LALROHLUA 8

 

8

 

Zan hnih chu Rohlua a rawn lang tawh lo. A nu in a rawn koh haw tlai khan kan inhau hrep a, ka ankhum a ni mah ang chu. A nu lamah a tang tlata ka hriatna khan ka thin a tirim zual a, haw turin ka ti lui tlat a, hreh tak chungin a haw ta kha ania, min rawn biak a tum nasa, a call leh message hrim hrim ka chhang lo tawp.

 

“Ka nu chuan doctor te an lo nia, a lo hmu sang ve deuh pawh a ni maithei a, nu ho zia alawm” atih kha ka duh khawp lo. Ka in khaikhin lo thei lo a, ka inhmuhhniam theihna tur ang hi chu ka duh lo, ka theihtawpin ka tuina kawng ka zawh a, midang vang mai maia hnual hi ka duh lo a, pasal ka nei ve ngai a nih chuan ka tuina zawng zawng pawh min pawmpui vek tura ka duh vang a ni.

 

Ka tum aiin ka haw tlai a, bungrua thawn ngai tlem ka neih avangin sumo chhuah hun ka va nghak a, ka tlai ta deuh a ni. Kawn ka thlenin khua a thim tawh a, hmanhmawh angreng deuh hian ka tlan a, kawng penga Rohlua rawn tlan chu ka va hmu thawi thuak a, mi a phur tih ka hriat rualin ka tlan muang nghal a, ka hmu tha thei chiah lo na in Eli a ang ka ti. In ka thlen hnua ka message dawn chuan amah ngei a ni tih a nemnghet chiah.

 

“Mate, Rohlua nen in tha vak lo mi? henu hian a status ah a rawn hmang a” Remremi  chuan a rawn ti a. Eli’n a clinic -a Rohlua thu lai chu status ah hmangin, ‘min rawn lam thlap nun ang kha’ tih a caption ah a lo hmang a, ka nui hawk.

 

Hetiang em ema neih a chak chu nei mawlh rawh se. Ka mizia nen a inmil lo lutuk chu ka nuih a za, hetianga tih hreh miah lo leh lansarh chak tlat hi an lo awm ve zel a ni. Ka inbual a, kan awmdan tehtawp hi a mak ka ti, tha taka kan inkawp reng laiin kan tawp thut a ni berin ka hria. Engmah inthenna thu chu kan sawi lang lo, mahse, kan awm mek dan leh kan nundan hian kan inthen tih pawm turin min nawr a ni ber mai. Zankhuain min rawn be lo a, tlawm ka inti angreng khawp mai. Enge ka beisei chu ka hrethiam chiah lo a, mahse, heti tehtawpa min tawp pui hi ka lo beisei lo pawh a ni maithei.

 

Kartluanin rilru ipik churhin ka awm a, ka hah zo vekin ka hria. Biak inah Rohlua ka hmu a, min hmu ang pawhin a awm lo a, ka thei ve emai tiin va biak tumna ka nei bik lo.

 

Temuana’n “Kan rawn leng dawn” a tih teh fo avangin Sunday zanah an rawn leng a, inkhel en turin an rawn leng a ni ringawt. Thingpui vawihnih ka lum saknaah kawngkhar kik ri ka hriat avangin ka va hawng a, Rohlua chu mit sen deuh ram hian a lo ding.

 

“Lo leng rawh” tih pahin kawngka chu ka hawng zau a.

 

“Ka be lawk duh che” tih pahin min rawn pawt a.

 

‘Inchhungah a sawi theih reng alawm” tiin ka lo tang ve a, kan inpawt deuh nawk nawk a.

 

Kan thawm a lo ring deuh nge ka hre lo, Temuana a rawn thleng phei rang ngang mai.

 

“Eng thil nge ni a?” tiin Rohlua chu a melh ran a.

 

“I lo buaina tur a awm lo, ka bialnu hi ka be lawk duh”Rohlua’n pawr fe hian a lo ti, a rim ka hriat rualin ka ner nghal sawk, zu a in a nih chiah hi.

 

“A bialnu I ni mi?”Temuana’n chiang zeta min melh chung hian a ti a.

 

“Ni tawh lo” ka lo ti sap.

 

“I bialnu a ni tawh lo a nih chu thianpa” dam zet hian a ti a, Rohlua’n min rawn pawt nghal sawk.

 

“Kan inthen lo, kan inthen ngai bawk lo ang” a ti a, a khawsak dan chu ka beisei piah lam a ni.

 

“I thawm chu tizawi deuh teh, miin an hria ang” ka lo tih chuan ngeiawm zet hian a nui a.

