LAST PIECE 3

 

Three

 

 

Kum a lo thar a, school pawh kan lut tan leh tawh a, Mama pawh a zirna a la zawh loh deuh avangin Sikkim lamah a chhuk leh phawt a, thla thum hnuah zo felin a rawn haw ve tawh ang. Ka la sawi hmaih pakhat la awm chu, Mama hi kei aiin a naupang zawk a, ka chhang chiah Lydia nen an inrual a ni. A tirah khan kei aiin a naupan ka ring miah lo a, amah hi hmel innocent a ni lo ve hrim hrim a, kan inrual tawk vel ka lo ring kha ania, mahni aia naupang ngaihzawn tum ngai miah lo khan ka han ngaizawng ta chu a nia, Mama ka tawn atang hian ka tih ngai loh hlirin ka awm chho tihna a ni ber chu.

 

Zan rei tak tak thleng kan inbia a, a lung a leng a, rawn haw a tum ut ut fo. Keipawhin ka ngai ve reng, mahse a kuai lungleng zawnga awm erawh ka duh lo bur thung. Kan dam anga, a zir zo thuai dawn tih ka hre ve reng a, ka fuih ve sauh sauh thin. February thla chawhnu lamah exam tan a ni a, an exam zawh chuan keipawhin ka chawlhsan theih ka ring. Exam hmachhawp ka nei ve nual a, school a thawk chung chuan engmah ka zir tak tak thei lo. Principal te nupa hi chuan thawk zel turin min duh tih an sawi ve reng a, mahse heta ka tan laklawh chuan ka tang reng dawn tih ka hre chiang ve si.

 

 

Mama te chhungkua hi han sawi lang ve reng reng ila, an chhungkua hi chhungkaw zahawm tak an ni hlawm. A pu(a pa pa) hi synod pastor pension a ni a, a pa (principal) hi an kohhranah upa a ni bawk. Tin, Mama nu te lamah pawh Synod office a thawk leh kohhran upa tih vel an ni nawk bawk a, chhungkaw puitling tak chu an ni hrim hrim.

 

 

Ka ngaihtuah nasat pauh leh nakinah thil hi a harsa dawnin ka hre ve nasa thin. Keini lamah lah Catholic ruh tak, hruaitu nihna chanvo chelh ve far kan lo ni hlawm bawk nen, keimah tak pawh hi ka ruh a, pasal neiha an kohhrana va awm kha ka theih ka ring ngai lo. A harsat hmaa chinfel theih hi ka duh leh thut thin. Chutianga ka ngaihtuah apiang chuan Mama chân hi ka la ui hrih ti tawp mai ang, ka hma ka sial deuh pawh a ni mahna! Eng chen nge kan inzui theih dawn hre lo mah ila tuna thlah tawp chu ka ui, inneih hi chu ka ngaihtuah peih lo law law. Ka ngaihtuah dan hi a dik em ka hre lo, inneih pui atan ni loin ngaihzawn atan ka duh ti ila amah Mama min hipzia in hriatthiam mai ka ring. Sapin 'long term relationship' an tih hi kan nih ka ring lo tawp mai anih chu.

 

 

Ka insiam laiin ka phone a rawn ri a, Mama min rawn call hun a nih avangin ka va chhang vat a, vawiin hian exam a zo dawn a, duhsakna nen ka lo thlap ve thlap. Keipawh vawiin hian exam tur ka nei a, Mama bulah erawh ka sawi lang lem lo. Ama zirlaiah a insawrbing a, keimah ngaihtuah tel loa a awm kha ka duh vang a ni pakhat. Chumi piah lamah an school a thawk tawh lo tur ka ni tih hi a rawn haw hunah hmaichhana hrilh ka duh vang a ni pah bawk. Uluk taka ngaihtuah ni ila chuan a bul atang khan lo hnara bul lo tan pui lo tawp tur hi ania, a tawp kan khar hunah kan na viau angem? Hunin a la hril ang chu.

 

 

Hun chelh din loh ta chu a kal ve bek bek a, Mama pawh a rawn haw tawh a, a awl zanah a rawn leng phei ve fo a, ka chhungte nen pawh an inkawm thei viau. Ka exam pawh written ah ka tling na a, interview ka paltlang zo ta lo a, exam hmabak pahnih ka nei mek bawk. Mama nu leh pa khan thawk zawm turin min duh viau a, ka bansan ta talh kha a nia, ka pa hi chuan thawk zel mah ila pawi a ti lo, zirtirtu tih takah a hnung zui tur hian min duh ve deuh thinin ka hria.

