LALROHLUA 9

 

9

 

Rohlua’n min rawn call a, “Ka nu a lokal a ni maw? Hei ka pa in a hau mek a, ka hre ve chiah a” a rawn ti a. Thil awmdan leh kan inchhunga thil thleng chu ka lo hrilh ve nghal a.

 

“I nu leh pa rilru tur chu ka hrethiam lutuk. Mahse, khatiang vang kha chuan inthen lo ang aw” a rawn ti a, a aw ah chuan lungchhiatna hi a lang tel tih ka hre thei. 

 

“Kan inah pawh lo kal rih lo la ka duh a” ka tih chuan a ngawi vang vang a.

 

“Um, ka lo tum ang. Mahse, engtin nge hmu lo chea ka awm reng theih ang?” a ti a, a thaw hak a.

 

“Tihdan kan ngaihtuah zel dawn alawm, lungngai lutuk lo phawt ang. A la hlimchhawn a, a rei anga ka pa pawh a thinrim zualpuite han reh sela” ka ti a.

 

Chutiang teh erawha an fapate tana min iai thu han hriat chu nu leh pa tan chuan a na ngawtin ka ring. Ka chanah ka dah a, ka nu leh pa rilru tur chu hrethiam ve viau chuan ka inhria. A chang chuan Khuanu ruat kan ni lo aniang tih mai pawh awl tak a ni, kan lo intawng ta kher kher te chu ka thin a rim lek lek fo a, mahse, chutianga ka ngaihtuah apiang chuan Rohlua tan engkim ka huam tih ka inhrilh nawn a ni zel tho. Tunah chuan hma hun ngaihtuah dan pawh a awm lo, kan hun tawn ang apianga rilru nghet taka awm chu ka tum tawp tawh.

 

Zanah Temuana leh Zorema an rawn leng a, inkawm reng reng thin kan lo nih tawh vang hian rawn len luh hi an sim hlei thei lo. Zorema hi chu a rawn leng lut reng reng a, Temuana erawh khatia reunion kan neih leh hnu khan kan inpawh thar a, a rawn lang ve ta fo a, kan inkarah awm a awm tawh lo bawk a, engahmah ka ngai hran lo. Checker kan khel a, kan chhakah ka nu leh pa in TV an en bawk a. Ka u pawh lengchhuak loin kan thil khelh naah a tel ve a, kan hlim ve viau. Dar 9 velah Temuana te thiandun an haw dawn a, pawn hmunphiah lak pahin ka thlah a, an tlan liam hnu chuan hmuhphiah chu la in inchhunga luh leh mai ka tum a, min ko ri ka hriat avangin ka hawi vat a, kan garage bulah Rohlua chu a lo thu reng a, a thim deuh avangin ka chhuah lai khan ka lo hmu lo mai mai a ni. Ka va kal vat a, a thutna bul ka thlen chuan a lo khur deuhin ka hria, boruak lah chu a vawt em em mai si a.

 

“Enge I rawn tih?” zawi thei ang ber chuan ka ti a.

 

“Ka ngai lutuk che a, ka hmuh theih che beiseiin ka lo kal alawm” a ti a.

 

“Min lo be thei reng alawm. Ka luh leh vat a ngai a nia”ka ti a, engmah sawi loin min kuah a. 

 

“A harsa e” a ti ta thlawt a, ka khawngaih ve reng.

 

“Kan tuar phawt hi a ngai sia, kan tuar chhuak ve mai ang” ka ti a. “Naktukah bungrua ka thawn dawn a, kan inhmu dawn nia” ka tih chuan hlim hmel a pu ve ta.

 

A phal lo chung ka luhsan a, ka chhungte ngaih a tha dawn lo tih ka hriat vangin rei awmna chi a ni lo. Ka va luh chuan ka pa in chiang fahran hian min lo la melh zui, ka zam lek lek a ni. Min en rei lem hlei lo a, hmun ka phiah chhunzawm a, mut an la tum hmel loh avangin ka room lam ka pan san ta a. Mu chungin Rohlua nen kan inbe ta reng a, an inchhung boruak a nawm loh thu a rawn sawi chuan ka khawngaih ve reng. 

