DAWN- 3

 

Dawn-3

(story of my life)

 

Pu Hminga fanu upa zawk Mami nen kan inkawmngeih ta phian a, amah hi nula zuanzang tak, inngaitlawm tak mai a ni a, a nau nen chuan an mizia a inpersan hle. Ka len luh chang pawhin Nutei nen chuan kan inbe ngai lo. Tin, hmuh pawh ka hmu ngai lo tluk a ni, room-ah a tawm deuh reng mai. Krismas lai a nih avangin keipawh kan veng lama ka thiante nen kan inzui tam a, veng dangah ka leng mang lo. Ka tui em em vang pawh ni loin zaikhawmnaah kan tel ve zel a, a chhungah erawh ka awm ngai lo. Thingpui lumnaah ka awm a, zan kan tum tawi thin. Ka rilru kilkhatah chuan Dinpuii a la awm reng a, an venga han kal mai duh chang pawh ka nei, mahse, ka hmu tak tak ang tih ka hlau leh thin si a, a ho ngawt mai. Ka ngaihtuah  chian hi chuan hetianga han awm tawp tur kan ni lo tih ka hria, mahse, tawn hriat ka la nei lo bawk nen tih dan turn gang ka hre lo te pawh a ni ange.

 

Hlim takin krismas leh kumthar kan hmang zo a, ni tin sikul lamah hun kan hmang chho leh ta. Mami kha a zirna chhunzawm turin a kal leh tawh a, Nutei erawh a kal a la hun lo a ni teh chek ang chu, sikul lamah a rawn lang ve zeuh zeuh. Min hria angin a awm ngai lo a, keipawhin ka enliam ve mai mai. Min be chak lotute tihlawm hi ka tihtur niin ka hre lem lova, ka tha en ve mai.

 

“Naktuk zan chu cinema kan en thut dawn mi niang?” kan thawhpui Tluanga chuan a ti a, an lo phur hlawm ngang mai, min rawn melh deuh thap avangin han hnial bik chu ni theiin ka hre lo a, ka lo bu ve nghut a. Ka hunawl neih ve anga lehkha zir ka duh thin vang hian zan lama han tei chhuah pawh hi ka ui ru viau, zan khat chauh a ni bawk a, eng em ka tih phah bik lo ang chu.

 

Cinema hall bulah thiante chuan min lo nghak thap a, nutling pahnih tih loh chu kan kim vek, ka rin loh deuhin Nutei pawh a rawn tel ve a, kekawr arh deuh  hlep hlawp a ha a, jean jacket a ha a, chapal pan zet a bun a, shawl pan deuh a bat leh tawp a, amah a nu lian bawk a, a langsar vuah mai. Min hmuh chuan a lo nui ve sak a, ka han nuih let ve a. Tluanga bulah a din deuh zel avangin an rawn inthurual a nih ka ring. An chhuah tawh dawn an rawn tih avangin keinipawh kan lut a, ka bulah Nutei chu a rawn thu a, Tluanga’n a rawn zawm bawk. A rimtui inkah chuan ka hnar a verh nghal zar, hetiang hi Dinpuii khan a hmang thin tlat a ni. Ani bawk maw? Ka theihnghilh ve mai dawn emaw ka tih lain amah hriatchhuahna tur hi a rawn awm leh zel a, engtikah mah ka theihnghilh dawn lo a niang. Theihnghilh pawh chu ka duh tak tak pawh a ni chuang lo. Kan film en chu a hming pawh ka hrelo, ka en ve tak na in engmah ka hre lo. Dinpuii nen kan inhun kal tawh kha ka lo ngaihtuah veng veng a, ka bula thuin, “ A tawp tep tawh tho a, min chhuahpui thei angem?” a tih riah chuan ka harh chhuak zawk.

 

“A, aw..” ka ti bah deuh nawk a. Tluanga chu engemaw a va hrilhru zauh a, kan chhuak ta a.

