LALROHLUA 12

 

12

 

Rohlua pa te an lo haw tawh a, an buai ve bawk nen kan inhmu hlei thei lo. Branch committee kan neih dawn avangin biak in lam pan chuan muangchangin ka kal a, ka rilruin thil tam tak ka ngaihtuah ve a, hetia mi tawn ang ka tawng ve mai tur anga ka hriatna hian min ti hrehawm ngawih ngawih. Heti khawp hian hmangaih ka nei ang tih hi ka lo ring ngai hauh si lo a, a mak mange! 

 

Biak in bulah ka thiannu Nuni'n min lo nghak reng tawh a, a bulah Zuali a lo awm bawk. Step atanga Eli rawn chho mek chu an lo melh a, an awmna bul chu kan thleng rual chiah.

 

"Enge pastor chu a an a?" Zuali'n a lo ti a.

 

"A tha ve pah reng, khawpui lamah an han awm anga, a zia telh telh mai ang" tih pahin min rawn melh zawk a, ka lo melh ve reng. 

 

Nuni'n min kheuh zeuh a, kan kal ta daih a. Committee chhung zawng chuan ka rilruah thil dang a leng lo a ni ber mai. 

 

"I ngui lutuk" Nuni chuan min rawn nghawk ru deuh sawk a.

 

 

"Ka mut a chhuak lutuk a" tiin ka lo nui lui sang a.

 

 

"Va zung lawk ila" a tih chuan pawi ka ti lem lo. 

 

Zung turin kan chhuak a, inhnuai lama kal a ngaih avangin committee room atang chuan kan chhuk thla zel a, zunin awmna kan thlen tep chuan Rohlua a rawn lang hlawl, ka banah chuan kaiin thim thamah min kai lut a, khawnge Nuni kha a awm tih pawh ka hre hman lo.

 

"Enge i lo tih?" Tawng rin hlau tak hian ka ti a.

 

 

"Ka ngai lutuk che a, Nuni kha ka lo text tawp alawm."

 

 

"Heta rawn kal tur hian maw?"

 

"Ni chiang e maw le" 

 

A nui suk a. 

 

"Mi an lo kal ange aw" 

 

"Nuni a duty alawm"

 

Ka nui tawp. 

 

 

"Hei hi ka ngai tawh lutuk a" tih pahin ka hmui chu a rawn tuai zauh a, chutah a hmui lum ther ther chuan min rawn fawp nghal a. A hmun a rem lo ciau e ti lo chuan kan am dun ngang mai.

 

 

Nuni khuh deuh khak ri kan hria a, chu chu warning a ni tih hrilh hranpa ka ngai bik lo. Min kuahna atangin ka tal chhuak a, toilet ah chuan ka lut ta vat a, Rohlua pawh a bibo ta nghal a. Chumi hnu committee naa ka thu leh chu ka harh huai hian ka inhria, Nuni a lo nui leh tut tut thin. Hei tak hian ka nun a tibuai, Rohlua telloa awm tak tak tur chuan tawrh chhuah tur ka ngah dawn tih hi hai rual a ni lo.

 

Krismas kan thleng tawh dawn a, kohhran pawh chuti lam hawi hlirin a kal tawh. Inkhawm a nuam thei hle a, tute mai pawh chuan kan pastor te nen kan hman hnuhnun ber tur tih an hria a. Kan theihtawpin kan tan kan la tih a hriat theih bawk. Amah tak hi rei tak tak a din theih loh avangin kn lamah hian puih a ngai tawp a, Rohlua'n hunawl a neih loh phah a ni ber. A naute lah rinrawl tur tak tak chuan an la puitling si lo a, engkim a kuta awm vek ang mai a ni.

 

"Zaninah i patea te inah kan phei vek anga, tumah a hrana hman loh tur" 

 

Ka pa chu ka va melh a, a chaw bar lai chiah a lo melh. 

 

"KTP in program kan nei asin" zawi thei ang berin ka lo ti sup a.

 

"Kum tin in hmang alawm. Kumin erawh chu chhungkuaa hman a ngai tlat" chiang fe hian min rawn melh kher a, ka lo hawisawn daih.

 

 

Dawr ka thlen hnuah Rohlua ka bia a, ka pa thusawite chu ka hrilh chhawng a, inhmuhna hun atana kan lo ruahman ve kha a ni si a, a ho ngawt mai. Krismas bazar an tam bawk a, keipawh nilengin ka buai a, ka u in min pui ve bawk. Chhunah thil ei turin a chhuak a, helai hnaia mi hi a ei duhzawng a awm thin loh avangin veng thenawmah a va kal lawk a, a rawn let leh vat turah ka ngai. Ka dawr chu an rawn bawr khat leh huk thin a, ka u thil ei chu rei ka ti viau mai. Chutih lai tak chuan Rohlua a rawn lang hlawl a, min rawn nuih suk a, engdang mah sawi loin ka thutnaah chuan ka hui zeuh a, rang takin a rawn kal a.

