LAST PIECE 2

 

 

 

Two

 

Krismas a hnai tawh a, school pawh kan chawl tawh, study camp erawh kan la nei reng a. Ni 20 thleng tal kal nise tia Principal in a sawi kha kan vai thatna tur a nih avangin pawi kan ti lo tlang viau. Kan han ti nek nek a, ni 20 zing a lo inherchhuah chuan ka nau mutbu hawn ka tum a, scooty ah phurh theih mai turin kan zawn chhuak a. Naupang thenkhat pawh an chhungten an rawn lam sap sap bawk. Scooty chu han tihnun mai ka tum a, a nung thei ta hauh lo. Rei ngial ka beih hnu pawha a la nun theih loh fo avangin ka chhungte biak mai thain ka hria a. Chutihlai tak chuan Mama a lo kal a, beidawn hmel zet hian ka lo melh ringawt.

 

 

"Ka lo en chhin dawn mi?" a ti a. Ka lo tawlh hnung nghal hret a. A han beih ngial hnu pawh chuan a nung duh der lo. "A plug thlak a ngai a nih ka ring, ka va leisak ang che u" a ti a.

 

 

"Ah.. a ngai lo, i buai lutuk ang. Mechanic ka ko mai ang" ka lo ti vat a, a nui suk a.

 

 

"A harsa hleinem, min lo nghak lawk ula" tih pahin kan dinna piaha motor dahnaah a phei a, a bike a va lachhuak a. Engmah ka sawi leh hman hmain a tlan chhuak zui nghal a.

 

 

"Au Hazel, i van en nasa em em" Jenny chuan a lo ti sap.

 

 

"Chhe si hek lo" ka lo thawr a, a meng bial nghal kawk.

 

 

"Chhelo i ti ve tho maw? Avan mak, a chhe lo an ti zel a, a chhiat lohna pawh ka hre ve lo e a" a ti bai bai.

 

Rei vak lo hnuah Mama chu a rawn let leh a, a thil rawn lei chu a cuah nghal mawlh mawlh a, ngawi rengin a che lai chu ka lo en tawp. Hnehsawh zet hian a thlak zo nghal zung zung a, a hmuhnawm reuh tawp.

 

 

"Engzat nge ka pek ang che?" Tih pahin ka bag ka zen nghal a.

 

 

"A ngai lo, tikhan in in thlen chuan a lawmawm" tiin a nui a.

 

 

"Chutiang ringawt a ni thei lo" ka tih chuan chiang zet hian min lo en a, ka hawisawn ta ringawt. Hetiang hian tu mipa mah ka la zah vawng vawng ngai lo.

 

 

"Krismas gift a ni mai" tiina hmanrua a lakhawm a, "Han tlan teh u ka lo en ang che u" a ti a. Ka che buai a nih deuh ber ang chu, lawmthu ka sawi pawh ka hre lo, ka tlanchhuak ta daih a, ka hit mem memin ka hria.

 

 

"Nu, pa, a u in star a nei" 

 

Inchhung kan luh rualin Jenny a au lawng lawng a, ka chhungte an lo nui nghal thaw.

 

 

"Nei ve rawh se, bialpate pawh nei se kan phal ania" ka pa in a lo ti a.

 

 

"Kei phalsak ka ni ve em?" Brandon-an a lo ti.

 

 

"I graduate hunah" ka nuin a lo ti a, ka naua chu a nui vur vur. Tunah pawh bialnu a nei tih kan hre reng sia.

 

 

Kan chhungkua hi kan inpawhin kan inkawm ngeih em em a, ka nu leh pa bulah hi chuan engmah zep kan nei ngai lo. Chutiang tur chuan anni pawh an inhawng em em bawk a, an fakawm ve thlawt. Catholic ruh tak ni mah ila ka pa hian he thu hi min hrilh fo thin. "Kan kohhran mi ngei hi nei ula tih hi ka duhthusam leh ka duh ber chu a ni a, engemaw palh thua kohhran dang ami hmangaih in lo nei a nih chuan an kohhranah in lut ang. Mama erawh chu mipa i nih ang ngeiin kan kohhranah a rawn lut bawk ang" a ti thin. Kan lo nui mai mai thin a, kan kohhran mi lo chu ngaihzawn theih ka inring ngai lo a, ka tum ngai hek lo. Tette atangin kohhran school ah kan lut chho ta char char bawk nen rilru leh ngaihtuahna hian khaw dang a hawi lo a ni ber ang chu.