 

“I entui lai ka chhuahpui ringawt che sia, ka inthlahrung hle mai”kawngpuiah kan ding a.

 

“Ka entui hran lo, inthlahrung reng reng suh” ka lo ti vat a.

 

“Boruak kha ka zo lo leh tan a, ka buai tak tak hmain chhuah mai kha ka duh a, keimah chuan ka hreh deuh si anih kha” a tih chuan ka lo nuih a, a mitmeng bial lian nalh zet chuan min melh ran a, kan inhmuh hmasak bera min melh dan ai chuan a no ve ta deuh a.

 

“Muangchangin kan haw dawn em ni? Kan thiante chu naktukah kan hrilh tawh mai aniang chu” ka tih chuan min hnial lo. An veng lam panin kan inzui a, zan a la rei lutuk lo bawk a, kawngpuiah mi tawh tur an awm nual.

 

“Ka nu leh pa hian i chanchin hi an sawi peih thei lutuk a, an fak thei lutuk che a. Dik tak chuan kan inhmuh hma hauh atang khan i chanchin hi chu sawi chhawn leh tur hre khawpin min rawn hrilh tawh” tiin a nui ri hak a.

 

“Engmah sawi chhawn tlak chanchin ka nei hleinem” ka lo ti a.

 

“Ka hmuh hmasak ber che khan ka lo hmuh tum dan nen che a inang lo lutuk a, chuvangin ka hlat ve tawp che”

 

“I sawi awmzia ka van hre lo”

 

Min rawn melh chho deuh ha a, thla eng chuan a hmai no tak chu a chhun raih a, ka lo melh ve vanga zak tih hriat tak hian hnuai lam a bih leh vat a.

 

“Fel deuh hi chu an hmelchhe duh sia, hmelchhe deuh leh mipa tawi lampang turah ka lo ngai che a, mahse, ..’a ngawi ta daih a.

 

“Mahse.. tih chu a va laklawh ve aw” tiin ka nui a.

 

“Ka rilru zawng zawng ka lo phawrh vek tep alawm le, a ho lutuk, sawi tawh loving” a ti ta daih a.

 

Ngawi rengin kan inzui ta a, a thusawi chu ka hrethiamin ka inhria. Mahse, hriatthiam loh chu ka duh zawk. Dinpuii kha ka tan lo rinawm reng ta se, midang keiin ka lo nei a nih chuan ka inthiam thei ngai dawn lo a, tin, ani aia thlan ka nei lo hrim hrim bawk. Nutei hi a hmeltha a, a hleitling bawk. Hmel leh pumruaah hmeichhe zahawm tak, chhuanawm tak tur a ni a, a ngaihzawngte pawhin chhuang takin midang bula an sawi tur ang chi hi a ni. Chhungkaw awmthei leh zahkai an ni bawk nen mipa tam takin amah hnaih theih hi an duhthusam a ni ngei ang. Chutiang zingah chuan ka bang bik hauh lo, mahse, kei chu tuemaw tan ka indah hrang tlat a, a chanchin ka hriat ngai tawh loh Dinpuii kha ka lo nghak ve tawp ringawt.

 

“Mangtha aw” a ti sep a, an gate bulah kan lo ding reng tawh.

 

“Mangtha le” ka ti a, a inher a, gate chu muangchangin a hawng a, chutah min rawn melh leh a.

 

“Joseph, ka thusawi kha lo ngaihtuah zui ve mai mai la” zak tih hriat tak hian a ti sap a.

 

“Nute..”

 

“Aih, tunah chuan engmah sawi suh” tih pahin hmanhmawh tak hian step-ah a chho ta a. Inchhunga a luh thleng chuan ka en reng a, ka lu chu ka han tuai puat a.

