DAWN-4

 

Dawn -4

(story of my life)

 

Exam tur atana inbuatsaih ka duh thawh deuh avangin sikul lam pawh ka chawlhsan a, Pu Hminga remtihnaa chawl ka ni. Lunglen hre hman miah loin ka inzir ve bawk a, thinlung kilkhatah Dinpuii hre reng mah ila chuti em ema hrehawm tihna ka nei lo. Tlai khat chu ka inzir ning ve deuhin kawmthlanga ka nu huan ka chek let chiam a, hna ka thawk ngai lo bawka rin aiin ka hah. Bathlar thlanglam atangin ka nu in min rawn ko a, inleng ka neih thu min rawn hrilh a. Ka hnathawh a laklawh vang leh ka zawh tep tawh avangin min nghak turin ka tita ringawt. Bal angreng takin thlan luang chungin inchhungah chuan ka han lut a, Nutei chuan min lo melh kal mai.

 

“Ehe, nang i ni maw?” ka ti hlut a. Nidang ang bawkin a inchei thiam leh ngang mai. A zahawm thlarh reuh bawk a, a vun a nalhin a mam han mai a, a mitmeng mawlh hi a mawi a ni.

 

“Bazar ah ka kal a, ka rawn kawi mai mai” a ti a.

 

“I fel hle mai, thingpui ka han lumsak ang che u” ka nuin a ti a, choka lam a pan nghal a.

 

“I dam tha reng reng maw?” ka ti a.

 

“Taksa lam chu dam tha a ni mai. Joseph, hmanni ami kha i bialnu em ni?”

 

Thu lah hi engmah a khuh ve ngai mang si lo.

 

“Um..” tih pahin ka nui deuh suk a.

 

“Sawi tur a nih leh nih loh chu ka hre lo a, mahse fimkhur rawh” a ti a.

 

“Engti zawngin maw?”

 

“Chhui ve tawh la a ni mai” ati a, chu bak chu ka zawt chhuak thei hauh lo.

 

“Sawi leh duh si loa min hrilh tho kha a chhan ka hre lo” ka ti a, ka lawm vak lo tih ka tilang bawk.

 

“Ka buaina tur a awm lo chunga ka lo buai hi ka inthiam miah lo, mahse, hre reng chunga ka ngawih mai mai chuan ka khawngaih che alawm” ati a, ka va melh chuan ngaihtuah ngun tih hriat deuh hian a thusawiah chuan a thu tak.

 

“Ani kha chuan maw a hmuh che chuan hmeltha a tihzia che leh fakna hlir asin ka bulah a sawi” ka ti kher. Engvanga tih let chak em em nge ka nih chu ka hre chiah lo.

 

“Mi a ni hek lo” tih pahin ngeiawm rawng kai lek lek hian a nui a, ka chhang duh tawh lo. Ka nu chu thingpui chawi chungin a rawn phei a.

 

“Tikhan lo in rawh u, ka inbual dawn” tih pahin ka tho a.

 

“Hei ka siam kep vek che, a buaithlak in phawt rawh” ka nu in a tih tlat avangin ngawi rengin ka thu leh ta.

 

Ka nu nen chuan eng engemaw sawiin an titi a, kei erawh chuan ka rilru ka lo kawm mawlh mawlh thung. Ka duh loh deuhin Dinpuii chu nung khawlo turten ka han dah chhin vel a, chutiang ni thei tur chuan ka dah chuang lo. Nutei chu ka be tui lo zawk vek, a hmaa ka lo ngainat ve deuh thinte a reh nghal vekin ka hria. Ngawi rengin thingpui ka in zo a, inbual turin ka kalsan ta daih a.

 

Exam kan zo a, ka inbuatsaih nasa bawk a, ka titha ve viau chuan ka hria. Kan exam hma chiaha Dinpuii lehkha ka thawn pawh a chhanna ka hmu tawh a, Nutei thusawi lam kha chu ka hrechang tawh lo hrim hrim. Ka nu bula engkim sawi thin ka ni bawk a, Dinpuii lehkha ka hmuh thute chu ka han hrilh ve a, “Mate, mihringah hian i lo innghat lutuk ange” a tih chuan ka ngaihtuahna a ti kal thui ve viau. Mahse, tunah rih hi chuan engmah intihbuaitir hi ka tum lo a, ka duh lo bawk.

 

Ni tin sikul lamah ka liam leh tawh a, Nutei nen chuan inhmu fo mah ila kan inbe ngai lem lo. Min be lo a, biak ka tum hran lem lo. Ka mamawh hunah erawh ka be tho a, ani pawhin tha takin min chhang ve mai zel. Tlai khat ka haw tur chu ka scooter a nun theih loh avangin sikul thlangah ka buai rei hle a, ka thawhpuite an haw vek tawh avangin keimahin ka han en kual vel a. Ka siam thei mai dawna ka hriat loh avangin haw mai ka tum a. Chutih lai tak chuan kawng chhak atangin Nutei a rawn chhuak a, min rawn hmuh chu a inring vak bik lo aniang, a rawn meng phawk angreng viau.

