LALROHLUA 6

 

6

 

Screenshot ka thawn chu ka han ennawn leh a, ka thin a rim tet tet bawk nen ka message min chhang lo te chu ka thin a rim hlur. Zingah morning wish a lo dah a, ka thil screenshot chungchang chu engmah a rawn sawi zawm lo. Engvangin nge Zuali hian ka hmuh loh hi a hlauh theih em em tih ka ngaihtuah a, nizana ka view zawh hnu khan a status kha a delete leh daih.

 

Dawrah ka inrem fel nileng a, in lama ka bungraw kawlho ka thiar phei a, ka buai nileng ve chiang hle. Ka u office bangin min rawn pui a, in kan thlen chuan khua a thim vel chiah. Ka inbual zawh rualin ka phone a rawn ri ral ral a, ka han ban vat a, Rohlua a ni. Vawiin a reh vang vang a, tunlai chu a awm dan hi ka thin a tirim deuh reng.

 

“Aw” ka lo ti hmuk a.

 

“Aizawlah ka chhuk thut a, hei ka thleng fel chiah a, ka lo hrilh nghal che” a tih chuan ka thaw hak a, hei pawh ka duh loh dan bawk.

 

“Aw le, a that chu” ka ti nghat a.

 

“Thinrim suh aw, ka pi a zual thut a, inrin lawkna pawh awm loin kan kal thut a, I buai dawn sia ka tia ka rawn hrilh buai duh ta lo che a” a ti leh mai a. 

 

A pi hi a damrei a rinawm tawh lo tih ka hre ve a, ngaihtuahawm chungin an rawn hawsan kha a nia, an kal leh nghal mai a ngaih em em erawh ka lo ring hran lo. A rilru a hah ve te ka ring bawk nen ka thinrimna chu dah that zel phawt ka duh.

 

Ka roomah lehkhabu ka chhiar a, chhun lamah ka hah ve deuh bawk nen mut hma ka duh avangin chaw eikhamah ka room lam ka pan vat a, chau viau e tiloin muthilh mai erawh a har. Ka nuin min rawn koh avangin min mamawhna a nei a nih ringin ka va chhuak a, rin loh lutukin Temuana leh Muanzoa an lo awm reng. Roomah lut lehin ka kawrlumte ka ha leh a, ka va chhuak ve ta a. Sitting room lamah kan thu a, kan chhak lawkah ka nu ten TV an en a.

 

“Kartawpah hian reunioun neih kan tum kha kan rawn bawhzui a”Muanzoa chuan a ti a.

 

“Engtikah?” ka lo ti hu a.

 

“I mak thei, group te kha en ve la” amah bawk chuan a ti leh a.

 

“Ka buai ve thei lutuk a, group pawh hi ka en hman thin lo alawm” ka lo ti ve mai a.

 

“Kartawpah hian Bibi te farm ah renunion neih kan rawt a, group a reh deuh ho chu an inah kalchilh ila kan tia, Temuana nen kan chan I ni a, kan rawn kal a nih hi” a ti a.

 

“Hun I lo insiam ve hram ang chu” Temuana chuan a lo ti a.

 

“Nia, theih hram chu ka lo tum dawn nia,  theih loh tak leh inhriatthiam ah kan tia nga” tiin ka lo insawikhalh lawk a, ka hman ngei ang tih ka hriat loh vang a ni.

 

“Chutiang a theih loh, nangmahniho vang alawm kartawp kan rawt hram hram” Muanzoa bawk chuan a lo ti a.

 

“Ka dawr ti thar hi ka buai ve lutuk a, nileng hi a rei lo mah mah thin a” nui chungin ka lo ti a.

 

“I kal lohte chuan kan phur na a tlahniam nasa dawn emai, tiraw thianpa”Muanzoa chuan a thianpa chu a han melh deuh zauh a.

 

Thingpui an in zawh hnuah kal lehna tur an neih thu sawiin an chhuak ta a, kal ngei tur chuan min chah dun mawlh mawlh a, hun ka neih chuan kal ve ngei pawh ka tum e. Ka roomah mu turin ka lut leh ta a, ka mut lah chu a chhuak lo telh telh a. Rohlua nen kan in text a, a patea te ina a thlen thu leh a nu leh pa chu a pu te inah an awm nghal thu a rawn sawi a, motor khalhtu ber a ni bawk nen a chau viauin ka ring. Tunhnaiah ringawt pawh a long run nasa ve emai.