 

“Hei hi I bialpa thar em ni? kan inthen hma hmain midang I lo melh hman a, ka beisei I pha lo” a ti leh kher chu Temuana a insum thei lo, a kawr nghawngah a vat ham a, a palian angreng si a, a khawih na ang tih ka lo hlau.

 

“Temuan, thlah rawh, khawi keiman ka lo bia ang” tih pahin ka va thelh a.

 

“Tikhan be rawh, ka awm ve dawn” a tichang fak.

 

“Thlah phawt teh le” tih pahin a kut chu ka lo vuan a, chutah chuan a thlah ve ta chauh a.

 

“Ka chhungte ngaih a tha lo ang, lo va lut la, keiman ka’n bia ange” ka ti a, hreh tak chungin a lut ta a.

 

“Lokal rawh” tih pahin Rohlua chu ka pawt a, garage ah ka luhpui a.

 

“I duh chu sawi rawh le” tih pahin ka kuangkuah a.

 

“Tenun, tinge hetiang hian I awm? Engati nge min biak duh loh?” a ti a.

 

“Rohlu, a harsat hmaa inthen hi ka duh alawm. Kan inkawp hi a rem ve tak tak dawn chuang lo a, doctor pasal nih kha a nuam zawk hrim hrim bawk ang. Tunah hian tawp ila, kan pahnih tan a tha” ka tih chuan min rawn kuah thlawp a.

 

“A tawp thleng min kalpui I inhuam kha tinge zan hnih thum lekah I rilru I thlak? Khapa vang kha a ni tiraw? Te, I telloin ka awm thei lo tih I hre reng” a ti a, min kuahna atanga tal chhuah tumin ka lo tang ve tang tang a.

 

“Kan la buai dawn tho tho a, tuna kan tawp hi a tha” ka tih chuan, “chutiang sawi suh. Ka mamawh che alawm, tumah midang ka duh lo” a ti a.

 

‘Ka duh loh dan hlirin I awm a, ka thei tawh lo. Tunah pawh zu I in a, zu in mi ka duh lo a” ka hnuk rawn ulh chu a hun lo ti zetin ka thaw hawk a.

 

“Aih, ka nghei thei, mahse, ka ngai lutuk che a, I tello chuan a har tih I hria” a ti a.

 

“Mihring chak lo leh dawih ber awmdan a nia, ka duh lo” ka tih chuan ka hmui a rawn hup a.

 

“Tenun, min then dawn lo tiraw? Min ring ngam rawh, hetiang hian ka awm tawh lo ang” a tih chuan ka taksa hi a na vek. Amah ka duhna a la bo bik si lo a, then hi a harsa ka ti ve bawk. Kan pahnihin buaina kan nei lo a, midang vanga ka duh ve em em han then ringawt chu harsa ka lo ti ve bawk nen tha tak chuan kan inthlah ta phawt a, enge kan an zel dawn tih chu hunin a hril ang chu.

 

“Khapa vang kha mi ka hnenah I lo let theih tawh loh?” Temuana’n a ti nghal chat.

 

Ka zep buai peihlo, kan inkar chu ka hrilh ta vek a, a nu in nei tura a duh chu doctor a nih thute ka sawi a, ka sawi lai chuan engtin emaw hian ka awm.

 

“Chu nu chu dctor  a nih vang khan I lo inhmu hniam ve ringawt ange. Nangpawh I duh ber kawng I zawh a, dik leh taima taka I thawh kha tuman an enhniam ngawt thei lo” a rawn ti. Hepa thil thlirdan hi chu a dik thlup zel. “Ka lo nghak ang che, chance ka nei leh a nih chuan ka chhuah tawh miah lo ang che” a la ti zui. Kei aia tha a hmuh hnem dawn nen kei ve tehlul chutianga min han ti chu a lawmawm ve hrim hrim.

 

Ka mut hnuah Rohlua nen kan inbia a, hmanzana Eli a phurh chungchang chu zawh ve hrim hrim ka duh avangin ka sawi chhuak a. 

 

"Ka thinrim dawn tih i hre reng a, i ti tho a" ka ti a..

 

"Aih, Te,  amah hruai turin ka kal lo tih chu a hrechiang viau ang. Ka pa damdawi tur ka lam anih kha, haw lam erawh taxi a awm tawh siloa min nghak la a tia, ka hnial ta lo mai anih kha. Tun hnuah chuan ka ti tawh miah lo ang" a ti a, ka dam nghal sawng sawng.

