LAST PIECE 4

 

Four

 

“Ka rawn haw ve chiah a, kan awm tlang ve tawh ang tih laia I awm bo leh daih chuan a va ho duh awm ve” Mama chuan keimah pawh min melh lo hian hma lam chu a melh tlat a. Delhi-a awm leh awm loh chungchang ka rawn a, min dan bur ka ring lo na in rawn hmasak chu ka tih tur a nih avangin ka rawn ve a ni. 

 

“Thla ruk course bak kal ka tum chuang lo a” amah melh reng pah chuan ka ti a.

 

Zawimuangin a rawn hawi chhuak a, min nuih sak a.

 

“Thla ruk chhung chuan thil tam tak a thleng thei asin” dam dup hian a ti a, chhan let dan vak ka hre tawh lo. Motor a tinung a, “Haw phawt ang aw” tih pahin a tlan chhuak ta nghal a. Kawng tluanin kan inbe tawh lo, mahni rilru ve ve kan kawm pawh a ni ang.

 

Kan in kawt kan thlen chuan motor a tiding a. “Strawberry, i kawng daltu nih chu ka duh lo. Rilru nuam deuhin I kal dawn nia, mahse, I kal hmain ka nu leh pa bulah ka bialnu anga introduce che ka duh a, chu erawh chu min tihhlawhtlinsak la tiraw?” a ti a. Ka huphurh nghal ngawih ngawih, chu kher  kher chu tunah hi chuan ka la beisei lo, a la hma mah mah ka ti.

 

“Um, kan tum dawn nia” tiin ka chhang ta tho a.

 

Zanah Gilbert nen kan inbia a, ka rilru ka siam fel thu ka hrilh a, ticket vel min lo enkep nghal turin ka chah a, ka la awm bo ngai loh avangin ka mamawh ve rih dawn si a, thil pawi lutuk chu a ni em lo ang chu. Ka nu leh pa bulah pawh ka rilru ka siamfel thu ka hrilh a, engkim ka kutah an dah nghal zat bawk. College kan rah ve atangin admission leh thil dang buaipui ngai zawng zawng hi kan tihturah an dah vek thin a, kan puitlin theih nan chung chu an ti thin tih ka hria a, hemi kawngah hi chuan an hlawhtling ve thawkhat  ang. 

 

Mama te ina kal ngai chuan ka rilru a kam ve deuh reng, kar tawpa kal tura min sawmna chu ka han aw phawt chu a nia, ka hreh ngang mai. A hma chuan ka thawh ve zuaina a nih avangin an ina kal hrim hrim chu ka hreh lutuk lo, tunah erawh chuan an fapa bialnu ka nih anga kal tur ka ni a, a dan a dang em a, chu bakah engtin nge an ngaih ang tih ka hre si lo a, ka rilru chu a inkhap buai ve viau. Thalai inkhawm zan a nih avangin Mama pawh a rawn leng lo a, inkhawm banah kan committee leh nghal a, kan rei ta zek. Kan ban hnu chuan Rinawma leh Seph-a’n min zui haw a, lehkha ziah fel tur tlem kan nei a, kan inah an rawn lut kawi a. 

 

“Hazel, kohhran dang daih I ngaizawng hi chu ka thikthu a lo chhe tawp”Sepha’n a ti bai bai a, ka lo nui mai mai a, Rinawma’n min lo melh deuh kar a.

 

“Mahni kohhran mi chauh ngaihzawn tur tih dan a awm hleinem” nghal zet hian ka lo ti a.

 

“Kohhranah a kul a taiin in inhmang ve a, a mawi chiah lo alawm” a ti leh hram.

 

“Ka nei tih pawh I hre ngawt emawni le?” nui chungin ka ti a.

 

“Ka hriat lohin tuin nge hre chuang anga? Thianpa pawh tihian a awm ve reng a, a nghak che tih pawh I hre reng a, I mak ve ngawt mai” a tih chuan Rinawma ka melh a, hnuai lam a lo melh daih.

 

“Min nghah thu chu ka vawikhat hriatna a nia, chu bakah tun thleng hian kan inthen chhan kha ka la hre miah lo tak a sin. A ti ho khawp mai” ka ti kher a, Seph-a a lo nui deuh tut tut. 

 

“Tak tak em ni?”tiin a thianpa chu a va nghawk a, thingpui lum turin ka thawhsan daih. Rinawma nena inngaihzawn leh hi chu ka ngaihtuah ngai lo hrim hrim, kan inthen dan tehtawp kha ka tan a tlawm thlak em avang khan kan boruak hi a tha tawh ngai dawn lo tih ka hria.

 

An haw hnuah Rinawma'n min rawn text ta reng a, ka chhiar nawn leh ngial pawhin ngaihtuah chhuah tur ka hre lo.

 

 

*kan inthen chhan kha i hre lo tak tak em ni?*

 

 

*Thil hlui chu sawi tawh lo ang, a liam vek tawh a. Hriat pawh ka duh tawh kher lo ang*

 

 

*Hazel, tun thleng hian i insawifiah ka lo  ring thin asin*

 

 

*engmah insawifiah tur ka nei lo a, chhan awm loa min thentu i nih vangin i lakah pawh tlawm ka inti, khang hun kha theihnghilh ila, tihian awm tawp ang*

 

 

Ka maimitchhing a, a chhan chu hre chak viau mah ila mi huat tur an awm belh dawnin ka hria a, khang kha ka peih tawh lo.