 

Krismas urlawk ni a ni a, ka nu nen kan bazar a, mi an tam ngei mai. Zan lamah kan cousin te rawn kal an tum avangin ei tur kan lei duhtawh viau a, chawhmeh pawh kan lei thei mang lo. Hah hnepin in kan thleng a, mipui zi nuai nuai kha ka zo lo tep. Ka inbual a ka mu ta daih a. Chawei dawnah ka nauten min kai tho a, ka harh ve ta huai. Tlai atang tawhin kan cousinte an rawn phur tawh a, kan chaweikham fel hnu rei vak loah an rawn thleng ta reng bawk a. Jenny a awm bawk a, Dya-i nen thleng seng leh sil hi chu an tihturah an ngai ve tawh a, ka ti khat angreng. Inchung lamah kan chet tlayna tur ka buaipui a, tlaiah khan ka lo muhil daih a, thutthleng pawh ka la rem hman lo.

 

 

"Andrew hi a lo kal ve dawn lo mi a?" zawh bik pawh nei lo hian ka ti a.

 

"A thianpa nen hman an lo tum tawh sia, han thulhsan kha a inthlahrung a, nakinah ka lo kawi ang a tih kha" Tetei'n a lo ti a. Ani hi hetiang hunah hian chhuanlam a nei ziah ka ti rilru neuh neuh a, ka unaute hriatah erawh ka sawi chhuak lo.

 

 

Ar kan hem a, a thenin ei tur dang an lo buaipui bawk a. Kan hla play lampui an lo awm bawk a, kan ri ve nawk nawk mai. Dar 11 velah Andrew a rawn lang hlawl a, a rawn kal tak tak pawh kha ka ring lo ania, mak ti zet hian ka lo melh a. Chu aia mak zawk a la awm fo, a hnungah Mama a rawn kal anih chu. Mak ti lutuk hian ka melh a, min rawn hmuh chuan keimah ang bawkin a hamhaih ve nge ka hre lo, min en ve ta reng a. 

 

"Ka thianpa Mama a nih hi, in thinrim ka hlau sia, kan lo lang ve lawk" Andrew chuan a ti a. Midangin an lo chhang nak nak hlawm a, sawi ve tur pawh ka hre lo.

 

 

"In in va nei ropui ve" tia min biak chuan ka harh chhuak chiah, ka bulah a lo ding reng a.

 

 

"I va ti lawmawm ve" ka ti a, ka melh zawk a, min lo melh vung vung. A nui suk a, ka nui ve ringawt.

 

 

Ka rin aiin an awm rei a, an haw hnu rei vak loah keinipawh kan tin ta a. 

 

 

Chumi zan atanga zan ngana, ni 29 zanah Mama chu kan inah a rawn leng, a thianpa hruaiin! A nihna takah chuan urlawk zan atang phei kha chuan ka vei ngawih ngawih a ni ber mai, ka duh miah loh thil a ni hetianga mahni pawh in control thei lo khawpa duh neih hi. Rei an leng lo a, thingpui an in hnuah an haw mai a, ka chhungte zawhna mitmeng chu haider luiin ka room ka pan san a, ka hlim tih an hai ka ring lo.

 

*Hazel, ka vei ngawih ngawih che tih hi hmaichhanah ngei sawi ka tum a, ka hlawhchham a ni e. Ka zah che a, awlsam taka sawi hi ka theih ka ring lo* 

 

 

Tudang mah an ni lo e, amah Mama ngei a ni.

 

Chhan dan tur ka hre ngang lo, ka chhang buai ang tih hlauhna ka nei bawk nen chhan loh maite chu ka han tum a, ni theiin ka hre si lo.

 

 

*Ka lawm lutuk e* 

 

 

Thaw dep depin min chhan hun ka lo nghak ve tawp.

 

 

*Chu chiah chu mi?*

 

 

*Mam, midang ang hi chuan ka en bik lo che*

 

 

Ka pangngai chho tan a, chhan dan tur pawh ka hre ve tan, ka fim tan a ni deuh ber ang chu.

 

 

*chhanna lawmawmah ka ngai dawn em?*

 

 

*min vei thu i sawi ringawt a*

 

 

Ka zak leh deuh e a.

 

 

*Ka duh che a, ka bialnu ni turin ka duh che*

 

 

Chhanna tur ka type mawlh mawlh laiin a rawn call nghal. Ka lai tut lehnghal, a va zia lo thei tak. Thil tam tak kan sawi lo, mahse, chumi zan atang chuan kan inngaizawng ve ta ringawt. A awlsam leh lutukin ka hria a, mahse, enge kan nghah vak la ngai chuang ang?

 

 

A tuk zanah amahin a lo leng a, anah inringtawk taka a awm hian a tir phat atangin min hip nghal. Ka chhungte pawh inti zei takin an room lamah min inthiarfihlimsan a, Jenny phei chu a zak deuh ngei a, an sir ve deuh reuh a nihna kha a awm a, a awm ve tho mai.

 

"Engtik atangin nge min duh?" 

 

 

Min melh vang vang a.