 

Kartluanin ka buai a, kartawpa reunion neih tur pawh ka lo theihnghilh thak. Dawr kal tumin garage atangin ka scooty lak chhuah ka tum a, kan kawta Temuana rawn tlan lut ka hmuh rual chuan ka hrechhuak chiah.

 

“Awi, ka lo theihnghilh chiang lutuk” ka lo ti hluai a.

 

“Ka ring reng a ni. Ka rawn hruai dawn che, insiam pawh I ngaih tawh loh kha” tih pahin a bike a tangin a rawn chhuk a.

 

“Ka chhungte pawh ka la hrilh lo reng reng” ka tih chuan inchhung lamah kan inzui lut a. Ka nu bulah thil awmdante sawiin ka thawmhnaw chu ka han thlak leh hram. Bibi te farm kan va thlen chuan kan thiante an lo awm kim deuh vek tawh. Kan vaiin kan kim tihna a nilo a, a tam zawk chu hmun hranah an awm darh tawh a, khuaa awm remchangho kan ni deuh ber.

 

“Thlamuan, hetah lo kal ve reng reng teh” Bibi chuan Temuana chu a lo ko lawng lawng a, midang an lo nui thaw hlawm a.

 

“Vawiin chu min lo ko buai su” Temuana’n a tih chuan an nui ham ham.

 

Bibi te farm chu a nuam ngang mai, a vawh em avangin tui kan cheng peih lo a ni mai a, a hmun a nuamin a thianghlim si a, picnic spot velah ka awt. Mipa thenkhatin chaw hmeh an buaipui a, a thenin in tur an lo buaipui bawk a, hetiang hunah hi chuan kan indaihzai thin reng a ni.

 

“Beer kha I la in lo tluang zel em?” Puitei’n a ti a, ka lo bu nghat a. “Khawvel hi chen ve deuh teh” tiin min fiam chhunzawm a.

 

“A ho e a, beer in kha khawvel chenna a ni chuang lo” Temuana’n a lo ti hluk. Kan hawi thap a, engtik laiin nge kan bulah a lo awm ka hre miah lo.

 

“Thlamuan, I in la strict ve khanglang elaw?”Eleni’n nui ar ar pahin a lo ti a, ani pawh a khi ve suk.

 

Ka haider mai pawh a, thianhlui leh inhmelhriat satliah ang chuan hepa hi a awm miah lo tih ka hre reng. Ka bulah a tal nileng thak a, amaha ka duh em em thin kha a la pangngai reng, hetiang nikhuaah hian boruak a zo lo ngai lo a, ruihtheihthil lakah a inthiarfihlim ngam thin hi hman atanga ka duh thin kha a ni. Mipaho an bo duak a, chawhmeh a vil hrat hrat a, kan thian hmeichheho in beer dawm far pahin an chhaih deuh reng bawk. A lo nui veleh sak zel a, a khat tawkin min melh deuh reng bawk.

 

“Temuan, lokal lawk teh” tih pahin Muanzoa’n a rawn kai chhuak a.

 

“Hrai ru ve hrim hrim teh u” Bibi’n a lo tia, an nui zui dar dar.

 

An kalna lam chu ka va melh zauh a, an hrai rui tak tak ang tih ka hlau. A va awm rei phian lehnghal a, Muanzoate ho khan an lo ti tak tak ang tih ka hlau. Ka ding thut a, an kalna lamah chuan ka va kal ve ta ringawt. Thlam piah ka thleng chiah tihah amahin a rawn phei a, ka hmu hmasa zawk, ka inher vut a, kal leh mai tumin ka pen vat a.

 

“Tenun” 

 

Ka hre lo der ringawt, a nui ri hak a.

 

“Min lo nghak la” tih pahin min rawn umphak chawpchilh nghal a. “Min ngaihtuah ami?” a tih chuan ka lo duh lo tawp, engvangin nge ka va kal kher.

 

“A teuh lo” ka lo ti hluai a, a nui var var.

 

“I chhungten an ngaihtuah che ngem? Chaw ei an la ngaihsak lo hlawm bawk sia” min ngaihtuah zet hian a ti a.

 

“Ngaihtuah lo ang, ka kalna tur an hria alawm” ka lo ti ve vat.

 

Dar 7 velah chaw kan eikham fel ve thei chiah a, awm khawtlai an rawt chu hre lo derin kan haw san a, an kai ve hlawm tawh bawk a, kan haw tih pawh an hre kher lo maithei. In thleng Temuana’n min thlah leh a, leng lut tura ka tih chuan min hnial lo ve tehmial. Inchhungah kan inzui lut a, khua a vawh deuh var tawh avangin ka chhungten heater an lo ai a, ka u pawh a leng lo ve tehmial. Inah a awm khat ve a, inkhawm loh zanah pawh nula rimin a chhuak deuh ngei ngei.