 

Zan dang ang chu nise ka lehkhabu intlar thut chu ka chhiar leh anga, thingpui dawm pahin hriatreng tumin chungho chu ka zir leh ngut ngut ngei ang. Nutei vang a ni chek ang chu, engmah ka tih a  tui lo, ka inphih fai a, ka mu ta daih a. Ka muhil thei  chuang lo, ka inleh ka inleh hnuah ka thu chhuak leh ta nge nge. Ka thingrem mawnga ka lehkhathawnho chu ka phawrh chhuak ta vek a, Dinpuii lehkha min rawn thawnho chu a mal te tein ka chhiar tha leh ta a. Nunhluiah ka let leh ta vawng vawng mai.

 

Ms,

 

I lehkhathawn ka lo hmu a, ka lunglen a reh hawkin ka hria. Kan zirlai a tough deuh avangin lehkha rawn thawn zung zung che pawh a harsa deuh thin a, min lo hrethiam tawh thin a, min hrethiam zel a ni ang chu. Ka lehkha i hmuh loh fo pawhin ka rilru chu a danglam ngai dawn lo tih lo hre reng la, kan pahnih nakin hun tur atan theihtawp ka chhuah ve a ni tih hi lo ringhlel lo la, lo hre reng ang che.

 

Ka roommate nen hian buaina tenau deuh kan tawh avangin kar hmasa lamah khan i lehkha tur ka ziahsa vek tawh ka rawn thawn thei lo che a, tihian ka rawn ziak tha leh a nih hi. Tunah chuan single roomah ka awm ve tawh a, min lawmpui ve ngawtin ka ring. Tunah chuan duhtawkin lehkha pawh ka zir ve thei tawh a, ka zalen ta sawt tihna a nih chu. Mahse, thla thar atangin hospitalah kan duty dan an thlak dawn avangin hunawl kan nei tlem tawh dawn a, chhuahna hun pawh kan nei mang tawhin ka ring lo. Ka kal dawna ka thusawi kha a rin tlak tih chu nakinah i la hre mai ang.

 

Engpawhnise, hetah buai takin ka zirlai buaipui mah ila, engtiklai mah hian ka theihnghilh ngai lo che tih lo hre nawn fo ang che.

 

Rinawmin,

 

Dinpuii

 

“Dinpui, engtia rei nge nghah che la ngai dawn?”ka ti chhuak ta hawk a.

 

Nilengin ka awm a nuam lo, zan lam ka mu tlem bawk nen ka ni hman chu a hahthlak tak zet.

 

“I va nawm loh hmel ve”

 

Nutei chuan min lo melh kalh a, a class la zo rawn lut tur chuan kawngka atangin min rawn thlek reng a lo ni.

 

“Nizan ka muhil tha lo a, ka rit bur mai” tiin ka lo chhang ve mai a.

 

“Damlohna i nei chu a ni hran lo maw?” a ti leh a, min ngaihtuah hmel zeta chutianga min zawh chuan ka rilru hi a ti no ve deuhin ka hria. Tlangval mah ni ila pangchan chak chang nei ve tho kan ni a, tin, ka tawng khat bawk a, a hlimawm ve hrim hrim.

 

“Ka tha lutuk ania” tih pahin lehkhabu ka la a, class ka neih dawn avangin ka tho chhuak nghal a.

 

“Tlaiah chaw rawn ei la, ka nuin sawm tur chein min ti a”

 

“Ka ei ngun emai, a inthlahrunawm ve bawk alawm”

 

“Ka nu i tihthlawn loh ngei ka beisei” tih leh inher a rual a, ka chhan leh hmain a kal daih.

 

Banah chuan Nutei te inah ka chho leh ta nge nge, hnial duh viau mah ila ka chhanna pawh a ngaithla duh ta si lo a, Nu Masangi ngei ka han hmu mai aniang chu. An in hi kan school chhak mai a ni a, ka thleng chho deuh mai.

 

“Nutei’n a hrilh che maw, a hrilh ta lo mai ang che tih ka hlau a, hei Muani hi rawn tirh ka lo tum mek a” Nu Masangi chuan a lo ti a, min lo lawm der khawp mai.