 

“Ka u lo thlen leh hma chu hetah hian lo thu mai teh, enpui zel an ngai sia” ka ti a, engmah sawi buai loin a rawn thu nghal a, keipawh min dawr tumtute chu an duh zawng tur ang ka lo enpui ve thei leh ta.

 

Darkar khat vel a liam hnuah ka u arawn lang ve ta chauh, Rohlua awm lo se ka buai turzia chu.

 

“I va han ei rei em em ve” ka lo ti nghal tun tun a. 

 

“Motor atam lutuk a, a hmuhnawm em a, ka en mai mai” a tia nih chu. Ka va melh nghek a, Rohlua lam a lo hawi daih thung.

 

“Enge I pa a an?”tiin a bia a.

 

“A zia tawh lutuk, zanin pawh hun hman theih a inring a” a lo ti ve a, ka u thutna tur chu a lo kian nghal a.

 

“Ka kal mai dawn aw, ka nau a bazar a, ka kal kual pui peih lo a, a zo ve dawn tawh ang” a ti a. Mi an la tam avangin thlah pawh ka thlah chhuak hman lo.

 

“Ka rawn letna chu a rei tawh alawm, saw laiah sawn ka awm reng a, I thlahlel ve dawn sia”ka u chuan a rawn ti chhuak a, a sawi ka man nghal mai.

 

“Min khawngaih ve tho em, kan awmdan hi?” ka ti a.

 

“Khawngaih loh theih ni hek lo. Mi induh tha hle hle lai inpawhthen tir an tum bawk si cheu a” a ti a.

 

“Mahse, an awm lo vang vang anga, a reh ve mai ang” beidawng zet hian ka lo ti.

 

“Khuanu ruat loh hi chu a rem thei chuanglo a, ruat in nih erawh chuan in la intawng mai tur asin”a ti a, chu chuan min hnem chuang der si lo. Mi an rawn luh leh tak avangin engmah kan sawi zawm thei tawh lo.

 

Thimah haw turin kan insiam ve thei ta chauh a, ka u phei chu inkhawm a duh avangin ka haw tir tawh a, ka tum aia rei keipawh ka awm. Pawisa vel chhiar fel tumin pawisa bawm chu ka han la chhuak a, a sirah hian envelop a lo awm bam a, ka han ban vat a.

 

*Krismas present*

 

Ka hawng nghal a, Rs.3000 a lo awm a, lehkha them a lo awm tel bawk.

 

*a beitham viau tih ka hria a, mahse, I mamawha I lo hman ve atan. Kan pahnihin I duhzawng te kan en ve ang chu ka ti a, mahse, a rem ta silo a, tihian ni mai rawh se*

 

Ka nui sak a, keipawhin engmah ka tihsak si lo a ka ti rilru vawng vawng a, a envelop nen chuan ka bag ah ka ak a, ka theih chhung chu ka kawl tha ang.

 

Ka inbual zawh chuan chaw ka ei a, midang inkhawm turin an chhuak vek tawh a, ka hmanhmawh lo law law a ni. Ka chaw eina ka tih fel mawlh mawlh laiin kawngka a rawn inhawng a, Rohlua a rawn lut heu mai. Inkhawm thawmhnaw a ha vek a, ani hi inkhawm a rawn tlanbo ringawt a ni ang.

 

“Tinge?” ka lo ti hu a.

 

“Ka ngai che a”tih pahin thutthlengah a thu a, heater a on nghal a.

 

“I ti awmang lo e” ka lo ti nuah nuah, a ruk tak chuan ka lawm reng sia.

 

“Inkhawm bana kan inhmuh ai a ni mai” a lo ti veleh mai a, ka nui ringawt.

 

Ka intih fel hnuah a bulah ka va thu a, min lo kuah nghal vang vang.

 

“Te, tinge le ka rilruah hian kan hun hman hi a tawpna ang zela ka hriat le” ati sap a, keipawhin chutiang chuan ka ngai ve reng a ni si a, tun hi beiseibo taka thu a sawi vawikhatna a nih ka ring.

 

“Chutiang sawi lo ang” ka lo ti tawp, ka thinlung hi a na em em si a.

 

“Nizanah ka nu leh pa bulah neih che ka duh thu ka sawi a” a chawl dat a, a sawi leh tur ka lo ngaichang reng a. “Inneih hi kan remti lo ah ngai lo ula, tun dinhmunah chuan a theih rih loh ang. Kan pawisa khawlsa zawng zawng inenkawl nan kan hmang zo si a, kum thar lamah kan ngaihtuah tha dawn nia’ ka pa chuan a ti a. Mahse, a dam zawnga min chhanna mai maiah ka ngai. Chuvang chuan keichu inruk maite hi ka duh” ati a.

 

“I nu leh pa thu chu awih phawt la” ka ti a.

 

“Enge thleng dawn kan hre hauh si lo a” a ti leh a, a dik reng, engmah thleng tur kan hre lo.