 

“I scooter a chhia em ni?” a rawn ti ve nghal zat a.

 

“Nia mawle, ka siam mai theih chi a ni lo aniang, tah hian ka riah mai ang” ka ti a.

 

“School compound-ah nawr lut la, heta dah tawpte chu a” a ti a.

 

Chutianga han roh viau tura scooter thar chu a ni tawh lo a, mahse, kawng laia awm tawp tur chuan a ngaihtuah awm ve tho chuan ka hria.

 

“Hmanni ka thusawi vang khan min ngei tih ka hria”

 

Scooty kan nawr luh hnu chuan Nutei chuan min chhuahchhal tan.

 

“Ngei nachhan tur che ka nei hleinem” ka lo ti tha ve mai a.

 

“Thudik zawng chhuak la ka duh vang chauh a nia” a ti leh a, ka ngawi reng. “Mahse, in inkar tihchhiat tum anga min ngaih ka hlauh vangin ka ngawihsan ta che a nih kha, engmah ka sawi lo angah khawngaihin lo ngai rawh” a ti a.

 

“A ho lutuk, engmah ka hre tawh hleinem” ka tih chuan a ner deuh sak. Chumi rual chiah chuan kan dinna bulah car a rawn ding a.

 

“Bazar lamah kan kal dawn asin, i rawn chuang ve duh em?” a ti a.

 

“Aih, duh lo e, lo va kal rawh u” ka ti a.

 

Car  chhung atangin mipa lian angreng tak hi a rawn chhuak a, minister tupa an tih chu a nih ngei ka ring. Nutei luh nan kawngkhar chu a rawn hawn sak thlap a, Nutei pawhin lawmthu a lo hrilh thlap.

 

“A nih aw, naktukah kan inhmu leh dawn nia” a ti a, ka lo bu nghat.

 

An tlan liamna lamah chuan ka phei ve ta a, ka sawi thiam chiah lo, Nutei chu ka rilruah a rawn awm  deuh ngut ngut. A thusawi vangah chuan ka han puh lui deuh a, mahse, mipa dang nen ka hmuh khan ka in ring hman lo, ka mood a dik lo ve ringawt. A hma pawhin a ngaihzawngpa chanchin chu ka hre tawh a, mahse, khatia ka hmuh dun khan engemaw ti tak hian ka awm, ka thik chu ka ti duh chuang lo.

 

In ka thlen hnuah Dinpuii lehkha tur chu ka ziak ta mawlh mawlh a, ani aia midangin ka rilru an luah kha ka duh lova, amah chauh ngaihtuah ka duh vang a ni. Ka ziah zawhah ka nu hnathawhpui tumin kawmthlang huan lam ka pan nghal a, ka nu hi awm awl tithei lo chi a ni a, kan eikhawp thlai hi chu kum tluan hian a thar ve reng reng thin. Ka pa hian a hau ve fo a, a sawt lem chuang lo. Chuvangin a hah lutuk tur hi ka veng ru ve thin a, ka hman phawt chuan a hna hahthlak zual ka thawhpui thin.

 

“Nu, i rilru dik tak min hrilh la maw, Dinpuii nge Nutei i ngainat?” ka ti a.

 

“I va a mai mai tak” tiin a nui a.

 

“Mahse, Dinpuii chu vawikhat chiah i la hmu sia, chutia ngainatna hman pawh i nei leh lo si ang” ka han ti leh hnuhnawh a, kan inah vawikhat chiah ka la hruai tih ka hriatchhuah vang a ni.

 

“Dinpuii hi misual a niin ka ring hauh lo a, chutiang bawkin Nutei pawh, an nungchang a mawi dun a, mahse, Nutei hi a to deuh zawk chuan ka ring” a ti a.

 

“Chu, Nutei i thlang deuh tihna em ni?”

 

“Chutiangte min zawh min zawh a, mi pawite kan sawi reu reu ang” a ti ta, keipawh ka ngawi tar eng. Engvanga chutia zawt ta chiam nge ka nih pawh ka hre chuang lo.

 

Hun a liam ve zel a, ni khat chu classroom-a naupangho zirlai ka zirtir mawlh mawlh lai chuan Nutei’n min rawn ko a, a hmanhmawh hmel riaua ka hriat avangin ka chhuak vat a.

 

“I la hre lo mi? Written ah i tling ania” tiin min lo nuih sang a.

 

“Tak tak em ni?” tiin chiang zet hian ka han en a.

 

“Ka pa in hrilh tur chein min tia, ka rawn tlan nghal alawm” atih chuan ka taksa chu a khur deuh dar dar; ka lawm lutuk vangin.

 

Interview hmachhawn tur ka la nei a, a huphurhawm tih chu ka hre tho na a, written zawk hi ka huphurh avangin interview lam chu ka ngaihtuah hah duh lo. Ka thawhpuite chuan min lawmpui ve liam liam hlawm a, sikul banah Nutei te inah ka tlang chho a, Pu Hminga chu sitting roomah a lo thu a, min hmuh chuan a lo hlim hle. A taksa a chak loh avangin tunhnai chho hian sikulah a rawn thu thla peih meuh lo a, chuvanga an ina han pan pawh ka ni.