 

Ni a liam ve zel a, zirtawp tlaiah Mama te ina kal tur ka nih avangin a hma ni atangin ka thawmhnaw hak turah ka buai tawh. Inchei vut si lo, mawi tawk tak sia kal ka duh a, ka rilru a buai ve deuh. Lydia ka rawn leh ta nge nge. 

 

 

"Ka telloa i awm hunah i va buai dawn tak" min ti nghe nghe. A ni chiah reng a, college kal lai pawhin function neih nikhuaa ka makeup artist kha a ni ve hrim hrim a.

 

 

Ka nu leh pa hriatpuina thlapa kal tur ka ni bawk a, thu tha min hrilh mawlh mawlh a, ka pa in a lo tuihnih ve zeuh zeuh.

 

 

"Au Hazel, tinge u Mama te inah chuan i kal kher dawn a? A zahthlak e" Jenny chuan a lo ti a, a u te pahnih an lo khi thaw.

 

"Nu leh pa hriatpuina hnuaia inngaihzawn hi a tha a, nangpawh ngaihzawng nei rual i nih hunah chuan kan hriat loha inhmuh ruk ang kha tum miah loh tur a nia, inah an rawn leng thlap tur a ni ang" tiin ka nuin a hrilh a, a lai hmel kan hmuh chuan kan lo nui nasa hlawm hle.

 

Mama a rawn thleng a, min hmuh chuan a mitmeng a tizim san mai. Mom jeans ka ngainat em avangin ka ha nasa a. Vawiin erawh chu jeans tight leh kamis oversized ka ha a, vans ka bun leh deuh tawp. 

 

 

"Tight pawh i nalhpui reng sia" a ti sup.

 

"Engkim ka nalhpui a lawm" tiin ka fiamthu zui a.

 

"I bawp a nalh lo emaw ka ti hman hial asin" tiin min fiam let.

 

"I bawp a nalh loh vang mai a" ka tih chuan rang zet hian hnuai lam a inen a, ka lo nui ri hak. "I awih emawni le? Nge a lo mawi lo tak tak, i va confi lo ve" ka ti a.

 

"Ka pian hi chu mawi tawk viau chuan ka hria" nui deuh tut chungin a ti a, a nuih zawnga a biang sum chiang lo deuha lo lang ve thin hian a mah a tihmuhnawm.

 

Kan kal chhuak zui nghal a, motor khalh pahin ka kut a vuan a, engvak mah sawi lo hian a rawn hmer leh vang vang thin. An in kan thlen dawn hnaih chuan ka thaw hak a.

 

"Mam, ka hreh e" ka ti hluai a.

 

"Engmah hreh nachhan tur a awm lo. Ka pa chu i hriat tawh tho kha, i pa anga nelawm a ni ve lo a, mahse a sual chuang loh kha aw" a han ti a.

 

An compound ah kan tlan lut a, kawmthlang lama school rawn lang luah chu ka melh zawk a, Mama ka hmuh hmasak berna hmun a ni. Inchhung luh mawlh chu ka huphurh, ka kut te chu a thlan deuh dap mai. 

 

 

"Nu, kan lo thleng a nia" Mama chuan inchhung luh pahin a ti a. Sitting room a lo awmte chuan min lo melh thap. Ka duh aiin an lo awm tam a, men ngaihna pawh ka hre lo.

 

 

"E, in lo thleng thei maw? Hazel, nangmah maw? Mama hian in hre dawn lutuk, mahse ka surprise duh che u a ti tlat a" a nu in a lo ti a.

 

 

"I va han hmeltha em em ve" Mama pu niawm tak in a lo ti bawk.

 

"Ka pu a nih hi, a hmu ve chak che a, a lo len phah a" Mama'n a ti a. Kan inchibai kual a, zahza na duh ngei mai.

 

An kawmchhaka a ni te nupa an lo awm tel bawk a, an chhungkua ringawt pawh zah tawh sa naklaiin ka insik ru mawlh mawlh lo chauh. Rei vak lo hnuah chuan midang chu an haw a, a pu erawh chuan chaw a ei ve dawn. 

 

"Khawi vengah nge kan awm i tih kha?" Tiin min zawt a.

 

Kan awmna vengte chu ka han sawi a, kan kohhran min zawt ang tih ka lo hlau ru deuh tung. Mama pu hi pastor pension a nih avangin a tupa tan hian anmahni kohhran ngei a duh ka ring rilru a, chuvangin tunah hi chuan buai nan hman ka duh lo a ni. Ka hlauthawn ang chu engmah a thleng ta lo, hlim takin chaw kan ei a, vawi thum vel hmeltha min tih thu a pu chuan a sawi hman, nuam ve duh tak a ni. Ka haw dawn chuan an chhungin pawn thleng min thlah a, kan invai liam ta a, ka thaw nghal huai.

 

"A hrehawm i ti em?" Mama'n a ti a.

 

"Hmeltha min titu bula awm chu hrehawm leh thak lo"ka lo ti a, a nuih a za nasa mai.

 

Tihian tuna kan hlim ang hian hlim reng ila ka ti, harsatnate hi kan la tawk dawn chauh nge, hlim takin kan pahnih hian kan awm ve zel ang tihte chu ka rilruah a awm neuh neuh a. Mama chan hi ka hlau, reilote chauh la inkawp mah ila amahah chuan ka duh hi a awm kin vek ni mai hian ka hria.

Note: Ka regular thei ngang lo, inthlahrung takin ka lo lang leh hlawl zel hrih a ni. Hna lama buai a na bawk si, taksa lo nuam lo veleh thin bawk nen min lo hrethiam zel mai teh u❤️