 

“In awmna tur hmunah in han awm fel phawt anga, keipawh ka la inpeih chuang lo a, hun tha chu a rawn inher chhuak ve mai ang, kan tawngtai zel anga” ka ti a.

 

“Um, I thu thu a ni mai. Inruk mai I duh ve siloh chuan hun remchang nghah leh chu kan tih theih awmchhun chu a nia lawm” ati ta a.

 

Inkhawm ban dawn hnaih ah a chhuak ta a, a kal hnak hnak ka hmuh chuan ka khawngaih tlat. Ka au let anga, ka zui mai dawn em ni tihte ka ngaihtuah ut ut hman a, mahse, chu chuan engmah rah tha a chhuah dawn si lo. Ka maimitchhing ta ringawt a, tinge hetianga kan awm hi a ngaih bik le?

 

Ka patea te inah kan phei a, ka engtih mah chu a nuam thei lo. Ka cousin Lti roomah ka awm a, inhnuaiah an ri hut hut a, ka awm peih ve ngang lo. Chhun lamah ka hah tih an hre bawk nen min rawn ko bik lem lo a, Rohlua nen kan inbe ngat ngat. Ani pawh KTP program ah pawh kal peih loin a haw a, tihian kan inbe ta ngat ngat mai a ni. 

 

*te, kan pem hunah chuan mipa tumah lo hnaih suh ang che. Hetah chuan kan awm tlang a, ka thikthu a chhia tih I hre vak lo ang, mahse, ral atang chuan ka khirh viau dawn ania*a tih chu ka chhiar nu var var a.

 

*eli a lo chhuk pawhin lo date miah suh ang che* ka ti a, a nuih a za viau mai.

 

A twap lama ka message chu min chhang tawh lo. A muhil a nih ka ring a, ka call kher duh tawh lo. Ka chhungte haw tur thawmah pawh ka chhuak peih lo, ka riak leh dawnah an ngai ve a ni ang, min hawsan ta a. Lti pawh mu turin a rawn lut a, ka bulah a rawn inthawlh ve nghal a.

 

“O Tenun, U Rohlua nen khan in la ni em?” a ti a.

 

“Aw, ni e” ka ti a.

 

“Nichinah khan frozen vel kan lei khan ka hmu asin” a ti ta a.

 

“I hmuh sual a ni lo maw?” ka lo ti ha a.

 

“A teuh lo e, dawr neitu pawhin a hminga a koh ka hria” ati.

 

“Tunen nge I hmuh?” ka ti leh a.

 

“Hmeichhe samsei deuh a nia, inhnawih tak ve deuh nen” a tih leh chuan ka thin a rawn rim nghal em em. A chhan chu Eli a ni tlat.

 

Ka phone chu la chhuakin call ka tuum a, ka thei miah lo lehnghal. Thinrim zet hian ka phone chu ka melh a, tinge hetiang mai mai hian min tih? Tha te tea kan inthen theih hi ka ring a nia, heti zawng hian a ngai dawn ta a nih hmel.

 

Ka lo muhil siar siar tan tihah ka phone riin min tiharh a, Rohlua hming ka hmuh chuan ka reject a, ka switchoff nghal daih. Ka chau tawng khawng ve tawh nen ka lo muhil chhunzawm ve mai a, zingah chiah ka harh.

 

Ka harh veleh ka phone ka ban nghal a, Rohlua message a awm ka rin nen engmah a awm lo. Chungte chuan ka thin a tirim tung a, Krismas tuk fuh lo tak chu a ni. Lti’n min thlah haw a, in ka thlen chuan ka chhungten chaw eiah min lo nghak tawh. Phur fahran loin chaweikham chuan inkhawm turin ka insiam a, ka engtih mah chu a tui lo. Nuni’n min rawn sawm a, biak inlam chu kan pan ve ta a. Kan kal hma vak lo bawk aw, gallery lamah kan lut chho nghal. Tlar hnung berah kan thu a, kan hmaah Eli a lo thu reng tawh. Thut sawn nghal daih thu a awm si loa, ngei ru deuh chung chuan ka thu ve ta. Pastor in hun a hmang thei dawn a, rei tak erawh asawi ka ring hran lo. A rawn din tan atangin Eli chuan a camera a lo hmet sek a, Nuni chuan min rawn nghawk zauh a, ka hmi ka lo ti pawrh ve nghal.

 

Inkhawm banah a hnungah kan thu tih a hriat pawh ka duh lo, kan chhuak nghal vat a, thingpui pawh in loin kan haw tlang nghal daih. Kan in thlen hma deuhin Rohlua chu car bulah a lo ding a, ka hmuh chuan hawisawnin kal tlangmai ka tum a. Ka kutah a rawn vuan a, motorah chuan lut turin min ti a,  ka lo teu hlar mai.

 

“A harsa zawngin awm lo la, kan rei lo ang” atih chuan ka hnial peih tawh lo. Ka thu lut a, kuangkuahin hma lam chu ka melh ngar a, a thaw hak a, a tlan chhuak zui nghal a.