 

 

"Hazel, inleng i nei"

 

Ka nu in min rawn ko lauh lauh a, ka inbual zo ka thawmhnaw ka lo inha mek a, tun ang huna rawn kal chu tu tak ni ang maw? Ka sam ka khuih thuak a, inhnuai lamah ka chhuk thla ta a. Ka rin loh ber ka hmu chu ka ding chawt a, ka hamhaih vekin ka hria. Gilbert, ni e, Gilbert ngei a ni.

 

 

"I lo dam maw?" Tih riah ka harh chhuak leh chauh a, ka lai hu in ka hria.

 

 

"Aw dam alawm. Kan inhmu thut a, min ti hamgaih alawm" ka ti a, a kut a rawn phar chhuak a, kan inchibai a.

 

 

"Ka hmu chak tawh che a, ka rawn thlen fel velah ka inbual a, ka rawn kal nghal" a ti a. A hmel chu ka han ennawn leh ngat a, tinge a lokal vang vang le? A hma ang kha chu nise chu ringawt ka hriat chakna pawh chu mut theih loh chhan a ni leh ngei awm sia, ka rilruah Mama a rawn lang a, Gilbert nen ka khaikhin lo thei lo. Mama ka duh hmasak ber na kha chu Gilbert nen an inan em vang a ni, an mitmeng kawlh hmel lek lek te, an hnar leh khabe vel te hi inang ka ti a, an aw thleng hian a inang ka ti a nih kha. Tinge Gilbert vanga khatianga ka awm ka hre lo, mahse ka lo duh ve hle chu a ni phawt ang.

 

 

"Delhi lamah coaching rawn kal ve daih la" a ti a.

 

 

"Ka chak ve khawp mai. Mizoramah hlir lehkha ka zir a, hawi zau nan pawh ka chak ve reng" ka lo ti a.

 

 

"I pa lo dil ve la, ka chhuk leh hunah rawn kal ve rawh. Boruak hi a inthlau ve teh mai ania" a ti a, chu chu dik ka ti lutuk. Saptawng leh hindi duhtawkin ka tawng thiam a, mahse, interview ka hmachhawn chiah hian ka thiante ka tluk lohna chu confidence ah hian a ni tih ka hrechiang tawh ngang mai.

 

 

"Ni e, ka lo sawi chhin ang. Mahse, a remti kher lo thei bawk a" ka ti a.

 

 

"I pa te chuan a nawr a nawr zawk che a, nangmah a nih kha duh lo zel" ka nu in a lo ti khauh a. A dik leh tho bawk si, hmun danga awm hrim hrim hi ka chak tawh lo a ni maithei.

 

 

Rei vak lo hnuah a haw ve ta a, ka nu in a mitmengin zawhna min rawn zawt nghal chat.

 

 

"A rawn kal ngawt nachhan kha ka hre miah lo ania aw" ka lo ti a.

 

 

"In inbe pawp thin a niang chu ka lo ti mai a" tih pahin min nuih a, ka hmui ka lo tihpawrh khum.

 

 

Gilbert ka hmuh hmasak berna chu Diocese Catholic Thalai Pawl inkhawmpui Mamit a kan neih tumin kan intawng a, thian angin kan intawng a, kan inkawm zui ta zel a. A chang chuan thian piah lam ang lek leka min biak chang a nei thin a, a nihna takah chuan keichuan ka hmuh hmasak ber atang khan ka duhzawng tak a ni tih ka hre nghal. Inkhawmpui kan zo a, kan haw hnuah phone hmangin kan inbe chhunzawm a, inngaihzawn thu engmah kan sawi ngai lo chung khan ka hlimpui em em thin a, kim khat dawn chu chutiang chuan kan inbia a. Mahse, kan tawpna erawh ngaihzawng nghet tak a lo nei reng tih ia hriat ni kha a ni. Ka tliak hnawp a ni ber, ka nu hian engkim min hriatpui a, ka natzia ka zep thei meuh bawk si lo nen ka naute pawn an hre ta vek. Khatiang tak khan ka ngaihzawng ni miah lo kha ka natpui thei ang tih ngaihna reng ka lo hre lo. Julian nen tleirawl chhuah atangin kan inkawp a, kan inthen khan hetiang hian ka na lo tawp kha a nia, a mak ve ngawt mai. Kum hnih a liam leh hnuah tihian kan inhmu leh ta a nia, khang hunlaiah khan min kir pui lo thei lo.

