DAWN - 2

 

Dawn- 2

(story of my life)

Dinpuii pawh rin ang ngeiin MBBS zir turin a tling a, duh thlang thei turin a ti tha ve bawk a, uluk taka kan ngaihtuah fe hnuah JIPMER a thlang ta kha a nia, that akin zir thei se tih chu ka duhpui ber. Keipawh engineer seat chu ka chang ve na a, ka zir ka ring lo zawk. Ka ti tha lo a, college tha ka chang dawn chuang lo a, doctor ka zir theih lo a nih ro ro chuan college kal ka duh zawk hrim hrim bawk. Ka u ten St.Edmund’s college ah seat ka chang tih min rawn hrilh hnu phei chuan chu lam chu ka awn fel der tawh. Buaipui tur neuh neuh kan ngah dun bakah Dinpuii pawh rei rial lova kal a hun mai dawn avangin tih fel ngai a ngah a, kan inhmu hman meuh lo. Ka rilru tak takah chuan lo zir chhuak pawh ni ila hun hi a danglam ka ring a, tunlai angin phone duh duha inbiak theih a nih loh bawk avangin ka tan a rinawm reng theih ka ring lo. Amah ka rin loh vang lam ai mah chuan tunah hi chuan bul kan tan ve chauh a, inkalsan thei lo khawpin kan inkawp tlat lo a, kei hi chuan engtikahmah ka theihnghilh tawh dawn lo tih erawh ka inhrechiang em em thung.

 

“Ms, lehkha inthawn thin ang aw?” a tih chuan a kut chu ka hum vang vang a. An in ka len vawikhatna a ni a, an chhungkua chu ka lo rin ang ai daihin an fel a, min lo be tha ve viau a, hetiang tih hria ila a tir atang khan ka leng ngei ngei ang.

 

“Tha deuhin lehkha i zuk zir anga, kan inhmuh leh hun tur a hriat si loh a, ka ngai thei ngawt ang che” ka ti a.

 

“Chanchinte kan inhrilh ve zel anga, chawlh remchanah inhmuhna hun tha chu a awm ve zel dawn alawm” a tih chuan ka lo bu nghat a. “I awm dan hi a mak e” a rawn ti hlawl.

 

“Eng ber chu?”l

 

“Ka hre lo, tun hi kan inhmuh hnuhnun ber ni mai tur ang hian i awm tlatin ka hria. Ka sawi thiam lo, i hlim lo bawk si” a tih chuan ka inthiam lo ngei mai. Chutiang em ema ka lo tilang chu pawi ka ti.

 

“Ka ngai dawn em che a, chu vang mai mai alawm” ka tih chuan a ner sak a.

 

“Nih, lehkha chu min rawn thawn thin dawn em?” a tih chuan ka lo bu nghal vat a. Ka u te address ziahna tur a la a, min ziah tir thlap bawk.

 

Ka haw dawn chuan pawn thlengin min thlah a, thla mang lai a ni a, a thim deuh chhulh a, kan inkai dun ral a. “Tluang deuhin in kal dawn nia aw” ka ti a, min chhan loh avangin ka han en chiang a, a mittui a lo hru zauh. “Din, tikhan min thlah teh suh” ka ti a, chu chuan ka ti zuau zawk niawm takin a rawn insut ta hlap a.

 

“Ngaihzawng ka la nei ngai lo a, ka neih hmasak ber i nia, inthen mai mai ka duh dawn lo. Nang lah hi inthen tur ang main i awm a” a tih chuan ka khawngaih lutuk. Ka kuah a, kei hi ka tidik lo a ni.

 

“Engtikah mah then che ka duh lo ang. Rinawm takin ka lo awm dawn alawm. Nang i rinawm chhung chuan” ka ti ta a, a mittui karah a rawn nui ta sak a. Engtikah nge kan inhmuh leh ang tih kan hre lo a, a hmui no nalh takah chuan am takin ka fawp ta vawng vawng a.

