiin min rawn be nghal a.

 

“Um..” tih pahin ka lo nghak law law a.

 

“Ka phone tlang thei bawk si lo che a, ka ngaih a tha lo hman deuh a, in inah lokal tawp ka lo tum a” a ti a, a rawn thleng chawpchilh nghal. “Tunge rawn thlah che?” a ti a, ka hmel chu uluk fe hian a thlek bawk.

 

“Ka classmate hlui, inneihnaa rawn kal ve a nih kha” ka ti a, inchhung lamah kan inzui lut nghal a.

 

Ka chhungten eng engemaw min lo zawt luam a, inthlak turin ka room ka pan a, ka u a awm tho avangin ka inthlak pawh ka hmanhmawh lem lo. Zep loah chuan Temuana ka hmuh khan engtin emaw hian ka awm ve chiang a ni. Khumah chuan ka thu a, ka tum miah lohin ka mitthlaah a rawn lang a, ka lu chu ka han thing vak ringawt a. Rohlua tan a fair lo tih hriain ka hmai ka phih sawk sawk a, thutkhawmna lam panin ka chhuak ta vat a. Rohlua bulah ka thu a, ka u a awm hi chuan sawi tur an ngah thin a, ka lo inrawlh ve chiam duh lo thin. Ka nu leh pa an mu tawh a, ka u pawh room lam a pan tawh. Thingpui hang ka lum a, inkhel a en dauh dauh a, ka va melh leh zauh thin a, Temuana tello chuan hei leh chen hi ka awm tawh a, Rohlua erawh chan ka hlau ngawih ngawih tih ka hrethiam ta, engmah ngaihtuah buai tur a awm tawh lo e.

 

Thingpui in pah chuan ka kut chu a vuan a, kan pahniha kan awm hi chuan ka kut vuan lo hian a awm thiam lo a ni ang, min vuan deuh chawt thin. 

 

“Engati nge min vawn tlat zel a?” ka tih chuan a rawn hmer deuh salh a.

 

“I kalbo daih ka hlau a” nui chung hian a ti a.

 

“I va ho tak” ka lo ti nghat a.

 

“Ho lo e, a chang hi chuan ka mumang mai a ni ang tih ka hlau thin a” tih pahin a lamah min pawt hnai a. 

 

“Eng ber nge I mumang a nih I hlauh?”

 

“Ka bialnu I ni mai hi awih har ka la ti deuh thin a. A hma khan Jona-a nau ang bakin ka hre miah si lo che a. Tunah erawh chuan I telloa awm ka ngaihtuah ngam leh tawh miah si lo” a ti a, ka lo thaw hak a.

 

“In awm loh hun tur ka ngaihtuah hian ka rilru a buai deuh thin a” ka lo ti a.

 

“Ngaihtuah lo ang, a hunah chuan thil a fel ve duak mai ang. Kum thum dawn hun kan la nei alawm, chumi chhung chuan thil tam tak a thleng thei alawm” a ti a.

 

A sawi dik khawp mai, hemi chhung hian enge kan tawn dawn tih a hriat loh, keini pahnih pawh hi hetiang reng hi kan ni lo maithei a, chumi ka ngaihtuah erawh chuan ka na deuh ngut ngut. Rohlua hi ka lo hmangaih reng tawh tihna nge, a telloa nun ka ngaihtuah hian a zuamawm loh riauin ka hre tan tlat.

 

Synod committee pawimawh neih turah a pa hruaiin a zin daih a, zan thum vel chauh cham tura kan ngaih kha a pi a lo nuamsam lo deuh nen karkhat dawn an cham ta mai a, a hrehawm ve veng veng. Bungrua a rawn thleng tha lutuk lo a, duh angin thawn chhuah tur pawh a awm tha thei lo. Ka u in dawr siam a lo sawi ve deuh reng bawk nen pawi ka ti lutuk tawh lo. Hetiang hun hi a la thlen ka ring tho a, chuvangin dawr tur pawh ka pa hian a lo buatsaih ru reng tawh. Kan in mi luah lai chu a chung kan sak belh a, chutah chuan insawn chhoh tiring a hnuai chu dawr turin kan siam ta a, pawisa ka lo khawl ve nual tawh avangin ka pa te han pun buai chu ka duh bik lo. Ka duh dan ang takin a chhung chu ka khawih that tir a, tih vek vek chuan dawr tha tak neih ka duh ve tlat.

 