 

 

Zanah Mama a lo leng a, ka inthiam lo zawk, ka rilruah Gilbert kha a cham ve deuh tlat a, duh lo viau mah ila ka tum vang ni miah loin a lo lang zel si a. 

 

 

"Zanin chu thil dang daih ngaihtuah i ang" Mama'n a ti ta nge nge.

 

 

"Chutia mi?" Tih pahin ka nuih a. 

 

 

"Strawberry, kan inhriatna la rei lo mah se ka hre ve tawk ciau tawh che. Nawm lohna i nei em ni?" Ka kut a vuan a, min ngaihtuah hmel zet hian min melh kal bawk. Ka lu ka thing a, a kut chu ka han hum nghet ve sauh a.

 

 

"Mam, engmah a ni lo" nuih sak pahin ka ti a, a thaw deuh huai.

 

 

"Dik tak chuan maw tun thleng hian ka la hlauthawng reng. Kan inngaihzawn dan a awlsam lutuk khan ka ngaih a ti tha lo thin a, ka chan leh mai ang che tih ka hlau" a ti a.

 

 

"Chu, min ring vak nange?" Ka lo ti nghal vat a.

 

 

"Aih, chutiang a ni lo. Ka hre lo, ka hre bik lo. Midang i thlang zawk ang tih ka hlau, engmah hna thawh pawh ka la nei si lo a" a ti a.

 

 

"Mam"

 

 

"Umm"

 

 

"I naupang deuh tih mai loh hi chu duhkhawp loh ka nei lo"

 

 

A maimitchhing sawk a.

 

 

"Kha kha ka sawi ngam loh chu ania, ka naupan zawk vang hian min ngaihzawn peih loh hun a thleng ang tih ka hlau a" a ti a. A hmel chu ka va en a, a duhawm ngawih ngawih. 

 

 

"Kan hma hun chu ka hre lo a, mahse chung vel vang mai mai chuan kan inthen ka ring lo" ka tih chuan nghet zet hian ka kut chu a vuan a.

 

 

"A laklawhah min tawpsan suh aw. Ka bialnu i ni na vang vang a, ka ngaihzawn chakna che hi a la reh lo ania" a tia, kan nui dun ta hawk hawk a. 

 

 

Ka bula lehkhabu in chhap darh nuaih chu ka rem fel a, ka hla play chu ka sak pui rat rat a, nimin lamah Mama te Sialsukah an kal a, vawiinah rawn haw an tum a, a motor ke a chhiat avangin an tum angin an awm leh thei lo a, a mood a rawn fuh loh hmel tawp. A chang chuan a naupanna hi a lang ve thin, pumpelh theih miah loh harsatna a lo thlen changte hian a hrethiam lo lek lek thin a, ka nuih a tiza thin. 

 

 

Ka phone ah message a rawn thleng a, Mama a nih ringin ka han ban vat a, Gilbert zawk a lo ni.

 

 

*Zanah kan lo leng dawn, Fela te nen*

 

 

Han phal loh ngawt thu a awm si lo a, ka lo aw ta ringawt. Mama'n min rawn biak hunah ka hrilhfiah mai a niang chu. 

 

 

"Delhi lamah chuan i zuk hawi thla ve dawn em niang?" Ka pa in kan chawei laiin a ti a, ka nauten min melh thap. 

 

 

"Aaa.. ka hre nang" ka lo ti ringawt.

 

 

"Kei chu ni ila ka aw nghal ang" Lydia chuan a lo ti vat a.

 

 

"Ka exam hmabak te hi ka ti leh phawt ang chu ka lo ti deuh a" ka tih chuan ka pa chuan a lu chu a bu nghat a.

 

 

"Class tan buai lo tur khan thutlukna lo siam la, thla thar atangin an tan leh mai dawn a nia" a ti a. 

 

 

A hma ang kha chu nise ka kal chiang viau ang, ka nunah Mama a tel ve tawh a, ka rawn ve phawt aniang chu. 

 

 

Gilbert te rawn lenlai chuan ka nu in zawhna a lo zawt deuh chiam a, ka phone ka ngaichang deuh reng thung. Mama ka be thei lo a, min rawn be bawk si lo nen ka ngaihtuah angreng a, ka nu in biakna tur a lo ngah chu ka lawm angreng. 

 

 

"Ticket buaithlak hun a ni leh dawn chiah a, i tum dawn chuan ngaihven ran a tha ang" tih pahin min rawn melh a, ka sawi thiam lo, Mama mita min ngaihtuahna tak tak ang kha ka hmu ve lo.