 

“Ka ei ngun lutuk a inthlahrunawm ka tia, ka chhan leh hmain a kal ta daih sia, ka tihthlawn che ka hlau a ka rawn chho a nih hi” ka ti a.

 

“I thei dawn lo tihna em ni?” a ti a.

 

“Vawiin tlai chu ka ei lo mai ang, tih tur ruahman lawk ka lo nei si a” ka ti a.

 

“Aw, a nih chu. Amah Nutei’n alawm sawm tur chea min ti, a va a mai mai tak, i remchan leh chan loh zawh nachang pawh a hre lo che a. Nidangah remchang a awm veleh mai ang chu maw” a ti a.

 

“Ni e, remchang hmasa berah ka lo ei dawn nia” ka ti a, Nutei rawt niawm taka a sawi chu mak ka ti deuh. A nu hian ka laka a rilru put hi a hriatpui lo a ni ngei ang, hriatpui nise chutia a sawi chu ka ring lo.

 

“Ka va phei phawt ange” tih leh chhuah ka rual a.

 

“Minister tupa zawk kha a sawm emaw ka ti a”an awmpui Muani’n a tih ri chu ka la hre phak.

 

Ka nui sak a, minister tupa sawm tur nei renga kei min sawm chu a ti ho hle mai, hmanruaah min hman mai mai a tum zawk pawh a ni maithei, ka lo buaina tur a ni tawh lo. Inah haw lovin Dinpuii te veng lamah ka pa scooter ka kensak chuan ka inkhalh chhuak a. Ka rilruah a awmna a rei tawh bawk a, engmah ka ngaihtuah tha thei tawh lo. An dawr zawnah chuan ka ding deuh dat a, a inkharin ka hria. Ka tlan thla zel a, an in pengah chuan ka han ding leh phawt a, an inah ka lut tawp ang nge tih chu ka hrethiam chiah lo. Engpawhnise, a chanchin hriat theih ang ang hriat chu ka tihtur niin ka hre tho tho.

 

An kawtah ka scooter ka hung a, naupangin an lo nam thluk ka hlauh avangin an lungrem hrulah ka dah a, zam angreng takin an in lam chu ka pan ta a. Pawnah naupang an lo zi nak nak a, an jeep pawh a ding ran mai, ka huphurh thar leh ta riau. Kawngka ka kik a, thawm a reh deuh avangin ka han kik nawn leh a, rei vak lo hnuah a ri rak a, a rawn inhawng a.

 

“Ms..”

 

“Dinpui”

 

Kan inmelh ta tlawk tlawk a, ka mumang chu a ni em lo ang chu maw!

 

“Lo lut la” atih chuan ka phu zawk a, ka lut nghal a.

 

“Enge a awmzia” ka ti hu a.

 

“Nia, enge i awmzia tih hi tun thlengin ka inzawt thin asin” a ti a, a mittui chu a parawl kiang mai.

 

An verandah thlang lamah chuan kan inzui chhuak a.

 

“Ka lo haw  tih chu i hre lo ang tiraw?” a ti a.

 

“Hre lo, i chhungte bulah i chanchin zawt tura rawn kal ka nia”ka tih chuan min melh vang vang a.

 

“Tinge ka lehkha thawn che kha min chhan let ngai tawh loh?”

 

“Nangmah zawkin alawm min chhang let lo”

 

“A ni lo, vawi 4 ka thawn thlawn hnu che kha chuan min be duh tawh loh anih ringin ka rawn thawn duh tawh lo che a lawm. I lehkha tur chu ka ziak tam lutuk, ka thawn ngam tawh lo che a” a ti a.

 

“Engmah thiamthu sawi dan tur ka hre lo, mahse, chung lehkha chu ka hmu miah lo. Ka lo beidawnsan hma lutuk che a, keimah thiam loh a ni. Min ngaidam hram rawh aw” ka ti a.

