LALROHLUA 7

 

7

 

Nithum chhung chu Rohlua ka be duh tawh lo a, message nen call nen a rawn ti tluk tluk thin a, ka be chak hlawl lo a ni ber mai. Eli chungchang engmah min hrilh ngai loh vangte hian ka thin a rim a, ka thinrimna leh lungawi lohna a hriatthiam ngai loh vangin ka thin a rim bawk. Ka u phone atanga min rawn biak a tum fo bawk a, ka chhang duh chuang lo. Vawiin hi an rawn haw ni tur a ni a, chu pawh ka ngaihsak peih lo. Dawr ka nghak a, bungrua ka ngah vak loh avangin chah tur ka inziak fel a, ka bungraw thenkhat a tang bawk nen ka buai ve viau mai. Chawhnu lamah Temuana a rawn leng a, ka mood a fuh chiah lo tih a hre ve aniang rei pawh a awm lo. Tunlai chu thinrimna tur hi a tam lutuk a, ka hlim thei lo. Ka nu office bangin min rawn sawm haw a, dawr kan khar laiin kan kawtah car a rawn ding a. Ka va hawi chuan Rohlua te an lo ni, min hmuh chuan a nui var var a, a chhungte an awm ve si a, za lo deuh hian ka lo nuih let.

 

“Zanah ka lo phei ang” a rawn ti a, ka lo bu nghat. A nu chu a hnungah a thu a, min rawn melh zawk a, a hawisawn leh nghal. A pa erawh chu ka nu nen an inbe luam a, zan lama ral tura len an tum thu te a sawi a, chumi chhung chuan Rohlua’n  min melh char char.

 

Kan haw kawngah ka nuin Rohlua fel ta chu a thaw a ven hawk thute, a pa a lawmpui thute a sawi luam a, ka ngawi reng. Hmanzanah a rui tih thu phei chu ka sawi ngam lo hrim hrim. Engtin nge ka nu leh pate hian an ngaih ang ka hre lo a, kan inkawp thuk an ring lo nge engmah ka hre lo, an dodal thu an sawi ngai lo a, chuvanga thlamuang taka inkawp pawh kan ni a, ruihtheihthilah fihlim lo leh ta se chuan min zilh ka ring. In kan thlen hnuah rawng kan bawl a, ka u leh ka pa pawh an rawn thleng ve deuh nghal mai a. Ka pa hian inchhung che tur kan indaih lo deuhin a hria a, thingtlang lama kan chhungte bulah nula min ngaihtuahsak turin a va ngen a, naktuk hian a rawn thlen theih hmel. A hma kha chuan inchhung enkawl nen ka kawp thei vek a, tunah erawh dawr nghah lo ngai ve bawk nen ka hnial duh ta lem lo.

 

Zanah ka nu leh pate Rohlua te in lam panin an chhuak a, an chhuah hnu rei vak loah Rohlua a rawn thleng ve bawk. Thei chi hrang hrang min rawn hawn sak a, meilum bulah min si chet hian a rawn thu a, ka thinrim tih a hre leh tawp lo aniang.

 

“Ka call ngun che nen I la ngai si lo a, message min chhang ngai bawk si lo a” a ti a.

 

“Nia, ka chak vak lo a” ka lo ti ringawt.

 

“Engati maw? Min be peih lo maw?” a ti hu a, ka thinrim lutuk tur chu ka inbengdai hram hram.

 

“Eli chu a va rawn che tha awm ve” ka ti nghat a.

 

“Enge chet thatna tur awm a, ka pi thih ni khan a lo kal ve a ni mai” a ti a, a khi sung mai.

 

“In ina chaw a ei thute kha ka lo hria a” ka ti leh a.

 

“Ka nu in a lo sawm alawm maw le, I thinrim ka hlau a, ka sawi ngam lo a, I hre leh tho sia” a la  ti deuh deuh.

