LALROHLUA 11

 

11

 

Ni e, ka beiseina kha a thlen dik takah chuan ka na ve thung a, kumkhuaa Rohlua nena inthen tur anga ka inngaihtuah hian ka na lutuk tlat. Mahse, kan chhungte tan erawh lawmawm tak tur a ni thung. Rohlua te hmundangah an pem anga, chuan kan pahnih thawnthu pawh a tawp tawh ang.

 

“Call i chhang thei lo a, ka rawn kal tawp” 

 

Ka room kawngkaah Rohlua a rawn dak a, ka chhungte an awm loh vanga chutia rawn tlang ngam chu a nih ka ring.

 

“Nia, a.. ka lo buai deuh a” ka ti bah nawk a.

 

“Te, khawiah pawh awm ila engmah a danglam chuang lo ang” tih pahin min rawn kuah a, chet nachang pawh ka hre lo.

 

“Tihian kan inthen hranpa ngai loin hmun hranah kan awm anga, kan intheihnghilh ve mai ang” ka ti sap a.

 

“Aih, a thleng dawn lo, i hria tiraw? A thleng ngai lo ang” a ti tawn tawn a.

 

Engtia rei nge chutia kan awm ka hre lo, min kuahna atang chuan ka tal chhuak a, ka pa ka va hmuh avang chuan.

 

“Inhnuaiah rawn chhuk rawh u” a ti chang fak a, Rohlua hmela min ngaihtuahna chu ka hmuh hmaih lo, ka nui lui a, ka kut chu nghet fe hian a chelh nghal a. Inhnuai lamah kan inzui thla a, ka pa chuan pawn lam a lo thlir vang vang a, thil tam tak ngaihtuah hmelte pawh a pu.

 

“Nuni, i thianpa chu pawn thleng va thlah la, i rawn lut leh nghal dawn nia” min melh eih lo hian a ti a.

 

“Ka pu, Tenuni hi neih min phalsak rawh” Rohlua chuan khauh fang hian a ti a.

 

Ka pa chu zawi muangin a rawn inher a, kan pahnih chuan min melh dun a.

 

“Ka fanu hian pasal a nei a nih chuan a pasal tur chhungten an duh ngei tur a ni a, palai an rawn tir ngei bawk tur a ni” a ti charh charh a, ka lo thaw tha ngam lo. “In pahnih chungchangah chu chu a thlen ka ring lem lo a, chuvangin tuna in awmbo tur pawh hi in pahnih tan a tha”

 

“Kan awmbo hma ngei hian inneih ka duh a ni” 

 

Ka tawng tur chu min khap a, ka ngawi leh ta zawk.

 

“Tlangval tha tak i ni tih chu ka hai hauh lo, i nunhlui vangin ka iai hek lo che. Mahse, ka fanu hian a hlimna leh a tuina ber kawnga zawh avanga iai tute hnena awlsam taka kaltir chu ka thei lo a ni, min lo hrethiam la, nu leh pa rilru atanga kan natna hi i lo hrethiam hram dawn nia” a ti a, a kalsawn ta nghal a. Sitting room ah chuan Rohlua nen kan ding ngawi reng a, kan pahnih tan kawnga awlsam lohzia chu a langchiang ta tulh tulh mai.

 

Ka muhil lai chu ka harh hlawl a, ka phone chu ka han en a, Rohlua chu a lo online reng. Zan lai thleng khan kan inbia a, ka lo muthilhsan daih chu niin.

 

*i la meng elaw?* tih chu thawn a.

 

Rang zet hian min rawn chhang nghal.

 

*kan awmdan tur ka ngaituah a, ka muhil thei lo a, i rawn harh leh ngei ka ring bawk a, ka lo online a nih hi*

 

Ka nui sak a.

 

*inhmu ang*

 

Ka thawn zo chu ka inchhir leh tep.

 

*i ti der lo tiraw?*

 

*ka rawn chhuak nghal*

 

Ka chhan let hmain a rawn thawn nghal zung zung a, thu sut leh theih pawh a ni tawh lo. Kar khat deuh thaw kan inhmu tawh lo a, naktuk hian a pa te an rawn haw dawn lehnghal a, kan inhmu thei lo telh telh dawn a nih hmel lehnghal, chuvanga sawm deuh rawih pawh ka ni. Kan in hnung lamah ka ding ran a, kawngka pawh ka hawng sa. A chhan chu zingah ka chhungte thawh hmaa haw ka rilruk lo hrim hrim a, zing exer la anga lan ka duh vangin ka khum pawh ka siamsa duh lo.

