LAST PIECE 1

 

 

 

"Strawberry, ka ngai che" 

 

Ka mit ka chhing sawk a, ka mittui tlak mai loh nan ka meng lawk ngam lo. Ka phone chu ka hum nghet leh sauh a.

 

 

"Min lo be tawh suh" tih pahin ka phone chu ka hmet tawp ta a, chumi thu chauh sawi tur pawha ka beih a ngaih nasatzia chu, ka taksa hi a na chhuak vekin ka hria.

 

 

Tinge intawng lo tur kan lo intawn kher le tiin ka ngaihtuah fo thin a, mahse, khang hun liam tawha min tihhlim thinzia te, a kianga ka himzia ka hriatchhuah phah lek fang a ni. Ka mittui tling pam chu ka khap per sak sak a, engtikah nge heng hun hi kan paltlang ang le?

 

 

Ka nau study camp nei tur ka thlah a, zan lamah kan kohhran thalaiin tihtur kan neih avangin ka hmanhmawh viau mai. An school gate ka tlan luh laite chuan ka hnungah min lo pawt bet tang tang a, ka tlan chak mah mah tih ka hre mai. Scooty ka ti ding a, rang fe hian a chhuk nghal a.

 

"Au Hazel, thaw chhama min siam i tum mi a?" 

 

Ka nau Jenny chu a mittui a tling pam a. Ka khawngaih leh hnuhnawh.

 

"Bawihte, ka hmanhmawh lutuk a, tihpalh aw" ka ti a. A mittui a hru sawk a, a kal nghal a. Ka ngaingam leh si lo, ka va um a. "Ka duat, tikha chuan ka rilru a nuam dawn miah lo ania aw" ka ti leh a.

 

"Tiang khan min tlanpui tawh lo ang tih min promise rawh" a ti nghat a.

 

"Promise chiang viau" tih pahin ka kut ka ti pir a. Nui san san chungin a rawn ti ve a, ka thaw ta huai a.

 

Unau zinga upa ber ka ni a, nau pathum ka neih zinga naupang ber chu Jennifer-i, Jenny tia kan koh hi a ni a. Kan duat rawn a ni bawk a, a pangchang ve thiam khawp mai. Tunah pawl sawm a zir ve mek a, exam a hnaih tawh avangin study camp an nei a, zan tin kan thlah thin a. Zan dang ang lo takin a u te pahnih an hman lo a, keiman ka va thlah ve a ni.

 

"In va hmuhnawm ve" 

 

Ka hawi let vat a, ka piahah mipa pakhat a lo ding a, ka va nui ta ringawt a. Ani pawhin engmah a sawi tawh bik lo, ka hmu tha thei lo na in mipa sang thlerh thlawrh a ni tih chu ka va hmu thiam tho. Hmanhmawh zet hian scooty chu ka tinung a, ka tlan chhuak ta nghal a. 

 

 

In ka thlen chuan ka chhang chiah Lydia chu insiam sa vekin a room atangin a rawn chhuak a. Brandon pawh bathroom atangin a rawn chhuak chiah bawk. Anni ho hi ka nauteho chu an ni a, Lydia hi tunah university ah a kal mek a, master degree a zo ve tep tawh. Brandon pawh college kal mekin final semester a bei ve mek a, Jenny kha a piang tlai deuh a, a pawl pawh a la hniam deuh a ni. Kan chhungkua han sawi lang law law ila, ka pa hi MZU ah Professor hna a thawk a, ka nu erawh chuan inchhungkhur enkawl hna a thawk a, tlin takin a pasal fanaute min enkawl a ni. Kan khawsak a harsa lutuk hran lo a, nei em em kan ni lem lo bawk. Ka pa hi fate enkawl kawnga khirh ve tak mai a ni a, tutemah hian Mizoram pelin lehkha kan zir lo hrim hrim. A hmuh phak loa awm hi a remti lo a, ama enkawlna hnuai ngeia min seilentir hi a tum tawp mai a ni. Ka nu in a lo pui bawm tha bawk a, phaia awm tam tak aiin saptawng leh hindi hi kan thiam a tih ve theih awm e. Kulikawnah khawsain Catholic ruh tak chhungkua atangin ka lo seilian a, Cathedral ah kan lawi mek a, chutiang chuan chhungkua inngeih leh inngai em emin kan khawsa ve a ni.

 

"Dya, i pheikhawk dum flat kha min lo dah chhuahsak teh" tih pahin ka room ah ka tlan lut a. Zanin hian kan kohhran thalai pawlin programme pawimawh tak kan neih dawn avangin kan hmanhmawh tlang a ni.