 

“Rohlu”

 

“Kha.. i thinrim dawn tih kha ka hria alawm”tih pahin ka kut a rawn vuan a. “Tenun, dik tak chuan hlim hi ka duh a, kan pahnih inkarah pawh nise hetiang vanga lungawi lohte, inhauhte hi ka duh lo a. A theih hram chuan thinrimna tur thil hi chu pumpelh ka duh a. Ka nun hmasaah lungawi lohna tur leh thinrimna tur hi a tam tawk tawh a, nangmah nen hi chuan hlim tak zela awm hi ka duh” ati dam dap a.

 

“Ka hrethiam lutuk chutiangte chu, mahse, ka sawi awmzia zawk chu I chunga thil thleng mekte hi I hnen atang ngeia hriat ka duh. Midang kaltlanga hriat hi ka duh lo” ka lo ti a.

 

“Aw le, ka tihpalh. Ka hrilh che chuan I thinrim mai mai ang tih ka hlau a, chuvang chu alawm” a ti a. “Eli chungchangah hi chuan chiang deuhin ka sawi tawh kha, ani ai chuan ka thlang zawk che. Chuan, Zuali hian min rawn sawipui hi a tum reng bawk a, amah Eli lah hian ka nu a tilawm thiam si a, ka ning ania” ati ta a.

 

“I nu chuan monu doctor a awt ve bawk ang chu” rilru na ru deuh hian ka ti a.

 

“A awh leh awh loh lam ai mah chuan keimah hi ka pawimawh a” a lo ti nghal vat.

 

“A chang chuan bul kan lo tan dun hi ka inchhir tep thin” ka ti hlawl a, ka sawi tum pawh a ni chiah chuang lo. Ka kut a vawn chu a thlah nghal a.

 

“I inchhir maw? Nangmah vanga hetiang thleng thei ka ni tia ka lawm em em lai hian nang chu I lo inchhir reng a” zawi deuh tak hian a ti a. A rilru a nat hmel viau bawk.

 

‘Chu chu ka sawi tum a ni lo. Kan pahnih hian harsatna kan tawk dawn tlata hriatna hi ka nei a” ka tih chuan min melh vang vang a.

 

“Harsatna engpawh lo thleng se keichuan vawn zel che hi ka duh. Ka tling tawk lo tih hi ka hai lo a, mahse, theihtawp ka chhuah ve ania” a ti a.

 

Ka lo nawr mah mah niin ka hre ve, kha leh chen kha ho takin a lo khawsa tawh a, khatiang ngaihtuah kha chuan tunah chuan insiamtha tak a ni tawh. Kei hian a insiamrem tawk aia nasa hian ka lo nawr a ni maithei.

 

“Ih, dik tak chuan, Eli hi I atan a that zawk ka lo rin vang  ania” dam deuh zawk hian ka ti a.

 

“Te, chu chu sawi tawh suh. Ka tan hian I tha tawk, nang aia tha pawh ka duh hek lo. Tumah kan famkim lo tih hre mah ila ka tan chuan I famkim tawk” atih chuan a darah ka lu ka va nghat a, a lo thaw huai a. “Kei hi chu min hrethiam rih zel mai la, I lungawi loh pawhin min hrilh mai la, nunphung pangngai ka zawh ve tan chauh tih min hriatpui la aw” a tih chuan ka inthiam lo ngei mai.

 

“Hmanzana ka ruih vang khan ka tihpalh, a thleng nawn tawh lo ang. Beer chauh ania tah pawh khan, mahse, tihnawn ka duh tawh lo” ati sap a.

 

“Ka thinrimzia chu I hre peih lo zawk ang” ka tih chuan a lo nui hak a.

 

Ka nu te rawn haw thlengin a leng a, an rawn haw hnuah mut hma a duh ve avangin a haw ta a. A haw hnuah kan inbe leh reng a, ka thinrim lai kha chuan kan kal thui hmaa tawp mai ka duh kha a nia, tunah hian ka duhzia leh chan ka hlauhzia ka inhrethiam chiah.

 

Ka bungraw thleng thei lo ngaihven turin Zokhawthar lam ka panin Rohlua nen kan kal a. Karkhat dawn chu helai hmunah hian a tang tawh niawm tak a ni. Ka u in a thawhpuite min biaksak tawh avangin kan va thlen pawhin min lo buaipui nghal zung zung a. Rei fe kan hai hnuah kan va hmuchhuak ta hlauh. Ka dawr ber thin Pu Gina’n hmundanga thawn tur a tih zingah an lo dah chu niin, ka lung pawh a awi lo tak zet. Ka u thiante puihna zarah engmah bo awm loin ka hmu leh a, ka lawm hle. 