 

“Te, nangni chuan tikhan min hrechiang tawh a, mualpho zualna tur pawh a awm tawh lo. Ka nu sawichhiat leh a dik lohna sawi fo te hi ka tan a mualphothlak a, bakah nakin lehzelah pawh amah hmuh dik theih lohna a ni tih ka hre ve reng. Ka nu a ni miau a, ka huat viau hian awmzia a nei lo bawk a, ka sual lai zawng zawng pawha tha tura min ngai lo tawp tu a nih vangte hian a chang chuan ka haw ve ngawih ngawih thin kha a nia, tunah chuan maw Pathian hian keimah zawk hi min siamthar ve tak tak a ni ang, hmangaihna hian ka en tlat tawh a, ka tawngtaipui nasa bawk a, chhanna pawh ka la hmuh ngei hi ka ring a ni” a ti a.

 

Beidawng lo tur chuan kan han inchah veleh a, keipawhin huatna ai mah chuan khawngaihna ka nei lian zawk. He kan ramah ngei pawh hian hetiang hi an awm ve nuk awm asin. Pastor nupui an nih vang hian thlarau lamah an sang vek bik lo a, mihring famkim lo an nih ve tho avang hian hetiang tawk hi chu a awm loh theih bik loh tih ka hria.

 

Bungraw thawn tur ka pack fel a, Rohlua pawh college atangin a rawn chhuak tawh a, a rawn la thleng lo deuh. Dawr khar tawp ai chuan tiin ka cousin Zodini chu nghak turin ka ti a, a lo hreh lem lo bawk a, a rawn thleng phei rang khawp mai.

 

“Rohlua nen kan chhuak dawn a, tumah hrilh suh aw” ka tih chuan a nuih a za khawp mai.

 

“U Tenun, a ruka inngaihzawn hi a hmanlai tawh e” a la ti deuh deuh a.

 

“Kan dinhmunin a zir lo anih hi. I pa puia I hrilh vaih chuan I chak dawn lo ania” tiin ka vau a.

 

“Kawr min pek dawn chuan ka hrilh lo ang” nui vur vur hian a ti a.

 

“Ka pek ziah che kha, tha takin lo nghak la a ni mai” ka ti a. Ka sawi zawh rualin Rohlua pawh a rawn thleng ve nghal. Sumo counter lam panin kan inphur chhuak nghal a, kan va nang chiah chiah. Kan thawn zo a, a hma zana kan lo sawi lawk tawh angin kan leng chhuak nghal dawn a ni.  Kal tumna em em pawh kan nei hran lo a, kan khua angah hi chuan mi kan la inhre kual zut a, min hmu tawk an lo awm ang tih kan hlau deuh bawk nen a thianpa te inah kan kal ta ringawt a. Hetia kan pahniha kan awm hrim hrim hian kan ngaih a tha a, kan hlim tawk ve viau bawk. A thianpa a lo awm lo a, an nu in a fapa a a lo awi mu mek a, kan va thlen chuan min lo nuih sak a.

 

“Zaua’n min lo call zo chiah a, an rawn kal chuan min lo nghak se a tia” a lo ti seuh seuh a, a fel hmel khawp mai.

 

Rei vak pawh kan nghak lo, Zaua pawh a lo haw a, kan vawikhat inhmuhna a nih avangin Rohlua’n min han inhmelhriattir a, an nu chu Angtei a ni a, an fel nupa khawp mai. 

 

“Inchungah han awm ula, helai hi chu mi hi an rawn lut leh nulh nulh zel a, nuam lo in ti ange” Zaua’n a ti a, inchung lamah chuan kan chho ta a. An in chu a felfai reuh sia, ka duhzawng tak a ni.

 

Inchungah chuan ni a lo la lum nuam khawp mai, kawng pui lam thlir pahin kan thu a, engtia inhria nge tihte chu ka zawt mai mai a.

“A hmain Zaua nen hian college khata kan kal thin vangin helai hmuna rawn awm ta chu ka zawng nghal vat a, Angtei pa te khan inneih an phal lo a, an inru tawp hi a lo nia, a tirah chuan an harsa ve lutuk. khatianga nu leh pa duh lo chung inneih a retheih kha ka hrethiam lo hle nghe nghe. Mahse, tunah chuan hmangaih berte neih hlutzia hi ka hriatthiampui dawn khawpin ka hria” a ti ta duah a.