 

Zotlang pengah a tlan a, motor kawng lo lamah a tlan a, kawng a zimin a chhe viau lehnghal. Kawng a lo tawp a, chutah chuan motor ti thiin a chhuak nghal a. Ka thutna lamah rawn kualin kawngkhar chu a rawn hawng a, ka chhuak a.

 

“I la kal ngia lo tih ka hria” tih pahin ko ah chuan min hruai a, khawpui chhung chu a lo lang nghal iar a, a hmun lah chu a la nuam em em zui.

 

“Enge heta min hruai chhan?” ka lo ti hmuk a.

 

“Ka hruai chak che a”

 

“Ka kal chak lo a”

 

“Ka hruai tho che a”

 

“Hetiang mai mai hi chuan min namsul suh”

 

“Te, ka namnul ngai lo che” a kawng a dawm a. “Tinge tha taka thil sawi hi a harsat em em a” a tih leh chuan ka ngawi reng. “Khawnge I phone?” ati a, ka la ngawi reng.

 

A mah zawk chu motor ah a va lut a, ka phone chu a va la chhuak a.

 

“Ka message rawn thawn che kha nichin thlengin a la in delivered lo a, enge a awmzia?” tih pahin ka phone chu min pe a.

 

“Eng message mah chutiang a awm lo” tih pahin ka lo pawhthlaksak a.

 

Ka phone chu hawngin whatsapp ah ka lut a, a hming zawnah tawpin ka han hmuh a. “Hei, eng message mah a awm lo” ka tih khum hrep.

 

A nui ri huk a, rum fe hian ka lo melh.

 

“I pack a zo tawh a ni lo maw?”tih pahin a phone a rawn la chhuak a, a message min thawnho chu min hmuh a, chutihrual chuan nizan zan lai atang khan ka pack a thi tih ka hrechhuak zui nghal. Ka chek hlak a, tinge ka hriatchhuak loh zawk le. Topup chu min han thun sak nghal a, a rawn luh rual rualin message a rawn lut nghal zawt zawt.

 

“A thi tih ka hre hleinem”ka lo ti leh tho a, a nuih deuh sung.

 

A pa drip khai vel buaipuiin Eli a awm thute chu min lo hrilh reng chu niin, ei tur leia an chhuah lawk tur thute, an haw leh hnua a message zawng zawng ka hmuh chuan ka thinlung hi a dam nghal vek.

A mak ngawt mai, hoteah kan thin a rim a, thil hote vangin kan hlim leh em em si. Mi rawn kal an awm ve takah chuan kan let leh ta a, kal lam leh haw lam mood chu inang lo tak a ni. 

 

“Zanah inhmuh theih dan ngaihtuah ila?”school bulkan thlen chuan a ti a.

 

“Ka hre lo le” ka lo ti. Inkhawm tlanbo chu ka duh der si lo a, ina awm theih dan ka ngaihtuah mai loh chuan.

 

A tlan liam hnuah stepah ka chho a, kan huanah lut chhoin inhnuai atangin kan kawt zawl ka pawh chho a, ka chhungte thawm ka hre lem lo. Inchhung ka luh chuan Temuana a lo awm reng a, kan inhmuh khatzia ka hrechhuak chiah.

 

“Mas chibai rawn buk che ka lo tum a” a ti a. A thutnaah chuan ka kal nghal a, kan han inchibai a.

 

“I va fel ve. Nizante I hmang nuam em?” ka ti a, ka nu chuan thingpui a lo lum chu niin, a lo pe dawn mek a.

 

“Dam hi chuan nuam a ni mai zel e” tiin min chhang.

 

“I duh ve chuan va inthlit ve mai la” ka nuin a ti a, ka lu ka lo thing.

 

“I u kha em ni pro pastor kha?” ka nuin a ti a.

 

“Ka nau zawk a nia, kan naupang ber” a tih chuan engtin nge ka nu chuan a lo hriat tih ka ngaihtuah. 

 

“In fel unau khawp mai” tiin a han fak a. Temuana hian tawngkam a thiam lo si, miin an fak apiangin a che buai ziah.

 

Chawhnu inkhawm turin ka nu a chhuak a, Temuana chu haw a tum hmel loh angreng sia, ka thulh ta ringawt.

 

“Ka pa in nupui nei ve tawh la a tia, Tenuni a chan hun hunah ka tia” a tih chuan ka va melh a, a thutak vei phian a.

 

“Temuan, I luck tehreng nen kei aia tha hi I hmu hnem dawn lutuk tih ka hria. Keihi chu tihian ka awm vel mai mai ang” ka lo ti a.

 

“In la inngaizawng tho em ni?” a tih chuan ka lo bu nghat a.

 

“An insawn dawn an tia, engtin nge in awm zel ang?”

 

“Chungte chu a personal mah mah lo maw?”ka lo ti nghat.

 

“Beiseina chhete tal a awm a nih chuan nghah chhuah ngei che hi ka tum a” a lo ti hmiah.

 

“Midang nei turin ka duh zawk che” ka lo ti.