 

Inngaihzawnnaah chuan inngaihpawimawhna hi a hlu a, ho te anga lang pawh kan inngaihpawimawhsak phawt chuan chu chuan inlaichinna a siamtha thin a lo ni. Chumi zan chu kan pahnih tan bul kan tan that tak tak na a ni a, keipawhin ka rilru siam nghet lehzualin eng harsatna pawh lo thleng se Rohlua vawn tlat hi ka tum tawp. Kan pahniha tang tlanga a harsatna kan su tlang thei dawn anih phawt chuan ka duhna hian chumi ti thei tur chuan min nawr thei zel ang tih ka hria a, ka tan a din ngamna hmunah chuan phatsan ka tum bik lo.

 

Ka ni tin hun hman dan a pangngai reng a, Rohlua nen kan inkar a tha a, ani pawh ni tin college lamah a liam a, a haw pahin dawrah a rawn kawi ngei ngei a, ka haw rualin a haw a. Chutiang chuan inkhawm loh zanah a rawn leng leh a, kan inhmu tam a, ngaih pawh ka ngai viau. Mihring chu inhmuh tam leh intlawh ngun hian inngainatna a lo pung ve zel a te pawh a ni ang.  A chang chuan haw hma turin ka ti lui fo a, a duh ngai lo. A chhungte ka hmaizah vanga chutianga ti chu ka ni a, a hrethiam ve em em tho.

 

Nikhat chu phone call ka dawng a, number ka hriat ngai loh atangin a ni a, ka han chhan chuan Rohlua nu a lo ni. 

 

"Tenun, Rohlua nu ka nia, thil pawimawh deuhah rawn biak che ka duh a. Mama nen hian in lo inkawp ve deuh niawm in ka lo hria a, a lo ni palh a nih chuan in inkar lo titawp turin ka rawn ngn che. Hei nupui neih tir kan tum a, hriat loh palh i lo neih vang a nih ka ring a, in kal thui hmain ka lo hrilh che" a rawn ti a, thinrim dan tur pawh ka hre lo, ka lo nui tawp.

 

Nui chungin Rohlua ka hrilh a, hahdam deuhin ka lo dawngsawng thei a, a lawm tih ka hre reng.

 

"Nupui ka nei dawn tih ka hre miah lo a, a neitu hriat lohin neih tir a tum nih chu" a ti ve mai mai. 

 

Keipawhin chu thil chu ka hriatsak reng lo a, kan pahnihin kan hlim a ka lo duhtawk viau. Nikhat erawh ka beisei piah lam thil a thleng a, chu pawh chu kan inchhungah ngei a ni tlat. Chaw kan eikham a, thleng sil hmain ka roomah phone ka hmang a, ka bungraw chahna te nen kan inbia a, inhnuai lama thawm ka hriat avangin eng thil nge tih hre turin ka ngaihven a. Rohlua nu in ka chhungte a lo dinchilh ran ka hmuh chuan phone ka dah a, ka chhuk ve ta vat a.

 

"Mo ka nei dawn anih chuan doctor neih ka tum, in fanu pawh hi tha takin ka hrilh tawh a. Lalrohlua nen hian an innei dawn lo, engati nge a uai bet zawng hian a awm tlat" a lo ti tun tun a.

 

"Ekhai, kan lo hre lo a nih chu. Tun hnuah chuan kan fanu chu kan lo zilh ve dawn nia" ka pa chuan a ti dam dap a.

 

"Dawr nghak satliah hi nei turin ka enkawl lo" zawi deuh sap hian a ti a.

 

"Pi Zar, kan fanu hi kan chhuang hauh lo a, chhuan tlak a ni lo tih pawh kan hria e. Mahse, chhungkua hi cheng khatmah min pawt buai loin a inenkawl ve asin. A nu leh pa leh a u te hian sorkar hna kan thawk ve bawk e. Tih tak emah chuan in fapa hi makpaah kan awt bik hleinem. A sual lai zawng zawng hre chungin kan pawm thlap, hetiang zawnga min rawn ti dawn anih chuan amah kha lo zilh rawh, ka inchhung hi vawikhat pawh a rawn rap tawh tur a ni lo. Min zah lo bawk a, ka zahna chhan tur che ka hre lo ve" a ti ta piap piap a. Ka pa thin thawk chu a na thin reng a ni. 

 

Kan chhungkaw boruak a rawn ti chhe hneh chiang hle mai. Ka thleng sil chhung zawngin ka pa chuan min zilh a, ka nu in a lo tuihnih ve bawk. 

 

"Nangpawhin in inkar chu chingfel vat ang che. In la inkawp tih ka hriat chuan ka thinrim hle ang" a ti ta a, ka thinlung hi a na ngut ngut.