 

“I awm ve tehmial a” tiin ka fiam a.

 

“Hmeichhia hi chu han rehsan ve deuh thin hi in ngai alawm” min lo tilet a, ka hmui ka lo tihpawrh khum.

 

“Thingpui pawh kan la in hleinem, han lum nghal la” ka nu in a lo ti a. 

 

“Rawn ai hnai ve la” tiin Temuana chu a han be nghal a, chair hniam inchhawp chu banin a ai hnai ve nghal a.

 

Thingpui ka lum laiin Rohlua’n min rawn call a, a pi damdawiina an luhpui thu min rawn hrilh a, a riak ve dawn niawm tak a ni. Chhun lama ka hun hman dante min zawt a, ka hrilh ve nghal a, ka haw deuh chiah tih ka sawi chuan a ngawi deuh roh roh a.

 

“Ka awm loh lai chuan lo chhuak vak suh aw” a rawn ti, ka nui ru sak a.

 

Kan chunga an ngaih a that lutuk a, kan awmdan apiang min enliam hi chuan ngaih a tha lo let duh zawkin ka hria. Hetianga thikthu an han tihchhiatte hian a nuam ve mai mai a, ka beisei ve reng thin, a uar lutuk loh thil a nih avangin a tih chhunah hi chuan ka hlim pui thei lutuk.

 

Thingpui in hnu rei vak loah Temuana a haw a, chumi zan atang chuan huat tur awm miah si lo hian min rawn be fo a, whatsapp-ah min rawn bia a, ka chhang vek ngai lem lo a, min rawn call zeuh zeuh bawk. 

 

Karkhat an chamnaah chiah Rohlua pawh a pi a thi a, a tuar em em a, hnem dan ka thiam tawk lo chu ka inhaw hle. A pi thih tukah zan rei tawh takah min rawn bia a, a tawng dan chu a rui tlatin ka hria. Hun rei tawh tak zu a in tawh lo a, a in leh a nih vaih chuan a lut thuk leh ang tih hlauhna ka nei.

 

“Rohlu”

 

“Enge bae?”

 

A tawng vel chu over hi ka ti khawp a.

 

“I rui mi?”

 

A reh vang vang. A hnuah a rawn thaw ri ta halh a.

 

“Tenun.. min hrethiam rawh aw. Ka bulah chuan awm la hetiang hi a ni miah lo ang tih ka hria” inthlahrung deuh hian a ti a.

 

“Rohlu, ka awm emaw ka awm lo emaw, I tum tak tak leh tak tak loh inkar zawk a nih kha” ka ti fak a. Dik tak chuan ka tah a chhuak ut ut, a lakah hian beiseina ka nei sang ve asin maw le.

 

“I rilru a na dawn tih ka hria, a pawi ka ti lutuk” a ti sap a.

 

“I pi in thlah liam zo chiah a, kha vang hrim hrim pawh khan I ti mak ka ti” ka ti leh hram a.

 

“Min hau lo teh, ka ngai ve em em che a” a tih chuan inhauh vakin awmzia a nei lo tih ka hria a, ka chhunzawm duh tawh lo.

 

Nihnih hnuah an rawn haw tawh dawn tho a, hmaichhana zilh chu thain ka hre leh zawk. Ka muhil thei lo chu ka tho a, ka tawngtai leh ringawt thin. Zanin zet chu Lalrohlua vangin ka nunphung a buai zo vek a nih hi. A nun hi insiamtha tak tak tawh se ka ti tak zet, a thil tawn leh hun tawnin a tih danglam mai mai theih loh tur angin awm se ka duh. Whatsapp ah ka lut a, ka rin loh deuhin Rohlua a lo online vu a, min rawn biak loh avangin biak pawh ka tum em em lo. Out leh mai ka tum lai chuan status a rawn dah a, a pi ruang bula a awm lai leh Eli’n a dara a vuan lai ngei mai chu, ka view rang khawp mai, chu veleh rang em em hian a rawn delete a, ka view tih a hmuh hman pawh ka ring lo. A tihsual a nih ka ring a, a pi ruang bula an chhungkaw thlalak a rawn dah chhunzawm leh nghal a, view kher lo pawha ka hmuh theih avangin ka view duh lo, ka thin zawn erawh a sa thla pap pap.