 

"U, khawnge ka jacket i suk kha i dah?" Brandon chuan min rawn au lawng lawng a, engkim hi min zawt reuh bawk si a. A awmna chu hrilh pahin ka han au let ve a, ka pa in min lo tur sek hlawm bawk a, kan tlai chhe em lo ang chu. 

 

Biak in lam panin kan unau chuan kan chhuak a, ka pa in motor keng mai tura min tih laia ka lo hnial chu ka inchhir tawh ngei mai. Thlansa phatin kan thleng a, ka thiannu Lucy chuan min lo nghak reng tawh. Ka naute pawh an thiante nen an inhmu a, kan inthen hrang nghal a. Ka ke na ut ut chu haider ka tum viau a, ka nau pheikhawk ka bun khan ka ke artui a lo nawt pilh nasa ngang mai. Ka chek hlak a, Lucy chuan ka ke chu a rawn melh ve vat a.

 

"Rinawma hian band aid a pai ziah kha, ka'n dil ange aw?" A ti a. 

 

"A ngai lo, engtin mah ka awm hleinem" ka lo ti vei tung. Rinawma chu ka bialpa hlui a ni a, mamawhna nei anga awm kha ka duh lo hrim hrim. Tlangval che fel fai thlup a ni a, band aid pawh chu a pai leh dawn tih ka hre reng. 

 

Ka ke na chu ka theihnghilh chhunzawm vat a, kan hun hman mekah ka rilru a kal thui bawk a, phiekhawk bun hrehawm tak ka bun tih pawh ka lo theihnghilh zo vek. Ban rualin ka naute pahnihin min lo nghak tih ka va hmu a, ka thlen dawn tepah Rinawma'n min rawn ko a, ka ke a lo melh reng ka hmuh chuan ka ke ka bai auh auh tih ka hrechhuak chiah.

 

"Hazel, i ke a thi ania" a rawn ti a. Thaw hak chungin ka ding a, ka pheikhawk chu ka phelh a.

 

"Ka ke a lo nawt pilh a nih hi" tih pahin pheikhawk bun lo chuan ka kal ta a. 

 

"Ka lo tuam sak ang che" tih pahin la banah a rawn vuan a.

 

"A ngai lo" ka han ti hram a. Min vawnna chu thlah a tum der lo. A bag atangin band aid a rawn phawrh a, ka ke chu a rawn bel a, duh lo teh mah ila ke lawng ringawta kan in thlen chu a huphurhawm.

 

"Ka lawm lutuk e" ka ti a, ka pheikhawk pawh chu ka bun leh ta a. Mahse, a lo na ngang mai. 

 

"Ka lo thlah mai ang che" tiin ka hnungah chuan a lo kal ve zel a.

 

"Nia, inthlahtir mai la, kan kal rei awm emai" Brandon chuan a lo ti hmanhmawh.

 

Rilru dam zan lo chuan Rinawma bike ah ka chuang a, inbe miah loin kan in thleng min phur a, be peih lo viau mah ila chutia ngawi renga awm chu a nuam miah lo. 

 

"Ka lawm lutuk e" tiin kan kawtah chuan ka chhuk a, min mangtha hnuah a tlan let leh a, keipawh inchhung lamah ka bai lut a. Damdawi hnawih nghalin Rinawma'n ka ke a khawih kha ka ngaihtuah let vang vang.

 

Rinawma (Julian tiin an ko bawk) nen hian kum thum chhung kan inngaizawng ve a. Phaiah lehkha zirin a awm thin a, a rawn haw hnu rei vak loah intihthiam lohna em em pawh awm hran loin kan inthen hlawl mai a. Engmah inthen chhan kan neih ka hre lo a, Lucy hnenah erawh chuan 'aman a hria ang' a lo ti tawp a, zawh chhuah kher kha tlawmah ka la ve bawk nen tihian kan inthen chhan hre miah loin ka awm ta zel a ni. CTP ah hian Vice president a ni mek a, amah hi sawiselbo a ni tawp. Kan inkar kha khatiang kha ni mah se han sawisel zuina tur pakhatmah ka hre lo a, ani aia mi tha hi an awm ka ring lem lo bawk. A chang chuan ka ui ve thin lutuk, tunah hna a nei tawh lehnghal bawk nen, mahse, min hnawl tawhtu hnena kir leh lam erawh ka ngaihtuah ngai miah loh thil a ni thung. 

