LALROHLUA 10

 

10

 

“Te, ka lo lut ve ang”

 

Engtiklaiin nge ka dinna chu a rawn thlen ka hre miah lo, min ngaihtuah hmel zet hian min melh kal bawk a.

 

“A ngai lo ang, va haw rawh” ka nui lui a.

 

“Keimah vanga I tawrh ka duh hleinem” a ti a, ka banah a rawn kai a.

 

“Keimahin ka va hmachhawn phawt ange, a tul tak leh ka lo hrilh zawk ang che” ka ti a, Rohlua tana hriat nuam lo tak tur ka pa in a sawi ka hlau a, chutiang tur chuan ka phal lo.

 

Ka chalah a rawn fawp zeuh a, “Min lo be rawh aw, ka lo nghak ang che” a ti sap a.

 

Inchhungah ka lut a, ka luh rualin ka pa an room atangin a rawn chhuak a, ka nu in a rawn zui chhuak bawk.

 

“Ka thu awih loh hi a nuam viau em ni?” ka pa chuan a ti chang fak a, ka nu in a hnungah a lo pawt zeuh chu ka hmu ru reng, ka pa lah chuan engahmah a ngaih hmel loh.

 

“Ni e, nu leh pate thu awih hi a tha ber ania, kan inchhungah ngei duh loh I nih thu an rawn hrilh che kha, kan thu hi awih em em la a tha ber” ka nu chuan a ti a, ka rilru hneh tum ranin a tawng tih ka hria, ka pa kha a thinrim hmel tlat a.

 

“Sawi nawn fo ka duh lo. Ka thu I awih dawn lo a nih chuan thuawih lo kawl ka tum lo” a ti leh a.

 

“Nangpawh thu tawp lutuk hi siam zung zung thin lo la”ka nu in a lo ti a.

 

“Te, ka pa thu chu awih rawh. Rohlua chu sawiselna tur pawh ka hre lo, mahse, innei pawh ni ula nuam I ti dawn chuang lo, inngaihzawnlai atanga an chhungte duh loh nih chu innei lui mahse nuam an ti ngai lo ania” ka u in a lo ti ve a.

 

“A harsa ve em alawm”ka ti chhuak sap a.

 

“Enge a harsa te chu I tih khanglan? In nawm loh hlau reng rengin kan awm a, min hnial kalh hi chu tum duh suh” tih pahin ka pa chu an room lamah a lut ta daih a.

 

“Tunlai phei chu zan hi a mu tha thei lo ania, a rilru hi I tihah tawk tawh tih hria la, a taksa pawhin a tuar tawh hi” ka nu in a ti a.

 

“Tinge ka pa nawmsam loh thu kha in sawi duh lo a?” tiin ka zawt a.

 

“Hrehawm I ti ang tih kan la hlau fan maw le. Chutiang khawp chuan kan ngaihtuah che u tih hi hria ula, kan thu hi chu awih tawp mai rawh u” a ti ta a, ka lo thaw hak. 

 

Thil tam tak ka ngaituah hi chuan keipawhin Rohlua nena inkawp loh tawp hi a tha tih ka hria, mahse, chutianga ka ngaituah apiang chuan ka taksa hi a na vek zel. Hun reilote chhunga hetiang taka mihring induhna lo pung thei hi a mak ka ti. Ka phone a rawn rik chuan ka harh chhuak zawk a, Rohlua’n min nghak reng tih kha ka lo hre tawh lo.

 

“Hello”

 

“Tenun, ka lo nghak reng che a, engtin nge I pa chuan atih che?”

 

“Engtin ti lo e, ka buai leh deuh a, ka lo be lo mai mai che a” tiin dawt ka sawi ringawt.

 

“Kan pahniha inthen turin a ti leh che em?” ati a.

 

‘Aih, chutiang engmah a sawi lo” ka lo ti.

 

“Um, a nih chuan a that chu. Keichu rawn len hi ka duh, hetia a ruka inkawp reng chu a tha ka ti lo a, ka rawn kal zel anga, min khawngaih hun pawh an nei maithei asin” ati a.