 

Shillong ka awmna pawh thla thum a ni ve tawh a, hun chu kal muang ka ti em em a, ka khua har riau zel chu hrehawm ka ti ber. Naupanlai atanga hmun danga awm thang ka ni a, harsa ka ti ngai lo. Tun tum erawh chu Dinpuii a tel tawh tlat a, ka ngai thei lutuk hi tawrh a har ber. Ka u fate hi awm lo phei se chuan haw leh daih ka duh ang. Nikhat ka class bang in ka thlen chuan ka u in min lo nuih var var a, ka nuih let ve ringawt a, engmah phei chu a sawi lo. Thingpui min lo siamsak nghal a, keipawh indah fel lem lo chuan dawhkan kilin ka thu nghal a. Ka bula rawn thut ve pahin a kawr ipte atangin lehkha a rawn phawrh a.

 

“Hei hi i ta tur ni awm tak a ni” tih pahin a rawn lek va va a, ka va ban rang teh asin. A kutziak atangin Dinpuii a ni tih ka hre nghal mai a, ka thingpui in lai chu ka dah a, ka room lam ka pan zui nghal.

 

Khumah chuan ka han thu a, chu lehkha thawn chu ka hawn hma in ka hnim vang vang a, pentui rim tui ngata ziah a ni! A kawm ka tihchhia ang tih hlau zet hian ka hawng a, mipa e tiloin ka hnukte chu zuk ulh tlat a. Hmun hla tak atanga min ngaipawimawhtu leh min ngai ve em emtu lehkha han hmuh chu thil lawmawm tak a ni reng mai.

 

Ms,

 

Ka ngai lutuk che tih hian bul ka han tan phawt ange. Kan chhuk thla kha kan tluang vak lo a, kan train an delayed ngun avangin kan beisei aiin kawngah kan thang rei a, chumi tih loh ah chuan harsatna lutuk kan tawk lo e. Lehkha ka rawn thawn har che avangin min lo ngaidam rawh aw, hun thawl ka neih hmasak berah ka rawn thawn nghal che a nih hi.

 

Class kan tan tawh a, khalamah thiam ve viau in ka lo inhria a, hetah lehkha thiam rual zingah chuan ka te chem chem mai. Chuvangin anni aia a leta ka zir nasat a ngai tih ka hria a, ka theihtawp ka han chhuah ve anga, chanchin ka rawn la hrilh zel dawn che nia. Vai chaw ei hi har ka ti lutuk a, min lo tawngtaipui rawh aw. Ka thlen hlim khan ka ngai thei lutuk che a, zan  tin ka mumangah ka hmu che a, ka harhin i awm ngai si lo a, ka tap nasa thei ania aw. Nangpawhin min ngai ve a ni ang ka ti a, chu chuan ka inhnem hram hram thin. Thu tam tak sawi ka duh a, mahse, nidanga ka rawn thawn leh hunah che ni zawk rawh se. Ka address i rawn hriat theih nan hei hian bul ka rawn tan phawt a ni e.

 

Dam takin le.

 

Nangmah ngai em emtu,

Dinpuii

 

Vawi engzat nge ka chhiar chhuah ka hre lo, khumah chuan ka let tawp a, lehkha chu ka han bih leh thin a, ka lunglen chu zia huai awm tak, a nasa zawk emaw tih tur khawpin ka han awm a nih chu. Ka u fapa Hlutea’n min rawn tibuai hlauh zawk a, ka tho harh leh peih ta zawk.

 

Chutiang chuan hun a kal ve zel a, ka lehkha thawn thlak pawh kha a hmu ve tawh ngeiin ka ring a, ka lehkhathawn khan a ti hlim ve ngeiin ka ring tlat a ni. Keipawh theihtawpin lehkha ka zir a, lunglenga ka indawm kun chhungin midangin min thiam khalh tih ka hre bawk a, ka zirnaa insawrbing chu ka tum lui hram hram. A hma nena ngaihtuah chuan tunah chuan keipawhin ka paltlang thei ve sawt khawp chuan ka inhria.