 

“Foreign ah ka kalpui ang che” tih pahin Burma lamah chuan ka chhoh pui a.

 

“Te, a hlauhawm loh ami?” Rohlua’n a tih chuan ka nuih a za deuh.

 

“An man maithei che” ka tih chuan a awih em em tawh lo a niang, a nui ta suk a.

 

Zu chi hrang hrang lo intlar that ka hmuh chuan Rohlua chu ka vengthawng nghal, kei hi ka hruai lohna turah ka hruai a ni mai lo maw ka ti hial a, mahse, chutianga in chak awm leh it awm in a awm miah lo thung. 

 

“Beer I in chak em?” thil kan ei laiin ka ti a, ka khawngaih deuh vang a ni.

 

“Chak e” a lo ti var a, chutah, “Mahse, ka in lo ang” a ti zui a.

 

“Ka va lawm ve” ka tih chuan a kiai sak a.

 

“Zu nghei tih vel ai chuan nangmah nghei hi ka hlau fe, min then hi ka hlau zawk” atih  chuan ka lawm veng veng. 

 

Kan haw kawngah chuan kan hma hunte kan sawi dun ve nasa, a hma chuan amah nen hian future plan siam ngaihna pawh ka hre ngai lo. Mahse, tunhnai atang khan nasa takin ka inngaihtuah ve a, a telloa awm hi a harsa ka tih tawh dan ngaihtuah hian pasal atan neih ngei ka duh dawn tih ka hre tawh a, tih theih tam lo mah se ka ngaihtuah ve nasa ngang mai.

 

Kan hlim a, karah harsatna lutuk kan tawk bik lo. Hetih lai hian Rohlua pawh college ah guest lecturer hna a thawk a, amah hi a awm tha duh lo emai pawh a, lehkha hi a thiam a, a bright em em bawk. MA(eco) a zo a, fiamthuin a sawi thin a, zu in tibuai lo se chuan hna tha tak ka thawk tawh ang a ti zuk tawh. A ni reng bawk a, amah hi a ho ve em zawk a, tihian hna mumal nei loin a awm reng zawk. 

 

Chutianga hlim taka kan awm lai chuan ka rin phak miah loh thil a thleng a, ka ring lo ka han ti na a, ka hlauhthawn ruk a ni mah ang chu. Rohlua nu leh Eli an inbe chhe lo hle tih chu a hma atanga ka hriat tawh a ni a, keimah min bei ang tih hi ka lo ring ngai miah lo. 

 

"Rohlua chuan doctor nupui ngei nei rawh se" tih vel fiamthua a sawi an lo hria ni ngei tur a ni, min hrilh hlawm nak nak mai.

 

"I nute tan chuan doctor mo neih chu a chakawm ngawt ang" ka tichhuak nghe nghe.

 

"Tenun, ka nei dawn che. Keimah lo chu tumah i nei lo bawk ang" a ti chang fak a. Chutatang chuan sawi pawh ka ngam tawh lo, rilruah erawh a rawn lang veleh nawlh thin.

 

Ka bungrua a rawn thlen thar avangin ka buai hle a, Rohlua'n a haw pahin min rawn tlawh a, ka lo buai em avangin min rawn pui a. Kan titi pah mawlh mawlh bawk a, a phone arawn rik chuan ka bula a dah chu pickup pahin loudspeaker ah a dah a. A nu a lo ni.

 

"Tu dawrah emaw ni khan rawn kawi tawh suh aw. Eli'n a chhungte thil thawn a duh a, kalpui tur chein a nghak che" a rawn tia, a dah nghal daih.

 

Ka hrilhhai khawp mai, kei hi tu nge ka nih chiah? Hming ka nei ve a, a fapa bialnu ka ni bawk. 

 

"Va haw rawh" tih pahin a bag leh phone ka pe a, ka hmela lungawi lohna leh thinrimna chu a hmuh hmaih hauh lo ang.