 

 

"Drew-a status a ka hmuh atang che khan. I birthday a i thlalak a hman khan" a ti. Ka hriat ve hmain min lo star tawh tihna maw? A va mak thei ngai ve. 

 

 

"Ka awih duh angem aw?" Ka ti a, a ban a rawn phar deuh a.

 

 

"Ngaihtuah let duh se chuan Drew pawh hian a ngaibel thei hrim hrim ang. Ka va zawt chiam alawm. Chuan, urlawk zana in ina kal a tum pawh khan ka lo kal ve kha, ka hmuh chak vang chein" a ti leh a. 

 

 

"A nih ka awih tawh e" ka ti a. A nui sak mai. A hmeltha thlawt, zep a awm lo. Hei ai hian palian deuh hret se tih bak amahah duh khawp loh ka nei lo. Palian hi ka ngaisang a, ka mitthla ngat ngat thin. Mama hi a te viau e tihna a ni chuang lo a, ft 5'7 vel a nih ka ring. Rinawma kha ft 5'9 ania, ka duh tawk veng vawng thin. 

 

 

A haw dawnah rei vak lo kan infawp ve zuai a, kan in vai liam ta. Ka lung a awi tawk a ni ngei ang, ka lo nui leh thin. Ka khum ka siam zawh hnuah ka inphih fai leh a, ka mut hnuah a message a lo awm vang.

 

 

*in ka thleng chiah* tih leh *i hmui kha strawberry ang mai a ni, ka addict dawn tih ka chiang* 

 

Chumi zan atang chuan hming thar ka nei a, 'Strawberry' tih ngat mai chu. Inngaizawng tir tih takah kan inbe rei a, inhriatchian nan hun kan la mamawh tam bawk nen, zan hi a rei lo duh khawp mai.

 

 

Kumhlui thlah zanah kohhranin programme kan nei a, kan rei phian a. Mama rawn kal a tum tih ka hre ve bawk nen rilru in vei a nei run mai. Kan bang a, hmanhmawh angreng tak hian ka kal a, kan thalai hruaitu Thomas'an min lo be leh rih, a la hmanhmawh lo em em zui. 

 

 

"Julian-a khan Hazel te inah ka kal dawn a ti maiin ka hria" a la ti zui.

 

In ka thleng a, ka phone ka en hmasa ber. Mama message hlir a lo awm a, kan ban tawh thu hrilhinka han thawn let vat a. Min rawn call chhunzawm nghal.

 

 

"Hospitalah ka la awm a, nakin deuhah ka lo kal ang aw. Ka pu a tha lo leh deuh a" a rawn ti a. A pu damloh thu kha tlaiah a sawi a, an lo in admit ta nge nge a nih chu. 

 

 

Ka inthlak fel hnuah inhnuai lamah ka chhuk a, ka nu leh Rinawma an rawn inzui lut a, ka lo meng phawk deuh hru.

 

 

"I va thleng hma ve" tiin min bia a. 

 

 

Engemaw rawn tih a tum ka lo ti rilru a, ka chhang let a, chokaah ka lut tlang a. Tui ka in teuh a, thingpui ka chhuang nghal. Ka pa teho an lo haw ve ta bawk a, an rawn ri lut nak nak a. Dya-i hian Rinawma chu a kawm thiam ber a, an inthutchilh leh nghal reng bawk. An thlangah ka thu a, kohhran thil an sawi dun mawlh mawlh a, an thusawi chu ka hre zeuh zeuh.

 

 

"Kohhran dangte hi i lo ngaizawng ange aw" tia an infiamna chu ka lo ngaihtuah zui mai mai a. Mama te hi kan kohhran an ni lo tih ka hre chiang a, tinge kan la sawi lan miah loh?

 

 

Ka naute inthlak chhungin Mama a rawn thleng phei a, Rinawma'n a lo chik hle tih ka hria. Mama pawhin chutia tlangval lo thu ve ta reng chu a melh ru zeuh zeuh tih ka hre reng, Andrew rawn thlen laiin Rinawma chu a haw ta a. Keipawh kawrlum ha turin ka kal a, zanin hian Drew te inah hman kan tum a ni. Ka unaupa a ni bawk a, ka nu leh pain min phalsak ve mai bawk.

 

 

"Tunge rawn leng kha?"

 

Kan tlan chhuah hnuah min zawt ta chat a. 

 

 

"A melh dan che kha ka duh lo" a ti leh tawp.

 

"Engtinmah min melh loh kha" ka lo ti ve a.

 

"Strawberry, khatiang khan mipa dangin an melh che ka phal lo" a ti nghet ta churh a.

Note: Kumthar chibai vek ule, ka regular thei hrih thlawt lo, min lo hrethiam hram zel turin ka ngen che u. Lalrohlua hi ka zo hlei thei lo, ka type ve nual a, ka duh thu sam lo leh thin a, thluak a chawmawlh rih aniang 🤨