 

Heng kum khat chhung hi chu thil danglam em em thleng a awm lem lo a, sawi kan deuh zung zung ila a tha mai awm e. Kum hnihna atang hian thil a danglam ve hret hret a, kum khat kan hman zawh taka thla tin deuh thaw lehkha inthawn thinte pawh kha Dinpuii min chhan letna ka hmuh ngai tak loh avangin keipawhin ka thawn khat tial tial a, kumhnih a ral chuan engmah a chhan sawi tur awm si loin kan inbe ngai ta lo. Ka ngai tawh lo ni loin chutia beisei tur ber hre siloa awm chu ka duh loh avangin ka nunphung intihbuai tir ka tum lo. Thil pakhat rin dan nghet bur ka nei a, ka tana khuanu ruat a nih chuan kum engzat pawh liamin ral se kan intawng leh ang tih hi a ni. Chu hun chu a thleng ta lo a nih chuan inkawp lo tur kan ni tihna a ni mai. Nakina kan inhmuh leh hunah ani chu doctor a rawn ni tawh dawn tih ka hriat avangin satliah taka lo hmachhawn chu ka tum bik hauh lo. Ka zirlaiah ka bei ngawrh a, chhuanawm tak nih chu ka tum ve hle ringawt.

 

ZAWLKHAWPUI LAMAH

 

Tunah chuan graduate val ka ni ve ta, rilru leh ngaihtuahna pawh a puitling ta viau mai. Hma hun suangtuah roh roh chang ka nei ve ta fo a, NEHU hnuaia top 10 ka nih vangin keimah leh keimah pawh hi ka inbeisei sang ve thin. Chutimaiin kawng awlsam erawh zawh tur a awm lo tih hre khawpin kan inzir sil ve tawh a, ka chhungte ngaihtuahna pawh a buai ve nak tih ka hria. A chhan chu ka pa a pension ve tawh dawn a, hmundanga lehkha zir leh tur chuan min chawm zo tawh kherin a inring lo tih ka hria, mahni hlawh bak la duh lo a nih avangin pension chhuahpui tur pawh a ngah lo tih ka hre ve reng. Ka bulah engmah a sawi lo nain an hnena awm ve tawh tur hian min duhin ka hria.

 

“Hetah inhlawhna awm angte hi ka dap ve tawh mai dawn emawni le?” ka tih chuan an ngaingam chiah si lo, reife ka inngaihtuah hnuah kum khat chu chawlh phawt a, a kum leha ka zirna tur inkhawla private schoola thawh chu ka tum nghet ta. Ka tum dan chu ka pa ka hrilh a, min khawngaih tih ka hre reng.

 

“Shillong ah tal chuan i awm leh hram ang chu” a ti leh tho.

 

Ka nu leh pa remti vak lo chung chu private school pakhatah ka thawk ta a, ka tan kawng a inhawng zel dawn tih hria ila chuan a tirah phat atangin ka nu leh pa pawh an lawmin ka ring. Kan principal Pu Hminga chu pa tha lutuk mai, lehkha thiam si a ni a, thla hnih vel ka thawh hnuah a office ah keimahin min kawm a, ka nih chakte min zawt a, MPS nih ka chak thu ka sawi chuan a beng a verh ve ngang a ni ang, chutatang chuan min titipui ta fo a. Ka career intanna tak tak chu ani hnen atang hian ka dawng dawn a lo ni reng. Lehkhabu tangkai tak tak min hawhtir a, question pawimawh tak tak min lakkhawmsakin competition atana pawimawh tak tak chu kar loah a lo la khawm thei zung zung a, tihngaihna ka hriat loh leh kawng ka hriat loh chu min dap pui ta zel mai a ni. Lehkha thiam ve thei tak ka lo ni bawk a, chu chuan a tiphur zual em em a, zan rei tak tak thleng an inah keipawh ka awm thin. Hetih hun lai hian an fanute pahnih phaiah an awm a, an nupa leh an awmpui chiah an ina an chen avangin laklawh thila riah chang pawh ka nei. Hetiang taka an tana hlawkna awm miah loa min buaipui hi mak ka ti thin a, ka chhungte hnenah pawh ka sawi fo nghe nghe.