 

“Ka chhungte hnenah pawh ka sawi vek che, nangmah lo chu neih ka tum loh thute pawh”

 

“Awi, inneih chuti mai mai a ni lo asin. Mi pahnih induh tawn leh inhmangaih tawn a ngai” ka lo ti a.

 

“Min hmanagaih chawp ve thei tho a” a la ti fan.

 

“Temuan, thian anga kan inkawm hi chu ka remti, chumi piah lam erawh chu engmah a awm lo. Ngaihzawng nei lai ka ni a, I kalthui mah mahin ka hria” nelawm loh angreng tak hian ka ti lui kher a.

 

“Ngaih loh lamah ngai lo la” ati tha leh lawi a.

 

“Tiang zawnga kan inkawm ai hi chuan inkawm miah loh ka duh zawk a nia” ka ti leh talh.

 

Rei awm tawh loin a haw ve ta a, ka ngaihsan ve thin tehreng nen a awmdan chu ka beisei loh deuh a ni. Ka inthlak fel a, ka mu ta daih a. Rohlua khan zana inhmuh theih kha a duh a, engtin nge ka kal theih ang tih ka ngaihtuah kual a, hriatthiam a har angreng. Chhun lam inkhawm hi ka peih lutuk lo thin a, zan erawh chu ka pa hian a ham strict ve a, chuti maia ka inkhawm loh chu ka ring lo. Inkhawm tura chhuak si biak in thlen loh chu ka duhzawng a ni leh tawp si lo, chhungte remti chung ngaihzawng neih chu tih namai a lo ni lo e.

 

Chaw kan ei lai chuan ka putea pizawn dam that loh thu ka nuin a sawi a, ka pa bulah chuan kal ve ngei a that thu a sawi pah bawk a.

 

“Kan va lang ve dawn nia. Pi Chhungi chu a mimal tak pawh hian kal hi ka ba ve reng reng alawm” a lo ti a, ka ngaihtuahna ka lo vaivir ve nghal vat.

 

Thleng ka sil a, ka pa thingpui tur ka lum pah bawk a. An kal chhungin ka duh chuan Rohlua nen kan inhmu thei tih ka hre reng, mahse, ani lehzel inkhawm han thulhtir chu tha ka ti lo. Mahse, kawng dang a awm miau loh hi chuan kawng awm ve ang ang kan lo dap ve zel hi a ngai si a, ka duh dan loh leh ka nih lohna ang hlira ka awm a ngai ta mai hi a thinlung tak takin pawi ka ti. Ka nu leh pa chhuah hun ka ngaichang reng a, inkhawm lo tur anga awm ka duh si loh avangin ka hmaite phihin ka inchei a. Ka room a ka pa rawn luh lai pawh chuan ka mit ka lo hnawih mek.

 

“I u aia I haw hmasak chuan kawng lo kalh la, tun ang laiah mi an sual tawh a, fimkhur tur a nia”a rawn ti a, ka lo bu nghat.

 

Tukverh atangin an tlan liam lai ka thlir a, ka thaw deuh huai. Rohlua chu chanchin ka hrilh tawh avangin rawn kal dan tur chu a inngaihtuah ve mai tawh ang chu. Tui ka lum a, serthlum lachhuakin ka sawr a, in mai theih turin no ah chuan ka dah sa a, chutih lai chuan kawngkhar a rawn inhawng a, Rohlua a rawn lawr nghal zat. Ka thil siam lai chu ka tihkep ve nghal a, ka siam zawh chuan a thutna lamah pheiin kan in dun a.

 

“Tenun, thil ka ngaihtuah neuh neuh hian hetia a ruk arala inkawp hi tha ka ti lo. Engang pawhin harsa in thinrim dawn mah se in nu leh pa hi chu kan paltlang a la ngai dawn tho tho a, chuvangin naktuk zanah an awm laiin ka rawn kal leh ang” a ti a.

 

“A, chutiang ngawt pawh a ni chuang lo” ka ti ringawt a, han sawi viau tur ka hre chuang lo, a dik ka ti ve tho si a.

 

Kawngkhar a rawn inhawng deuh pawp a, ka pa a rawn lut nghal. Ka thutna atangin ka tho zawk a, Rohlua a rawn ding ve nghal.

 

“Ka rin ang chiah” ka pa chuan a ti sap a.

 

“Pa..”

 

Min rawn pan hnai a, min rawn ben a tum a, Rohlua kan inkarah arawn tla zep nghal.

 

“Ka pu, I duh chuan keimah zawk hi kut min thlak rawh” a ti a.

 

“Nang kha, ka inchhung rawn rap tawh lo turin ka ti che a ni lawm ni”a ti a, a tawng ring lo, a hlauhawm tawp a ni mai.

 

“Kapu, Tenuni nen hian kan inhmangaih asin. Harsatna karah pawh invawn tlat kan tum asin” a ti a. A banah ka lo vuan a, tawng tawh lo turin ka ti a, engah mah a ngai lo. “ Hetianga inhriat loha inhmuhte, inkawm te hi nuam kan ti bik lo asin. Mahse, heng hi ti lo thei loa min siamtute chu kan nu leh pate hi in ni” a ti a.