 

“Min lo nghak rei tawh em?” tih sap riah ka hawi let a, ka dinna piah lawkah Rohlua a lo ding a, ka hmuh chuan ka va pan nghal a, kan inkuah deuh thlawp.

 

“Aih, rei lo e” ka tih chuan ka biangah a fawp zeuh a.

 

“Kan inah phei mai ila” atih chuan ka ngawi vang vang a, ka duh chiah lo. “Ka naute room leh ka room a inhlat tho a, tuman an hre lo ang” a tih avang leh kalna tur dang em em ka hriat bik loh avangin kan inzui chho ta a. Tun ang huna kan pahniha min hmutu awm ngat se chuan kan hmingchhe ve viau in ka ring.

 

Quarter kan thlen dawn chuan ka ding deuh dat a, a ni theiin ka hre ngang lo.

 

“Te, i ngai serious a nih kha, engtinmah kan awm dawn hleinem” Rohlua’n a tih chuan a dik ka ti tho. Thawm dim thei ang berin inchhungah kan lut a, a room hi pawn atanga luh theih a ni a, mahse chhung lam atanga a lo kalh avangin tihian inchhungah kan lut a ni. Ka kal hmasa a, a room chhung ka lut fel chiah a, a nau tawng ka hre nghal a, ka thin a phu nghal zeih zeih mai. 

 

“Min hmu ami?” Rohlua rawn luh hnuah ka lo zawt a.

 

“Hmu lo e, a zunchhuak a rawn tho anih kha. A mu leh tawh” tih pahin ka bulah a rawn thu a.

 

“Ka hlauthawng hman lutuk a” ka tih chuan a nui sak a.

 

“Engmah hlauhthawn tur a awm tawh hleinem” tih pahin min kuah ta hle hle a.

 

“A vawt bawk sia, mu mai mai ila” a tih chuan ka hmel chu chiang zet hian a rawn en nghal. “Engtin mah ka ti lo ang che” nui chungin a la ti zui.

 

“I chiang chiah maw?” ka tih chuan a bu nghat a.

 

“Te, kan awmdan tur hi ngaihtuah a ngai tawh a nia aw” a khumah chuan kan mu a, min kuah hlu hlu a. A thusawi chu ka lo ngaihtuah ve mek tho a nia.

 

“Thla khat vel bak in awm tawh dawn si lo a, engtia han ngaihtuah vak chi nge mawni dawn le?” ka lo ti chuai raih a.

 

“Beiseina nei lo lutuk ang khan awm fo lo teh “ a ti hluk.

 

“Keichu beiseina neih dan tur pawh ka hre tawh lo alawm. I nu te an lo haw anga, krismas boruak a ni chho anga, kum a thar anga, in awmbo leh nghal mai dawn si a” ka lo ti a.

 

A nihna takah chuan Rohlua te hi an pem a la hun lo a, amaherawhchu a pa hriselna a that loh avang leh hmunpui kal fo a ngaih dawn takah chuan khawpui lama awm turin Synod inkhawmpuiin a lo rel ta a ni. 

 

“Ka pa rawn haw se, neih che ka dil anga, a rem loh pawhin kawng dang zawn hi ka duh” ati a.

 

“Chutiang ngawt a ni thei si lo alawm. Lo innei dawn tehreng pawh ni ila hun a awm tawh lo hrim hrim” ka lo ti a.

 

“Ka hmangaih ang che hian min hmangaih ve tawk loin ka hria” a lo ti daih.

 

“I hre ngawt lo” ka ti sap a.

 

“A, kei chu ka neih theihna tur che a nih hi chuan mualpho pawh pawi ka ti tawh lo” ala ti tak deuh deuh a.

 

Ka ngawi roh roh a, a hmui lum thar tharin ka hmui a rawn nul chuan ka lo thaw hak a, ani erawh a nui suk thung. Inhmangaih leh induh tawnnaah chuan heng hi chu thil thar a ni hran lo. Kan infawp vawng vawng fo a, mahse, tun tum erawh ka rilru a chawl vak lo, ka inveng deuh run a, ka rilru tak tak pawhin min fawhna chu ka chhanglet thei lo. Ani lahin a lo hre reng ngang mai.

 

“Min hlau suh, ka tina dawn lo che, min ring rawh” a ti a, chu chuan a ngaihtuahna a fim tih min hriat tir a, ka inthlahdul ve ta deuh.

 

Min fawhna te hian ngaih thla a la hliah hliah bik a, ka ning thei ngai lo.