 

“Tunah mai chuan a chi lo ang”tiin pehhel angreng deuh chuan ka ti a, ka sawi vek ngam bawk si lo a.

 

“Um,  phal veleh a ni mai” ala ti tho. 

 

Kartluanin ka buai a, bungraw rawn thleng thar bawk nen ka indaih ngang lo. Rohlua pawh in lamah a tawm ve deuh ngat ngat a, a pa nuamsam lo nen a buai ve hle a, hmunpui lam kal mai tha a an hriat avangin kar thar hi chuan a nu leh pa chu an liam thlak a ngaih hmel. Ka rilru hi chuan a hre ve reng a, tih theih erawh ka nei der si lo a, tawngtaipui tawp mai loh chu. Sunday chawhnu kan inkhawm bang chu Zuali’n min lo ko teh chel a, ka lo nghak a, henu hi chuan ka rilru natna thu bak sawi tur a hriat leh pawh ka ring lo.

 

“Pastor kan tura kal kan tum a, lokal ve la” ati a, eng rilru puin nge min sawm ang tih ka lo ngaihtuah mai mai. “Tenun, thil ka lo hriat chian loh vangin thil ka lo sawi ve vak vak a, min ngaidam turin ka duh che” ati a.

 

“A ho lutuk, thil pawi engmah I sawi hleinem” ka lo ti vat a, a sawmna erawh ka hnial ta hram. Ka peng tur chu ka va hawi let mai mai a, Eli kal liam tur ka va hmu a, ka nui sak. Khami vanga kal duh lo pawh ka ni reng a, chutiang ni lo se chuan han lan ve pawh pawi ka ti lo, ka kal chhan tur kha ka chiang a, mimal inrem lohna kha chu ka dah tha thei. Mahse, mi hmaa drama chan kha ka peih buai ta lo mai.

 

Ka mu mai mai a, ka hahdam ve ni a ni a, nilenga mutte hi ka chak ve thin. Chu erawh a rem mang chuang si lo a, chawhnu inkhawm banah hian mut hram hi chu ka duh thin. Ka lo muhil nghet viau ni tur a ni, ka nu in min rawn kaitho a, chaw ei an lo peih der tawh. Ka tho chhuak a, ka pa pawh ala dam chiang thei lo, a bp sang a chhuak a, a nelawm loh a ni tawp. Chhung inkhawm kan hmang zo a, chaw ei kasiam nghal mawlh mawlh a. Ka u in pastor damlo phaia an kalpui tur vel a rawn sawi chhuak a, ka pa chu a ngawi hmuk reng.

 

“A khawngaihthlak khawp mai, dam varin lo haw rawh se”ka nu in ati a.

 

“An nu pawh rawn inhmu chhuak nghal se” ka pa in a lo ti a, ka nu in a melh rum rap.

 

“I pa hi a nuam lo ber bur lutuk a, inkhawm bang kha thianten tlawh an ti sap sap a, ka rawn pha a, rei vak lo te chu kawi ve ni ila tha tur” a ti leh a, ka pa pawhin engmah a sawi tawh lo. Ani hi chu bp sang nei a ni bawk a, a bp sang a chhuah hi chuan a kawlh thei viau lehnghal, tunah hi chuan a zia tak pawh a awm tawh zawk, damdawi in thlen ngai rap rap zel a nia, tun hnu hian kan kal khat ta mai pawh a.

 

“Inkhawm banah ka rawn kawi dawn nia” ka u in a ti a, ka nu leh pa pawhin engmah an sawisel hran lo.

Thleng ka sil zo a, inkhawm pawh tum lo chuan ka mu a, Rohlua’n min rawn be zuai a, inkhawm a tum avangin kan inbe rei lo. Mu pahin hlate ka ngaithla mai mai a, hma hun ngaihtuah vak vak hi ka duh loh avangin ka ngaihtuah duh lo lui a, ka rilru pakhatah chuan tun atanga rei loteah hian Rohlua te pawh bial dang vawng turin an chhuak anga, kan pahnih thawnthu pawh hi a tawp ve mai ang tih ngaihdan ka nei a, chutiang tur chuan harsa hle mah se rilru siam chhoh hi ka duh. Chutiang a nih loh chuan keimah hi ka na mai mai dawn a, tun kumhnih chhung hian chhungkua din tur khawpin kan la inpeih ka ring lo hrim hrim bawk. 