 

“Joseph, ka lawmpui tak zet che a ni. Interview lamah chuan ka ngaihtuah hauh lo che, he hna hi i hmu ah keichuan ka ngai nghet nghal hmiah” a lo ti a.

 

“A lawmawm emai, ka arpui hi kan talh dawn em niang?” Nu Masangi chuan a lo ti a, Nutei a rwan lut ve chiah.

 

“Ka tan in inhuamnaah ka lawm lutuk, mahse, interview te han paltlang zet ila” ka ti a, ka inthlahrung a ni.

 

“Chaw chu ei hrim hrim la” Nutei chuan a ti a, ka hnial duh ta lo.

 

Hlim takin zanriah kan kilho a, ka hriat loh lain Nutei chu ka lo melh leh vung vung thin, kan mit leh mit a intawng leh thin a, ka hawisawn rang thei hle. Dinpuii tana rinawm lohna chikhatah ka ngai a, ka duh lo hle.

 

“Engtin nge awm zel i tum?”

 

A nu leh pa te sitting room ah an awm a, a thleng silna bulah ka lo awm ve a, ka rilrua awm reng chu ka zawt tawp.

 

“Thla thar hian ka kal a hun leh tawh dawn a, ka peih lo khawp mai” a ti a.

 

“I va ngaihawm dawn ve”

 

“Pakhat an gem chuan min ngai dawn chuang hleinem”

 

“I ho e a”

 

“Nia, i tan chuan a ho alawm”

 

Ka va melh a, titau tih hriat deuh hian min lo melh a, a tum deuh bar.

 

“Minister tupa lam an lungleng viau thung ang chu” ka lo ti a.

 

“Thian ang bakin ka en hleinem” a ti a, a sawi zawi lutuk a, ka hre lo der.

 

“I zirchhuah hunah pawh hna tha deuh thawhna chance a awm anga” ka lo ti kher a.

 

“Hna ka nei dawn anih chuan nangmah ang hian mahni thiamna ngeia thawh ka duh dawn a” a ti salh.

 

“Ka la neih loh hi”

 

“I va tawngthei tak”

 

Ka lo nui ringawt.

 

Ka haw dawnah min thlah a, kal thlak a huphurh thu a sawi siam siam a, a tira a mizia ka ngai theih loh nen mi thar hlak ang chiaha a awm thei hi mak ka la ti reng.

 

“Officer i nih hnuah pawh min theihnghilh bik lo ang chu tiraw?” a ti a.

 

“Nute, ka lo tling ve hlauh a nih chuan in chhungkua hi chu engtikah mah ka theihnghilh tawh lovang che u, ka tana i pa hlutzia te hi ka sawichhuak thiam lo” ka ti a.

 

“Ka pa hian hetiang em em hian mi tumah a tanpui nasat hi ka la hre ngai lo, fapa ang hian a lo en ve tak tak che aniang” a ti ve a, ka pawm khawp mai.

 

“In chhungkaw tan hi chuan tih theih ka nei ve a nih phawt chuan ka tlanchhe ngai lovang” ka ti a.

 

Kawngpui kan thleng thla dawn a, thla chu a eng angreng viau mai. Ka inrin hman hmain Nutei kut chu ka han vuan a, chaw kan ei lai atang tawh khan vawn ka chak tawh a, ka insum thei ta lo a ni.

 

“Han chho tawh rawh, ka lo en ang che” ka ti a, a kut chu ka la vuan reng tho.

 

“Haw tlang nghal la aw” a ti sep a.

 

“Aw le, nangpawh inleng nei rei lutuk lo la” ka ti a, a tum leh hmak tawh.

 

Kawngah mi an rawn kal tak zeuh zeuh avangin a kut ka vawn pawh ka thlah a, kal tura ka tih leh chuan muangchangin a inher a, pen khat vel a pen hman a, a rawn inher a. Ka bulah a rawn kal leh a, ka inrin hma in ka hmuiah a rawn fawp ta zauh a, rang fe hian a tlan chho nghal. Ka en zui vang vang a, ka hmui ka khawih leh a, ka ding khawng reng ringawt. Ka rilru a hlim leh Dinpuii tana rinawm lo nia ka inhrait vagna hrehawm ka tihna chu a inbuk tawk vel ang.

 

In ka thlen hnuah zanina ka thil tawn chu ka ngaihtuah let a, dik ka ti thei lo. Nutei tana beiseiawma ka awm vang khan ka thiam loh a ni a, a rilru ka tihnat thui hmaa ka insiamthat ngei ngei a ngai. Dinpuii thlalak ka khum bula intar chu ka en a, thupha ka chawi ta mawlh mawlh a.

(Ads click kha kan lo theihnghilh tawh takin, sawi thar leh thin ila a tha ang )