 

“Tihian innei tawh ila aw” a ti deuh reng mai.

 

Ka dar kham lutuk chu ka harh hlawl a, khatia kan titi mawlh mawlh lai khan kan lo muhil daih chu niin, Rohlua chuan min lo kuah bet tlat a, ka dar na lutuk chu ka inlet lo thei lo. 

 

“A la hma, muhil leh lawk ang” a rawn tih chuan ka va melh a, a la maimitchhing tho.

 

Ka mu leh na in ka muhil tawh lo, dar zat chu a khat tawkin ka en reng a, a hun taka heta tanga ka chhuah loh chuan ka che buai dawn tih ka chiang si a.

 

“Rohlu, ka kal a hun tawh ania”tih pahin ka sawi dat dat a. Rang zet hian min rawn kuai her a, amah bawhzawngin min kuaithlu a. “A hun tawh lo ania, khua a var dawn” ka ti a.

 

“Reilote” tih pahin min kuat bet tlat a, ka lo tang tung tho.

 

“Te, che miah suh aw” a ti a, a ngaihna hre lo zet hian a thu ang chuan ka awm ve tawp.

 

 A taksa rawn danglam chu ka hre vat a, thawh tumin ka che a, min kuah bet nghet lutuk. Rei vak lo hnuah min thlah dul a, a inher nghal daih. 

 

“Hei, i muhil leh ami?” ka ti a.

 

“Ka va mualpho teuh tak”tih pahin a tho nghal a, tukverh chu hawngin boruak vawt zet rawn lut chu a hip vang vang.

 

Pawn lam ka lo bih kual, thlasik khawvah vanglai ber a nih bakah khua a la var chiah lo a, tumah an chhuah peih chu ka ring lem lo. A thawmhnawm a inha zo a, pawn lamah chuan kan inzui chhuak ta a. Mi kal ngai lohna school a chhuak turin kawng hnuai lam kan pan a, exer la ang taka a lan theih nan a track suit a ha vei zan bawk.

 

“Nichin khan min hlau hman em?” a ti a, ka lo nui deuh suk.

 

“Heyy, i va sual tak. Mipa ka nia, a buaithlak a lawm” a ti lehnghal.

 

“Ka ngaisang che, vawikhatmah min nawr luih emaw khalam hawia min ti lo kha ka lawm” ka lo ti a.

 

“A harsa ve khawp mai” tih pahin ka kut a rawn vuan a. “Mahse, hmangaihte tihchhiat duh khawp mihring ka ni bik lo a” a ti leh a.

 

“Ka hria alawm” tih pahin ka bu nghat a.

 

"Ka tan chuan zu tel miah loa krismas ka hman ve hun tur tiin ka lo nghakhlel ve viau a, kan inzui theih leh si loh chuan a ho ngawt ang" a ti a, ka khawngaih ve reng.

 

Kan in lan theihna laiah chuan kan ding a, khua a vawh em avangin kan khur deuh hlak hlak a.

 

"Ka kal ang aw" ka ti a, min melh vang vang a. A remtiah ngaiin kal mai ka tum a, min rawn vuan nghal vut a.

 

"Min ngai reng rawh aw" a ti sap a. A hmel chu khawngaih thla a la ngawih ngawih.

 

"Engtik lai pawhin chu chu a thleng reng ang" ka ti a.

 

Min la en reng tih hriain ka hawilet duh tawh lo, ka mittui hi a tla mai dawnin ka hria. In ka thleng a, ka han thaw deuh kawk kawk a. Thawm dim thei ang berin ka lut a, chokaah ka nu a lo awm tih ka hmuh chuan ka ding deuh chat a. 

 

"Exer ka la a.." ka ti ta ringawt a.

 

"Tei lo kal teh" tiin chair chu a lo pawt chhuak a. Tim deuh daiin ka va kal a. 

 

"I chhuah hnu lawk khan i room ka rawn en a, i lo awm lo a" lungngaih hmel zet hian a ti a, ka nu hmel lan dan chuan min ti na ngut ngut.

 

"Nu, ni e,  Rohlua te inah ka kal alawm" tiin ka nu bum chu ka duh ta lo. "Mahse, nu engtinmah kan awm lo tih chu Pathianin a hria" ka ti a, ka mittui a luang nghal a.

 

"Tei, ka ring che alawm. I room ah han kal rawh, a la hma alawm. Zing tawngtai ka va kal ange" tiin a tho a, a mittui chu ka hmuh loh turin a hru a, ka thin zawn hi a rawn na ta nget nget a.