 

Ka phone riah ka harh zawk a, ka thil ngaihtuah kha ka lo muhil chhunzawm daih chu niin, phak angreng deuh hian ka pickup a, Rohlua a lo ni.

 

“Te, veranda ah khan lo chhuak teh” a ti a, ka rizai ka hlim nghal a. Ka room tukverh chu hawngin ka u nena kan intawm bathlarah chuan ka chhuak a. “Min hmu em?” a rawn tih chuan ka hmu chiah. Kan kawmchhakah a ding a, ka room atanga langsar tak a ni a, a kut a rawn vai chu ka lo vai let ve a.

 

“A vawt sia, haw vat rawh” ka ti a.

 

“Garage bulah rawn kal ka tum a, i pa te room a la eng bawk sia ka ngam lo a” a ti a, ka tah a chhuak, tinge hetiang khera kan inngaihzawn hi a ngaih bik le?

 

“Inleng in ngah dawn sin, han haw vat la” tha deuh chuan ka ti a.

 

“Ka ngai lutuk che a, ral atang tal hmuh che ka chak a, ka ngai lutuk che tih hre reng la aw” a ti mawlh mawlh a, keipawh hian ka ngai tak zet a ni.

 

A kal liam thleng chuan ka thlir a, amah ka hriat tantirh kha chuan pastor fapa rui ve thei deuh, inla pa bawk si kha a nia, ka u nen an inkawm zeuh zeuh vangte khan ka ngei rilru viau thin. Tunah erawh chuan a telloa awm harsa ka ti tawh a, engtikah emaw chuan kan inthen a ngai dawn nia ka hriatna te hian min tina ngawih ngawih si a. A haw hnuah in a thlen fel tawh thu leh inleng an neih ve nual avanga mu mai tura min tih thu vel a ni. Ka mu meng kar a, Eli a tel leh ngei dawn tih ka hre reng sia, chungte chuan min titlawm vawng vawng.

 

Zingah ka nu tawngtai inkhawm chuan pastor te chu a rawn thlah liam ve ta tho a, rin aiin a na reuh a, ka ngaihtuah ve reng mai. Rohlua pawh a nau te pahnih enkawl nen a buai chho ve viauin ka ring, inchhung enkawl lam hna thawk ngai lo ta chu zawhna pawh min zawt ho thei hle a, eirawngbawl ngat phei chu a zei hian ka ring thlawt lo. Zanah kan inbe deuh reng a, aruka inhmuh tum kha kan ni a, a nau exam tur avangin kan thulh leh a, movie ka en a, ani erawh chu a nau lehkhazir a vil thung. A nu te awm loh atanga ni nga naah buaina kan nei tan a, Eli vang a ni. Ei rawng bawl turin a clinic a lo khar phah thin ka hre thar a, ka sa phat mai. Rohlua ka bia a, a ni khatna chauh a nih thu awlsam deuhin min lo hrilh a, phone ka dah hmak.

 

*Te, ka sawm a ni lo a, rawn bawl tur pawhin ka phut lo bawk. Min ngaihtuah ve a a rawn bawl a ni mai a, a peih a hnu thinrimna tur a awm hleinem. Roomah ka awm san daih a lawm*

 

He thu hi min rawn thawn a, ka lung a awi lo ngang mai. Amah ka rin loh vangte, ka lung a tih awi loh hrim hrim vang lam ni loin ka dinhmun atih lan chian lutuk vang zawkin ka thin a rim. Kei chuan ka ti ve thei lo tih ka hriatna ringawt chu ka natpui a, Rohlua ka khawngaih vangin ka thin a rim hlur ti ila a dik ber awm e. 