 

Kartluanin inchhungah ka buai a, kan inhnuai kan sak chhunzawm avangin hnathawkte eitur siam leh a tul apianga pui thei turin ka awm a, ka hah ve thin viau. Master degree ka nei tawh a, ka nu leh pa hian ka thawh awm tawk thawh tur melh turin min ti fo a, hnaah hian ka vanduai rihte pawh a ni ang, ka la hmu hlei thei lo. Jenny school bang chu a eitur ka lo siam sak mawlh mawlh a. A inthlak zawha a rawn kal chuan min melh vang vang a.

 

"A u, kan school ah lo thawk la, kan science teacher a bang thut a, kan mamawh lutuk asin" a ti a.

 

"Ka peih lo e a" ka lo ti mai a, private school ber khera thawh chu ka peih lo a ni. 

 

"Kan exam chhung tal thawk la, sir hnenah pawh M.Sc i nih thute, B.Ed i zawh tawh thu leh i thawh theih ka rin thu ka sawi a" a ti leh a, a biangah ka piai sak a, ka nuih ta mai mai a.

 

Chu thil chu an lo ngai serious ngang mai, zanah kan inah principal te nupa chu an rawn leng nghal a. An school a thawk tur chuan min rawn ngen chawt a ni ber mai. Ka peih rei lo a nih pawhin pawl sawm leh pawl sawmpahnih exam chhung tal thawk turin min rawn bia ti ila a dik ber ang. Chuti taka min rawn ngen ta chu ka pa pawhin min ngaichang tak chungin aw a lo pawh ve a, keipawhin pawi ka ti hran lo, a rei dawn lo bawk a.

 

A tuk atangin Jenny te school ah chuan ka kal ve ta a, zir tur an nei tawh mang lo a, ka awl phian mai. Chutih rualin study camp nei lai an nih avangin ka riah a ngai ve fo dawn tih ka hria a, chu mawlh chu ka peih lo. Karkhat ka thawh hnuah zan lam ka duty a hun ve nghal mai a, Jenny lawmah a tla a, ka nau vang chauhin ka kal hram hram a ni ber e. Dar 8 a rik chuan chawlh lawk an nei a, thingpuite an in a, a thahnemngai falin an hriatthiam lohte min lo zawt ve bawk a. Intihharh tumin pawnah ka chhuak a, ka taksate chu ka han zimar . Ka piah lawka classroomah chuan mipa pakhat vei nulh nulh ka hmu a, ka en reng lai chuan a rawn hawi a, ka lo hawisawn rang ngei mai. Ka va bih leh dek dek a, min lo en tawh lo tih hria in ka han en nawn leh ngat a. Jenny ka thlah zana min lo hmutu kha a ni tlatin ka hria. A pumrua chu a lian tha tia sawi tur chu a ni hauh lo a, mahse, a te chhe chuang lo. A inphut mawi tawk e ti ila ka sawi thiam dan ber a ni mai awm e. 

 

Nihnih chhung chu ka hmu leh miah lo a, ka hmuh sual zawk emawni ka ti rum rum tawh. A nithumna tlaiah school atanga ka haw tur chu kawmchhak stepah a rawn chhuk thla ta a, principal te in atangin a rawn chhuak a ni ngei ang. Amah hmu anga awm duh si loin scooty bulah chuan ka ding a, Jenny ka nghah tho avangin chuanlam dang ka mamawh chuang lo. 

 

"I nau i nghak mi?" tih riah chuan ka hawi chhuak a. Ka chhak lawkah chupa chu a lo ding reng. A hmel ka hmuh rual khan keimahah hian engemaw tak a rawn thleng ka ti mai, ka hit deuh mem mem hian ka hria. Min zawhna ka chhang thei hram a, a nui ri huk lehnghal. Hmeltha hluah tia sawi tur ni miah si lo khan a chhe lo ru viau a, zûn ngah tur chu tih ka hre mai.

 

Jenny nen kan inphur haw a, ka insum thei tawh lo, kha pa kha tunge tih ka hriat a ngai tawh lutuk tlat. Pangngai thei ang berin ka zawt a, ka inchhir leh tep, a chhan chu ka nau min chhanna hian min tibeidawng tlat.

 

"Kan principal fapa rangkachak a nih kha, a nu hian a chhuang thei rap mai. A chhe lo bawk sia, bialnu pawh a ngah lutuk an ti ka thianten" a ti! A hming pawh Mama a ni tak, a nu fapa ngawih ngawih tur tih ka hriatna chuan min ti down hnep bawk.