 

“I chanchin hriat theih dan tur hi chu ka dap kim viau in ka hria. Aizawlah i awm tawh tihte ka lo hria a, kan inah kalin ka chanchin i ngaihven hun turte ka suangtuah thin, kum khat chhung tawp  chu min kalsan ta nia hriain rilru mangin ka awm a. Beisei ngam si lo beidawnsan thei si lo chein tun hun hi ka thleng asin”

 

“Sawi tawh suh, engmah sawi a ngai tawh lo” tih pahin ka kuah a. “Ka thiam loh vek a ni, ring ngam tur che ka nih lain ho teah ka lo beidawng a, a thleng tawh loving” ka tih chuan nghet zet hian ka kawngah min kuah a.

 

“Ka hmangaih che” a ti thawp sat a. Chu chuan min nghawr deuh dawt, ka chhang lo. A biangah chuan ka dawm a, ka fawp ta a.

 

Khawvel chu a thar leh ta riau hian ka hria, Dinpuii nen kan khawvel chu din tharin a awm leh ta a, kan damchhungin heng hlimna leh lawman hian min zui angem tih chu hunin a la hril ang chu.

 

Thla khat chhung chawlh neia lo haw a ni a, rei lo dawn hlein ka hria. Tunah kar khat dawn a lo cham tawh lehnghal a, engpawhnise kan hun neih ang ang hi hlim tak leh nuamti taka hman hi a tha. Zan tin khel loin an inah ka lut a, exam hmachhawn tur ka ni tih inhre lo khawpin Dinpuii zun chuan min phuar vel ta a nih chu. Engmah ka hrilh lem lo bawk a, hrilh ila chuan len phal loh zan a neih ka hlau a, chuvanga ka exam tur chungchang pawh sawi lo ka ni.

 

Nikhat chu bazaar lamah kan inzui chhuak ve a, a kal a hun leh tep tawh avangin mamawh kan lei pah a ni. Dawr pakhata kan luhnaah rin loh deuhin Nutei a lo awm ve a, chuta inhmuh chu kan ring lo dun lutukte pawh a ni ang, biak pawh kan inbe lo.

 

“Minister Pu Lianzama tupa bialnu kha a nih kha, awi, a hmeltha tawp” dawr atanga kan chhuah hnuah Dinpuii chuan a ti a, Nutei a sawina tih ka hre mai.

 

“Tu chu maw?” tiin ka zawt ta tho a.

 

“Dawra lo awm ve kha, Delhi ah a awm thin alawm. Kan thiante hian an sawi nasa thei lutuk a, a thlalak pawh ka hmu thin. A takah khan a hmeltha zual” a ti leh a, a sawi danah chuan fak derna pakhatmah a awm lo tih hriat zetin dawr lam chu a melh leh vang vang a.

 

“I hmeltha daih zawk” ka lo tih chuan min rawn nghawk a, a nui a.

 

“Min tehkhin lo mai teh, i tizahthlak e a” a ti duh lek chauh. Anihna takah chuan Dinpuii hian san lamah a tluk lo deuh tih mai a, Nutei aia a hmelthat lohna ka hre ve lo.

 

“Ka thawhna principal fanu a nih kha” ka ti a.

 

“A ni maw? Ni tin i hmu thei bik dawn a ni maw?” a la ti deuh deuh a.

 

Ka lo nui ringawt, mahni hmeichhiatpui chuti em ema hmeltha a ti thei chu ka fak zawk, hmeichhe tam tak nise an tluk miah loh pawh fak an harsat dawn nen, Dinpuii zawng a danglam ve a ni.

 

Mihringte hi kan inngaih lutuk vangte, kan inhmangaih vang maia awm tlang thei kan ni thin si lo a, Dinpuii pawh a zirna chhunzawm turin a liam leh ta vung vung mai. Kan inzui rei loh ngaihtuahin kan inzui nasa a, an inah ka tam bawk a, chutia a awm lo chu ka ngai ngang mai. Lunglen ka tuar thei hlein ka inhre ve tawh kha a nia, bul tan that leh a ngai dawn a ni hawt e.