 

“An la naupan ang aiin an fel hmel khawp mai, tikhan engtin nge ei an zawn?” ka ti a.

 

“A rem rem a thawk ve thin a, mahse, electric department ah nikum hmasa atang khan a thawk ve. Ka zu ruih buai apianga ka tlan luhna, ka lungawi loh leh rilru hah ka inbunruahna te an nia, ka tum aiin ka hruai har zawk che a” a ti a.

 

“A pawi hleinem, tunah min hruai tho alawm” ka tih chuan min rawn kuah a.

 

“Tunlai chu zan pawh ka mu tha thei lo, kan awm dan tur ngaihtuah hian ka lo meng leh reng thin a”a tih chuan ka han melh ha a, a lo serious viau lehnghal.

 

“Rohlu, kan inneih theih hi i ring em?” 

 

“Ka ring mai a ni lo, ka nei ang che”

 

Min kuahna kut chu ka dawm vang vang a, harsatna thuk zawk hi kan hmachhawn a la ngai dawn ni mai hian ka hria. Hetianga a ruka inkawp hi theih loh hun a awm ngei dawn a, ka pa in a hriat rualin harsatna kan tawk nghal dawn tih pawh ka hria, chutiang bawkin Rohlua nu a tawrhhlelhawm dawn tih ka hre reng mai. Tunah erawh chuan ka duh ber chu kan theih chhung hlim taka awm a, inhau buai leh lungawi loa insiam loh hi ka duh ber.

 

Kan haw dawn chuan Angtei chuan min rawn din hnaih a, “Kan pa hian in chanchin min hrilh tawh a, ka lo khawngaih ve tawp cheu. Keini pawh harsa tak chungin kan innei a, hmangaihna hi chu a mak ve ania. Nangni pawh in inhmangaih tak tak chuan eng pawh tawk turin in inhuam ngei ngei ang” a ti a, ngainatawm deuh hian min nuih a.

 

“Nangmahni angin kan huaisen ve lo ang tih ka hlau” ka ti sap a.

 

“A hun a lo thlen chuan rin aiin kan huaisen duh ania” a ti a, kan nui dun hak a.

 

“Nangni pahnih chu min lo rel lo maw?”

 

Rohlua’n min rawn pan pah hian a ti a, a hnungah Zaua a lo kal bawk a.

 

“Rel maithei, i duat loh vaih chuan kan ina lokal ka phal tawh dawn lo a nia”Angtei’n a lo ti a, Rohlua a nui ve hawk mai.

 

Kan haw kawngah an nupaa harsatna an sut dan vel min hrilh a, nu leh pa tuithlar inhuam khawpin Rohlua hi ka hmangaih ve em tih ka lo inzawt rilru neuh neuh. Dawr kan thlen chuan Zodini pawh haw turin a lo insiam mek a, min hmuh chuan a hmel a dik lo riauin ka hria.

 

“In rei lutuk a, pa puia a lo kawi a, thil a thawn ka ti che a, sawtah sawn i scooty i dah bawk si. A ngaih a tha vak loin ka hria” a ti a, ka hlauthawng ru khawp mai.

 

“Ka tlang phei mai ang aw, engemaw a thlen chuan min lo call vat la, ka rawn phei ang” Rohlua’n a ti a. A tlan liam thleng chuan ka thlir a, kan inkar hnawk vel lutuk hian min tichau ngawih ngawih.

 

“Ka pa chu thinrim awm angin a awm em?” tiin Zodini chu ka zawt a.

 

“Pa Puia chu a fing si, i hriat ve vek kha. Mahse, engmah a sawi lo a, a haw tlang a, ka hlauthawng lutuk te pawh a ni ve thei tho” a ti leh a, ani hi chu a dawih ve hrim hrim a, eng em a thleng lo turah ka ngai. 

 

Kan chaw ei lai chuan ka pa chu a ngawi reng a, nidangah chuan min zilh nan a hmang ber thin. Ka nu chuan chhun lama an thawhpuite nena an thil tawn a sawi mawlh mawlh a, a khat tawkin ka u in a lo chhang a. Ka pa chu ka va melh leh zawk thin a, a ngaihtuah awm thil ka hre thei lo. 

 

"I va ei tlem ve" ka nu in a tih chuan a chaw thleng nen a lo tho mek a.