 

Thenawm dawra kal turin ka chhuak a, ka nu in kuhva min la chah zui, “Ka rei deuh dawn sin, Asii kuhva ka thelpui lawk dawn” ka ti tel hram a, engmah a sawi zui bik lo. Ka va thlen chuan Rohlua a lo thu reng tawh a, kan inkar zawng zawng hre lo mah se Asii pawh hian rin dan tawk chu a nei tho ang.

 

“Ka nuin kuhva min chah a, thut rei pawh ka hman ka ring lo” ka ti nghal a, Rohlua’n min en reng.

 

“Enge i pa chanchin thar hriat turte a awm em?” Asiin chuan Rohlua chu a zawt a.

 

“Tukin khan investigation an han ti tha leh a, naktuk lam hi chuan a hriat theih tawh mai chu ka ring a” a lo ti a.

 

“A pawi emai, i pa hi chu ka ngaina asin le. A, kei chang pawh ka ni lo, kan bial mipui hian kan ngaina vek, a special ve thlawt ani hi chu. Kan hming hian min ko thei vek ni mai hian ka hria, hengte hi thil mak ve tak chu a nia” a ti a, a dik ang, a pa hi chu sawiselbo ti ila a inhmeh ngawt ang.

 

“A fel bik hleinem, bial mipuite fel vang hian a lang mawi mai mai alawm” a lo ti ve a.

 

A hmaa kan lo tumsa angin dawr atang chuan kan chhuak a, kawng hnuai lamah kalin middle school ah kan lut thla a, khua a vawh avangin inkai chungin kan kal a, mi kan tawh kan rin lem loh vang a ni bawk. School gate ah kan lut thla a, thla chu a eng pum a, khua erawh a vawt khawp mai. School step ah thu in kan inkuah rial a, eng dang mah sawi loin kan infawp a, heng hunte hi ka hriatreng tur a ni ti rilru chungin ka am ve khawp mai.

 

“Tinge?” thaw chham lek lek hian min zawt a.

 

“Engmaw?” ka tih chuan ka hmui a rawn tawk zeuh a.

 

“I duham ve hle mai” tiin a nui a, a darah chuan ka han beng a.

 

“Ka ngai ve che a ni mai lawm”ka lo ti a, min kuah ta hle hle a.

 

“Lungawi lohna zawng zawng zaninah hian sawi fel vek tur aw” a ti a, a hma zana ka thinrimna vel kha a sawi tih ka hre mai.

 

“Eli chu a rawn kal leh em vawiin tlaiah te?”ka lo ti nghal a.

 

“Kal lo e, damlo ka ngah a tia, min lo call a, rawn kal a ngaih loh thu ka lo sawi ve mai” a ti a.

 

“Innei ula chuan in nuam zawk ang maw le” ka lo ti sap. Min kuahna a thlah a, chiang zet hian min melh a.

 

“Chu chu vawikhatmah sawi tawh suh” ati hmuk.

 

“Rohlu, lo innei thei lo ta ila, i thinlungah ka awm ve reng angem?”

 

“A mak” a ti hluk a. Ka thutakzia a hre ve a ni mahna, a hmui chu a han liak zeuh a, “Tenun, nang hi ka nei thei lo che a nih chuan midang hi ka neih mai mai theih ka ring lo. Chutiang khawp chuan ka tan i hlu a, ka hmangaih bawk che” a ti ta a.

 

“Keipawhin ka hmangaih lutuk che. Chuan, ka hmangaih reng bawk ang che” ka ti a.

 

“Mahse, Te, inthen tur ang mai hian thil sawi fo teh suh aw” ati a, a awmah ka hmai ka phum vang vang. Ka nu in min rawn call tak avangin rei pawh awm tawh lo chuan kan haw chho a, kan inpenna turah chuan kan ding a, rei tawk tak kan infawp leh a, tunah tak hian hun hi chelh din theih nise ka ti mange!

 

Ka mut dawna ka message dawn chu ka en vung vung ringawt a, chhang loin ka phone ka hmet thim a, kan pahnih tan kan hun tawp kan hmang zel tih zawng a chiang a ni.