Kar khat vel zet chu dawr siamthain ka phe buai ve char char a, ka hah thei hle a, zan lamah phei chuan biak tlak ka awm meuh thin lo. Rohlua te rawn haw ni tih ka hria a, an rawn chhuak tih a rawn sawi a, a bak chu kan inbe lo. An thlen hunah min hrilh mai ang chu ka ti mai a, ka be ta lem lo. Thim dawnah ka haw a, zawh fel kan duh tawh avangn mistiri pawhin min khawih rei pui a, kan zo fel ve ta hram. Biak in bul ka thlen chuan ka rin loh deuhin Rohlua ka hmu a, ka nui nghal var var. An rawn thlenna a rei deuh tawhin ka ring a, zanah a lo kal tho ka rin avangin ka va au hram ta lo. Ka tlan liam tep tihah side glass atangin ka va melh leh hram a, ka tlan lai chu ka ding nghal chawt. Biak in sir lam atanga hmeichhe kal mek chu Eli a ni chiang lutuk. Ka va tlan let leh mai dawn em ni ka tih rilruk mek laiin Eli chu Rohlua bulah chuan a ding ta a, an inbia a ni maithei, rei vak lo hnuah quarter lam pan chuan an inzui thla ta a. Ka sa nghal phatin ka hria, min rawn hmu ve ta se engtin nge a awm ang tih ka ngaihtuah a, thinrimna hian min tuam nghal help help. Ka inhumruh a, haw ka ngai tih ka hrechhuak bawk, hmanhmawh zetin ka tlan a, in ka thlen hnu pawh chuan ka la normal thei lo.

 

Ka chaw ei chu ka puar leh puar loh pawh ka hre lo, ka room lam ka pan vat a, ka phone chu ka hmet eng leh zauh thin. Min rawn be lo a, message takngial pawh a awm lo, chungte chuan ka thinrim a tizual a, ka na nget nget. Ka lo muhil sek ni tur a ni, ka phone riah ka phu zawk a, ka han ban nghal vat a. Rohlua a lo ni a, ka chhang dawn nge chhang dawn lo tih reilote ka inngaihtuah.

 

“Hello”

 

“Chaw in ei tawh em?” engmah thleng lo ang maiin a aw a rawn zangkhai a, ka thin a lo rim tung.

 

“Ei loh a hun ami?”

 

“A va mak hmuk hmuk ve. Ka rawn kal dawn chiah a, thil ka lo hawn che a nia” tiin phur zet hian min rawn bia a, ka lungawi lohna chu dahthat phawt ka tum.

 

Ka tho a, inbual turin bathroom lam ka pan a, engmah thuchiang hreloa thinrim ringawt chu a fuh berin ka hre leh ta lo. Ka inbual zawhah thleng sil turin ka chhuak thla a, ka nu in a lo sil vek tawh chu niin, a zia lo ka ti deuh.

 

“Tunlai chu I hah thei si a ka tia, ka lo chhawk che a nih kha” a lo ti sam et lehnghal.

 

Ka pa thingpui ka lumsak laiin Rohlua a rawn lut a, ka hmuh chuan ka ngei deuh thut. Ka melh deuh ram ram a, engmah lah chu hre awm angin a awm duh miah lo lehnghal. Ka chhungten an zinna chungchang vel chu an zawt a, a pi erawh hma a sawn lutuk lo niawm tak a ni. 

 

‘Ka rawn inkhalh chau ve deuh aniang, zanin chu mut hma ka duh a” darkar khat vel a thut hnuah a ti a, ka hrethiam ve reng.

 

“I thu thu ni mai” ka lo ti ve mai a. Pawn lamah thlah turin ka zui chhuak a, a kekawr ipte atang hian bawm tetakte hi a rawn phawrh chhuak a.

 

“I ngaina em ka hre lo a, ka rawn hawn ve duh hrim hrim che a” tih pahin min pe a, ka han en chuan silver thi nalh zet hi a lo ni.

 

“Engmah a ngai hleinem. A mawi bawk si, I inseng teuh dawn a nih kha” ka han ti a.

 

“Ka la inseng ngai hleinem, ka tih ve theih tawk a nih kha” a ti a, a nui sang a. “Khawi ka lo awrhtir ang che” a tih chuan ka pe vat a, min awrh tir a, ka nghawng hnunglam chu a rawn fawp zeuh a, ka lo ip deuh zawk.

 

“Ka lawm lutuk” tih pahin ka inher a. A locket chu ka khawih niap niap a, ka hlim veng veng mai.

 

“I chhungte mut hun kha ka nghak thei tawh thlawt lo a, hei ka ngai bawk sia” tih pahin ka hmui chu a rawn khawih thawi thuak a.

 

“Miin min hmu ange” tih pahin a kut chu ka lo vai sawn a. 

 

“Tumah an awm loh hi”tih pahin kawngpui lam chu a hawi kual vel a, chutah min pawt hnaih dawrh pahin min fawp ta a, rei erawh a ni lo. “Ka addict dawn tlat” tih pahin a nui var var a.

 

“I mut hunah I lo sawi dawn nia”ka tih chuan min kuah a, thui lote ka thlah leh hnuah kan inthen ta a, a kal liam thleng ka thlir a, a ngaihawm nghal vawng vawngin ka hria.

 

Mutna ka siam zawhah ka mu nghal a, Rohlua pawhin a mut nghal thu a rawn sawi a, a chau viauin ka ring. Whatsapp status ka en kual a, nilenga ka en hman loh avangin a lo tam viau lehnghal. Zuali status ka en chuan skip phei pawp pawp tumin ka hmet hman a, hmuh ka neih avangin ka back leh a, ka en tha leh ngat. 

 

*monu hual kan ti thei tawh mai angem* tih a caption ah a hmang a, Rohlua te ina Eli chawei lai thlalak a ni. 

 

Ka thin a sa u tut a, ka na nget nget, ka thaw te chu a chham mai dawn hian ka hria.