 

“Chhuak rawh”tih pahin ka pa chuan a banah a rawn vuan a.

 

“Tenuni hi neih min phalsak rawh” 

 

“ I zui duh chuan I zui thei ang. Ka thu awih lo hi ka ina kawl reng chakna ka nei lo” min rawn melh pahin a ti a.

 

“Ni lo e, in thu lo chuan kan innei lo ang, kan inru lo ang. Mahse, in phalna ngeia inneih hi a thei ta ngang lo a nih chuan chu chu kan la hmabak tho ang” 

 

“Rohlu, kal mai rawh” 

 

Ka pa thinrim hmaisen vek chu ka hmu thei tawh lo. 

 

“Tenun, ka hmangaih che tih hrereng rawh aw. I nu leh pa hi ka zah em em a, mahse, min kalsana min tawpsan tur erawh chuan ka ti thei lo che” ati ta a.

 

Ka pa tawng leh hmain Rohlua chu ka nawr chhuak ta a, ka pa mize chhe ber a rawn lang chhuak ang tih chu ka hlau a ni.

 

“I hlau em?” pawnah chuan a ding a, min ngaihtuah hmel zet hian min en bawk a.

 

“Aih.. ka pa a ni alawm” tiin ka lo nui lui a.

Inchhung ka luh leh chuan ka pa chuan rum zet hian min lo melh a, hlau duh miah loin ka melh ve kar. A thaw chhuak hak a.

 

“Mahni tana tha tur pawh hre lo” tih sap pahin a chhuak zui leh nghal a.

 

Ka nu a dah hnuah a rawn let leh tih ka hrethiam mai, ka awm chu a nuam bik hauh lo. Chhungkaw inkawmngeih tak leh inhau ngai lo kan ni si a, hetia ka ngaihzawng vanga chhungkua kan inkhak a ngai ta fo te hi ka ngaihtuah chian chuan a pawi ka ti a, Rohlua kalsan mai pawh ka rilruk fo. Mahse, hmangaihna hi chuti maia hnawhbo theih a ni bik si lo a, hun a kal anga, kan tana tha tur chu a rawn inher chhuak mai turah ka ngai tawh.

 

Kum a thar a, Rohlua te insawn hun pawh a in her chhuak ve ta. Inhmu tawh lo tur leh inthen hlen tur ang mai hian zan tin ka tap a, ka huphurh tak zet a ni, chung zawng zawng erawh a ruk tak meuhin mahniin ka tuar  a, Rohlua hriat chu ka duh lo. Ka nu leh pa chuan min en ve tawp a ni ber, kan awm hrang vat tawh dawn tih an hria a, an ngaih a ngam pawh a ni mahna. Kei lah chu ka hlimna zawng zawng te kha Rohlua chuan a liampui ni mai awm hian a lang a, inchhungah pawh ka tawng peih meuh lo. Ka u leh ka nu chuan lainat tak hian min en thin a, ka pa thinlung erawh a sak ngaiin a la sak a ni maithei, kan inbe tlem khawp mai. Ka dawr bungrua la turin zin chhuah ka tum a, rilru tih thawven ka mamawh em bawk avangin ka chhungte chuan min ngaihtuah ru viau mah se min hnial duh bik lo. Nidangah chuan ka cousin hian engkim min tihsak  mai thin a, tun tum erawh chu mahni ngei kal ka duh ve tlat.

 

Han let leh lawk ila, khatia krismas leh kumthar kan hman liam hnu lawk khan Rohlua pa chu a tha lo leh deuh thut a, Eli pawhin a buaipui nasa, chung zawng zawng chu hmuin hre mah ila ka en liam lo thei lo a, a chhan chu a mamawhtu zawk chu anmahni Rohlua te chhungkua an ni miau a, sawi theih neiin ka inhre lo. Rilru ipik hluah thin mah se amah Rohlua rilru ber hi a nghetin ka hria a, awmze nei loa hrehawm lo tawrh kha ka duh bik lo a ni. Chutihrual erawh chuan Rohlua te insawn thlak leh Eli transfer inrual erawh chuan awm a ti nuam bik chuang hauh lo a, mahse huaisen taka ka tawn tur ang ang tawng tura hmalam pan zel chu ka duh ber tawh. An chhuk dawn zanah kan inhmu a, thu puitling takin kan thlung dun a, chu chu keichuan bawh pelh ka tum lo.

 

“Te, rinawm takin lo awm phawt mai la, ka pa hi hetiang hi a ni ta si a, a thu zawm ve zel phawt hi a tha ber chu a ni bawk nen tunah innei thei lo mah ila kan tan hunt ha zawk a inher ngei ngei ang tih hi ka ring tlat a. Nang lo chu nupui atana thlan ka nei lo tihah lo chiang la, min lo nghak ve tawp phawt mai rawh aw” a tih chu thumal pakhat te mah hmaih neilo in ka la hre vek a, a sawi zan ang mai khan ka thinlungah hian a chiang em em reng. Eng thleng nge a rintlak dawn tih hre lo mah ila nghah a, amaha beiseina neih phawt chu ka tum ve em em ringawt. A atthlak riau a hriat changte ka nei bawk thin, mahse, chang dang ka kan thei chuang lo a, hetia nghah phawt hi ka duh a ni.