 

"Ka puar e" tih pahin tuihmun lam a pan a. 

 

"Ka pa chu a van cool em em" ka ti zui a, ka u in min rawn melh zawk.

 

"Tunlai chu an hah ve em a, chuvang aniang" ka nu in a lo ti ve mai a, kan ngawi tlang ta a.

 

Ka roomah ka awm a, Rohlua nen kan inbia a, ka pa in min hau em tih vel min zawt a, engmah a sawi lo tih ka hrilh chuan a thaw huai. An chhungkaw boruak ka zawh chuan,"A pangngai a ni mai. Tunlai chu mo interview an awm a, ka pa damlo a rawn cil hneh khawp mai" a ti nghat a, ka lo ner ve nang mai.

 

"Kan tluk lo zual leh sawt dawn a nih chu" ka ti a, a ngawi deuh roh roh a.

 

"Inru daih mai ang hmiang"  a rawn ti a, chu chuan kan pahnih inkar hnawkzia a tilangin ka hria.

 

"Thenawm dawrah ka kal dawn a, lo kal ve la" ka lo ti daih a, a phun deuh nuah nuah.

 

Ka pawisa ka la a, inhnuai lamah ka chhuk a. Ka u in tv a lo en a, ka nu chu an room ah a tawng ri ka hria, ka pa hi a nuamsam lo emaw ni, ka han ding khawmuang deuh a. An thawm a reh leh tak siah chuan ka chhuak leh ta zawk, ka haw leh hunah ka ngaihven mai ang. Dawr ka va thlen chuan Asii chiah a lo awm a, mi kuhva lam an rawn la chhuak lo hlawm a ni ang a reh ve thap mai.

 

"Tenun, enge i pa chu a an?" Asii chuan a lo ti a, ka hrilhhai viau mai.

 

"Ka va hre lo ve, tinge?" Ka lo ti let hu a.

 

"Vawiin tlai a rawn haw kha kan dawr bulah hian a motor kha a ding reng a, ka lo ngaihven lawk lo a. A rei tak deuhah chuan ka va chhuak a, a luhai kha a lo ding reng a lo nia"a ti ta a.

 

"Kan chawei lai khan nawmsam lohna a nei emawni ka ti reng a, engmah ka lo hre lo nih chu. A zia lo hle mai" ka ti a, a ruk tak chuan ka zak khawp mai. Rei ka awm hmain Rohlua a rawn thleng a, Asii nen an inbe luam a, ka rilruah ka pa ringawt chu a lo awm.

 

"Kuhva roll tur ka va la lawk, tikhan min lo nghahsak lawk teu" tih pahin a chhuak a.

 

"Tinge i va ngawi ve" tih pahin min rawn nghawk a.

 

"Nia, ka pa a nuamsam vak lo a" ka ti ringawt.

 

"A va zia lo ve, engati nge? Ka rawn kal dawn mi?" A ti a.

 

"Aih, chutianga ngaihtuahawm a  ni lo. Ka lo saqm chhuak ve zuk che a, haw leh vat ka ngai sia" in thiam lo deuh tak hian ka ti a.

 

"A pawi hleinem, ka hmu che a, ka hlim hrim hrim" a ti a, ka sam chu a rawn chul a, ka lo nui lui ve sak.

 

Asii rawn let hnu chuan kan in lamah kan inzui a, garage bulah kan indinchilh ran a.

 

"Va lut rawh le, ka lo enliam ang che" a tih chuan kal hmasa turin ka ti ve thung. "I lut lai ka hmu duh alawm" a tih tlat avangin ka inher a, kal mai chu ka tum a. Rang fe hian min rawn kuai let a, min kuah ta thlawp a. "Ka thlen veleh ka lo bia ang che" tiin ka chalah chuan a fawp a., ka lo bu nghat.

 

Min kuahna chu thlahin inchhung lam chu ka pan a, ka pa te room lam chu ka va melh hram a, garage nen a in ep avangin an room tukverh atangin a lang chiang hle a, chumi hrechhuak chuan ka va hawi reng a ni. Ka hlauhthawn ang ngeiin tukverh atang chuan ka pa in min lo en reng a, ka hmu tih a hriat chuan tukverh a khar hmak a, ka ke pen tawpin Rohlua dinna lam ka va en a, ka pa awmna lam chu a lo melh ve reng.