 

Kum tawp lamah chuan thil nihphung leh kalphung pawh ka hre ve ta zul mai, exam awm hmasak berah keipawh ka exam ve thei ngei dawnin ka hria. Lehkhabu rawn tur a nei tha a, a neih loh tha tak tak pawh khawi atanga a hawh tih hriat loh hi min kawl tir nual bawk. Tawngkam thiam lo chi ka nih avangin han lawm vak dan lah ka thiam lo, chutichung chuan min hrethiam em em thin. Krismas a hnaih tawh avangin Pu Hminga fanute pahnih pawh an rawn haw dawn tih a nu hnen atangin ka hria a, an fate pawh an chhuanawm viauin ka ring. School chawlh anih tawh avangin in lamah ka inchhiar tluk tluk a, zir belh tur hi ni tin a awm a ni mai. Chutia ka lo inchhiar tui lai chuan ka nuin min rawn ko a, inleng ka neih thu min rawn hrilh nghal a, ka inha sawk sawk a, ka nu chu ka zui chhuak ve a. Kan sitting roomah chuan Pu Hminga te nupa chu an lo thu a, karkhat dawn kan inhmu tawh lo.

 

“Vawiinah Mamite unau an rawn thleng dawn a, chaw ei turin kan rawn sawm che a nih hi. Kan bazaar zo chiah a, phei rualpui mai turin kan sawm dawn nia kan ti a” Nu Masangi chuan a ti a.

 

“A va lawmawm dawn ve, ka lo inring lo em em mai lehnghal a, ka inbual chuan a rei deuh dawn sia ka han inphih fai ve lawk ange” ka ti a, bathroom lamah ka lut ta nghal a.

 

Ka chhuah leh chuan ka nu in lawmthute a lo sawi mawlh mawlh a, min ngaihsakzia a hre bawk a, a lawm ve tak zet tih ka hria.

 

“Fapa kan nei bawk si lo a, keini nupa hi chuan fapa ang tak tak hian kan en ania” Pu Hminga’n a lo ti chuar chuar a, room ah ka lut leh a, ka thawmhnaw chu ka thlak mawlh mawlh a. Rei min tih ka hlauh avangin ka sam pawh chu hairoil ka hnawih hman tawh lo.

 

Kan in atanga kan inzui chhuak chu nidang ang lo takin ka khawr deuh tut a, an ina riah chang pawh ka nei a, chutia ka han awm thut chu a ngaihna tak pawh ka hre lo.

 

“Tukin zingah Silcharah kan driver pawh anmahni hmuak turin a kal tawh a, kan rawn sawm tir dawn che em ni kan ti deuh a, mahse, amaha kal kha a hreh tak loh ah chuan tihbuai che kan hreh a” an ti a.

 

“Min tibuai reng reng lo, ka tihbuaizia ngaihtuah phei chuan” ka han ti ve a. An in kan thleng a, ei rawng bawl kan tan nghal chu a ni deuh mai. Ar ka talh a, thil dang hi chu ti ve thei dum mah ila ar talh hi ka thiam lutuk lo a, thiam lo anga lan erawh ka duh chuang lo. Pu Hminga chu nui vur vurin a rawn kal a, min rawn pui ta a, zahah pawh ka la duh ta lo. Dara 5 velah kawngpuiah thawm a rawn awm a, Pu Hmingate nupa an tlan chhuak nghal a, muangchangin ka zui ve. An fate an rawn thleng tawh a ni ngei ang, bungrua lak pui an ngaih ka rin vanga zui chhuak ve ka ni.

 

“Joseph, lokal rawh” Nu Masangi chuan min lo hui vat a, “Hei, Joseph-a kan rawn tih fo kha a nih hi” tiin a fate chu a han hrilh nghal a.

 

“A ni maw, i hming chu kan hre lutuk alawm. Mami ka nia, hei ka nau Nutei  a nih hi” tiin a upa zawk chuan min lo chibai a. A nau lam chu ka melh zawk a, mi pawh a lo en ve lo, an bungrua ringawt chu a buaipui a, ka va be duh ta bik lo.

 

‘In rawn thleng tluang chu a lawmawm hle mai, in bungrua hi chu keiman ka rawn buaipui amg lo va lut rawh u” ka ti a, lawmthu a sawi hnuah a nu te nen chuan an lut ta a.

 

“Ka bag hi chu keimah ngeiin lak luh ka duh tlat”

 

Ka va melh zawk a, min melh no fahran lo, ka nui lui suk a, Mami bungraw ho chu ka keng ta a.

(ngaihnawm i tih tur chi te a ni em? comment hi min tiphurtu leh fuihtu ber ania, insum hauh suh )