Lungleng leh khawhar reng renga hun ka hman na pawh thla 3 a lo ni ve reng tawh, englai mahin Rohlua ka theihnghilh ngai lo. Kan inbe tam a, kan inthlahlel ngawih ngawih a ni ber. Kan pahnih ah hian beiseina ka neih san lohzia chu amah pawh hian a hria a ni ang, min fuih fo a, hmunkhata kan awmlai maha harsa ka tih nen hmun hran atang phei chuan kan inkar hi tihchhiat awlsam tak tur ang mai niin ka hmu thin.

Nikhat chu ka nu thiannu Pi Thangi a lo leng a, eng engemaw sawia an titi luam hnuah Rohlua nu nen an inbiak thu leh mo pawh an neih hnai maithei thu a sawi ri tel zeuh a, ka nu nen kan inmelh ralh a, thudang a sawi pui nghal vat a, keipawh ka room ah kal nghalin Rohlua chu biak tumin ka phone ka la nghal a. A ring quit dawn emaw tih hnuah hmeichhia in a lo pickup lehnghal. Ri deuh nawk nawk a rawn awm nghal a, sah mai lo chuan k ngaithla reng. 

"Kan inbe tawh lo i ti ni lom ni?"

Chu thu ka hriat chuan ka sa pup a, phone ka dah nghal. Kan inbe tawh lo tiin hmeichhe dang bulah a lo sawi naw? Ka na ngut ngut a, eng nge ka chunga thil thleng hi ni ngai, ka duh loh tawp leh ka hlauh ber thil kha a lo thleng ta mai tihna em ni? 

Minute 3 vel hnuah call ka dawng leh a, Rohlu hnen atangin. Ka inngaihtuah fe hnuah engkim sawi fel a hunin ka hria a, ka pickup a.

"Enge sawi duh i la neih?" 

"Te, thil tam tak sawi dun tur kan nei"

"Ni e, ka beisei. Kan inbe tawh ngai lo tia i lo sawina nu nen hlim taka in inkawp theih nan" ka lo ti nghat a.

"Aih, nilo, Te, chutiang chu vawikhat mah ka la sawi lo a, min rin phawt a ngai"

"Hei chen hi chhungte phal lo chungin ka kawp chein ka vuan tlat che a, ka chunga i thil tih ve chu hriatreng tlak pawh a ni lo e. Hetah hian tawp tawh ang" tih pahin kan inbiakna chu ka hmet hlum ta a, ka mittui a rawn luang nghal ngiai.

Ka dawr nghak chu ka ngui bar a, ka engtih mah a tui lo. Rohlua a reh vang vang a, chu chuan ka thu hriat kha a dik a ni ang tih min rin ngheh tir tulh tulh bawk. A pawi lo, ani pawhin a theih chuan ka thei ve tur alawm tiin ka infuih a, mahse thil awllai erawh a ni hauh chuang lo. 

 

Zanhnih chu a liam ve ta, Rohlua hnen atangin eng insawifiahna mah ka dawng lo a, biak a zawh fiah ka tum tawh bik lo. Ka vannei a, zan mut lamah harsatna ka tawk lo. Mahse, zing khua a lo var chiah a, ngaihtuahna a rawn fim chiah hian tawrh a har ber a, engkim a tawp a ni tih hrilh nawn ka ni fo ni ber hian ka hria. Ka chhungte bulah engmah ka sawi ngam lo a, ka thiam ang tawkin ka inthup ve a, an hrethiam bik lo turah ka ngai. 

 

Zan khat chu rin loh deuhin Temuana a rawn lang hlawl a, kan inhmuh khat zia ka hrechhuak chiah. Ka chhungte an chhuak vek a, kan pahniha kan awm takah chuan eng engemaw kan sawi a, ka tum lawk loh deuhin Rohlua nen kan inbiak tawh loh thu ka sawi lang thut a, ka in thiam lo leh deuh. Amah beiseia ka sawi chhuakah a ngai ang tih chu ka hlau ru deuh a, mahse a ni lo bawk a, a hrethiam em ang chu.

 

"Tenun, kei chu hriatfiah nan hrim hrim nangman i biak leh chu a ngai ka ti. I rilru a dam dawn chuang em ni hetia tawp ngawt te chu" tiin min zawt a, ka ngawi roh roh.

 

"I laka ka rilru zawng zawng i hre vek a, mahse rilru dang i put lohzia ka hria, chuvangin nangmah hian fiah ngam ka tha ka ti. A tul chuan keimah pawhin ka be hreh miah lo ania" a ti lehzel a. 

 

"Min lo chhang duh lo ta se emaw a nupui hual nia an sawi khan phone lo pickup leh ta se" ka ti sap a.

 

"I  ngaihtuah thui mah mahin ka hria. Chungte chu ngaihtuah vak vak duh lo zawk rawh. Engkim a tha leh ang tih ring tlat la" a ti a. 

 

A haw hnu chuan vawi tam Rohlua number chu ka hmet chhuak tawh. Thudik hriat ka hlauh vang nge ka call ngam ngang lo. Chumi zan chu chhin khat mah ka chhing lo. Khawvar hnuah ka lo muhil ve a ni ngei ang, ka pa thawmah ka harh hlawl a. 

 

"Rawn tho tawh ta che, palai an lo kal dawn kha" ka room a rawn dah zawk pah chuan a ti a, ka hrilhhai ngang mai. Ka chhing leh vang vang a, eng palai nge ka pa khan a sawi, ka meng leh nghal vat a. Ka tho chhuak nghal vut. 

 

"Nu, enge ka pa thusawi kha awmzia?" 

 

Chokaa ka nu lo awm chu zawhna ka han zawt nghal a. Chutih rual chuan ka ni pasalte leh ka putea te an lo lit zawm ve nghal zat.

 

"Kan naute chu pasal nei rual a lo ni ve tawh reng a" ka putea chuan nui huah huah hian a rawn ti lut a. 

 

"Rohlua ten palai an rawn tir dawn anih kha" ka nu chuan a ti a, min nuih var var a.

 

Ka hmulthi a rawn ding nghal sung, awih tur nge awih loh tur? Mahse ka putea te ho chuan dawt an sawi awm si loa, rang zetin ka room ah ka tlan lut a. Ka phone khuma ka dah chu a lo thim chiah a, rang zeta banin ka en a. Rohlua misscall a lo awm ran. Rang zet hian ka call back a.

 

"Enge a awmzia?" A rawn pickup rualin ka lo ti thawr a.

 

"Ka nupui i ni dawn, a chiang em" a rawn ti nghet charh.

 

"Ve ngawt a, tuin nge pasal ka nei duh tawh ti?" Ka han ti vel a. A nui hak.

 

"Te, lo tang reng reng suh ang che. Ka hmangaihna che hi fiah nawn fo ka cho e, i pasal ni chungin a ni tawh thung ang" a ti a. Ka nui lo thei tawh lo.

 

A mak tih bak sawi dan ka thiam lo, nizanah Rohlua pa in ka pate a lo bia a, palai intirh chungchang pawh awlsam zawka tih theih an lo ngaihtuah a lo ni. An fate kan hlimna chu an duh ber a ni tiin tlawm ngam ve vein an indawr a, keinin a rah kan tel dawn ta a ni. Ka hlim em em a, mumangah pawh Rohlua nupui hi chu ka ni lo asin.

 

Khatia kan inbiak loh ngar ngar lai khan theihtawpin Rohlua chuan a pa rilru hneh a lo tum char char a lo ni a. A pa hi a lama a tan tir theih phawt chuan anu chu buaina thamah a ngai lem lo a nih hmel. Kan inbiak loh chhung khan a nu pawh a theih tawpin a lo nawrin a lo kar ve ngar ngar a ni tih tun hnuah a sawi chhuak chiah. Khami ka thinrim nia phone a hmeichhe lo tawng pawh kha ka rin ang chiahin Eli a lo ni a, ka then theih nan leh ka beidawn nan a thiam ang ang a lo ti ve a ni ber e. 

 

"Eli kha ka hre chiang telh telh a, ka hlau deuh thin" a tih chuan ka nui hawk a. 

 

"I neih teuh em kha" tiin ka fiam zui thin a, a nui tha duh ngai lo.

 

Kan inneih hun tur an sawi fel vek tawh a, a hnai telh telh a, ka huphurh telh telh lehnghal. Engpawhnise ka hmangaih ber ka nei thei tur hi ka vannei em em a ni tih ka inhrilh nawn fo thin. Rilru na leh beidawng hnu khan beiseina thar ka han hmu leh a, hei aia thlan tur hi engmah ka hre chuang lo ang. Rohlua nen kan inngaihzawn tirh kha ka ngaihtuah kir fo thin, zu rui thle ve mai mai thin khati taka a laka beiseina ka lo nei sang ve thin kha a mak ka ti a, ka chungah pawh hian a lawm em em reng. Khatiang taka a laka rinna nghattu kha a tawng ngai lo tih min hrilh ve koh koh thin a, ngaihnawm ka ti thin. 

 

Tunah chuan harsatna leh beidawn rum rum na kan tawh hnuah kan tan ni eng mawi a lo lang ve ta. Lalrohlua nupui ni mai tur ka nih avangin ka hmela hlimna a lo lang chhuak tam deuh a nih pawhin a mawh lo ve, ka hlimna hi chuti maia tawp thei a la ni tlat si lo a, damchhung atan tia kan thutiam ni a lo thlen hunah ka hlimna hi a famkim zual ngei ang.